1. Mumu liaka Yesu ‘alikwijile mu spiritu’ yisandu? (Tala chizulie cha uputukilo.)

MUHASA kunyonga chize Yesu ‘alikwijile mu spiritu’ yisandu? Hanji anasehejela nawa meso jenyi anahenya ni chiseke? Mumu liaka evwile chiseke chacho? Shimbu liacho Yesu katumine tumbaji twenyi 70 hanga ambujole sango lia Wanangana wa Zambi. Iye te kanazange chinji kunyingika chize ayo te malinga mulimo wacho. Mumu te kuli akwa kole anji waze te keshi kuzanga sango lipema, ngwe Alongeshi ni A-Fwariseu waze alilongesele chinji. Ayo te kakupiangula atu anji hanga anyonge ngwo Yesu kali wika kamwe Ka-karpintero nawa tumbaji twenyi “kalongolokele ha masona.” (Yili. 4: 13; Marku 6:3) Alioze, tumbaji yafuna ni chiseke cheswe mu mulimo wo. Ayo te kakwambujola chipwe ha yihungumiona, hanji ukwiko wa andemoniu. Yika yaakwashile kupwa ni chiseke ni hamu liacho?​—Tanga Luka 10:1, 17-21.

2. (a) Kuchi te tumbaji twa Yesu apwa ngwe ana-kemba? (b) Yika yakwashile tumbaji twa Yesu kunyingika chinji umwenemwene wa mu Mbimbiliya?

² Yesu kambile kuli Yehova ngwenyi: “Ngunakuhalisa Tata, Mwenya lilu ni hashi, mumu wahengekele yino yuma kuli akwa mana ni akwa malinjekela; wayisolwele kuli  ana-akemba. Ewa Tata, mumu chocho chakupemenene.” (Mateu 11:25, 26) Mumu liaka Yesu avulukile tumbaji twenyi ngwo ana-kemba? Ha mukunda wa A-longeshi ni A-Fwariseu waze alilongesele chinji te akulinyonga eye ngwo kali akwa mana, keshika Yesu yalongesa tumbaji twenyi ngwo apwe ngwe ana-kemba. Tumbaji yalilongesa kupwa akwa-kulikehesa waze keshi kulinangamisa. (Mateu 18: 1-4) Ha mukunda wakulikehesa, Yehova yazachisa spiritu yenyi yisandu hanga yaakwase kunyingika kanawa umwenemwene wa mu Mbimbiliya. Alioze, mangana a ulembelo A-Yunda, akwa-kulinangamisa yanunga ni kwapupuchisa kuli Satana.

3. Yika mutulilongesa ha mutwe uno?

³ Kanda ukomoka amu Yesu evwile chiseke chinji! Iye kevwile chiseke chinji ha kumona chize Yehova akwashile atu waze akwete mbunge ya kulikehesa hanga anyingike umwenemwene wa mu Mbimbiliya, chipwe ngwe kakalilongesele. Mutapu uno wakulongesa kakuutayiza kuli Zambi, nawa Zambi kalumukine. Kuchi iye akusolola ngwo nihindu kananungu ni kutayiza mutapu wacho wa kulongesa? Ha mutwe uno, mutulilongesa chize Yehova akukwasa atu waze kalilongesele chinji kunyingika umwenemwene wa mu Mbimbiliya musono.

4. Mu majila aka Kaposhi wa Kutalila mwashi kutanga kali chawana cha zango?

⁴ Ha miaka yapalika, atu ja Zambi hanalulieka malongeso jo hanga apwe ashi nawa azwalala. Tutalenu yilweza yitatu. Chitangu Kaposhi wa Kutalila mwashi kutanga. * (Tala maliji mushi lia lifwo) Yono kali chawana chize chinakwasa waze kanyingikine kutanga kanawa hanji keshi kuhanjika limi liacho kanawa. Asoko kakuzanga chinji Kaposhi wa Kutalila mwashi kutanga, mumu chakupwa chashi ana jo kunyingika kanawa malongeso waze ali ha Kaposhi wa Kutalila mwashi kutanga. Atu anji hanasoneka mikanda hanga asakwilile. Umwe ndumbu wa pwo yamba ngwenyi, te kakwivwa woma ha kuhana kumbululo ha Longeso lia Kaposhi wa Kutalila. Haliapwila ka! Muze haputuka kuzachisa Kaposhi wa Kutalila mwashi kutanga, iye yasoneka ngwo: “Haliapwila nakukumbulula chinji, nawa woma hiunanguhwa! Ngunasakwila chinji kuli Yehova hamwe ni yenu.”

5. Kuyuka chika mutuwana mu Mbimbiliya yize alulieka chaha ya New World Translation of the Holy Scriptures?

⁵ Chamuchiali, tuli ni Mbimbiliya yaha New World Translation of the Holy Scriptures yize anakalulieka, ni kuyifwambwisa mu Inglês ha kukunguluka chize alingile mu Outubro 5, 2013. * Versu jinji haliapwila jili ni maliji akepe, nihindu ulumbunwiso wawo kuwalumukine alioze uli washi kuunyingika. Chakutalilaho, mukanda wa Yombi 10:1 te ukwete maliji 27 haliapwila uli ni maliji 19 nawa ni mukanda wa Yishima 8:6 te ukwete maliji 20, haliapwila uli ni maliji 13. Versu jino jaali jili jashi kunyingika ha Mbimbiliya yino alulieka. Umwe ndumbu wakuwayisa yoze waputukile kulu kuwayila Yehova ni ushishiko weswe yamba ngwenyi: “Muze natanga mukanda wa Yombi ha Mbimbiliya alulika, mba yingunyingika  kanawa ulumbunwiso wa maliji jacho ngwe te kanda ngwatanga kama!” Atu anji no chochene che anambe.

6. Kuchi twakwivwa hakutwala ku ulumbunwiso upema wa Mateu 24:45-47?

⁶ Chamuchitatu, kutwala ku unyingikiso wa ulumbunwiso wa yimwe yisoneko. Chakutalilaho, hitwanyingika ulumbunwiso wa “ndungo wamwenemwene, wa kukanyama,” ha Kaposhi wa Kutalila wa Julho 15, 2013. (Mateu 24:45-47) Kaposhi wacho kalumbunwine ngwo, ndungo wamwenemwene, wa kukanyama kali Chizavu cha Tusongwelo. Nawa ngwo “akwa zuwo,” kali waze akuwayisa ni “mapanga akwo,” waze eswe analisa kuli ndungo wamwenemwene, wa kukanyama. (Yoa. 10:16) Twakusakwila chinji hakulilongesa umwenemwene wacho ni kuulongesa kuli akwetu! Mu majila akwo aka Yehova akusolwela ngwo iye kakutayiza malongeso jacho ashi nawa azwalala?

7, 8. Jimwe sango ja mu Mbimbiliya yika te jinalumbunuka hakutwala kulutwe lia matangwa?

⁷ Nyi yena waputukile kulu kuwayila Yehova, kota hiunamono kwalumuna cha ulumbunwiso wa sango ja mu Mbimbiliya mu mikanda yetu. Ku mashimbu akunyima, twapwile ni kuhanjika chinji ngwo sango jimwe jinalumbunuka yimwe yuma muyikalingiwa kulutwe lia matangwa. Shina chinalite kulumbununa kanawa sango ja mu Mbimbiliya mu jila ya mutapu au nyi? Mba. Chakutalilaho, Yesu katesele “chilayi cha profeta Yona.” (Tanga Mateu 12:39, 40.) Yesu yalumbununa ngwenyi, mashimbu waze Yona atwamine mu jimo lia yishi te kanalumbunuka mashimbu waze iye te matwama mu fuka.

⁸ Mu Mbimbiliya muli sango jize te jinasolola yuma yize muyiza kalingiwa kulutwe lia matangwa. Postolo Paulu yalumbununa hakutwala ku jimwe sango jacho. Chakutalilaho, ulo wa Apalahama ni Hekare ni Sara te unalumbunuka usendo wa Yehova ni vungu lia Izalele ni ululikiso wa Yehova wa mu malilu. (Ngala. 4:22-26) Ngwe chizechene tabernakulu ni tembele, ha Tangwa lia Kufuka shili sasendote wa lutwe hamwe ni yuma yikwo ya Shimbi te yapwile “chizulie cha yuma yipema yize muyizaho.” (Hepre. 9:23-25; 10:1) Yino yakukolesa ufulielo wetu muze mutulilongesa sango jino ja mu Mbimbiliya, ni kunyingika ulumbunwiso wajo. Shina yino yinalumbunuka ngwo mutu mweswe ni yuma yeswe yize yili mu Mbimbiliya umwe mutu hanji chimwe chuma nyi?

9. Kuchi te kunyima akulumbununa sango ja Mbimbiliya hakutwala kuli Nabote?

⁹ Ku mashimbu akunyima mikanda yetu te yakulumbununa ngwo, atu, sango, ni chuma cheswacho anambe mu Mbimbiliya chili ni ulumbunwiso wacho. Chakutalilaho, Mwazovu mupi Jezebele kashihile Nabote hanga mukwo-lunga Ahabe ahase kutambula munda wa vinyu wa Nabote. (1 Mia. 21:1-16) Ha mwaka 1932, Kaposhi wa Kutalila yalumbununa ngwo Ahabe ni Jezebele te kanalumbunuka Satana ni ululikiso wenyi, Nabote te kanalumbunuka Yesu, nawa ngwo kufwa cha Nabote chinalumbunuka kufwa cha Yesu. Ha mwaka 1961, mukanda “Santificado Seja o Teu Nome” yiwamba ngwo Nabote te kanalumbunuka akwa-Kristu akuwayisa nawa Jezebele kanalumbunuka akwa-Kristu amahuza. Nawa kufwa cha Nabote ku moko ja Jezebele chinalumbunuka kufwa cha akwa-Kristu akuwayisa  ha matangwa wano akusula. Ha miaka yinji, ulumbunwiso uno wakutatwisa ufulielo wa atu ja Zambi. Mumu liaka mba ulumbunwiso wacho walumuka?

10. (a) Kuchi ndungo wamwenemwene anakanyama ha ulumbunwiso wa jimwe sango ja mu Mbimbiliya? (b) Yika mikanda yetu yinalumbununa chinji musono?

¹⁰ Ha kupalika cha miaka Yehova kakukwasa “ndungo wamwenemwene wa kukanyama” hanga akanyame chinji. Kuchi chenacho? Haliapwila ndungo wamwenemwene keshi kulumbununa chamulumbunwina sango ja Mbimbiliya, alioze chitangu kakupwa ni ushindakenyo mba ajilumbunune. Jimwe sango jikulu hakutwala ku Yisoneko ya mu Mbimbiliya te jikalu chinji kuwana ulumbunwiso, ni kujiwuluka ni kujikaula. Muze te twakusa tachi jakuwana ulumbunwiso wa sango jilemu ja mu Mbimbiliya, yitutokesa longeso lingunu nawa lipema. Kashika, musono mikanda yetu yakutondekeza chinji ha malongeso a Mbimbiliya hakutwala ku ufulielo, kunyongonona, kuwayila Zambi ni malongeso akwo apema waze mutuhasa kulilongesa ku sango ja mu Mbimbiliya. *

11. Kuchi haliapwila tunanyingika sango ja Nabote, nawa kuchi chilweza chenyi muchihasa kutukwasa?

¹¹ Ulumbunwiso wetu hakutwala kuli Nabote musono uli washi, nawa upema. Nabote kakafwile hanga alumbununuke Yesu hanji akwa-Kristu akuwayisa, ka. Iye kafwile hamukunda wa ufulielo wenyi kuli Zambi. Iye kononokene Shimbi ja Yehova chipwe tuhu yamuhungumiona kuli akwa-kuyula a ndundo. (Kwalula. 36:7; 1 Mianangana. 21:3) Chino chili chilweza kuli tuvumbi eswe a Zambi musono waze mahungumiona ngwe Nabote. (Tanga 2 Timoteu 3:12.) Akwa-Kristu mahasa kunyingika, kwiwuluka, ni kukaula longeso liacho ni kukolesa ufulielo wo.

12. (a) Yika twatambile kwamba hakutwala ku Mbimbiliya? (b) Kuchi mutuhasa kupwa ni ulumbunwiso ungunu chipwe wa yuma yikalu? (Tala maliji mushi lia lifwo.)

¹² Shina mutuhasa kwamba ngwo Mbimbiliya yikwete wika longeso lipema lize kulishi ni ulumbunwiso ukwo? Ka. Musono mikanda yetu yakulumbununa chize sango ja mu Mbimbiliya jinalita ni sango  jikwo ja mu Mbimbiliya. Chakutalilaho, ushishiko wa Nabote chipwe ha yihungumiona yize amwene, ni kufwa chenyi yakutwiwulula ushishiko wa Yesu ni waze akuwayisa. Chikwo nawa, chakutwiwulula ushishiko wa “mapanga” akwo anji. Ha chino mutuhasa kumona chize Yehova anatulongesa kanawa mu jila yashi. *

13. Yilweza yika yinasolola ngwo haliapwila tunanyingika kanawa ulumbunwiso wa Yishima ya Yesu?

¹³ Yesu Kristu kapwile Longeshi munene hano hashi. Iye te kakuzanga kuta yishima, hanji yilweza muze analongesa. (Mateu 13:34) Yishima yili yipema chinji mumu yakulumbununa sango jikalu hanga jipwe jashi kunyingika kanawa ni kuheta ku mbunge yetu. Ha miaka yinji, mikanda yetu yakulumbununa yishima ya Yesu ha maliji ashi nawa azwalala. Chakutalilaho, Kaposhi wa Kutalila 15 Julho, 2008, kakutukwasa kunyingika kanawa ulumbunwiso wa yishima ya Yesu, hakutwala ku futunwiso, lunona wa musetate ni wanda wa yishi. Haliapwile mutuhasa kumona ngwo yishima yino yinalumbunuka Wanangana wa Zambi, mba uno unakwase atu anji hanga eche yitanga yipi ya hano hashi ni kupwa tumbaji twa Kristu.

14. (a) Kuchi te twakulumbununa chishima cha Ka-Samaria mupema? (b) Ulumbunwiso uka tulinawo haliapwila ku chishima cha Yesu?

¹⁴ Yika mutuhasa kwamba hakutwala ku yishima hanji yilweza yize Yesu ambile? Yishima yimwe yili yilweza ni uprofeto. Yikwo yikwete malongeso alemu. Alioze kuchi mutuhasa kunyingika yishima yize yili yilweza ni yize hi yilweza ko? Ha kupalika cha miaka, hi twanyingika kanawa kumbululo. Chakutalilaho, achi nyonga hakutwala ha ulumbunwiso wa chishima cha mwenyembo Ka-Samaria. (Luka 10:30-37) Ha mwaka wa 1924 Kaposhi wa Kutalila, kambile ngwo Ka-Samaria kanalumbunuka Yesu nawa jila yize yinakatuka ku Yerusaleme ndo ku Yeriku yinalumbunuka kupihia cha yitanga ya atu chize ha kwehuka cha mu Endene. Yamba nawa ngwo eji waze apwile mujila kanalumbunuka akwa-mingoso a chipululu, nawa sasendote ni Ka-Levita te kanalumbunuka akwa-Kristu amahuza. Alioze musono, mikanda yetu yakuzachisa chishima chino ha kwiwulula akwa-Kristu eswe ngwo katambile kupwa ni katonde. Twatamba kukwasa atu eswe waze anafupu ukwaso, kanji-kanji ha kwaakwasa hanga alilongese umwenemwene hakutwala kuli Zambi. Twakwivwa chiseke ha kumona chize Yehova anapwisa chashi umwenemwene.

15. Yika mutulilokesa ha mutwe uze musulaho?

¹⁵ Ha mutwe uze musulaho, mutukalilongesa chishima cha Yesu cha ma virgem-kumi. (Mateu 25:1-13) Kuchi Yesu anazange tuvumbi twenyi ha matangwa wano akusula anyingike ulemu wa chishima chacho? Shina atu anatongola ha chishima ni yuma yize yiliho yinalumbunuka chimwe chuma chilemu kulutwe lia matangwa? Nyi iye te kanazange hanga tunyingike malongeso alemu waze matukwasa ha matangwa wano akusula? Tutalenu.