1-3. Mumu liaka Paulu apwile ni ushindakenyo ngwenyi Yehova mahasa kumukwasa? (Tala chizulie cha uputukilo.)

NYI kachi nwapwile akwa-Kristu mu Roma ku sekulu yitangu, kachi nwapwile mu miaka yikalu. Akwa-Kristu te kakwaamwesa lamba linji kuli A-Roma. A-Roma yaliongela akwa-Kristu ngwo ayo yocha yuma mu Roma nawa ngwo kapwile ni kuvwila atu jo lwaji. Mandumbu ni mapangi jetu akwa-Kristu yaasa mu zuwo lia ususu. Amwe yasanyola kuli tushitu. Eka yaahata ha mitondo ni kwocha haufuku hanga kupwe pangu. Kachi te hita tangwa ni yenu nunashimbwila ngwenu munuhasa kumona yuma yacho.

² Hamashimbu wano akalu henaho postolo Paulu amusele mu zuwo lia ususu. Aye te keshi ushindakenyo ngwenyi mandumbu jenyi akwa-Kristu mamukwasa, mumu ha shimbu likwo amwene lamba liacho yahona kumukwasa. Alioze Yehova yakwasa Paulu kupalikila muli Mwene Yesu. Mba Paulu yasoneka ngwenyi: “Mwene wamanyine hamwe ni yami, iye wanguhele tachi.” Yesu yahana Paulu tachi jize te jinafupiwa. Mba Paulu yasoneka  nawa ngwenyi, “wangupulwile ku kanwa lia ndumba.”​—2 Timo. 4:16, 17. *

³ Paulu yewuluka chize Yehova amupulwile ku matangwa akunyima. Mba kapwile ni ushindakenyo ngwenyi Yehova mamwaha tachi hanga alihumikize mu lamba apwile nalio ni lieswalio lamba te makamona kulutwe lia matangwa. Hakupwa ni ushindakanyo, yasoneka ngwenyi: ‘Mwene kumakangupulula ku yitanga yeswe yipi.’ (2 Timo. 4:18) Paulo kamwene ngwenyi chipwe tuhu mandumbu jenyi kahashile kumukwasa muze mamona lamba, iye nihindu kafulielele ngwenyi Yehova ni Yesu mamukwasa. Aye kapwile ni ushindakenyo ha chino.

4, 5. (a) Iya mahasa kunukwasa muze munufupa ukwaso? (b) Kuchi munuhasa kukolesa usepa wenu ni Yehova?

⁴ Hinunamona kama yipikalo yimwe ni kwivwa ngwenu kukushi niumwe yoze manukwasa nyi? Hanji yanuchiza ha milimo chipwe kunupinjisa ku shikola. Hanji nwayijile chikolo chipwe kumona ukalu weka. Hanji yinwita akwenu anukwase alioze yinuhonga mumu niumwe wahashile kunukwasa wakuhi. Chamwenemwene, yipikalo yimwe keshi kuhasa kuyihwisa kuli atu. Yika mba nwatamba kulinga? Mbimbiliya yatulweza ‘tufuliele Yehova.’ (Yishi. 3:5, 6) Kutala munuhasa kupwa ni ushindakenyo ngwenu pundu manukwasa? Pundu, manukwasa. Tuli ni yilweza yinji mu Mbimbiliya yize yakutwaha ushindakenyo ngwo Yehova pundu kakukwasa atu jenyi.

⁵ Kanda nwivwa uli ni atu kahashile kunukwasa. Enu nwatamba kumona mashimbu jacho ngwenu e mashimbu alita akufuliela Yehova ni mbunge yeswe. Mashimbu jacho e munuhasa kumona chize iye mahasa kunufunga. Kashika nwatamba kufuliela chinji Yehova ni kukolesa usepa wenu ni iye.

6. Mumu liaka hi chashiko kufuliela Yehova muze tunamono lamba?

⁶ Munuhasa kumona yipikalo yize muyinupinjisa chinji. Nwatamba kweseka kutala ha yipikalo yenu ni kulemba kuli Yehova hanga anukwase. Kutala mbunge yenu muyihasa kuhwima muze nunafuliela ngwenu manukwasa nyi? Mba, mbunge muyihasa kuhwima. (Tanga Samu 62:8; 1 Petulu 5:7.) Nyi munufupa kupwa ni usepa upema ni Yehova, nwatamba kumufuliela. Kulinga chocho hi chashiko. Mumu liaka? Chitangu, mumu hanji Yehova keshi kukumbulula kulemba chenu hazehene munulemba kuli iye.​—Samu 13: 1, 2; 74:10; 89:46; 90:13; Haba. 1:2.

7. Mumu liaka kanji-kanji Yehova keshi kukumbulula kulemba chetu hazehene mutumwita?

⁷ Mumu liaka, kanji-kanji, Yehova keshi kukumbulula kulemba chetu hazehene mutulemba kuli iye? Mbimbiliya yinambe ngwo Yehova kali Tata yetu nawa yetu tuli ana jenyi. (Samu 103:13) Chisemi keshi kuhana mwanenyi cheswacho meta hanji kumwahacho hazehene meta. Chisemi kanyingika ngwenyi mwana mahasa kufupa chimwe chuma alioze ni kushimbula ka, hi keshi kuchifupa nawa. Chisemi kanyingika nawa yuma yize atamba kuhana mwanenyi, ni chize akwo mevwa ha yuma yacho. Kanyingika yize yinafupiwa kuli mwanenyi ni shimbu atamba kumwahayo. Nyi chisemi mapwa ni kuhana mwana cheswacho mafupa hita shimbu meta, chisemi wacho mamupwisa kapinji kuli mwana. Yehova,  Tata yetu wa mu malilu, kakutuzanga chinji. Amu iye kali Sakatanga wa mana, kananyingika yuma yinafupiwa kuli yetu ni shimbu lipema atamba kutwaha yize mutumwita. Chuma twatamba kulinga ndo kumushimbwila hanga tumone chize makumbulula kulemba chetu.​—Tesa Iza. 29:16; 45:9.

8. Yika atulakenya Yehova ha yeseko yize mutuhasa kulihumikiza nayo?

⁸ Twiwulukenu nawa ngwetu Yehova kananyingika yipikalo yize mutuhasa kulihumikiza nayo ni yize kutuchi kuhasa. (Samu 103:14) Kashika kakutwaha tachi jize jinafupiwa. Mashimbu amwe mutuhasa kwivwa pundu ngwetu kutuchi kuhasa kunyongonona. Alioze Yehova katulakenya ngwenyi, nyi yeseko muyitulemena chinji, iye ‘matumwesa jila ya kutuhukilamo.’ (Tanga 1 A-Korindu 10:13.) Tunawahilila chinji ha kunyingika ngwetu mutuhasa kujikijila kuli Yehova mumu iye kanyingika yeseko mutuhasa kulihumikiza nayo.

9. Yika twatamba kulinga nyi twalemba kuli Yehova alioze katukumbulwile hazehene?

⁹ Nyi twalemba kuli Yehova alioze katukumbulwile, tuhwimenu mbunge. Twiwulukenu ngwetu Yehova kakufupa kutukwasa, alioze kakushimbwila shimbu lipema lize mahasa kutwaha ukwaso uze unafupiwa. Mbimbiliya yakutulweka ngwo: “Kashika Yehova kanashimbula akanunge vumbi; kashika kanalinangamisa ha kunuvwila keke. Mumu Yehova iye Zambi ya ululi, kawaha waze mamutwaminyina.”​—Iza. 30:18.

10-12. (a) Yika muyihasa kukaliwisa kufunga asoko waze anayiji? (b) Usendo wetu ni Yehova kuchi muuhasa kupwa nyi mutufuliela muli iye ha mashimbu alamba? Hana chilweza.

¹⁰ Ukalu wenu muuhasa kupwa unene chinji mba munwivwa ngwe chize evwile Paulu yoze atambile kupulwila ku “kanwa lia ndumba.” Ha shimbu liacho, nwatamba kufuliela chinji Yehova. Chakutalilaho, hanji nuli ni usoko wenu yoze unayiji. Hanji nwalemba kuli Yehova anukwase nuwane chize munulinga ni kunukwasa nawa nujikize. * Mbunge yenu muyihwima muze munwiwuluka ngwenu Yehova kanamono yeswe nunapalikamo ni kunyingika chize nunevu. Mba manukwasa nulihumikize ni ushishiko weswe.​—Samu 32:8.

¹¹ Ha mashimbu amwe muchihasa kusoloka ngwe Yehova keshi ni kunukwasa. Hanji mbuki keshi kutayiza yize yenu nunafupu. Hanji nwanyonganga ngwenu asoko jenu manukolweza, alioze ayo hi mapihisa chinji yuma. Ha mashimbu wano, nwatamba kufuliela Yehova anwehe tachi. Kundamenu chikolo kuli iye. (Tanga 1 Samuele 30:3, 6.) Mba muze munumona ngwenu Yehova kanukwasa, usendo wenu ni iye muukola chinji.

¹² Linda che evwile. * Aye yafunga yisemi jenyi waze apwile nyi kuyiza ha miaka yinji shimbu kanda afwa. Yamba ngwenyi: “Ha mashimbu jacho, ami ni lunga liami ni ndumbwami, kutwahashile kunyingika chize mutulinga. Shimbu limwe twapwile ni kwivwa ngwe tuli amokomoko. Alioze nyi twatala kunyima, twakumona kanawa chize Yehova atufungile. Aye yatujikijisa ni kutwaha yuma yize yafupiwile kuli yetu chipwe tuhu twakapwile ni kumona chize mutulinga.”

13. Kuchi kufuliela Yehova chakwashile Rhonda alihumikize muze amwene luyinda munji?

¹³ Kufuliela Yehova ni mbunge yeswe  muchitukwasa kulihumikiza muze mukusoloka umwe luyinda. Ai ye yapwile kuli Rhonda. Lunga lienyi, yoze te hi Chela cha Yehova ko, te kanafupu kumulakula. Ha shimbu limuwika, ndumbwenyi yapwa ni musongo upi wa lupus. Muze hi kwapalika tukweji akehe, pwo lia ndumbwenyi nawa yafwa. Ha kuhwa cha yipikalo yeswe ayi, Rhonda yaputuka upionelu wa shimbu lieswe. Nihindu naye nawa yafwa. Kuchi Rhonda ahashile kulihumikiza mu luyinda mweswe au? Mwene yamba ngwenyi: “Napwile ni kuhanjika kuli Zambi hita tangwa, ni muze te ngunafupu kukwata yiyulo. Hakulinga chocho namwene ngwami Yehova kwali. Yingulilongesa kumufuliela hi kulifuliela muli yami mwene ko chipwe atu eka, ka. Mba yangukwasa mu yuma yeswe yize yafupiwile kuli yami. Kashika, hi namona chize natamba kukalakala ni Yehova.”

14. Kuchi Yehova mahasa kutukwasa muze umwe wa muchisaka chetu mamusosolola muchikungulwila?

¹⁴ Tutalenu ha sango ja yipikalo yikwo. Uchinyongenu nyi umwe wa mu chisaka chenu kamuchiza muchikungulwila. Tunanyingika chize Mbimbiliya yakuhanjika hali waze anasosolola muchikungulwila. (1 Kori. 5:11; 2 Yoano 10) Ha mukunda wa zango nukwete hali mutu wacho, hanji mununyonga ngwenu kunuchi kuhasa kukaula shimbi ja mu Mbimbiliya. Kutala munufuliela ngwenu Yehova mahasa kunwaha tachi hanga nununge kumwononoka nyi? Munumona shimbu liacho ngwenu lie nwatamba kukundama chikolo kuli Yehova nyi?

15. Mumu liaka Alama ahonene kwononoka Yehova?

¹⁵ Kuchi sango jacho jinalite ni sango ja mutu mutangu, Alama? Kutala kafulielele  ngwenyi mahasa kununga kupwa ni mwono chipwe tuhu kononokene Yehova nyi? Ka, Alama “kongolokele.” (1 Timo. 2:14) Mumu liaka wahononene kwononoka Yehova? Alama yalia muhuko uze amuhele kuli mukwo-pwo mumu kazangile chinji pwo lienyi kuhiana Yehova. Yevwilila maliji ja pwo lienyi kuhiana shimbi ja Yehova.​—Uputu. 3:6, 17.

16. Iya twatamba kuzanga chinji nawa mumu liaka?

¹⁶ Chuma alingile Alama chakutulongesa ngwo, twatamba kuzanga chinji Yehova kuhiana hita mutu. (Tanga Mateu 22:37, 38.) Nyi mutuzanga chinji Yehova, mutuhasa kukwasa kanawa asoko jetu chipwe ngwe kakuwayila Yehova hanji ka. Kashika, zangenu chinji Yehova ni kumufuliela. Nyi mbunge yinalipikala hakutwala kuli usoko wenu yoze hanamusosolola muchikungulwila, lembenu kuli Yehova ni kumulweza chize nunevu ku mbunge yenu. * (Roma 12:12; Fwili. 4:6, 7) Chipwe tuhu nunevu yikola yinji ku mbunge, nyongenu ngwenyi ayi ye shimbu nwatamba kukolesa chinji usendo wenu ni Yehova. Mba munuhasa kumufuliela ni kunyingika ngwenu munuyuka chinji nyi munumwononokena.

17. Yika twatamba kufuliela ngwetu Yehova malinga, nyi mutukalakala chinji mu mulimo wakwambujola sango lipema?

¹⁷ Mumu liaka Yehova wapulwile Paulu “ku kanwa lia ndumba”? Paulu ngwenyi: “hanga ku kanwa liami akambujole liakulu Sango Lipema.” (2 Timo. 4:17) Ni yetu Yehova kanatwehe mulimo wakwambujola “Sango Lipema” nawa kakutusanyika ngwenyi tuli “akwa milimo-ni-akwo.” (1  Tesa. 2:4; 1 Kori. 3:9) Nyi mutukalakala liakulu mu mulimo wacho, twatamba kufuliela ngwetu Yehova matukwasa ha yeswayo muyifupiwa kuli yetu. (Mateu 6:33) Mba muchipwa chashi kuli yetu kushimbwila Yehova akumbulule kulemba chetu.

18. Kuchi mutuhasa kufuliela chinji Yehova ni kupwa ni usendo ukolo ni iye?

¹⁸ Kashika kalakalenu hita shimbu nukolese usepa wenu ni Yehova. Nyi mbunge muyiputuka kulihulumba muze munumona yipikalo, zachisenu shimbu liacho nukundame chinji kuli Yehova. Tangenu ni kulilongesa Liji lienyi Mbimbiliya ni kulipukuna. Lembenu kuli Yehova mashimbu eswe ni kumuwayila. Muze munulinga chocho, munufuliela ngwenu Yehova mahasa kunukwasa nulihumikize mu yeseko yeswe nunamono haliapwila ni yize munumona kulutwe ni matangwa.