Shina hiunalihula kama yihula yino? Nyi hiunalihulayo kuushi ukaweye. Atu a hashi heswe kakunyonga chinji ha yihula yilemu ya ku mwono. Shina muhasa kuwana kumbulula lia yihula yacho?

Tununu twa atu mahasa kwamba ngwo, “Ewa!” Mumu liaka? Mumu ayo hanawane kumbululo lingunu lia yihula yo mu Mbimbiliya. Shina muwahilila kunyingika yize Mbimbiliya yinambe? Ha chino yena muhasa kuyuka ha kulilongesa Mbimbiliya ni Yela ja Yehova. *

Pundu lume, amwe atu nyi maeta hanga atange Mbimbiliya kakwamba ngwo: “Nguli ni milimo yinji.” “Yili yikalu kunyingika.” “Chishi shimbu.” Alioze amwe kakusolola nyonga lieka. Kakuzanga kunyingika chinji yize Mbimbiliya yakulongesa. Tutalenu yimwe yilweza:

• “Napwile ni kuyaya ku yingeleja ya Katolika ni Protestante, ni mu tembele ya Sikh, ni mu yingeleja ya Budista, nawa nalilongesele Teologia ku universidade. Chipwe chocho te chishi kuwana kumbululo lia yihula yami yinji ya ku spiritu. Ha chino umwe Chela cha Yehova yeza ku zuwo liami. Yingukomoka ha kumbululo lienyi lia mu Mbimbiliya, hazehene yingutayiza kulilongesa Mbimbiliya.”​—Gill, Englaterra.

• “Te nakulihula yihula yinji hakutwala ku mwono, alioze kumbululo lize pastor wa ku yingeleja yami anguhele kuliakahwishile yihula yami. Chipwe chocho, umwe Chela cha Yehova yakumbulula yihula yami ni Mbimbiliya wika. Muze iye anguhulile nyi ngunazange kunyingika nawa, ami ni chiseke cheswe yingutayiza.”​—Koffi, Benin.

• “Ami te nakulihula chinji hakutwala ku kupwa cha afu. Te nafuliela ngwo afu mahasa kulinga upi kuli atu waze ali ni mwono, alioze te nakuzanga kunyingika yize Mbimbiliya yakwamba. Chocho yinguputuka kulilongesa Mbimbiliya ni umwe sepa liami Chela cha Yehova.”​—José, Brazil.

• “Ami nesekele kutanga Mbimbiliya alioze chakahashile kunyingika yize te ngunatange. Mba hi umwe Chela cha Yehova yeza ni kungulumbunwina kanawa uprofeto unji wa Mbimbiliya. Yinguzanga kunyingika nawa yize te ngunalilongesa.”​—Dennize , Mexico.

• “Ami te nakulihula nyi Zambi kakutuzanga lume. Chocho yinguputuka kulemba Zambi wa Mbimbiliya. Ha tangwa linakasulaho umwe Chela yangongwela ku zuwo liami, yingutayiza longeso lia Mbimbiliya.”​—Anju, Nepal.Sango jino jinatwiwulula maliji waze Yesu ambile ngwo: “Kawaha yiswale mu spiritu, mumu wanangana wa malilu ni wo.” (Mateu 5:3) Chochene, atu kaatangile ni nyonga lia kuzanga yuma ya ku spiritu. Zambi wika mahasa kutukwasa ha chikuma chacho, nawa iye kakuchilinga kupalikila mu Liji lienyi, Mbimbiliya.Longeso lia Mbimbiliya kuchi liapwa? Kuchi mulihasa kutukwasa? Yihula yino muyipwa kukumbulula ha mutwe uze muusulaho.