1, 2. (a) Yishima yika Yesu alwezele masepa jenyi? (b) Yika twatamba kunyingika hakutwala ku chishima cha mapanga ni pembe?

YESU te kanahanjika ni masepa jenyi Petulu, Andeleu, Tiangu ni Yoano hakutwala ku chimwe chuma chilemu chinji! Muze te haalweza chishima cha ndungo wamwenemwene, wa kukanyama, cha kumi lia virgem, ni cha mbongo, Yesu yalweza masepa jenyi nawa chishima chikwo. Yaalweza hakutwala ku shimbu lize te “Mwana mutu” makapatwila “mavungu eswe.” Iye yamba ngwenyi, “Mwana mutu” makahandununa atu ha yizavu yaali, chizavu chikwo makachisanyika ngwo cha mapanga, chikwo ngwo cha pembe. Mba yahanjika nawa hakutwala ku chimwe chizavu cha muchitatu chilemu, e “mandumbu” a Mwanangana.​—Tanga Mateu 25:31-46.

² Chizechene ngwe apostolo, tuvumbi twa Yehova ha mantangwa wano, kanazange kunyingika kanawa chishima chacho, mumu chinakwata ha mwono wa atu. Yesu kambile ngwenyi amwe kumakatambula mwono wa mutolo alioze akwo kumakaanongesa. Kashika, chili chilemu kunyingika kanawa  chishima chino hanga tumone chize twatamba kulinga mba tukapwe ni mwono wa mutolo. Ha longeso lino mutukumbulula yihula ngwe yino: Kuchi Yehova atukwasa hanga tunyingike kanawa chishima chino? Kuchi tunanyingika ngwetu chishima chino chinashindakenya ha mulimo wa kwambujola sango lipema? Iya watamba kwambujola sango lipema? Mumu liaka chili chilemu musono atu kushishika kuli “Mwanangana” ni kuli “mandumbu” jenyi?

3, 4. (a) Yika twatamba kunyingika hanga tuwane ulumbunwiso wa chishima chino? (b) Ha 1881, kuchi Kaposhi wa Kutalila alumbunwine chishima chino?

³ Hanga tunyingike kanawa ulumbunwiso wa chishima cha mapanga ni pembe, twatamba chitangu kunyigika kanawa yikuma yitatu yilemu: (1) Iya“Mwana mutu,” hanji “Mwanangana,” mapanga ni pembe aya? nawa “mandumbu” ja Mwanangana” aya? (2) Ha shimbu lika“Mwana mutu” makahandununa hanji kupatwila mapanga ni pembe? (3) Mumu liakaamwe anaavuluka ngwo mapanga akwo ngwo pembe?

⁴ Ha mwaka wa 1881, Kaposhi wa Kutalila alumbununa ngwo: “Mwana mutu” hanji “Mwanangana” kali Yesu. Nawa yalumbununa ngwo, mandumbu ja Mwanangana hi waze wika ko makayula ni Yesu mu malilu, alioze atu eswe waze makatwama hashi muze mukapwa hangunu. Kaposhi wa Kutalila yasolola ngwo kuhandununa atu muchikapwa ha shimbu lia Kanunu ka Miaka ya Kuyula cha Kristu, nawa ngwo waze akwimbulula zango lia Zambi ha yuma yeswe e makavuluka ngwo mapanga.

5. Ha mwaka 1923, kuchi atu ja Zambi te akunyingika ulumbunwiso wa chino chishima?

⁵ Kulutwe lia matangwa, Yehoha yakwasa atu jenyi kunyingika kanawa chishima chacho. Kaposhi wa 15 Outumbro, wa 1923, kambile ngwo “Mwana mutu” kali Yesu. Alioze, yazachisa versu ja Mbimbiliya hanga alumbunune ngwo “mandumbu” waze anambe mu chishima kali wika waze makayula ni Yesu, nawa ngwo ayo eswe makapwa mu malilu ha shimbu lia Kanunu ka Miaka. Nawa yamba ngwo, mapanga kali waze makatwama hano hashi mushi lia chiyulo cha Yesu ni mandumbu jenyi. Nawa chishima chacho chinasolola ngwo waze makakwasa mandumbu ja Mwanangana, ha mulimo wa kuhandununa, ni kupatwila, katamba te kuulinga shimbu mandumbu wano akuwayisa a Kristu achili hano hashi, nawa muze Kanunu ka Miaka ya Kuyula kanda achiputuka. Kaposhi yamba nawa ngwo mapanga mahasa kupwa waze akufuliela kuli Yesu ni kufuliela ngwo Wanangana muukaneha mwono upema.

6. Ha mwaka wa 1995, kuchi ulumbunwiso wa chishima unakalumuka?

⁶ Ha miaka yinji te twakunyonga ngwo atu kakwapatwila muze mutwaambulwila sango lipema ha mashimbu wano akusula. Nyi ayo atayiza sango lipema, mapwa mapanga, nyi alituna sango lipema kali pembe. Alioze ha mwaka 1995 ulumbunwiso wa chishima yiwalumuka. Kaposhi wa Kutalila yatesa Mateu 24:29-31 (tanga) ni Mateu 25:31, 32 (tanga), nawa yalumbununa ngwo Yesu makapatwila atu ha shimbu lia luyinda munene muze mwe Mwana mutu “meza mu uhenya wenyi.” *​—Tala nota.

7. Yika chishima chinalumbununka?

 ⁷ Haliapwila, tunanyingika kanawa chishima cha mapanga ni pembe. Tunanyingika ngwetu “Mwana Mutu,” hanji “Mwanangana,” kali Yesu. “mandumbu” a Mwanangana kali waze akuwayisa ni spiritu sandu waze nawa makayula mu malilu ni Yesu. (A-Roma 8:16, 17) “Mapanga” ni “pembe” kali atu a ku mavungu eswe. Kumakaapatwila ha shimbu lia luyinda munene yoze kwasala hakehe aputuke. Nawa tunanyingika ngwetu Yesu makapatwila atu nikulita ni ukwaso uze ayo akuhana kuli mandumbu jenyi akuwayisa waze achili hano hashi. Tunawahilila chinji ha kunyingika ngwo Yehova ha miaka yinji kakutukwasa hanga tunyingike kanawa chishima chino ni yishima yikwo yili mu Mateu kapitulu 24 ni 25!

8, 9. Mumu liaka Yesu avulukile mapanga ngwo akwa “ululi”?

⁸ Yesu ha kuhanjika ha chishima cha mapanga ni pembe kakambile liji “kwambujola” hanji “mulimo wa kwambujola.” Mba kuchi tunanyingika ngwetu chishima chacho chinatulongesa ngwo mulimo wa kwambujola uli ulemu?

⁹ Nyi tunazange kunyingika kumbululo, chitangu twatamba kwiwuluka ngwo Yesu te kanalongesa chimwe chuma kupalikila mu chishima. Iye te keshi ni kwamba hakutwala ku mapanga amwenemwene ni pembe ka. Kashika, kakapwile ni kwamba ngwo mutu ni mutu yoze maakapatwila ngwe panga te katamba kuhana mazalo ni kulia kuli mandumbu jenyi akuwayisa hanji kwameneka muze anayinji ni muze ali mu zuwo lia ususu, ka. Yesu kavulukile ngwo mapanga kali akwa “ululi” mumu ayo kakutambula kanawa mandunbu jenyi akuwayisa, nawa kakushishika kuli ayo ha mashimbu wano akalu akusula.​—Mateu 10:40-42; 25:40, 46; 2 Timoteu 3:1-5.

10. Kuchi mapanga mahasa kukwasa mamdunbu ja Kristu?

¹⁰ Muze Yesu atele chishima cha mapanga ni pembe, iye te kanahanjika hakutwala ku yize te muyilingiwa ku matangwa akusula. (Mateu 24:3) Chakutalilaho, iye yamba ngwo: “Sango lino lipema lia Wanangana kumakaliambujola mu yifuchi yeswe ya hashi.” (Mateu 24:14) Nawa muze te kanda achita chishima cha mapanga ni pembe, iye yata chishima cha mbongo. Yesu yata chishima chino hanga alongese tumbaji twenyi akuwayisa ngwenyi ayo kali ni mulimo unene wa kwambujola sango lipema. Alioze, ayo te kali akehe, mulimo te unji. Tumbaji akuwayisa te kakwalweka ambujole sango lipema ku “yifuchi yeswe ya hashi” shimbu songo kanda lichiza. Ngwe chize twalilongesa ha chishima cha mapanga ni pembe, mapanga kakukwasa mandumbu ja Yesu. Chino che chuma te chilemu atamba kulinga, kukwasa mandumbu ja Yesu kwambujola sango lipema. Shina twatamba kuhana wika mulamba hanji kukolweza akwetu hanga ambujole sango lipema nyi?

11. Chihula chika amwe mahasa kuhula, nawa mumu liaka?

¹¹ Musono, kuli unji wa 8,000 000 wa tumbaji twa Yesu, nawa anji a kuli ayo hi akuwayisa ko. Yesu kakahele mbongo kuli ayo. Iye kajihanyine wika kuli mandumbu jenyi akuwayisa. (Mateu 25:14-18) Alioze, amwe mahasa kuhula ngwo, ‘Nyi Yesu kakahele mbongo, shina ayo chamwenemwne katamba  kwambujola?’ Mba. Tutalenu mumu liaka.

12. Yika twalilongesa ha maliji a Yesu waze ali mu mukanda wa Mateu 28:19, 20?

¹² Yesu katumine tumbaji jenyi eswe hanga ambujole. Muze Yesu amuhindwishile, iye yalweza tumbaji twenyi hanga “atayise tumbaji” ni kwaalongesa “kufunga yuma yeswe” yize iye atumine. Kashika, tumbaji jacho noo te katamba kwononoka shimbi ya Yesu ya kwambujola sango lipema. (Tanga Mateu 28:19, 20.) Yino yinasolola ngwo yetu eswe nyi tunashimbwila kutwama hashi hanji mwilu, twatamba kwambujola sango lipema.​—Yilinga 10:42.

13. Yika twalilongesa ha usolwelo uze Yoano amwene?

¹³ Mu mukanda wa Usolwelo twakulilongesa ngwo mulimo wa kwambojola makaulinga kuli waze akuwayisa ni atu akwo. Yesu kalwekele postolo Yoano ha umwe usolwelo wa “ndungi” yoze unasanyika atu hanga eze anwe meya a mwono. Ndungi kali 144,000 akuwayisa, waze makayula ni Yesu mu malilu. (Usolwelo 14: 1,  3; 22:17) Meya kanalumbunuka chitapo chize Yesu ahanyine hanga chikwase atu akapwe ni mwono uze kuushi shili chipwe kufwa. (Mateu 20:28; Yoa. 3:16; 1  Yoano 4: 9, 10) Mandunbu akuwayisa, ni zango lieswe kakulongesa atu hakutwala ku chitapo ni chize ayo mahasa kuyuka. (1 A-Korindu 1: 23) Alioze, usolwelo au unahanjika hakutwala ku chizavu chikwo cha waze hi akuwayisa ko, alioze kali ni kutalatala cha kutwama hano hashi. Ayo no kaanatumu hanga asanyike atu ni kwalweza ngwo, ‘tweyenu’ nawa ayo kakwononokena shimbi ha kulongesa akwo sango jipema. Kashika, usolwelo uno unasolola ngwo eswe waze akutayiza sango lipema katamba kwambujola sango lipema kuli akwo.

14. Kuchi mutuhasa kwononokena “shimbi ya Kristu”?

 ¹⁴ Waze eswe akwononokena shimbi ya Kristu katamba kwambujola sango lipema. (A-Ngalishia 6:2) Yehova kakuzanga ngwo waze eswe akumuwayila ononokene shimbi yimuwika. Ku shakulu, iye te kakuzanga ngwo A-Izalele eswe ni yilambala waze te atwama no ononokene shimbi jenyi. (Kutuhuka 12:49; Ulevi 24:22) Chochene, musono twatambile kwononokena shimbi jeswe jize ahanyine kuli A-Izalele. Alioze, chipwe ngwe tuli akuwayisa chipwe ka twatamba kwononokena “shimbi ya Kristu.” Chuma chilemu chize Yesu atulongesele chili kusolola zango. (Yoano 13:35; Tiangu 2:8) Twatamba kuzanga Yehova, Yesu ni atu. Jila yipema yakusolola zango lino yili kuhanjika ni atu hakutwala ku sango lipema lia Wanangana.​—Yoano 15:10; Yilinga 1:8.

15. Mumu liaka mutuhasa kwamba ngwetu Yesu katumine tumbaji jenyi eswe hanga ambujole?

¹⁵ Maliji waze Yesu ambile kuli tumbaji jenyi akehe kali ni ulumbunwiso kuli tumbaji anji. Chakutalilaho, Yesu kalingile usendo ni 11 a tumbaji jenyi nawa yalakenya ngwo makayula no mu Wanangana wenyi. Waze makayula nenyi kali unji wa 144,000. (Luka 22:29, 30; Usolwelo 5: 10; 7:4-8) Nawa muze Yesu amuhindwishile, tumbaji akehe wika atambwile shimbi ya kwambujola sango jipema. (Yilinga 10:40-42; 1  A-Korindu 15:6) Alioze tumbaji eswe aku sekulu yitangu kononokene ha shimbi yacho. (Yilinga 8:4; 1  Petulu 1:8) Musono, ni yetu tunanyingika ngwo twatamba kwambujola sango lipema, chipwe kutushi kwivwa Yesu mwene kanatulweze ngwenyi tulinge mulimo wacho. Kuli tununu a atu waze anambujola sango lipema musono. Tunanyingika ngwo hakulinga mulimo au tunasolola ufulielo wetu muli Yesu.​—Tiangu 2:18.

16-18. Kuchi mutuhasa kupwa atu ashishika kuli mandumbu a Kristu, nawa mumu liaka twatamba kulinga chino haliapwila?

¹⁶ Satana kanalimika chinji ni mandumbu ja Kristu, waze achili hano hashi, mumu kananyingika ngwo kanasala ni “mwaka ukepe wika.” (Usolwelo 12: 9, 12, 17) Chipwe ngwe Satana kanate miheto yinji, nihindu mandumbu akuwayisa machinunga ni kusongwela mulimo wa kwambujola, nawa atu anji kanapanjika sango jipema. Chamwenemwene Yesu kali hamwe ni mandumbu jenyi akuwayisa, nawa kanasongwela.​—Mateu 28:20.

¹⁷ Twakuwahilila chinji ha kukwasa mandumbu ja Kristu ha kwambujola sango jipema. Nawa twakwakwasa hakulambula mbongo ni ha kukalakala chinji ha kutunga Mazuwo a Wanangana, ni a kukunguluka chetu chinene ni mitango. Nyi twononokena makulwana a mu chikungulwila ni mandumbu akwo waze “ndungo wamenemwene” akusa, mutusolola ngwo tunazange kukwasa mandumbu ja Kristu.​—Mateu 24:45-47; A-Hepreu 13:17.

¹⁸ Kwasala hakehe hanga mandumbu ja Kristu atambule chijikilo chakasula. Mba angelo eche “fuji jiwana ja hashi” hanga luyinda munene aputuke. (Usolwelo 7:1-3) Shimbu Armangedone kanda yichiputuka Yesu matwala mandumbu jenyi akuwayisa mu malilu. (Mateu 13:41-43) Kashika, nyi tunazange atupatwile ngwe mapanga muze Yesu meza, wano e mashimbu akushishika kuli mandumbu akuwayisa a Kristu.