SATANA nihindu uchili ni kulimika ni waze akuwayisa ni “mapanga akwo.” (Yoa. 10:16) Ha shimbu likepe lize iye alinalio, Ndiapu kanazange kupihisa ufulielo wa tuvumbi anji a Yehova. (Tanga Usolwelo 12:9, 12.) Alioze mutuhasa kulimika nenyi ni kumukumba. Mbimbiliya yinambe ngwo: “Limikenu ni Ndiapu mba kumakanuchina.”—Tia. 4:7.

²Atu anji kakuseha nyonga lia kwamba ngwo Satana katwamako. Kuli ayo, Satana ni andemoniu kali wika atu waze akusolola ha mikanda, ha yinema ni mu yizulie ya yinema yize akuheha nayo twanuke. Atu jacho kakunyonga ngwo mutu mukwa-mana kechi kuhasa kufuliela ngwenyi ma spiritu api kwali. Shina yino yakupikala Satana amu atu akufuliela ngwo iye ni andemoniu katwamineko? Ka. Mumu chili chashi Satana kupiangula atu waze keshi kutayiza ngwo iye katwamako. (2 Kori. 4:4) Satana kakuneha manyonga wano hali atu hanga iye ahase kwaapiangula.

2, 3. (a) Mumu liaka Satana wakuzanga atu afuliele ngwo iye katwamineko? (b) Kuchi tunanyingika ngwetu Satana katwamako?

 ³ Amu tuli atu ja Yehova, keshi kutwonga. Mumu tunanyingika ngwetu Ndiapu kwali. Kuchi tunachinyingika? Mbimbiliya yinatulweze ngwo Satana kahanjikile ni Eva kupalikila muli kapela. (Uputu. 3:1-5) Iye kahanjikile ni Yehova, hakukumika yitanga ya Yombi. (Yombi 1:9-12) Satana kesekele kupiangula Yesu. (Mateu 4:1-10) Nawa muze Yesu te hapwa Mwanangana ha 1914, Satana yaputuka ‘kwasa jita’ ni akuwayisa waze achili hano hashi. (Uso. 12:17) Jita yacho muyichinunga ndo musono, mumu Ndiapu machifupa kupihisa ufulielo wa waze akuwayisa ni wa mapanga akwo. Mba tukumbe jita yacho, twatamba kulimika ni Satana ni kununga ni kukolesa ufulielo wetu. Mutwe uno muuhanjika yikuma yitatu yize muyitukwasa kulinga chocho.

4. Kuchi Satana ali chilweza chinene cha kulizata?

⁴ Satana kakulizata chinji. Mungelo yono mupi kakumikine ulite wa Zambi wa kuyula, ni kweseka kulingisa akwo hanga amuwayile iye kuhiana kuwayila Yehova. Kashika iye kali chilweza cha kulizata chinji. Kashika, kwehuka kulizata ni kupwa akwa-kulikehesa yili jila yimwe yize mutuhasa kulimika ni Satana. (Tanga 1 Petulu 5:5.) Mba kulizata yika chinalumbunuka? Shina kulizata chili chipi mashimbu eswe nyi?

5, 6. (a) Kulizata yika chalumbununa? Lumbununa. (b) Mumu liaka kulizata chili chuma chipi, nawa yilweza yika ya mu Mbimbiliya yinasolola kulizata chacho?

⁵ Mukanda umwe walumbununa ngwo kulizata chalumbunuka mutu kupwa ni nyonga lia kulifuliela mwene ni kulisa vumbi mwene. Chinalumbunuka nawa “mutu kwivwa kuwaha ha mukunda wa yuma yipema yize iye hanji atu eka alinga hanji ha yikumba yipema ali nayo.” Ewa, kwivwa kuwaha mujila yamutapu au hi chipi ko. Postolo Paulu kambile kuli mandumbu ku Tesalonika ngwenyi: “Yetwene twakulisamba hali yenu mu Yikungulwila ya Zambi, ha utunu wenu ni ufulielo mu yihungumiona yenu yeswe ni mu lamba lize nwakulihumikiza nalio.” (2Tesa. 1:4) Chekwamba, kwivwa kuwaha ha mulimo wa akwetu chipwe hali yetwene chili chipema chinji. Kashika, kutwatambile kwivwila sonyi asoko jetu, chisemewa chetu hanji ku chihela kuze twakolelele.—Yili. 21:39.

⁶ Alioze kulizata muchihasa kupihisa usendo wetu ni Yehova. Kulizata muchihasa kutwivwisa uli muze matutoweza. Nawa kulizata chacho muchihasa kutulingisa hanga tuhone kulikehesa ni kutayiza chiyulo chize anatwehe. (Samu 141:5) Kulizata chino kanachilumbununa ngwo chili kulinyongena chinji yetwene, chipwe “kupwa ni mbunge yize akusolola atu waze akufuliela, kanji-kanji ngwo ayo kahiana akwo.” Yehova keshi kuzanga kulizata chacho. (Eze. 33:28; Amo. 6:8) Alioze Satana kakuzanga chinji kulizata muze akumona atu mamwimbulula ha kulisuta ene. Achinyonga chize Satana awahilile muze Nimorote, Falau ni Abasalome alizachile ha kulisamba ene! (Uputu. 10:8, 9; Kutuhu. 5:1, 2; 2 Samue. 15:4-6) Kulizata che chalingishile Kene kutokesa usendo wenyi ni Zambi. Yehova katowezele Kene, alioze ha mukunda wa kulizata chenyi iye kevwile ko. Kene te mukwa-pami, yalengulula utowezo wa Zambi, chocho yehuka chiyulo cha Yehova.—Uputu. 4:6-8.

7, 8. (a) Katonde yika, nawa kuchi katonde akusolola kulizata? (b) Kuchi kulisuta muchihasa kupinjisa chikungulwila?

⁷ Musono, atu kakulizata chinji mu majila eka ni eka. Kulizata ha mashimbu akwo chakusoloka hakupwa ni katonde. Kulita ni umwe mukanda, katonde kanalumbunuka ngwo kumwesa lamba atu akuvungu likwo. Kamulumbununa nawa ngwo  kali “nyonga liakwamba ngwo atu aku minyachi yimwe kali ni yitanga yipema, utotombo kuhiana atu aku minyachi yikwo.” Katonde kakuneha vunda, jita ni kulishiha.

⁸ Chochene, yuma yacho kuyatambile kupwa mu chikungulwila cha akwa-Kristu. Alioze kulizata muchihasa kulingisa mandumbu ahone kulivwashana mukachi ko ni kulinga yuma yize kuyalitelele. Ayi yalingiwile kuli amwe akwa-Kristu aku sekulu yitangu, waze Tiangu ahulile kanawa ngwenyi: “Jita kulihi yinakatuka? Kulitachika hakachi kenu, kulihi chinakatuka?” (Tia. 4:1) Nyi mutuvwila akwetu kole ni kumona ngwe tuli alemu kuhiana ayo, chino muchihasa kutulingisa hanga twambe hanji kulinga yuma yize muyinehena akwetu yinyengo. (Yishi. 12:18) Pundu lume, kulisuta muchihasa kuneha kapinda mu chikungulwila.

9. Kuchi Mbimbiliya yakutukwasa kwehuka katonde ni kulizata cheka ni cheka? (Tala chizulie cha uputukilo.)

⁹ Nyi twalimona ngwe tuli alemu chinji kuhiana akwetu, twatamba kwiwuluka ngwetu Yehova kakwivwila kole “mweswe mukwa-kulengumuka mu mbunge.” (Yishi. 16:5) Twatamba nawa kuhengula mbunge yetu ni kulihula ngwetu, ‘Shina nakunyonga ngwami nguli mupema chinji kuhiana atu a ku chifuchi hanji a ku vungu hanji a ku munyachi ukwo?’ Nyi twanyonga chocho, tunavulama ngwetu Zambi mwe “watangile mavungu eswe ja atu.” (Yili. 17:26) Ha chino, yetu eswe tuli a ku munyachi umuwika mumu yetu eswe twakatuka kuli Alama. Chili uhepuke kunyonga ngwetu, Zambi katangile minyachi yimwe yipema kuhiana yikwo. Nyi twanyonga chenacho, tuneche Satana hanga apihise zango ni kulivwashana chize akwa-Kristu akwete. (Yoa. 13:35) Mba tuhase kulimika ni Satana ni kumukumba, twatamba kwecha kulizata.—Yishi. 16:18.

¹⁰Satana “kanayulu hano hashi,” nawa iye kanasongwelaho. (Yoa. 12:31; 1 Yoano 5:19) Yuma yinji yize yakusoloka hano hashi kuyalitele ni shimbi ja mu Mbimbiliya. Chino kuchishi ni kulumbunuka ngwo yuma yeswe ya hano hashi yili yipi, ka. Chipwe chocho, twatamba kunyingika ngwetu Satana mahasa kuzachisa yuma yacho hanga atupiangule tulinge shili. Mahasa nawa kutweseka hanga tuzange yuma ya hano hashi ni kulengulula kuwayila Yehova.—Tanga 1 Yoano 2:15, 16.

10, 11. (a) Mumu liaka muchihasa kupwa chashi kuzanga yuma hano hashi? (b) Yika yasolokele kuli Ndima ha kuzanga yikumba ya hano hashi?

¹¹ Amwe akwa-Kristu a ku sekulu yitangu noo kazangile chinji yuma ya hano hashi. Chakutalilaho, Paulu kasonekene ngwenyi: “Ndima hanangwehuka, mumu kanafwila yuma ya mwakono.” (2 Timo. 4:10) Mbimbiliya kuyishi kutulweka yuma ya hano hashi yize Ndima azangile chinji, yize yamulingishile hanga ahichike Paulu. Mutuhasa kwamba ngwetu Ndima kaputukile kuzanga chinji yikumba ya hano hashi kuhiana mulimo wa Yehova. Nyi chino chili chamwenemwene, pundu Ndima katokesele mulimo upema wa kulingila Zambi. Shina kalingile kanawa nyi? Ka. Ndima kachi kanungine ni kupwa chikwashi cha Paulu. Yuma ya hano hashi kuyakamuhele nichimwe chuma kuhiana yize te Yehova mamwaha!—Yishi. 10:22.

12. Kuchi Satana mahasa kutupiangula ha kuzachisa usolo wa “upite”?

¹² Ni musono chino muchihasa kulingiwa. Amu tuli akwa-Kristu, hi chipi ko kufupa kulia cha yetwene ni cha asoko jetu. (1 Timo. 5:8) Tunanyingika ngwetu Yehova kakuzanga hanga tuwahilile ku mwono, mumu iye kasele Alama ni Eva mu paraisu yipema hanga atwamemo. (Uputu. 2:9) Alioze Satana mahasa kutupiangula ha kuzachisa usolo wetu wa kufupa “upite.” (Mateu 13:22) Atu anji kakunyonga ngwo mbongo ni yikumba muyihasa kwaanehena uwahililo hanji lufuma. Nyi twakunyonga  chenacho, mutuhasa kutokesa chuma chipema chize tukwete, usepa wetu ni Yehova. Yesu yamba ngwenyi: “Niumwe mahasa kulingila miata aali: mumu hanji mavwila kole umwe, mazanga mukwo; hanji makakaminya kuli umwe, malelesa mukwo. Kunwahashile kulingila Zambi ni kulingila upite hamuwika.” (Mateu 6:24) Nyi twapwa tupinji a upite, mutwehuka kulingila Yehova. Chino che Satana anazange hanga tulinge. Kanda twecha mbongo hanji yikumba yipwe yilemu kuhiana usepa wetu ni Yehova. Mba tuhase kulimika ni Satana ni kumukumba, twatamba kupwa ni nyonga lipema hakutwala ku upite.—Tanga 1 Timoteu 6:6-10.

13. Kuchi atu a hano hashi akusolola nyonga lipi ha ulo?

¹³ Nawa muheto ukwo wa Satana uli utanji. Atu anji kakunyonga ngwo kupwa ni ushishiko kuli mutu yoze alimbata nenyi kuchishi nawa ni ulemu, nawa ngwo chakujingalisa mutu. Chakutalilaho, umwe pwo mukwa-yiheho, yamba ngwo chili chikalu kupwa mukwa-kushishika. Iye yamba nawa ngwenyi: “Ami chanyingikine mutu yoze washishika hanji yoze unazange kupwa mukwa-kushishika.” Mukwo yamba ngwenyi: “Ami chishi ni ushindakenyo nyi pundu lume hano hashi mutu mahasa kulimbata wika ni mutu umuwika ku mwono wetu weswe.” Satana kakuwahilila chinji muze mamona akwa-lufuma mahanjika chipi hakutwala ku ulo uze Zambi asele. Ndiapu, keshi kuzanga ulo, nawa iye kazangile hanga ulo wende kanawa. Mba tuhase kulimika ni Satana ni kumukumba, twatamba kupwa ni nyonga lipema lia Zambi hakutwala ku ulo.

14, 15. Yika muhasa kulinga nyi makweseka hanga ulinge utanji?

¹⁴ Chipwe tuli mu ulo hanji tuli twamishi, nihindu twatamba kusa tachi hanga twehuke yuma yeswayo ya utanji. Shina chino chili chashi nyi? Ka hi chashi ko! Chakutalilaho, ni uchili mukweze kota wakwivwa chize masepa je aku shikola akulisamba muze malinga utanji ni mutu mweswawo anazange. Ayo mahasa nawa kulisamba ha kulitumina sango ni yuma yikwo ya utanji mu matelefone. Mu yifuchi yimwe, kutumina yuma ya utanji chili ngwe kutumina mutu pornografia hakutwala kuli twanuke. Mbimbiliya yinambe: “Chinenu utanji. Milonga yize yeswe mutu mavulumuna yili haze lia mujimba; alioze yoze malinga utanji mavulumuna mujimba wenyi mwene.” (1 Kori. 6:18) Yikola yize yakwiza chinji ha kulimona cha lunga ni pwo, yakuneha lamba linji ni kufwa. Nawa akweze waze hanalingi utanji muze kanda achimbata kakwivwa yikola yinji ku mbunge ha chikuma chino. Kuheha cha hano hashi chakutulingisa tutayize ngwetu nyi twehuka shimbi ja Zambi kutuchi kumona lamba ni limwe. Nyi mutufuliela mahuza wano, mahasa kutupiangula ku “kwonga cha shili.”—Hepre. 3:13.

¹⁵ Nyi wevwa usolo wa kulinga utanji, yika muhasa kulinga? Nyingika ngwe uli ni umwe ulelu. (Roma 7:22, 23) Lemba kuli Zambi hanga akwehe tachi. (Fwili. 4:6, 7, 13) Ehuka yuma yize muyihasa kukutwala ku utanji. (Yishi. 22:3) Nawa nyi makweseka hanga ulinge utanji, watamba kwehuka kafuji-fuji.—Uputu. 39:12.

16. Yika Yesu ambile muze Satana esekele kumupiangula, nawa kuchi mutuhasa kukaula chilweza chenyi?

¹⁶ Yesu hanatwehe chilweza chipema. Iye kakamupiangwile ni yilakenyo ya Satana. Nawa iye kakapwile ni kunyonga ha yilakenyo yacho. Iye kawashi-kawashi yamba kuli satana ngwenyi: “Chinasonewa ngwo.” (Tanga Mateu 4:4-10.) Yesu te kanyingika Liji lia Zambi, kashika chapwile ­chashi  ­kutongola yisoneko muze Satana esekele kumupiangula. Mba tuhase kulimika ni Satana ni kumukumba, kutwatambile kuliecha hanga atupiangule ku usolo wa kulinga utanji.—1 Kori. 6:9, 10.

¹⁷ Kulizata, zango lia kupwa ni yikumba ni utanji yili wika miheto yitatu ya Satana. Alioze kuli miheto yikwo nawa. Chakutalilaho, amwe akwa-Kristu kali ni asoko waze akulimika no hanji masepa aku shikola waze akwaachoka. Akwo katwama mu yifuchi muze manguvulu akweseka kukanjisa mulimo wa kwambujola sango lipema. Tunanyingika ngwetu mutuhasa kumona yihungumiona yacho. Yesu kambile ngwenyi: “Kumakanuvwila kole kuli eswe mumu ha jina liami: alioze yoze manyongonona ndo ku songo kumakamulamwina.”—Mateu 10:22.

17, 18. (a) Miheto yika yikwo yize Satana akuzachisa, nawa mumu liaka yino muyihasa kupwa kuli yetu? (b) Yika muyikalingiwa kuli Satana, nawa kuchi chino chinatukolweza hanga tunyongonone?

¹⁸ Mba kuchi mutuhasa kulimika ni Satana ni kumukumba? Yesu kambile ngwenyi: “Mu uhumikizo wenu nukazuke mwono wenu.” (Luka 21:19) Mutu niumwe kechi kuhasa kutulinga upi uze muuhasa kununga ndo ku miaka ya mutulo. Niumwe mahasa kupihisa usepa wetu ni Zambi wakwihi, shina wika nyi yetwene twecha hanga chilingiwe. (Roma 8:38, 39) Chipwe amwe tuvumbi ashishika a Yehova mafwa, chino kuchishi ni kulumbunuka ngwo Satana kakumba, ka. Yehova kumakaahindwisa. (Yoa. 5:28, 29) Alioze Satana keshi ni chilakenyo cha mwono wa mutolo. Muze makanongesa hashi hapi ha Satana, iye kumakamunyasa mu jondo ha kanunu umuwika wa miaka. (Uso. 20:1-3) Kusongo lia kanunu umuwika wa miaka wa kuyula cha Kristu, “makatusula Satana ku zuwo lienyi lia ususu” hanga akeseke chakasula atu angunu. Mba kulutwe lia yino yuma, makamwonwona. (Uso. 20:7-10) Satana kechi kapwa ni mwono wa mutolo, alioze ena mukapwa nawo! Nunga ni kulimika ni Satana, ni kukolesa ufulielo we. Kashika, muhasa kulimika ni Satana ni kumukumba!