1. Mumu liaka twatamba kufunga usepa wetu ni Yehova hanga ukole?

NYI hanakupapachisa ngwe Chela cha Yehova, yena uli ni chuma chilemu chinji. Yena uli ni usepa ungunu ni Yehova. Alioze yitanga yipi ya hashi ha Satana yakuzanga kupihisa usendo wacho, nawa muuhasa kukeketela ha mukunda wa yitanga yetu ya uhenge. Kashika yetu eswe twatamba kufunga usepa wetu ni Yehova hanga ukole.

2. (a) Yika usepa unalumbunuka? (Tala sona mushi lia lifwo) (b) Kuchi mutuhasa kukolesa usepa wetu ni Yehova?

² Shina Yehova kali wamwenemwene kuli yena? Shina wakumunyonga ngwe kali sepa lie? Shina wakuzanga hanga usepa wenu ukole? Tiangu 4:8 kanatulweze yize twatamba kulinga: “Kundamenu kuli Zambi, mba iye kumakundama kuli yenu.” Usepa we ni Yehova kuunatale hali yena ni Yehova. * Nyi wasa tachi hanga ukundame kuli Yehova, iye kumakundama kuli yena. Nyi wachilinga iye mapwa wamwenemwene kuli yena  nawa usendo wenu muukola nikwivwa chize Yesu evwile hakwamba ngwo: “Yoze wangutumine, iye wamwenemwene. Ami ngunamunyingika.” (Yoa. 7:28, 29 Alioze yuma yamutapu uka watamba kulinga mba ukundame kuli Yehova?

3. Kuchi mutuhasa kuhanjika ni Yehova?

³ Nyi unazange kukundama kuli Yehova, chili chipema kulemba mashimbu eswe kuli iye. Alioze kuchi chino muchilingiwa? Achi nyonga chize muhanjika ni umwe sepa yoze watwama kusuku. Yenu munuhasa kulisonekena ni kulihanjikisa ku telefone. Yena muhasa kuhanjika ni Yehova muze mulemba kuli iye mashimbu eswe. (Tanga Masamu 142:2.) Mba kuchi mutuhasa kwecha hanga Yehova ahanjike ni yetu? Mutulinga chino muze mututanga liji lienyi Mbimbiliya mashimbu eswe, ni kuyipukuna. (Tanga Izaia 30:20, 21.) Tutalenu chize kuhanjika chetu ni Yehova muchihasa kukolesa usepa wetu ni iye, ni kumupwisa Sepa lietu wamwenemwene.

4, 5. Kuchi Yehova akuhanjika ni yena muze unalilongesa Mbimbiliya? Hana chilweza.

⁴ Tunanyingika ngwo Mbimbiliya yili liji lia Zambi kuli atu eswe. Shina Mbimbiliya muyihasa kutukwasa hanga tukundame kuli Yehova? Mba! Muulinga chino, muze mutanga ni kulilongesa Mbimbiliya mashimbu eswe kusa ushindakenyo ha chize wakwivwa hakutwala ha yize unatanga. Ni kunyonga ha chize muhasa kukaula yize unalilongesa. Chocho, yena mwecha hanga Yehova ahanjike ni yena. Iye mapwa Sepa yoze makukwasa nawa ni yena mukundama kuli iye.​—Hepre. 4:12; Tia. 1:23-25.

⁵ Chakutalilaho, kuchi wakwivwa muze mutanga maliji ja Yesu ngwo: “Kanda nutulika upite hano hashi”? Nyi muusa Yehova kulutwe ku mwono we, yena muukamona ngwo iye kakuzanga chinji. Alioze yena muhasa kutanga maliji ja Yesu ni kunyingika chize chatamba kululieka mwono we ni kukalakala chinji mu mulimo wa Zambi. Nawa Yehova makukwasa hanga unyingike yize yena muhasa kulinga hanga ukumdame kuli iye.​—Mateu 6:19, 20.

6, 7. (a) Muze tunalilongesa Mbimbiliya, yika yakupwa ha zango lietu kuli Yehova ni zango lienyi kuli yetu? (b) Kuchi nyonga lietu liatamba kupwa muze tunatange Mbimbiliya?

⁶ Chili umwenemwene ngwo muze mutulilongesa Mbimbiliya, mutunyingika chize mutuhasa kululieka mwono wetu hanga  tulingile kanawa Yehova. Alioze mutunyingika nawa yuma yipema yize iye akulinga ni utu wenyi upema, uze wakutulingisa hanga tumuzange. Nyi zango lietu kuli iye mulioka, ni zango lienyi kuli yetu liakwoka, nawa zango lietu kuli iye mulikola chinji. Tanga 1 A-Korindu 8:3.

⁷ Nyi tunazange kukundama kuli Yehova, chili chilemu kulilongesa kanawa Mbimbiliya. Yesu ngwenyi: “Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.” (Yoa. 17:3) Mutuhasa kulilongesa yuma yinji yipema muze mututanga Mbimbiliya, alioze nyonga lietu liatamba kupwa kunyingika kanawa Yehova ngwe Mutu.​—Tanga Kutuhuka 33:13; Samu 25:4.

8. (a) Kuchi amwe mahasa kunyonga ha yize Yehova alingile hali Mwanangana Azaria? (b) Nyi unanyingika Yehova kuchi muwivwa ha yize iye akulinga?

⁸ Muze mutunyingika Yehova ngwe Sepa, kutuchikwivwa woma nyi Mbimbiliya yisolo kulumbununa mumu liaka iye alingile chino. Chakutalilaho, muze Azaria apwile mwanangana wa Yunda, atu te kakuwayila tuzambi twa mahuza. Azaria kakalichingile hamwe no. “Walingile chipema kumeso ja Yehova.” (2 Mia. 15:1-5) Alioze Yehova yalamba Azaria ni yikola ya mbumba. Mumu liaka? Twanyingikine. Kuchi mba wanyonga ha chize Yehova alingile? Shina wakulipikala ha chino ni kumona ngwe Yehova kakasolwele ululi nawa ngwe iye kakapwile ni chitela chakusa mbumba kuli Azaria nyi? Ka. Nyi unanyingika kanawa Yehova mumona ngwo kufumba cha Yehova chalita. Iye mashimbu eswe kakufumba “ni kulita.” (Jere. 30:11) Chipwe kuwanyingikine mumu liaka Yehova asele yikola ya mbumba kuli Azaria, nihindu muhasa kupwa ni shindakenyo ngwo Yehova kalingile yize yalita.

9. Sango jika jinatukwasa kunyingika mumu liaka Yehova alambile Azaria ni yikola ya mbumba?

⁹ Mbimbiliya yinatwehe sango jinji hakutwala kuli Mwanangana Azaria, yoze ananyingika nawa ngwo Mwanangana Uzia. (2 Mia. 15:7, 32) Mukanda 2 Sango ja Mianangana 26:3-5, 16-21 unambe ngwo, iye “walingile chipema kumeso ja Yehova.” Alioze unambe nawa ngwo kulutwe “mbunge yenyi yiyilifuza alinge uhenge.” Mwanangana kambile kulinga yuma yize te atamba kulinga wika kuli asasendote. Asasendote 81 kamulwezele ngwo chuma te anambe kulinga chili chipi nawa yeseka kumukinda. Kuchi iye alingile? Iye yalizata ni kwevwila uli! Sango jino jinatukwasa kunyingika mumu liaka Yehova alambile mwanangana ni yikola ya mbumba.

10. Mumu liaka kutwambile kunyingika yitela ha yize yeswe Yehova akulinga? Kuchi mutuhasa kupwa ni ujikijilo ngwo Yehova mashimbu eswe kakulinga yuma yize yalita?

¹⁰ Longeso lika lilemu mutuhasa kwandaho? Ha Sango ja Mwanangana Azaria, mutuwanaho yikuma yinji yize muyitukwasa kunyingika mumu liaka Yehova amumwesene lamba. Alioze nyi Mbimbiliya yiso kutulweza sango jeswe, yika twatamba kulinga? Shina mutulihula nyi pundu lume Yehova kalingile yuma yize yalita? Nyi mutufuliela ngwo Mbimbiliya yili ni sango jeswe jize twatamba kujikijila ngwo Zambi mashimbu eswe kakulinga yuma yize yalita? (Shimbi 32:4) Nyi twanyingika kanawa Yehova ngwe Mutu, mutumuzanga chinji ni kumujikijila. Ha chino yetu kutuchi kufupa kunyingika yitela ya yuma yeswe yize akulinga. Muze mutulilongesa Mbimbiliya, mutunyingika ngwo Yehova kali wamwenemwene, nawa mutukundama kuli iye.​—Samu 77:12, 13.

11-13. Kuchi tunanyingika ngwo Yehova kakwivwa kulemba? (Tala chizulie cha uputukilo)

¹¹ Muze mutulemba, yetu twakukundama kuli Yehova. Twakumuhalisa ni kumusakwila ni kumwita ukwaso. (Samu 32:8) Alioze nyi tunazange kupwa masepa ja Yehova, twatamba kupwa ni ushindakenyo ngwo iye kakwivwa kulemba chetu.

¹² Amwe atu kakwamba ngwo Zambi keshi kwivwa yilemba, nawa ngwo twakulemba hanga twivwe kanawa ku mbunge. Ayo kakufuliela ngwo yilemba yakutukwasa wika hanga tunyonge kanawa ha milonga yetu ni kuwana kumbululo lietu. Chamwenemwene, yilemba muyihasa kutukwasa ha chino. Alioze muze mutuhanjika ni Yehova ha kulemba, iye pundu lume kakutwivwa. Kuchi mutuhasa kupwa ni ushindakenyo ngwo iye kakutwivwa?

¹³ Achi tunyongenu ha chino: Muze Yesu te kanda achiza hano hashi, iye te kakumona chize Yehova te akukumbulula yilemba ya tuvumbi twenyi a hano hashi. Muze ejile hano hashi, Yesu kalembele kuli Tato wa mu malilu hakutwala ku manyonga jenyi ni yize te akwivwa. Limwe tangwa iye kalembele ufuku weswe. (Luka 6:12; 22:40-46) Kuchi te malemba ufuku weswe nyi te kananyingika ngwo Yehova keshi kwivwa kulemba? Yesu nawa kalongesele tumbaji twenyi chize atamba kulemba kuli Yehova. Kuchi te Yesu malongesa tumbaji twenyi kulemba nyi te kananyingika ngwo Yehova keshi kwivwa kulemba? Chamwenemwene, Yesu te kanyingika pundu ngwo Yehova kakwivwa kulemba. Iye mwene yamba ngwenyi: “Tata ngunakusakwila mumu wakungwivwa. Ngunanyingika wakungwivwavwa matangwa eswe.” Ni yetu nawa mutuhasa kupwa ni ujikijilo ngwo Yehova kakwivwa kulemba chetu.​—Yoa. 11:41, 42; Samu 65:2.

14, 15. (a) Kuchi mutuyuka ni tweta pundu yuma yize yalita ha kulemba chetu? (b) Kuchi kulemba chakwashile Kathy kukundama kuli Yehova?

¹⁴ Kumbululo lia kulemba chetu ha mashimbu amwe lishi kusoloka kanawa. Alioze nyi mutwita pundu chimwe chuma ha kulemba chetu, Yehova matukumbulula, nawa iye mapwa wamwenemwene kuli yetu. Nyi twasolwela Yehova yuma yeswe  yize yakutupinjisa, iye makundama kuli yetu.

¹⁵ Chakutalilaho, Kathy te kakwambujola chinji sango lipema, alioze chino te chishi kumwaha chiseke. * Iye yamba ngwenyi: “Yami chishi kuzanga mulimo wa kwambujola. Chekwamba ngwo, yami pundu te chishi kuuzanga.” Muze hahwima ku mulimo wenyi, umwe mukulwana wa mu chikungulwila yamukolweza hanga apwe pionelu wa shimbu lieswe. Iye yamba ngwenyi: “Mukulwana yangwaha mukanda hanga ngusinale. Yingukwata chiyulo chakupwa pionelu, alioze yinguputuka nawa kulemba kuli Yehova mashimbu eswe hanga angukwase kuzanga mulimo wa kwambujola.” Shina Yehova kakumbulwile kulemba chenyi? Muze hakumbanyisa miaka yitatu mu upionelu, iye yamba ngwenyi: “Kukalakala chinji mu mulimo wa kwambujola ni kulilongesa kuli mapangi akwo, yinguwahisa hakehe-hakehe uhashi wami wakwambujola. Haliapwila, ami chishi kuya wika mu mulimo wakwambujola​— alioze nakuuzanga chinji. Nawa haliapwila usepa wami ni Yehova unakolo chinji kuhiana chize wapwile kunyima.” Kulemba chakwashile Kathy hanga akundame kuli Yehova.

16, 17. (a) Yika twatamba kulinga hanga tukolese usepa wetu ni Yehova? (b) Yika mutulilongesa ha mutwe uze musulaho?

¹⁶ Yetu mutuhasa kukundama kuli Yehova ku miaka yeswe. Kashika tunungenu ni kumupanjika mashimbu eswe hakulilongesa Mbimbiliya, ni kuhanjika nenyi mashimbu eswe ha kulemba. Ni twachilinga usepa wetu ni Yehova muukola chinji nawa iye matukwasa hanga tukumbe yipikalo yetu.

¹⁷ Alioze ha mashimbu amwe twakupinda chinji ni yipikalo ya ku mwono wetu, chipwe ngwe twakulemba chinji kuli Yehova. Ha mashimbu jacho, ujikijilo wetu kuli Yehova muuhasa kukeketela. Mutuhasa kunyonga ngwo Yehova keshi kukwivwa kulemba chetu nawa mutuhasa kulihula nyi chamwenemwene tuli sepa lienyi. Nyi mutuputuka kunyonga chocho, yika mutuhasa kulinga? Mutwe uze musulaho muutukwasa ha chikuma chacho.