Magui: Meneka, Mandalena. Nawahililanga chinji ha kukumona ha Chiwanyino cha Kwiwuluka Kufwa cha Yesu ha poso yize yapalika. * Yika yena wanyonga ha kukunguluka chacho?

Mandalena: Nawahililanga chinji kupwaho, alioze natamba kutayiza ngwetu kuchevwile kanawa unyingikiso wa yuma yeswe alongesangaho. Nakwivwa atu malinga chiwanyino cha kusemuka cha Yesu ha tangwa lia Natal ni kuhinduka chenyi ni Chizomboka, alioze kanda nguchivwa kama ayo mewuluka kufwa chenyi.

Magui: Chochene, chiwanyino cha Natal ni Chizomboka kakuchilinga kuli atu anji a hashi heswe. Alioze Yela ja Yehova kananyingika ngwo chili chilemu kwiwuluka kufwa cha Yesu. Nyi uli ni amwe mashimbu, nguhasa kukulumbunwina yitela yacho.

Mandalena: Ewa, kunguli ni amwe mashimbu.

Magui: Kwamba pundu, Yela ja Yehova kakwiwuluka kufwa cha Yesu mumu iye kalongesele tumbaji twenyi ngwo apwe ni kulichinga. Tutalenu yize yalingiwile ha ufuku muze te kanda achifwa. Unewuluka yize iye ambile hakutwala ku chiwanyino chilemu chize iye alingile hamwe ni tumbaji twenyi ashishika?

Mandalena: Seya ya Mwene nyi?

Magui: Chochene. Mbimbiliya yinachivuluka nawa ngwo Chiwanyino cha Mwene cha Ufuku. Ha chiwanyino chacho, Yesu yahana tumbaji twenyi malongeso alita. Lisesa, muhasa kutanga maliji jenyi waze ali ha mukanda uno wa Luka 22:19?

Mandalena: Mba. “Iye yanda mbolo, mba muze te hasakwila, yayipalula, yaahayo ngwenyi, Yino mujimba wami auhanyine hali yenu: chino chilingenu nukangwiwuluke.”

Magui: Nasakwila. Tala malongeso ja Yesu kusongo lia mufunda uno: “chilingenu nukangwiwuluke.” Nawa muze halongesa tumbaji twenyi hanga apwe ni kumwiwuluka, Yesu yalumbununa kanawa yize ayo mapwa ni kumwiwulukila. Iye yamba ngwenyi kanahane mwono wenyi hamukunda wa tumbaji twenyi. Yesu yalumbununa maliji wano nikulita ni waze ali mukanda wa Mateu 20:28. Versu yacho yinambe chino: “Chizechene ngwe mwe Mwana Mutu kejileko akamuvumbike, alioze hanga iye akavumbike akwo, nikuhana mwono wenyi ndando ya ukuule hali anji.” Kashika Yela ja Yehova akulikungulula ha miaka yeswe hanga alinge chiwanyino cha kufwa cha Yesu​—hanga ewuluke chitapo cha ukuule uze Yesu ahanyine. Kufwa chenyi chinalumbunuka mwono kuli atu eswe waze akwononoka.

Mandalena: Nakwiva chinji atu mamba ngwo Yesu kafwile hanga tuhase kupwa ni mwono.  Alioze kwamba umwenemwene yami te chanyingikine ulumbunwiso wa maliji jacho.

Magui: Hi yena wika ko, Mandalena. Chikuma cha chitapo cha ukuule wa Yesu chapwa chikalu chinji. Alioze chili nawa umwe umwenemwene upema uze tunawane mu liji lia Zambi. Shina uli kama ni amwe mashimbu?

Mandalena: nguli ni amwe mashimbu akehe.

Magui: Chinawehe. Mungutanga wika chikuma cha chitapo nawa mungweseka kukulumbunwinacho ni maliji ashi.

Mandalena: Chinapeme.

Magui: Mba tunyingike kanawa chitapo, chitangu twatamba kunyingika kanawa sango ja Alama ni Eva mu munda wa Endene muze ayo te kanda achivulumuna. Mba tunyingike kanawa chikuma chacho tutange hamuwika A-Roma 6:23. Lisesa shina muhasa kutanga kama?

Mandalena: Ewa. Unambe ngwo. “Fweto ya shili kufwa, alioze chawana cha vumbi lia Zambi, mwono wa mutolo muli Kristu Yesu Mwene wetu.”

Magui: Nasakwila chinji. Tuhengule kanawa maliji wano. Chitangu twamona versu yinambe chino: “Fweto ya shili kufwa.” Yino yili yimwe shimbi yashi yize Zambi ambile chize muze atangile atu​—fweto ya shili kufwa. Chochene kuuputukilo kwakapwile nyiumwe mutu mukwa-shili. Alama ni Eva kaatangile atu angunu nawa ana jo eswe kachi kasemukine angunu. Kashika te kukushi nichimwe chitela chize te muchihasa kwaashiha. Alama ni Eva ni minyachi yo yeswe kachi katwamine ni mwono wa mutolo ni kuwahilila. Ngwe chize tunanyingika, shina yuma yalingiwile ngwe chize Zambi ambile?

Mandalena: Ka. Alama ni Eva kalile muhuko wa mutondo uze akanjishile.

Magui: Chochene. Nawa muze ayo achilingile​—Alama ni Eva yasakula kwehuka kuli Zambi​—ayo yapwa akwa-shili. Ha chino, ayo yasakula kupwa akwa-uhenge, nawa akwa-shili. Kusakula chacho chanehene lamba linji, alioze hi wika kuli Alama ni Eva, alioze ni kuli minyachi yo yeswe.

Mandalena: Yika unambe kwamba?

Magui: Tala, munguhasa kuzachisa chimwe chilweza. Achimana ngukuhule kama, wakuzanga kulinga mbolo?

Mandalena: Mba! Yili yuma yize nakuzanga linga chinji.

Magui: Tunyongenu ngwo yena uli ni forma yaha ya kulingila mbolo. Muze kanda uchilingila mbolo, forma yacho muyikonyoka. Kutala mbolo jize mulinga mu forma yacho kuchi mujipwa? Mbolo jacho mujihenga nyi ngwami?

Mandalena: Mba, mujihenga.

Magui: Chizechene nawa, muze Alama ni Eva avulumwine kuli Zambi, ayo “yahenga” che kwamba ngwo yapihia ha mukunda wa shili ni uhenge. Muze avulumwine te kanda achishita mwana niumwe, kashika ana jo eswe anakasemuka ni “uhenge” wowene. Ayo eswe te masemuka ni yitanga ya akwa-shili. Mu Mbimbiliya, liji “shili” kulialumbunukine wika yimwe ndako alioze muchihasa nawa kupwa cha mujimba chize twakuhinga. Ha chino chipwe ngwe yena ni yami kanda tuchilinga chuma chipi​—chipwe te kanda tuchisemuka, alioze muze Alama ni Eva avulumwine ayo yatulanjisa ku shili, yetu yeswe yitupwa ni mwono wa uhenge ni shili yize muyitutwala ndo ni kukufwa. Ngwe chize twatanga mu A-Roma 6:23, fweto ya shili kufwa.

Mandalena: Chino kuchapemene. Mumu liaka atu anamono lamba ku miaka yeswe ha mukunda wa Alama ni Eva?

Magui: Chamwenemwene​—chapihia chinji. Amu chino chinalingiwa, alioze ha ululi wenyi Zambi kambile ngwo Alama ni Eva te katamba kufwa ha mukunda wa shili yo, amu eswe tuli minyachi yenyi Zambi katwechele kuhona kutalatala. Zambi katwehele yimwe jila yize te muyitukwasa. Chitapo cha ukuule wa Yesu. Tutange  nawa A-Roma 6:23. Muze ha tongola ngwo “fweto ya shili kufwa” alioze versu yinambe nawa ngwo: “Chawana cha vumbi lia Zambi, mwono wa mutolo muli Kristu Yesu Mwene wetu.” Kashika kufwa cha Yesu chatupulwila ku kufwa ni shili. *

Magui: Kuli nawa chikuma chikwo chilemu mu versu ai chize ngunazange kushimutwina ne.

Mandalena: Chikuma chikwo chika?

Magui: Talenu, versu yacho yinambe ngwo: “Chawana cha vumbi lia Zambi, mwono wa mutolo muli Kristu Yesu Mwene wetu.” Haliapwila, ni Yesu kamwene lamba ni kufwa hali yetu, yahana mwono wenyi hamukunda wa yetu, mba mumu liaka versu yinambe ngwo ukuule uli “Chawana cha vumbi lia Zambi”? Mumu liaka keshi kuuvuluka ngwo “chawaha cha Yesu”? *

Mandalena: Kumana. Ami te chanyingikine chocho.

Magui: Chochene, Zambi katangile Alama ni Eva, nawa ayo kanakehuka kuli iye muze ahonene kwononoka mu munda wa Endene. Iye kevwile yikola yinji ku mbunge hakumwehuka kuli waze ana jenyi aali. Alioze Yehova yafupa kusopa mulonga wacho ha mashimbu waze ene. * Iye yatuma mwanenyi hano hashi, nawa yahana mwono wenyi ngwe chitapo cha ukuule. Kashika ukuule uli chawana chilemu cha Zambi. Kuli nawa chikuma chikwo chilemu hakutwala ku chawana chino cha Zambi. Shina hi unanyongo kama chize Zambi evwile muze atu ashihile mwanenyi?

Mandalena: Ka, chiso kunyingika.

Magui: Ngunamono amwe buneco ku zuwo lie. Kota uli ni ana.

Mandalena: Mba, nguli ni ana aali—wa lunga ni wa pwo.

Magui: Amu uli chisemi, achinyonga chize Yehova, Tato ya Yesu evwile muze Yesu afwile. Mu malilu kuchi iye evwile ha kumona Mwanenyi kanamumbulumuna, ni kumuchoka ni kumulamba makome? Nawa kuchi Tato evwile muze ahachile Mwanenyi ha mutando ni kufwilaho?

Mandalena: Kanda te nguchinyonga kama chocho! Kevwile yikola yinji ku mbunge.

Magui: Chochene chili chikalu kuli yetu kunyingika kanawa chize Zambi evwile ha tangwa liacho. Alioze tunanyingika ngwo iye kakwivwa yinyengo, nawa tunanyingika mumu liaka iye echele hanga chino chilingiwe. Kanatulumbunwina nyonga liacho kanawa mu mukanda wa Yoano 3:16. Muhasa kuutanga kama?

Mandalena: Ewa. Unambe chino: “Chocho Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.”

Magui: Nasakwila. Tala nawa kuuputukilo wa versu yacho. Yinambe chino: “Zambi wazangile akwa hashi.” Lino lie liji lilemu​—zango. Ha zango Zambi yatuma Mwanenyi hano hashi hanga afwe hamukunda wetu. Chochene, chitapo cha ukuule chili kusolola chinene cha zango. Kashika Yela ja Yehova akulikungulula ha miaka yeswe hanga ewuluke kufwa cha Yesu. Kutala sango jino jakukwasa kama nyi?

Mandalena: Mba, jangukwasa chinji. Nasakwila chinji ha shimbu lize wasa hanga ungulumbunwine sango jino.