Muze wakwivwa maliji ngwo, “Songo linakundama” yika wakunyonga? Shina wakunyonga kwiza cha Meseya hanga akatwale atu apema mu malilu ni kwocha atu api mu kahia? Nyi wakunyonga kufwa cha mutu? Kunyonga yuma yacho muyihasa kulingisa amwe atu hanga alihulumbe, akwo mahasa kuhangulula hanji kusa miselo.

Mbimbiliya yinambe ngwo: “Songo kumulikeza.” (Mateu 24:14) Chikuma chochene kanachivuluka ngwo, “tangwa linene lia Zambi” nawa ngwo, “Armagedone.” (Usolwelo 16:14, 16) Kwamba umwenemwene, chino chili kalumbanganyiso wa mayingeleja hakutwala ku chikuma chino nawa kakwamba yuma yinji ya saki. Alioze Mbimbiliya yene, yinambe lume zwalala ha chikuma chino—yinalumbununa yize songo linalumbunuka ni yize songo kulishi kulumbunuka. Liji lia Zambi linatukwase nawa kunyingika nyi songo hiliakundama. Alioze kuhiana yeswe ai, yinatulweze chize mutuhasa kulilamwina! Chitangu, tuchilumbununenu kanawa yize songo linalumbunuka ni yize kulishi kulumbunuka. Haliapwila mba yika chamwenemwene songo linalumbunuka kulita ni Mbimbiliya?

1. SONGO HI KUNONGESA KO HASHI NI KAHIA.

   Mbimbiliya yinambe ngwo: “[Zambi] wasele fundamentu ya hashi hanga kuyichi kanyika ndo ku miaka ya mutulo.” (Samu 104:5) Chisoneko chino ni yisoneko yikwo yinatwehe shindakenyo ngwo Zambi kechi keza kanongesa hashi chipwe kwecha hanga anongesoho, ka!—Chilumbununyi 1:4; Izaia 45:18.

2. SONGO HI CHUMA KO CHIZE KUCHISHI KATALILO.

   Mbimbiliya yinambe ngwo, songo lili ni tangwa lize mulikeza—Zambi hanatese tangwa lize songo mulikeza. Tunatange chino: “Alioze ha kutwala ku tangwa lize ni ola yize niumwe kayinyingikine, chipwe angelo a mwilu, chipwe mwe Mwana ka, ndo mwe Tata, wika. Kanyamenu, lawokenu, lembenu: mumu kunwanyingikene muze mwaka muupwa.” (Marku 13:32, 33) Pundu lume, Zambi (“Tata”) hanatese shimbu lize songo muliza.

3. SONGO KECHI KALINEHA KULI ATU HANJI KULI YIMWE YUMA MUYIKAKATUKA MWILU.

   Songo yika mulikaneha? Mukanda wa Usolwelo 19:11 unambe ngwo: “Namwene lilu lia kwazulula; kumanyi, kavwalu mutoma, ni yoze unatwamaho jina lienyi ngwo, Wamwenemwene, Keshi-mahuza.” Versu 19 yinanungu nyi kwamba chino: “Namwene mwe ngongo, ni mianangana ja hashi, ni mbunga ja maswalale jo, kanakunguluka mukwasa jita ni yoze watwamine hali kavwalu, ni mbunga ja maswalale jenyi.” (Usolwelo 19:11-21) Chipwe ngwe maliji anji hano kali yijimbikilo, nihindu mutuhasa kwaanyingika kanawa; Zambi makatuma chilombo cha angelo hanga akwonone akwa-kole jenyi.

1. SONGO LILI KUNONGESA CHA MANGUVULU JA ATU.

   Mbimbiliya yinambe ngwo: “Ha matangwa ja mianangana aze Zambi ya mwilu makakolesa umwe wanangana uze kuuchi kanonga. Chipwe  chiyulo chawo kechi kachiswanyisa kuli atu eka. Muukafwenya mawanangana ano akwo ni kuasulisa, alioze wene muukakola wa mutolo.” (Daniele 2:44) Ngwe chize twamba kulu ha lutope 3, kumukukapwa kunongesa cha “mianangana ja hashi, ni mbunga ja maswalale jo” waze makakunguluka ni kwasa “jita ni yoze watwamine hali kavwalu, ni mbunga ja maswalale jenyi.”—Usolwelo 19:19.

2. SONGO LILI KUHWA CHA JITA, UPUPILO NI UHENGE.

   Zambi mamanununa “jita ndo ku songo lia hashi.” (Samu 46:9) “Akwa ululi makatungisa chifuchi; atu angunu kumakalindulukamo. Alioze yingulungulu kumakaateta mu chifuchi ni akwa mafwefwe makaatukulamo.” (Yishima 2:21, 22) “Talenu, ngunatange yuma yeswe yaha.”—Usolwelo 21:4, 5.

3. SONGO LIA MAYINGELEJA WAZE AKUHONA VUMBI ZAMBI NI ATU.

   “Aprofeta kanaprofeteza mahuza, ni asasendote kanayulu nikulita ni liji lio . . . alioze chika munulinga muze songo mulikeza?” (Jeremia 5:31) “Anji kumakamba kuli yami ha tangwa lize ngwo, Mwene, Mwene, te kutwaprofetezele mu jina lienu, nyi? Kutwatuhwishile andemoniu mu jina lienu, nyi? Kutwalingile yipupu yinji, mu jina lienu nyi? Hohene mungukaakumbulula ngwami, Chanunyingikine nilimwe tangwa: katukenu kuli yami, yenu nwakulinga uhulia.”—Mateu 7:21-23.

4. SONGO LIA ATU WAZE ANANUNGU NI KULINGA YUMA YIPI.

   Yesu Kristu yamba ngwenyi: “Uno we upatwilo ngwo, Pangu hilineza hano hashi, alioze atu azangile milima, hi pangu ko; mumu yitanga yo yapwa ya ungulungulu.” (Yoano 3:19) Mbimbiliya yinalumbununa unongeso wa hashi heswe ha mashimbu ja Noa, lunga mukwa-ululi. “Alioze malilu aze a haliapwila, ni hashi, ku liji limuwika hanayitulikila kahia, kanayifungu ndo ku tangwa lia upatwilo ni kwonwona cha yitanganyanyi.”—2 Petulu 3:5-7.

Tala, kwiza cha “tangwa lia upatwilo ni unongeso” kanachitesa ni unongeso wa “hashi” ha mashimbu ja Noa. Hashi haka anongesene? Hashi hetu muhachinunga ni haliapwila alioze ‘kanongesene “yitanganyanyi”—akwa kole ja Zambi waze apwileho. Ha shimbu lia “tangwa lia upatwilo” lia Zambi, waze akusakula kulimika ni Zambi no makapwa kunongesa. Alioze masepa ja Zambi makaalamwina, ngwe chize Noa ni usoko wenyi alamwinyine.—Mateu 24:37-42.

Achinyonga kama chize hashi muhakapema muze Zambi makwonona atu eswe waze akwete yitanga yipi! Pundu lume, sango ja mu Mbimbiliya hakutwala ku songo jili mujimbu wa yuma yipema chinji, hi yipi ko. Nihindu hanji muhasa kulihula: ‘Shina Mbimbiliya yinatulweze tangwa lize songo muliza nyi? Shina hiliakundama? Kuchi munguhasa kulilamwina?’