1-3. Mumu liaka umwe pangi apwile ni ushindakenyo ngwenyi, Yehova kanyingika yize te anafupu?

LANA, umwe pionelu wa shimbu lieswe, kechi keza kavulama yuma yize yalingiwile muze ayile mu Alemanha ha mwaka 2012. Iye kakunyonga ngwenyi Yehova kakumbulwile yilemba yenyi yaali. Muze te ali mu komboyu muze te anayi ku chipalo cha ndeke, iye yeta Yehova hanga amukwase kuwana umwe mutu hanga ahanjike nenyi hakutwala ku umwenemwene. Muze haheta ku chipalo cha ndeke, koko aye yanyingika ngwenyi, ndeke yize te maya nayo muyikaya tangwa lize mulisulaho. Lana yeta ukwaso kuli Yehova mumu iye te hazachisa mbongo jenyi jeswe nawa te kanafupu kuze mapomba.

² Muze Lana ahwishile kulemba, iye yevwa umwe mutu kanamusanyika ngwenyi, “Lana, Kuchi kanawa, yika unalingi kuno?” Te umwe mukweze yoze alilongesele nenyi ku shikola. Te kali ni naye hamwe ni kako, waze te analishika nenyi mumu te kanayi ku África do Sul. Muze Lana haalweza kapinda kenyi, naye ya mukweze hamwe ni kako wa pwo yasanyika Lana hanga aye ku zuwo lio. Ayo kamuhulile yihula yinji hakutwala ku ufulielo wenyi ni mulimo wenyi wa upionelu.

 ³ Ha chimene, muze te hahwisa kulia, Lana yakumbulula yihula yo yinji hakutwala ku Mbimbiliya. Lana yeta numero ya telefone hanga afupe umwe mutu yoze manunga ni kukumbulula yihula yo. Lana yafuna kanawa ku zuwo lienyi, nihindu uchili pionelu. Iye kanyingika ngwenyi, Yehova kevwile yilemba yenyi, kanyingikine yize te anafupu, nawa kamukwashile.—Masamu 65:2.

4. Yuma yika mutulilongesa?

⁴ Nyi susumuku mutupwa ni umwe kapinda, chili chashi kulemba ni kwita ukwaso kuli Yehova, nawa iye kakuwahilila chinji kupanjika kulemba chetu. (Masamu 34:15; Yishima 15:8) Alioze kulemba cha chilweza cha Yesu chinatulongesa ngwo chili ni ulemu unji kulemba hakutwala ku yuma yize tunafupu. Mu mutwe uno, mutulilongesa chize yikuma yino yiwana yakasula ya kulemba cha chilweza cha Yesu muyihasa kutukwasa hanga tupwe atu ashishika kuli Yehova.—Tanga Mateu 6:11-13.

5, 6. Mumu liaka Yesu atulongesele hanga twite “mbolo yetu” chipwe tuli ni kulia chinji?

⁵ Yesu katulongesele hanga twite “musono mbolo yetu” hi ko ngwo, “mbolo jami.” Victor umwe kalayi wa mbonge mu África do Sul, yamba ngwenyi: “Mashimbu eswe, ami ni mukwetu-pwo twakusakwila chinji Yehova tushi kulipikala hakutwala ku kulia cha tangwa lize mulisulaho, hanji kulipikala hakutwala ku kufweta lukeza. Mandumbu jetu azango kakutufunga matangwa eswe. Alioze yami nakulemba hanga waze akutukwasa ahase kukumba yipikalo yize o akumona hakutwala ku mbongo ni ku mulimo.”

⁶ Chipwe ngwe tuli ni kulia chinji, alioze mandumbu jetu anji kali yiswale. Nawa amwe kali mu luyinda. Kutwatambile kwaalembele wika, alioze twatamba kulinga chimwe chuma hanga twaakwase. Chakutalilaho, mutuhasa kuhana akwetu yuma yize tulinayo. Mutuhasa nawa kukwasa mulimo uze atu ja Yehova akulinga hashi heswe ha kuhana milambu. Tunanyingika ngwetu milambu yetu yakukwasa mandumbu jetu waze anafupu ukwaso.—1 Yoano 3:17.

7. Mumu liaka Yesu atulongesele ngwetu, kutwatambile ‘kulipikala ha tangwa lia hamene’?

⁷ Muze Yesu ahwishile kulongesa atu kulemba, iye yalongesa nawa hanga tuchine kusa mbunge jetu wika ku yikumba. Iye wambile ngwenyi, nyi Yehova kakufunga “mwambu wa mu yambu, uze muupwa musono ni hamene maumbila ha jiko, hi shinoho ko chikolo yenu, nyi? Enu akwa ufulielo ukepe! Kashika kanda nulipikala ngwenu, . . . Chika mutuzala?” Mba, wambile nawa ngwenyi: “Kanda nulipikala ha tangwa lia hamene.” (Mateu 6:30-34) Kutwatambile kulipikala hakutwala ku yuma ya matangwa a kulutwe. Alioze twatamba kuwahilila ni yize mutupwa nayo ha tangwa ni tangwa. Chakutalilaho, mutuhasa kulemba hanga tupwe ni chihela chakutwama, mulimo hanga tukwase asoko jetu ni mana hanga tukwate yiyulo yipema yize muyitukwasa kutwama kawape. Alioze kuli chuma chilemu chinji chize twatamba kwita ha kulemba chetu.

8. Yika maliji ja Yesu hakutwala ku mbolo yetu ya ha tangwa ni tangwa anatwiwulula? (Tala chizulie cha uputukilo.)

⁸ Maliji ja Yesu hakutwala ku mbolo yetu ya ha tangwa ni tangwa kanatwiwulula chuma chikwo chize iye ambile ngwenyi: “Hi ku mbolo wika ko, mutu mapwa ni mwono, alioze ku maliji eswe akutuhuka mu kanawa lia Zambi.” (Mateu 4:4) Kashika twatamba kwita kuli Yehova hanga anunge ni kutulongesa, nawa atwehe yize tunafupu hanga tununge ni kukundama kuli iye.

9. Mumu liaka shili yili ngwe makongo?

⁹ Yesu yamba ngwenyi: “Nutukonekene kama makongo jetu.” Ha limwe shimbu, iye kambile nawa ngwenyi: ‘Nutukonekene kama shili yetu.’ (Mateu 6:12; Luka 11:4) Tunambe chocho mumu shili yili makongo. Ha mwaka 1951, Kaposhi wa Kutalila, kambile ngwo, muze mutulinga shili, chakupwa ngwe twapwa ni makongo kuli Yehova. Yehova katela zango ni kwononoka chetu. Kashika nyi twehuka Zambi, yetu kutwalingile yize iye akuzanga. Kaposhi yanunga ngwo, nyi Yehova te mazanga kukwika usepa wenyi ni yetu, te mahasa kuchilinga. Kaposhi wacho kambile nawa ngwo: “Zambi keshi kuzanga shili.”—Yoano 5:3.

10. Mumu liaka Yehova mahasa kutukonekena, nawa kuchi twatamba kunyonga ha chino?

¹⁰ Tunawahilila chinji ha ukuule wa Yesu uze Yehova ahanyine ha shili yetu! Twakufupiwa ukonekeno wa Yehova matangwa eswe. Hikwapalika 2,000 a miaka chize haze Yesu afwile, nihindu ni musono twakuyuka ku ukuule. Twatamba kulemba mashimbu eswe hanga tusakwilile Yehova ha chawana chino. Niumwe te mahasa kutukula ku shili ni kufwa wakwihi. (Tanga Masamu 49:7-9; 1 Petulu 1:18, 19.) Maliji waze ali mu chilweza cha kulemba cha Yesu waze anambe ngwetu, “nutukonekene kama makongo jetu” kanatwiwulula ngwo, ngwe chize tunafupu ukuule, ni mandumbu jetu no che anafupu. Yehova kanazange nawa hanga tunyonge mandumbu ni usepa wo ni iye. Chino chinalumbunuka kwaakonekena kawashi-kawashi muze matuvulumuna. Kwamba umwenemwene, yino yili yuma yikehe-yikehe, alioze muze mutukonekena mandumbu jetu, mutusolola ngwetu, twaazanga. Mutusolola nawa ngwetu, twakusakwila chinji ha ukonekeno wa Yehova.—A-Kolosu 3:13.

11. Mumu liaka chili chilemu kukonekena akwetu?

¹¹ Amu tuli akwa-shili, ha mashimbu amwe muchihasa kupwa chikalu kukonekena waze akututuka. (Ulevi 19:18) Nyi twaputuka kuhanjika yuma yize ayo akutulinga, ni mandumbu akwo mu chikungulwila alinjisa mu yuma yacho, chino muchihasa kupinjisa sambukila ya chikungulwila. Nyi mutununga ni kulinga chino, mutusolola ngwo kutushi kulemesa chawana cha Zambi cha ukuule nawa kutuchi kuyukako  ni che chimwe. (Mateu 18:35) Nyi kutushi kukonekena akwetu, nyi Yehova neye kechi kutukonekena. (Tanga Mateu 6:14, 15.) Nawa, nyi tunazange hanga Yehova atukonekene, twatamba kwehuka kulinga yuma yize iye keshi kuzanga.—1 Yoano 3:4, 6.

12, 13. (a) Yika yalingiwile kuli Yesu muze amupapachishile? (b) Mumu liaka nyi twapwa mucheseko kutwatambile kuliongelela akwetu? (c) Yika Yesu alingile yize yinasolola kununga ni kushishika ndo ni hakufwa?

¹² Maliji a kulemba cha chilweza cha Yesu “kanda nututwala kama kucheseko” kanatwiwulula yize yalingiwile kuli Yesu muze amupapachishile. Spiritu ya Zambi yamusongwele mupuya hanga “akamweseke kuli Ndiapu.” (Mateu 4:1; 6:13) Mumu liaka Yehova echele hanga chino chilingiwe? Yehova katumine Yesu hano hashi hanga asope mulonga uze wasolokele muze Alama ni Eva ehukile chiyulo cha Yehova. Uhulia wo wanehene umwe mulonga uze te watamba kupwa kusopa ha kupalika cha mashimbu. Chakutalilaho, shina Yehova kalingile chuma chipi muze alingile atu nyi? Shina mutu mungunu te mahasa kununga ni kushishika kuli Yehova nyi mamweseka “kuli Ndiapu”? Shina te chili chipema nyi atu maliyula ene? (Uputukilo 3:4, 5) Kulutwe lia matangwa, muze Yehova makakumbulula yikuma yeswayi, eswe mu malilu ni hashi makanyingika ngwo kuyula cha Yehova chili chipema.

¹³ Yehova kali musandu, kashika kechi kweseka mutu niumwe ku yuma yipi. Satana mwe “mukwa kweseka.” (Mateu 4:3) Satana kakutweseka mu majila anji. Alioze etu e twatamba kusakula. Yetweswe mutuhasa kukwata chiyulo cha kukumba cheseko hanji ka. (Tanga Tiangu 1:13-15.) Muze amwesekele kuli Satana, Yesu kawashi-kawashi kalitunyine ha kutongola Liji lia Zambi. Yesu kashishikile kuli Zambi. Ha chino, Satana kakamwechele. Iye yashimbwila “ndo ku mwaka ukwo.” (Luka 4:13) Chipwe ngwe Satana te kakweseka Yesu ha yuma yinji nihindu iye te kakwononokena Zambi ngwe Mwata yenyi. Iye kasolwele ngwenyi mutu mungunu mahasa kushishika kuli Yehova chipwe ha mashimbu alamba linji. Nihindu Satana kakweseka tumbaji twa Yesu, hamwe ni yena hanga wehuke kuli Yehova.

14. Yika twatamba kulinga mba tukumbe cheseko?

¹⁴ Yikuma yize Satana ambile hakutwala ku kuyula cha Yehova muyichinunga, alioze katamba kuyikumbulula. Kashika haliapwila, Yehova akwecha Satana hanga atweseke. Yehova keshi kututwala “kucheseko.” Iye kali ni ushindakenyo ngwo etu mutuhasa kushishika kuli iye, nawa iye kanazange kutukwasa. Alioze iye keshi kutushinjila hanga tulinge yuma yize yalita. Iye kakuvumbika chinji uhashi wetu wakusakula. Kashika iye akwecha hanga tukwate yiyulo yetwene nyi mutushishika nyi ka. Mba twehuke kunjila mu cheseko, twatamba kulinga yuma yaali: kukundama kuli Yehova ni kununga ni kwita ukwaso ha kulemba. Kuchi Yehova akukumbulula yilemba yetu mba tukumbe cheseko?

15, 16. (a) Yeseko yika yize twatamba kwehuka? (b) Iya yoze twatamba kuliongelela nyi twapwa mu cheseko?

¹⁵ Yehova kakutwaha tachi jenyi, ye spiritu yisandu hanga yitukwase kulimika ni yeseko ya Satana. Yehova hanatwehe nawa Mbimbiliya ni chikungulwila chenyi hanga yitutoweze ku yuma yipi. Chakutalilaho, iye kanatutoweza ngwo kutwatambile kuzachisa mashimbu, mbongo, ni tachi ku yuma yize kuyishi ni ulemu unji. Espen ni Janne katwama mu chimwe chifuchi mu Europa chize chikwete upite unji. Ha miaka yinji, ayo te mapionelu a shimbu lieswe  sali likwo lia chifuchi kuze te kwakufupiwa chinji akwa-kwambujola. Muze japwile ni mwana-wa kemba, o yecha mulimo wa upionelu, nawa haliapwila ayo kali ni ana aali. Espen yamba ngwenyi: “Mashimbu eswe twakulemba kuli Yehova hanga tuchine kupwa mucheseko mumu haliapwila kutushi ni uhashi wa kukalakala chinji milimo ya Zambi. Twakwita Yehova hanga atukwase kununga ni ufulielo wetu ni zango lia kwambujola sango lipema.”

¹⁶ Cheseko chikwo chize twatamba kwehuka chili kutala pornografia. Nyi twalihana ku pornografia, kutwatambile kuliongela Satana. Mumu liaka? Mumu Satana ni hashi henyi kuheshi ni tachi ja kutulinga yuma yipi. Amwe kakutala pornografia mumu ayo keshi kwehuka manyonga api. Alioze mandumbu jetu anji hanakumbu cheseko chacho, ni yetu mutuhasa kukumba.—1 A-Korindu 10:12, 13.

17. (a) Kuchi mutuhasa kusolola ngwetu tunazange hanga Yehova ‘atupulwile kama kuli mwe mupi’? (b) Uhuzululo uka mutukapwa nawo?

¹⁷ Kuchi mutuhasa kusolola ngwetu tunazange hanga Yehova ‘atupulwile kama kuli mwe mupi’? Kutwatambile kupwa “akwa hashi” nawa “kanda tuzanga hano hashi.” (Yoano 15:19; 1 Yoano 2:15-17) Mutukapwa mu uhuzululo muze Yehova makachiza Satana ni kwononona yitanga yeswe yipi ya hano hashi! Alioze ndo ha shimbu liacho, twatamba kunyingika ngwetu Satana “kali ni ufwatulo wunji mumu kananyingika mwaka ukepe wika ali nawo.” Iye malinga chuma cheswacho hanga atupiangule kuli Yehova. Kashika twatamba kulemba hanga Yehova atukwase kwehuka Satana.—Usolwelo 12:12, 17.

18. Nyi tunazange kulilamwina ha kwonona cha yitanga yeswe yipi ya hano hashi ha Satana, yika twatamba kulinga?

¹⁸ Shina unazange kutwama hashi haze kuhechi kapwa Satana? Nyi chenacho, nunga ni kulemba kwiza cha Wanangana wa Zambi, ni jina lia Zambi lipwe lisandu ni upale wenyi ulingiwe hano hashi. Mashimbu eswe lemba kuli Yehova hanga akufunge nawa akwehe yeswayo mufupa hanga ushishike kuli iye. Ewa, linga chuma cheswacho chize muhasa hanga utwame nikulita ni chilweza cha kulemba cha Yesu.