Ha matangwa waze asonekene Mbimbiliya, Zambi kazachishile akwa-kuyula hanga akwase atu jenyi ku lamba. (Akwa Kuyula 2:18) Mbimbiliya yinambe ngwo Tangwa lia Upatwilo lia kulutwe lia matangwa lili shimbu lia chiseke, Yehova Mukwa-kuyula wa hashi heswe, makalamwina atu ku uhenge.—Tanga Masamu 96:12, 13; Izaia 26:9.

Zambi hanasakula Yesu hanga akasopese atu ni ululi waze ali ni mwono ni waze hanafu. (Yilinga 10:42; 17:31) Atu anji kakufwa kuhona kupwa ni chinyingi cha Zambi. Kashika Tangwa lia Upatwilo, Yesu makahindwisa atu jacho hanga akanyingike ni kuzanga Zambi wamwenemwene.—Tanga Yilinga 24:15.

Atu makahindwisa ha kanunu umuwika wa miaka. (Usolwelo 20:4, 12) Ayo katamba kwaha shimbu hanga alilongese majila ja Zambi ni kumwononekena. Kulisa ni yize atu anji akwamba, Mbimbiliya yinambe ngwo atu makapatwila kulita ni yuma yize makalinga muze makahindwisa ku kufwa.—Tanga A-Roma 6:7.

Mbimbiliya nawa yinahanjika hakutwala ku tangwa lia Upatwilo lize mulikalingiwa, muze kanunu wa miaka kanda achiputuka. Tangwa liacho kalivuluka nawa ngwetu, songo, ngwe chize analilumbununa ha chikuma chitangu cha kaposhi yono. Ha tangwa liacho, Zambi makashiha atu eswe waze akwete yitanga yipi. (2 Petulu 3:7) Kashika twatamba kulifunga hanga tusolole zango lietu kuli Zambi.—Tanga 2 Petulu 3:9, 13.