1. Yika yize atu akunyonga ngwetu yipema?

TWATWAMA hashi haze hali yitanga yinji ya upangala. Chakutalilaho, atu anji kakunyonga ngwo chili chipema kulinga utumwa hanji kupomba ni mutu yoze kuwalimbachile nenyi. Yinema, mikanda, miaso, ni kuheha, yeswayi yakusolola wika yitanga ya utanji. (Masamu 12:8) Alioze Yehova mahasa kutukwasa hanga tutwame nikulita ni shimbi jenyi. Mutuhasa kupwa atu a mbunge yitoma, hanji kupwa angunu hano hashi ha too ni yitanga ya utanji.—Tanga 1 A-Tesalonika 4:3-5.

2, 3. (a) Mumu liaka twatamba kwehuka manyonga api? (b) Yika mutulilongesa ha mutwe uno?

² Mba tuwahise mbunge ya Yehova, twatamba kwehuka yuma yeswe yize iye akuvwila lwaji. Alioze amu tuli akwa-shili, mutuhasa kupwa mu cheseko cha kulinga utanji ngwe chize yishi akuzombekela ku nguna. Nyi twaputuka kupwa ni manyonga a utanji, twatamba kwehuka kawashi-kawashi. Nyi kutwachilingile, manyonga a utanji makola muli yetu, mba muze  mukupwa umwe uhashi wa kulinga shili, mutuhasa kuyilinga. Kashika Mbimbiliya yinambe ngwo: “Usolo muze hiwakola . . . muusema shili.”—Tanga Tiangu 1:14, 15.

³ Manyonga a utanji mahasa kukola mu mbunge. Kashika twatamba kukeya chinji ha yize mutuputuka kunyonga. Nyi twehuka manyonga api, yetu mutwehuka kulinga utanji ni lamba lize liakwizako. (A-Ngalishia 5:16) Ha mutwe uno, mutulilongesa yikuma yitatu yize muyitukwasa kulimika ni manyonga api: usepa wetu ni Yehova, usongwelo wa mu Liji lienyi, ni ukwaso wa kuli mandumbu akola mu Ukristu.

4. Mumu liaka chili ni ulemu kuli yetu kukundama kuli Yehova?

⁴ Mbimbiliya yinambe kuli waze anazange ‘kukundama kuli Zambi’ hanga ‘apemese moko jo’ ni kutomesa mbunge jo.’ (Tiangu 4:8) Nyi mutupwisa Yehova Sepa lietu mupema, tuchikulinga wika yuma yize muyimuvwisa kuwaha, alioze mutuzanga nawa hanga manyonga jetu amuvwise kuwaha. Nyi manyonga jetu kali atoma hanji angunu, ni mbunge yetu nawa muyipwa yitoma. (Masamu 24:3, 4; 51:6; A-Fwilipu 4:8) Yehova kananyingika ngwenyi tuli yihenge nawa ngwenyi mutuhasa kuputuka kunyonga hakutwala ku yuma ya utanji. Alioze amu kutwazangile kuvwisa Yehova chinyengo, kashika twakusa tachi hanga twehuke manyonga api. (Uputukilo 6:5, 6) Twakusa tachi jinji hanga tuhase kulinga yuma yize muyipwisa manyonga jetu atoma.

5, 6. Kuchi kulemba muchihasa kutukwasa hanga twehuke utanji?

⁵ Ni twalemba ni kwita ukwaso kuli Yehova iye matukwasa kuchiza manyonga eswe aluchisa waze ali mu mbunge. Iye kakutwaha Spiritu yenyi Yisandu hanga yitwehe tachi jize mujitukwasa kupwa ni mbunge yitoma. Mu yilemba yetu mutuhasa kulweza Yehova ngwetu tunazange kupwa ni manyonga apema waze mamwiwvisa chiseke. (Masamu 19:14) Tumwitenu ni kulikehesa cheswe hanga atukwase kwehuka usolo weswe upi uze muuhasa kututwala ku shili. (Masamu 139:23, 24) Tunungenu ni kwita ukwaso hanga twehuke kulinga yitanga ya utanji ha kulinga yuma yipema, chipwe ngwe chino muchipwa chikalu.—Mateu 6:13.

⁶ Muze te kanda tuchililongesa hakutwala kuli Yehova, te tukwete yitanga yize iye keshi kuzanga, kota nihindu mutuchipinda ni yitanga yacho yipi. Alioze Yehova mahasa kutukwasa hanga twalumune yitanga yetu ni kulinga yuma yize muyimuvwisa kuwaha. Chakutalilaho, muze Mwanangana Ndawichi alingile utanji ni Mbate-Shipa iye yalikonyeka nawa yeta kuli Yehova hanga amwehe “mbunge yipema” ni kumukwasa hanga apwe mukwa-kwononoka. (Masamu 51:10, 12) Nyi ku mashimbu a kunyima twapwile ni manyonga a utanji nawa mutuchinunga ni kupinda no, Yehova mahasa kutukwasa hanga tumwononokene ni kulinga yuma yipema. Iye mahasa kutusongwela hanga tupwe ni manyonga apema.—Masamu 119:133.

7. Kuchi Liji lia Zambi mulihasa kutukwasa kwehuka manyonga api?

⁷ Yehova mahasa kukumbulula kulemba chetu hanga atukwase kupalikila mu Liji lienyi, Mbimbiliya. Mu Mbimbiliya, mutuwanamo mana ja Zambi, waze apema. (Tiangu 3:17) Muze mututanga Mbimbiliya matangwa eswe, mutupwa ni manyonga  apema mu mbunge. (Masamu 19:7, 11; 119:9, 11) Nawa mu Mbimbiliya muli yilweza ni utowezo uze muutukwasa kwehuka manyonga ni usolo upi.

8, 9. (a) Mumu liaka umwe mukweze walingile utanji ni umwe pwo chikoi? (b) Yika yize mutuhasa kwehuka ha chilweza chize chili mu mukanda wa Yishima kapitulu 7?

⁸ Mu mukanda wa Yishima 5:8, Liji lia Zambi linatutoweza hanga twehuke yitanga ya utanji. Mu kapitulu 7, tunatange chishima cha umwe mukweze wa lunga yoze ha ufuku wayile ni kwendangana hakamwihi ni zuwo lia umwe pwo chikoi. Pwo liacho te hamakano lia tapalo ali, “ni mazalo a chikoi.” Pwo liacho yaya ndo kuli mukweze, yamukwata ku koko, yamumbejela ni kumwamba amwe maliji waze akolesele usolo wenyi. Mukweze kakehukile usolo wacho, ha chino, iye yalinga utanji ni pwo wacho. Chipwe ngwe nyonga lia kulinga utanji kakapwile nalio, nihindu aye yalinga utanji. Aye yapwa ni kapalia munji ku mwono. Nyi kanyingikine utoji uze te analikokela, kachi kachinyine  mwana-pwo wacho!—Yishima 7:6-27.

⁹ Chizechene nawa ngwe mukweze yono wa lunga, ni yetu nawa mutuhasa kukwata chiyulo chize kuchapemene ha mukunda wa kuhona kunyingika utoji uze mutulikokela. Chakutalilaho, ha ufuku yimwe yisaji ya yinema yakusolola yizulie ya sonyi, kashika muchihasa kupwa chipi kufupa-fupa yizulie mu chisaji. Nawa mutuhasa kulisa mu upi nyi kutwanyingikine yize tunafupu mu internet hanji mu ma site waze akusolola yizulie ya utanji ngwe pornografia. Yuma yino muyihasa kutunehena usolo wa utanji, ni kutuhonesa kwononokena Yehova.

10. Mumu liaka chili chipi kulitenya-tenya? (Tala chizulie chili ha uputukilo.)

¹⁰ Mbimbiliya yinatulweze nawa chize mandumbu a malunga ni a mapwo atamba kulikata. (Tanga 1 Timoteu 5:2.) Akwa-Kristu kakusolola wika zango lia ulo kuli mutu yoze alimbata nenyi hanji kuli yoze anafupu kulimbata nenyi. Ayo keshi kutenya-tenya hanji kulendekela mutu yoze kalimbachile nenyi. Amwe mahasa kunyonga ngwe kusolola zango lia ulo kuli umwe mutu ha kulenga, kulitalatala yeswe ai, ayo kakuyimona ngwe hi yuma yipi ko mumu kasolo kulikwata ku mujimba. Nyi atu aali waze kalimbachile malitenya-tenya ayo mahasa kuputuka kupwa ni manyonga api, chino muchihasa kwatwala kulinga utanji. Chino hichinalingiwa ku mashimbu akunyima, ni musono muchihasa kulingiwa.

11. Yika mutuhasa kulilongesa ha chilweza cha Yosefwe?

¹¹ Yosefwe kali chilweza chipema kuli yetu. Pwo lia Potifwa kesekele Yosefwe hanga apombe nenyi, alioze Yosefwe yalituna. Ha chino, pwo lia Potifwa yanunga ni kumweseka. Ha tangwa ni tangwa te kakuzanga hanga apwe “hamuwika nenyi.” (Uputukilo 39:7, 8, 10) Umwe mukanda wakulumbununa Mbimbiliya unambe ngwo pwo lia Potifwa te kakunyonga ngwenyi, nyi te mapwa ha chihela cha ukawo, Yosefwe te matayiza kupomba nenyi. Yosefwe kapwile ni hamu lia kuchina kutenya pwo lia Potifwa. Kashika muze akwachile ku mazalo ja Yosefwe hanga apombe nenyi ku tachi Yosefwe “yahichika chikuto chenyi mu kwoko lia pwo, yachina, yatuhuka haze.”—Uputukilo 39:12.

12. Kuchi tunanyingika ngwetu yuma yize twakutala muyihasa kupihisa mbunge yetu?

¹² Yesu katowezele ngwenyi yuma yize twakutala muyihasa kupihisa mbunge yetu ni kupwa ni manyonga akulinga utanji. Iye kambile ngwenyi: “Mweswawo matala pwo mukumuvwila usolo, halinga nenyi utanji kulu mu mbunge yenyi.” (Mateu 5:28) Chino che chalingiwile kuli Mwanangana Ndawichi. “Ha fulumba yamona pwo umwe kanasane,” alioze iye kakechele kutala yoze pwo ni kumunyonga. (2 Samuele 11:2) Chipwe ngwe kapwile pwo liambala, Ndawichi nihindu yaputuka kupwa ni usolo upi hali pwo wacho, hi yalinga nenyi utanji.

13. Mumu liaka twatamba kukolesa “shingo” ni meso jetu, nawa kuchi mutuhasa kuchilinga?

¹³ Nyi tunazange kwehuka manyonga api twatamba kukaula chilweza cha Yombi. Wambile ngwenyi: “Nakolesele shingo ni meso jami.” (Yombi 31:1, 7, 9) Ngwe Yombi, yetu mutuhasa kupwa ni hamu lia kwehuka kunyonga yuma ya utanji ha kutala umwe mutu. Nawa ni twakeuka chimwe chizulie cha utanji ha computador, ha umwe mutambi, ha mikanda hanji heswaho, mutuhasa kuyehuka kafuji-fuji.

14. Yika mutuhasa kulinga hanga tununge ni mbunge yitoma?

¹⁴ Muze mutunyonga ha yuma yize twalilongesa, kota mutuhasa kumona ngwetu, twatamba kusa tachi hanga tukumbe yitanga ya utanji. Nyi mutufupa kwalumuna yitanga yetu, twatamba kuchilinga  kawashi-kawashi! Muze mutwononoka ha yize Yehova akutulweza, mutuhasa kwehuka utanji ni kununga kupwa ni mbunge yitoma.—Tanga Tiangu 1:21-25.

15. Mumu liaka chili chilemu kufupa ukwaso, nyi wamona ngwe, chili chikalu kwehuka manyonga a utanji?

¹⁵ Nyi wamona ngwe, chili chikalu kwehuka manyonga a utanji, hanjika ni umwe ndumbu mu chikungulwila yoze uli ni miaka yinji mu mulimo wa Yehova, yoze mahasa kukwaha usongwelo kupalikila mu Liji lia Zambi. Muchihasa kupwa chikalu kuhanjika yuma ya ku mwono we kuli umwe mutu, alioze chili chipema kutambula ukwaso. (Yishima 18:1; A-Hepreu 3:12, 13) Mandumbu akwa-Kristu akola chinji mu ufulielo mahasa kukukwasa hanga umone chize watamba kwalumuna yitanga ye. Nyi walinga chocho muhasa kununga ni kupwa sepa lia Yehova.

16, 17. (a) Kuchi makulwana mahasa kukwasa waze akupinda ni yitanga ya utanji? Hana chilweza. (b) Mumu liaka chili chilemu kuli waze akutala pornografia hanga ete ukwaso kawashi-kawashi?

¹⁶ Makulwana a mu chikungulwila e ajama kutukwasa. (Tanga Tiangu 5:13-15.) Ha miaka yinji umwe mukweze mu Brasil te kakupinda chinji ni manyonga a utanji. Iye yamba ngwenyi: “Ami te ngunanyingika ngwami manyonga jami te keshi kuwahilila Yehova, alioze nevwile sonyi jinji ja kuhanjika ni akwetu yize te yili mu mbunge yami.” Umwe mukulwana wa chikungulwila ha kuchimona yakolweza yono mukweze hanga afupe ukwaso ni utakamiso kuli makulwana. Mukweze yono yamba chino: “Ami yingukomoka chize makulwana asolwele umbovu unji hali yami, yinguwahilila chinji ha yize yeswe ayo ambile kuli yami. Ayo kapanjikile kanawa yipikalo yami. Ayo yazachisa Mbimbiliya hanga angusolwele ngwo Yehova kakunguzanga chinji, nawa ayo yangulembela. Chino chapwishile chashi kuli yami kutayiza chiyulo cha mu Mbimbiliya chize ayo angwehele.” Muze hakolesa usepa wenyi ni Yehova, iye yamba ngwenyi: “Haliapwila hinanyingika ulemu wakufupa ukwaso kuhiana kusweka yipikalo yetu.”

¹⁷ Nyi uli ni yitanga ya kutala pornografia, watamba kufupa ukwaso kawashi-kawashi. Mumu nyi washimbwila chinji ha kufupa ukwaso, muhasa kufwa mu muheto wa kulinga utanji. Chocho muvwisa mbunge ja akwenu chinyengo nawa chino muchihasa kulingisa atu hanga ahanjike chipi hakutwala kuli Yehova. Mandumbu anji hanete ukwaso kuli makulwana ni kutayiza usongwelo wo hanga awahilile Yehova ni kununga mu chikungulwila cha akwa-Kristu.—Masamu 141:5; A-Hepreu 12:5, 6; Tiangu 1:15.

18. Yika twatamba kulinga?

¹⁸ Yitanga yipi ya Satana hano hashi kuyinoko chinji. Alioze tuvumbi twa Yehova kakusa tachi jinji hanga apwe ni manyonga atoma nawa ni yitanga yipema. Yehova kakuwahilila chinji ni tuvumbi wano. Kashika tukundamenu kuli Yehova ni kukaula usongwelo wenyi kupalikila mu chikungulwila cha akwa-Kristu. Muze mutulinga chino, mutuwahilila ni kupwa ni mbunge yitoma. (Masamu 119:5, 6) Kulutwe lia matangwa, muze Satana mamuchizaho, mutukatwama mashimbu eswe hashi haha hapema ha Zambi.