1, 2. Kuchi Yesu asolwele zango lienyi hali atu?

MWANA mutangu wa Zambi kali chilweza chinene cha Yehova ha kusolola mana anji mumu kapwile “chilangaji” wa Tato. Achinyonga chiseke ni uwahililo uze Yesu apwile nawo muze Tato “alulikile malilu” ni “muze afunjikile fundamentu ya hashi.” Alioze ha yino yuma yeswe yize Tato atangile, Yesu ‘kuwahilila chenyi chapwile hali ana ja atu.’ (Yishima 8:22-31) Chochene, iye kapwile ni kuzanga atu chize ku uputukilo.

² Ha kupalika cha miaka, Yesu yasolola ushishiko ni zango lienyi kuli Tato ni hali atu eswe hakuhichika malilu ni kwiza hano hashi ngwe mutu. Ha zango lienyi Yesu yahana mwono wenyi ngwe “ukuule hali anji.” (Mateu 20:28; A-Fwilipu 2:5-8) Muze Yesu apwile hano hashi, Zambi kamwehele tachi hanga alinge yikomokeso. Yikomokeso yacho yakusolola zango linji lize Yesu alinalio hali atu nawa yakusolola yuma ya ukomokeso yize makalinga kulutwe lia matangwa.

3. Yika mutulilongesa mu mutwe uno?

 ³ Muze apwile hano hashi, Yesu kambujolwele “sango lipema lia wanangana wa Zambi” (Luka 4:43) Iye te kanyingika ngwo Wanangana muuhalisa jina lia Tato ni kuhwisa milonga ya atu ku mashimbu eswe. Muze Yesu apwile ni kwambujola, iye nawa kalingile yikomokeso yinji. Yikomokeso yacho yasolwele ngwo Yesu kali ni zango linji hali atu. Mumu liaka chino chili chilemu kuli yetu? Mumu yize iye alingile hali yetu yinatwehe kutalatala ni ufulielo kulutwe lia matangwa. Haliapwila tulilongesenu yikomokeso yiwana yize Yesu alingile.

4. Yika yalingiwile muze Yesu alitakanyine ni lunga mukwa mbumba?

⁴ Ha mashimbu waze Yesu apwile ni kwambujola, iye kayile ku chihela chize te avuluka ngwo Ngalileya. Koko, mu limwe limbo, iye yaliwana ni umwe lunga yoze wapwile ni yikola ya mbumba. (Marku 1:39, 40) Lunga wacho te kanayiji chinji, kashika Luka, yoze te ndotolo, wamwambile ngwo wa “too ni mbumba.” (Luka 5:12) Mbimbiliya yinambe ngwo, muze lunga wacho wamwene Yesu, iye yaliumba “kuli iye, nikuliondela hashi ngwenyi, Nyi mupala, muhasa kungupemesa.” Lunga wacho te kananyingika ngwo, Yesu kali ni tachi ja kuuka, alioze te kanazange kunyingika nyi te Yesu mazanga kumuuka. Mumu liaka? Mumu lunga te katwama ni A-Fariseu waze te akulengulula akwa-mbumba. Alioze yika Yesu anyongene? Yika te iye malinga hali lunga wacho? Nyi yena, kachi yika walingile?

5. Mumu liaka Yesu wazangile kuuka mukwa mbumba?

⁵ Lunga wacho kota kakakololokele ngwenyi “luchisa, luchisa!” (Ulevi 13:43-46) Alioze Yesu kakevwile uli. Mumu iye te kanazange kukwasa lunga wacho. Pundu lume yetu kutwanyingikine yize Yesu anyongene, alioze tunanyingika yize iye evwile. Iye kevwile chinyengo chinji kashika iye walingile chikomokeso hali lunga wacho. Iye yakwata lunga wacho, chuma chize te katambile kulinga. Ni ushindakenyo hamwe ni kenda Yesu yamba ngwenyi: “Ngunapale; pwako mungunu.” Mba “hazehene mbumba yenyi yiyimukatuka.” (Luka 5:13) Chochene Yehova kahanyine tachi kuli Yesu hanga alinge chikomokeso achi ni kusolola chize iye te akuzanga atu.—Luka 5:17.

6. Yika yinatukomwesa ha yikomokeso yize Yesu alingile, nawa yikomokeso yacho yika yinasolola?

⁶ Ni ukwaso wa tachi ja Zambi Yesu kalingile yikomokeso yinji. Iye kaukile atu anji hi akwa-mbumba wika ko. Yesu nawa kaukile atu te akwete yikola yeka ni yeka. Mbimbiliya yinatulweze ngwo atu akomokene “ha kumona tumama kanahanjika, yitonji angunu, yilema kanende, tupuputa kanalaula.” (Mateu 15:31) Muze Yesu apwile ni kuuka atu, iye te keshi kufupa ngwo mutu mungunu ahane chimwe chihanda cha ku mujimba wenyi kuli mutu yoze uli ni yikola mba amuuke. Ka, mumu Yesu kali ni tachi ja kuuka mujimba wa mutu. Iye te kakuuka atu hazehene, ha mashimbu akwo te kakuuka atu ali kusuku ni iye. (Yoano 4:46-54) Yika yilweza yino yinasolola? Mwanangana wetu Yesu Kristu, kali ni tachi ni zango lia kuhwisa yikola liakulu. Muze mutulilongesa chize Yesu te akufunga  atu, chakutwaha shindakenyo ngwetu hashi haha “chiswale ni mukwa-kuhona kumakaavwile keke.” (Masamu 72:13) Yesu makauka waze eswe akumona lamba mumu iye kanazange chinji kuchilinga.

7, 8. Lumbununa yize yalingiwile muze Yesu aliwanyine ni umwe lunga te unayiza ku Mbeteseta.

⁷ Hakupalika cha amwe tukweji muze te hauka mukwa-mbumba, Yesu yaya ku Ngalileya ndo ku Yundeya kuze anungine ni kwambujola sango lipema lia Wanangana wa Zambi. Kota te kuli tununu twa atu waze evwile sango ja Yesu ni waze amwene zango lienyi. Kwamba umwenemwene, Yesu kazangile kutakamisa yiswale ni akwa-kumona yihungumiona ni kuhana kutalatala chipema kuli atu jacho.—Izaia 61:1, 2; Luka 4:18-21.

⁸ Ha kakweji wa Nisane, Yesu yaya ku Yerusaleme hanga alinge Chizomboka. Mu mbonge mwapwile atu anji waze ejile ha chiwanyino chino chipema. Kuuto lia tembele kwapwile chitende chize te avuluka ngwo, Mbeteseta, kuze kwene Yesu yaliwana ni umwe lunga yoze te keshi kuhasa kwenda.

9, 10. (a) Mumu liaka atu te akuya ku chitende cha Mbeteseta? (b) Yika Yesu alingile ku chitende, nawa yika yino yinatulongesa? (Tala chizulie cha uputukilo.)

⁹ Mbunga ya akwa-kuyiza te yakuya ku Mbeteseta. Mumu liaka? Mumu ayo te kakunyonga ngwo mutu unayiza mahasa kumuuka nyi haya ku chitende muze meya te malisunga. Achinyonga chizungo-zungo chize chapwileko kota atu anji, waze te ali ni yipikalo, ni atu waze ahona kutalatala waze te anafupu hanga auke. Yesu kapwile mungunu nawa kakafupile hanga amuuke, alioze mumu liaka apwile ha chihela chacho? Zango lize apwile nalio hali atu lie liamutwalileko. Koko kwe aliwanyine ni lunga yoze te wayiza chize muze Yesu te kanda achiza hano hashi.—Tanga Yoano 5:5-9.

¹⁰ Yesu yahula lunga wacho nyi te kanazange hanga aputuke kwenda. Achinyonga kama ha chinyengo cha yono lunga muze alwezele Yesu ngwenyi kanazange hanga apwe kuuka alioze te keshi kuhasa, mumu te kukushi niumwe yoze mamukwasa kunjila mu chitende. Yesu mba yalweza lunga wacho alinge chimwe chuma chikalu. Iye yamwamba hanga ande chalo chenyi hanga ende. Chocho, lunga yanda chalo chenyi hi yaputuka kwenda! Chikomokeso chino chili chilweza chipema cha yuma yize Yesu makalinga hashi haha. Chinasolola nawa zango linene lize Yesu alinalio hali atu. Iye te kakufupa waze te akufupa ukwaso.

11. Kuchi Marku 5:25-34 unasolola ngwetu Yesu te kakuzanga atu waze te ayiza?

¹¹ Tanga Marku 5:25-34. Umwe pwo te kakumona lamba ni yimwe yikola yipi chinji ha miaka 12. Yikola yacho yapihishile chinji mwono wenyi, nawa te keshi kuwayila kanawa Zambi. Kayile kuli mandotolo anji nawa kazachishile mbongo jinji hanga amuuke, alioze yikola yenyi yokele chinji. Limwe tangwa, pwo wacho yapwa ni nyonga lieka hanga apwe kawape. Chocho pwo wacho yanjila ha kachi ka mbunga ni kukwata ku mazalo ja Yesu. (Ulevi 15:19, 25) Muze evwile ngwenyi jimwe tachi jamukatuka ku mujimba, yahula ngwenyi, iya wangukwata.  Pwo ni “woma, ni kuchikima yafulamana kumeso jenyi, yamwambulwila umwenemwene weswe.” Yesu yanyingika ngwenyi Yehova mwe waukile pwo wacho, kashika wambile kuli pwo wacho ngwenyi: “Mwanami, ufulielo we hiwakupwisa mungunu, uye kanawa ukahinduke ku upupilo we.”

12. (a) Yika yize twalilongesa, nawa kuchi mutuhasa kwimbulula Yesu? (b) Chilweza chika Yesu atuhichikile?

¹² Chakututakamisa chinji ha kumona chize Yesu te akuzanga atu chipi-chipi waze te ayiza. Alioze Satana hi chocho ko apwa, yoze wakweseka kutupwisa ngwe tushi ni ulemu nawa ngwe niumwe wakutuzanga wakwihi. Alioze yikomokeso ya Yesu yinahane shindakenyo ngwetu iye kakutuzanga ni kutufunga. Kashika mutuhasa kusakwilila chinji ha kupwa ni Mwanangana nawa Sasendote wa Lutwe wapwa chocho. (A-Hepreu 4:15) Muchihasa kupwa chikalu kuli yetu kunyingika chize mutu yoze wayiza akwivwa, chipi-chipi ni kutushi kuyiza. Alioze achinyonga hali Yesu. Iye kapwile ni zango hali atu chipwe ngwe iye te keshi kuyiza. Ni yetu tusenu tachi hanga twimbulule chilweza chenyi cha kusolola zango.—1 Petulu 3:8.

13. Uhindukilo wa Lazaru yika unasolola hali Yesu?

¹³ Yesu te kakwivwa yinyengo yinji ha lamba lia akwo. Chakutalilaho, muze sepa lienyi Lazaru afwile, iye “watwile mikuma ni kulipikala” muze amwene chinyengo kuli asoko ni masepa ja Lazaru. (Tanga Yoano 11:33-36.) Chipwe ngwe te kananyingika ngwenyi mahindwisa Lazaru, nihindu kalilile. Iye te keshi  kwivwa sonyi nijimwe ja kusolola chize te akwivwa. Yesu te kakuzanga chinji Lazaru ni asoko jenyi kashika azachishile tachi ja Zambi hanga ahindwise Lazaru ku ufwe!—Yoano 11:43, 44.

14, 15. (a) Yika yinasolola ngwetu Yehova kanazange kuhwisa lamba lia atu? (b) Yika mutuhasa kulilongesa ha liji “mafuka”?

¹⁴ Mbimbiliya yinasolola Yesu ngwe chize apwa Tato, Yehova. (A-Hepreu 1:3) Kashika yikomokeso ya Yesu yinashindakenya ngwetu Yehova neye kanazange kuhwisa yikola, lamba ni kufwa. Kwasala hakehe, Yehova ni Yesu makahindwisa atu waze hanafu. Yesu kambile ngwenyi, “ola muyiza, muze waze eswe ali mu mafuka hanga akahindwise.”—Yoano 5:28, 29.

¹⁵ Muze Yesu azachishile liji “mafuka” te kanahanjika hakutwala kuli atu waze hanafu nawa makewuluka kuli Zambi. Zambi, mwe Mukwa-Ndundo-Jeswe, Sakatanga wa yuma yeswe, mahasa kwiwuluka chuma cheswacho cha mutu yoze hanafu chipwe utu wa mutu wacho. (Izaia 40:26) Yehova keshi wika ni uhashi wa kwiwuluka atu waze hanafu, alioze kanazange pundu kweewuluka. Uhindukilo uli ha Mbimbiliya uli chilweza chipema cha yuma yize muyikalingiwa hashi haha.

16. Uhashi uka tuvumbi anji a Yehova makapwa nawo?

¹⁶ Nyi twanunga ni kushishika, mutuhasa kumona chikomokeso chinene, cha kulilamwina ku luyinda munene! Ha kuhwa cha Armagedone, mutukamona yikomokeso yinji. Ha shimbu liacho, atu makapwa ni mwono ungunu. (Izaia 33:24; 35:5, 6; Usolwelo 21:4) Achinyonga kama ha kumona atu kanambila mawana jo, pango, yitwamo ya yilema, ni makina ya tujika matwi. Yehova kananyingika ngwenyi waze eswe makalilamwina ha jita ya Armagedone makafupiwa kupwa atu waze ajikiza nawa ni mwono ungunu, mumu makalinga milimo yinji. Ayo e makapwisa Hashi heswe paraisu.—Masamu 115:16.

17, 18. (a) Mumu liaka Yesu walingile yikomokeso? (b) Mumu liaka twatamba kulinga chuma cheswacho hanga tukapwe hashi haha ha Zambi?

¹⁷ “Mbunga yinene” musono kakuwana utakamiso muze matanga chize Yesu te akuuka atu. (Usolwelo 7:9) Yikomokeso yacho yakukolesa kutalatala chetu cha kutuuka kulutwe lia matangwa. Nawa yakusolola chize Mwana mutangu wa Zambi akuzanga atu. (Yoano 10:11; 15:12, 13) Zango lia Yesu linasolola zango linene lize Yehova alinayo hali tuvumbi twenyi eswe.—Yoano 5:19.

¹⁸ Musono hashi ha too ni yikola, lamba ni kufwa. (A-Roma 8:22) Kashika tunafupu hashi haha ha Zambi. Hashi haha, atu eswe makapwa ni mwono ungunu uze Zambi alakenya. Mukanda wa Malakia 4:2 unatwehe kutalatala ngwo yetu mutukapwa “nikutumbwoka ngwe yimbembe ja ngombe,” nikuwahilila ni kulikwiza cheswe mumu ha kutuuka ni kututusula ku uhenge. Tupwenu ni uwahililo muli Yehova ni kufuliela ha yilakenyo yenyi hanga tulinge chuma cheswacho hanga tukapwe hashi haha. Cho utakamiso ha kunyingika ngwetu yikomokeso ya Yesu yili yilweza ya yuma yize makalinga hali atu ha mashimbu a kuyula chenyi!