Ha mashimbu wano kunasoloka mikanda yinji yize yinahanjika chinji hakutwala kuli atu waze akwamba ngwo Zambi katwamineko. Mikanda yacho atu anji anayizange nawa yinanehe chimbangwinya ni kuzwela. Hakutwala ku mikanda yacho David Eagleman, mukwa-ciencia ya kuhengula wongo, yasoneka ngwenyi: “Akwa-kutanga amwe kakunyonga yuma yeka . . . kakwamba ngwo akwa-ciencia kakunyonga ngwe kanyingika yuma yeswe.” Yamba nawa ngwenyi, “Ciencia yipema nihindu yakwazulula mana ja atu, nawa kuyakusolola yuma yaha yize yakukomwesa.

Hakupalika cha mashimbu, akwa-ciencia waze akwete yinyingi yinji kawanyine yuma yinji ya ukomweso ha yihula yo yikalu hakutwala ku chisemewa. Amwe, nawa kalingile uhenge unji ha mulimo wacho. Isaac Newton kapwile umwe mukwa-ciencia mulemu chinji chize ku mashimbu akunyima. Iye kasolwele chize tachi ja mavu ja kusongwela ma planeta, tutongonoshi ni ma galaxia mu chifuchi. Katuhwishile uhashi wa kwalula chimwe chihanda cha matematika chize akuzachisa ku computador, uhashi wa kuya mwilu ni fisica nuclear. Newton kalingile nawa alquimia, yimwe ciencia yize yakuzachisa uhashi wa tutongonoshi ni yimwe yuma ya yipupu hanga eseke kwalumuna unengu ni utale hanga upwe oru.

Hakupalika cha miaka 1,500 muze Newton te kanda achisemuka, Ngregu Ptolomeu mukwa-kuhengula tutongonoshi, kahengwile mwilu ni meso jenyi wika. Iye yahengula tutongonoshi nawa yahasa kupwa ni uhashi wakulinga mapa. Alioze yafuliela ngwenyi, hashi he hamuchima lia yuma yeswe. Carl Sagan, kasonekene hakutwala kuli Ptolomeu ngwenyi: “Nyonga lino te akutayiza ha unji wa 1,500 ja miaka linasolola ngwo chipwe umwe mutu mukwa-mana anji mahasa kwamba yuma yize kuyalitele.”

Musono, akwa-ciencia no kakupinda ni kapalia yomwene mu milimo yo. Shina limwe tangwa makeza kawana umwe ulumbunwiso upema wa chifuchi nyi? Ewa twatamba kutayiza ngwetu, ciencia hiyaheta kusuku chinji, nawa kuyakutukwasa chinji, alioze twatamba kunyingika ngwetu, ciencia kuyishi kulinga yuma yeswe. Mukwa-fisica, Paul Davies kambile ngwenyi: “Kufupa-fupa kanawa chuma chize muchineha ulumbunwiso walita nawa ungunu kuli eswe hi chashi ko.” Maliji wano kutuchi kuhasa kwaahangulula ngwetu: Atu kechi kuhasa pundu kunyingika chisemewa. Kashika muze akusolola jimwe sango jakwamba hakutwala ku ciencia hanga ahane umwe ulumbwinwiso wa yuma yize yatwama mu chifuchi, kutwatambile kutayiza pundu sango jacho ni mbunge yeswe.

Mbimbiliya yakuhanjika hakutwala ku yimwe yuma ya ukomokeso ya chisemewa ngwo: “Yino yuma yapwa ngwe chihanda cha yilinga [ya Zambi]; twakwivwa lufuma wenyi hwe-hwe wika.” (Yombi 26:14) Alioze kuli yuma yinji ya yinyingi yize atu kechi kuhasa kunyingika kanawa. Kwamba pundu, maliji asonekene postolo Paulu waze halinga miaka 2,000, nihindu achili amwenemwene: “Mana ni yinyingi ya Zambi, kuyajondoka nikulumbama ngwe upite! Upatwilo wenyi keshi kuhasa kuunyonga weswe! Majila jenyi keshi kuhasa kuafunjika eswe!”—A-Roma 11:33.