1. Yuma yika yalingiwile ha mwaka 66? (Tala chizulie cha ha uputukilo)

  ACHINYONGA ngwe wapwile mukwa-Kristu mu Yerusaleme ha mwaka 66. Yuma yinji yalingiwileko. Umwe kapitau Ka-Roma te avuluka ngwo Floru yeya mbongo ja talentu 17 mu utulikilo wa mbongo mu tembele. A-Yunda hazehene yaputuka kwivwa uli. O yashiha maswalale anji A-Roma nawa yatambula lipanda kuli A-Roma. Alioze A-Roma kakashimbwile, no yaakumbulula kawashi-kawashi. Mukachi ka tukweji atatu Céstio Galo yasongwela maswalale 30,000 ni kujingilika Yerusaleme. A-Yunda a yihulia yaswama ku yiswamino ya mu tembele, alioze maswalale A-Roma yeseka kupupa chipanga cha tembele ni kweseka kunjila. Atu mu mbonge yaputuka kwivwa woma. Nyi mwe wapwile, kachi kuchi wevwile?

2. Yika akwa-Kristu atambile kulinga muze amwene chilombo cha A-Roma chajingilika mbonge yo, nawa kuchi chino chalingiwile?

² Yimwe miaka kulutwe, Yesu katowezele tumbaji twenyi hakutwala ku yuma yacho ni kwaaha usongwelo: “Muze munumona Yerusaleme hayijingilika ni yilombo ya maswalale, hohene nukanyingike ngwenu, Kukuwa chayo hichakundama. Hohene waze  mapwa mu Yundeya akachinyine ku milundu. Waze mapwa muchima liayo akatuhukemo. Waze mapwa mu yambu kanda akanjilamo.” (Luka 21:20, 21) Kuchi ayo te mahasa kukaula shimbi ya Yesu ha kuhichika Yerusaleme muze chilombo cha maswalale majingilika mbonge? Kunakalingiwa chimwe chikomokeso. Chilombo cha tujita A-Roma susumuku yahichika Yerusaleme! Yesu kambile ngwenyi matangwa jacho “kumakatepulula.” (Mateu 24:22) Kukatuka haze maswalale ahichikile Yerusaleme, waze kapwile mashimbu apema kuli akwa-Kristu ashishika kwononokena Yesu ha kuchina kafuji-fuji ku milundu. a Kunyima, ha mwaka 70, chilombo chaha cha tujita twa A-Roma yafuna nawa ku Yerusaleme. Ha shimbu lino, ayo yanongesa mbonge. Alioze waze eswe ononokene ku shimbi ya Yesu yaalamwina.

3. Yuma yika yalifwa yize akwa-Kristu kwasala hakehe alitakanenayo, nawa yika mutulilongesa ha mutwe uno?

³ Utowezo ni shimbi ja Yesu ni musono mutuhasa kujikaula. Kwasala hakehe yuma yamutapu wacho muyilingiwa. Yesu kazachishile yuma yize yalingiwile ku sekulu yitangu hanga alumbunune yuma yize muyikalingiwa muze “luyinda munene” makaputuka. (Mateu 24:3, 21, 29) Ngwe chize chapwile kuli akwa-Kristu ashishika waze alamwinyine ku unongeso wa Yerusaleme apwile ni kwonwona, muchikalingiwa kuli “mbunga yinene” yize makalamwina ku unongeso unene wa hano hashi. (Tanga Usolwelo 7:9, 13, 14.) Chili chilemu chinji kunyingika yize Mbimbiliya ya kulongesa hakutwala kulutwe lia matangwa. Mumu liaka? Mumu, mwono wetu unatale ku yuma yacho. Haliapwila mutulilongesa chize yuma yino muyitukwasa ku mwono.

4. Kuchi luyinda munene makaputuka?

⁴ Luyinda munene kuchi makaputuka? Luyinda munene makaputuka ha kwonwona cha mayingeleja eswe amahuza. Mu Mbimbiliya mayingeleja amahuza kanavuluka ngwo “Babilonia Yinene, Naye ya Yikoi.” (Usolwelo 17:5-7) Mumu liaka mayingeleja amahuza akwaavuluka ngwo yikoi? Mumu mangana jamo keshi kukaula shimbi ja Zambi. Shimbu akwase Yesu hamwe ni Wanangana wenyi ni ushishiko weswe, ka, ayo kakukwasa manguvulu ja atu ni kulengulula shimbi ja mu Mbimbiliya hanga apwe ni lufuma. Uwayilo wo kuushi ngwe uwayilo upema wa akwa-Kristu akuwayisa. (2 A-Korindu 11:2; Tiangu 1:27; Usolwelo 14:4) Alioze iya makwonwona Babilonia Yinene? Yehova makazachisa “kumi lia mbinga” wa “Ngongo muchila” hanga akalinge “upale wenyi.” “Ngongo muchila” kanalumbunuka “Nações Unidas,” ni “Kumi lia mbinga” linalumbunuka ululikiso weswe wa manguvulu waze akukwasa “Nações Unidas.”​—Tanga Usolwelo 17:3, 16-18.

5, 6. Mumu liaka tunambe ngwetu, kwonona cha Babilonia Yinene kuchishi kulumbunuka kushiha atu jamo eswe?

⁵ Shina atu eswe mu uwayilo wa mahuza makaashiha muze Babilonia yinene makayinongesa? Ka. Yehova kalwezele profeta Zekaria hanga asoneke yuma yize muyikalingiwa. Ha mashimbu jacho, waze ali sali lia uwayilo wa mahuza makamba ngwenyi: “Hi nguli profeta ko, nguli njimi, mumu e mavu hapwa upite wami chize ku ukweze wami.” Nawa, ni mamuhula ngwo, “Yilonda yino ha moko je kuchi yapwa? Aye makumbulula ngwenyi, Ye yilonda ayi angwehele mu zuwo lia masepa jami.” (Zekaria 13:4-6) Kashika mangana a mayingeleja makalikala ngwo ayo kakapwile  mu mayingeleja jacho nawa ngwo kakapwile akwa-uwayilo wa mahuza.

⁶ Yika muyikalingiwa kuli atu ja Zambi ha mashimbu jacho? Yesu yalumbununa ngwenyi: “Nyi kachi matangwa aze kaatepulwileko, kachi mutu niumwe malilamwina; alioze mumu hali waze hanaatongola, matangwa aze kumakatepulula.” (Mateu 24:22) Ku sekulu yitangu, luyinda wa mu Yerusaleme ‘kamutepulwile.’ Yino yakwashile “waze hanaatongola,” akwa-kristu akuwayisa hanga achine. Chizechene nawa, chihanda chitangu cha luyinda munene muchikapwa ‘kutepulula’ ha mukunda wa “waze hanaatongola.” Akwa-mafwefwe, ngwe “kumi lia mbinga” kechi kahasa kwonwona atu ja Zambi. Ha chino, kumukukapwa shimbu lia uhumikizo, hohene vunda yacho yitangu muyihwa.

7, 8. Uhashi uka muukapwako muze makanongesa uwayilo wa mahuza, nawa kuchi atu ja Zambi makalisa ni atu akwo ha shimbu liacho?

⁷ Yika muyikalingiwa ha kuhwa cha unongeso wa uwayilo wa mahuza? Mulikapwa limwe shimbu lia kusolola pundu yize yili mu mbunge yetu. Ha shimbu liacho, atu anji makafupa ukwaso wa ululikiso wa atu, e “mawe a ku milundu.” (Usolwelo 6:15-17) Alioze atu ja Yehova makafupa ukwaso kuli iye. Muze ‘atepulwile’ unongeso ku sekulu yitangu, lino liakapwile shimbu lize te A-Yunda eswe malikonyekena ni kupwa akwa-Kristu. Alioze liapwile shimbu lize te akwa-Kristu makatuka mu Yerusaleme ngwe chize Yesu alwezele. Chizechene nawa, kulutwe lia matangwa muze unongeso ‘mautepulula’ tuchikushimbwila ngwetu, atu anji susumuku makanjila mu uwayilo wamwenemwene. Alioze, mulikapwa shimbu lize akwa-Kristu eswe makapwa ni uhashi wakusolola zango lio kuli Yehova ni kukwasa akwa-Kristu akuwayisa.​—Mateu 25:34-40.

⁸ Kutwanyingikine pundu yize muyikalingiwa ha mashimbu jacho a yeseko. Alioze, twatamba kunyingika ngwetu mwono kuushi kapwa washi nawa mutukasa tachi jinji mba tukashishike kuli Zambi. Ku sekulu yitangu, akwa-Kristu kahichikile mazuwo jo nawa ayo kamwene lamba linji ha kulamwina mwono wo. (Marku 13:15-18) Twatamba kulihula ngwetu: ‘Shina hi nalilulieka kanawa hanga ngwehuke usolo wa upite? Kutala munguhasa kulinga cheswacho munguhasa hanga ngushishike kuli Yehova? Twatamba kunyonga ha yihula yino! Ha shimbu liacho, chipwe mukusoloka yeseko yeswayo, nihindu yetu wika e mutukawayila Zambi yetu, ngwe chize alingile profeta Daniele.​—Daniele 6:10, 11.

9, 10. (a) Sango jika atu ja Zambi makambujola ha luyinda munene? (b) Akwa-kole ja atu ja Zambi kuchi makevwa?

⁹ Luyinda munene kechi kapwa shimbu lia kwambujola “sango lipema lia Wanangana.” Ha matangwa jacho, shimbu lia kwambujola sango lipema mulikapalika. Shimbu lia “songo” mulikahwa! (Mateu 24:14) Tuvumbi twa Zambi makambujola ni hamu lieswe sango jilemu ja upatwilo jize mujikakwata atu eswe. Sango jacho mujihasa kupwa kunongesa cha hashi hapi ha Satana. Mbimbiliya yinatesa sango jino ni chiwe muze yakwamba ngwo: “Chiwe chinene cha makelekeshi chapezala ngwe makumi asambano a makilo ni atatu yichiholoka mwilu hali atu; Atu yashililika Zambi ha lamba lia chiwe; mumu lamba liacho linene kuhiana.”​—Usolwelo 16:21.

¹⁰ Akwa-kole jetu makevwa sango jino jilemu. Yehova katumine profeta Ezekiele hanga alumbunune chize chimwe chizavu cha akwa-mavungu,  anavuluka mu Mbimbiliya ngwo, Ngoke wa Mangoke, chize makevwa: “Mwene Yehova kanambe ngwenyi, ha tangwa lize manyonga makeza mu mutwe we, ni yena mukataka chuma chipi, ukambe ngwe, munguya kulimika ni chifuchi cha yihunda kuyishi yipanga-ya-mawe. Munguhulumukina hali atu ahwima waze anatwama ni chipi chakuhi, eswe kanatwama keshi ni yipanga-ya-mawe, chipwe njalo, chipwe mapito, ngukatambule upite wa jita ni kumbata yuma ya kupunda; ngukase jita ni yihela yapwile te puya alioze haliapwila ni atu jayo, ni atu aze aakongele ku mavungu, mba hapita yimuna ni upite, waze atwama he hamuchima lia hashi.” (Ezekiele 38:10-12) Atu ja Yehova makalisa ni atu eswe a hashi, ayo makapwa ngwe ‘katwama hamuchima lia hashi.’ Mianangana kechi kahasa kulitwamina. Ayo makafupa kwasa jita ni akwa-Kristu akuwayisa a Yehova hamwe ni waze akwaakwasa.

11. (a) Yika twatamba kwiwuluka hakutwala ku yuma yize muyikalingiwa ha luyinda munene? (b) Kuchi atu makevwa muze makamona yilayi?

¹¹ Yika muyikalingiwa nawa? Mbimbiliya kuyishi kutulweza pundu chize yuma muyikalingiwa, alioze kota yimwe yuma muyikalingiwa ha shimbu lioliene. Mu uprofeto wenyi hakutwala ku matangwa akusula, Yesu yamba ngwenyi, “Mba kumukukapwa yilayi mu tangwa ni kakweji ni matongonoshi. Hano hashi kupinda cha mavungu ni kulifwita, ha lundunjila wa kalunga-lwiji, ni mikanya yenyi. Atu kumakalezumioka ni woma, ha kutalatala yuma yize muyiza ha yifuchi yeswe ya hashi, mumu tachi ja malilu kumujikanyika. Hohene kumakamona mwe Mwana Mutu kaneza mu lelwa ni tachi ni uhenya unene.” (Luka 21:25-27; tanga Marku 13:24-26.) Shina umanunuko wa uprofeto uno muukatungumwisa atu ni yuma ni yilayi ya mwilu nyi? Twatamba kushimbwila hanga tukamone. Alioze tunanyingika ngwetu muze akwa-kole ja Zambi mamona yilayi yacho, ayo makevwa woma nawa kechi kanyingika yize makalinga.

12, 13. (a) Yika muyikalingiwa muze Yesu makeza “ni tachi jinene ni uhenya”? (b) Ha shimbu liacho kuchi atu ja Zambi makevwa?

¹² Yika muyikalingiwa muze Yesu makeza “ni tachi jinene ni uhenya”? Aye makalamwina atu eswe waze ashishika ni kushiha atu waze keshi kushishika. (Mateu 24:46, 47, 50, 51; 25:19, 28-30) Yesu kazachishile chimwe chilweza hanga alumbunune kanawa yuma yacho. Aye yamba ngwenyi: “Muze mwe Mwana Mutu meza mu uhenya wenyi, ni angelo asandu eswe hamwe nenyi, makatwama ha ngunja yenyi ya uhenya: mavungu eswe makakunguluka kumeso jenyi: iye makaahandununa umwe kuli mukwo, chizechene ngwe kafunga mahandununa mapanga kuli pembe. Masa mapanga ku chindume, alioze pembe masa ku chimeso.” (Mateu 25:31-33) Yika muyikalingiwa kuli mapanga ni pembe? Ayo makaasambisa. Pembe hanji atu waze keshi kushishika, “wano kumakaya ku lamba lia mutolo.” Alioze mapanga, hanji atu waze ashishika, makatambula mwono wa mutolo.​—Mateu 25:46.

¹³ Yika pembe makalinga, muze manyingika ngwo makaashiha? Ayo “kumakalila mbimbi.” (Mateu 24:30) Alioze kuchi makevwa akwa-Kristu akuwayisa ni waze akwaakwasa? Ayo makalinga yize Yesu ambile ngwenyi: “Muze yino yuma muyiputuka kupwa, hetukenu, nutale kwilu; mumu ukuule wenu unakundama.”​—Luka 21:28.

14, 15. Mulimo uka wakukungulula uze muukalingiwa muze Ngoke wa Mangoke makaputuka kulimika ni atu ja Zambi, nawa kuchi chino muchikalingiwa?

¹⁴ Yika muyikalingiwa muze Ngoke wa Mangoke makaputuka kulimika ni atu ja Zambi? Mbimbiliya yinambe ngwo Mwana mutu “makatuma angelo jenyi, akakungulule waze iye hanatongola, ku fuji jiwana, chize ku kusula songo lia hashi ndo ku kusula songo lia lilu.” (Marku 13:27; Mateu 24:31) Kukungulula chino kuchishi kulumbunuka shimbu lize makasakula akwa-Kristu akuwayisa. Nawa kuchishi kulumbunuka kusakula chakasula cha akwa-Kristu akuwayisa waze achili hano hashi. (Mateu 13:37, 38) Kusakula chacho muchikalingiwa muze mukukasala shimbu likehe hanga luyinda munene aputuke. (Usolwelo 7:1-4) Mba, shimbu liacho liakukungulula yika linalumbunuka? Mulikapwa shimbu lize akwa-Kristu akuwayisa waze achili hano hashi makatambula chawana cho ni kuya mu malilu. (1 A-Tesalonika 4:15-17; Usolwelo 14:1) Chino muchikalingiwa ha shimbu lioliene muze Ngoke wa Mangoke maputuka kulimika ni atu ja Zambi. (Ezekiele 38:11) Hachino, Yesu yamba ngwenyi, “akwa ululi kumakatemuka ngwe tangwa mu Wanangana wa Tato.”​—Mateu 13:43. b

¹⁵ Shina chino chinalumbunuka ngwo, akwa-Kristu akuwayisa ‘makapindumuna’ nyi? Atu anji mu uwayilo wa mahuza kakufuliela ngwo akwa-Kristu makatwala mu malilu ni mijimba ya musunya. Ayo nawa kakufuliela ngwo makamona Yesu zwalala kaneza hanga ayule hashi. Alioze Mbimbiliya yakusolola pundu ngwo kwiza cha Yesu kuchishi kumoneka, muze yakwamba ngwo: “Hohene chilayi cha mwe Mwana Mutu kumuchikasoloka mwilu,” nawa Yesu makeza “ha malelwa  a mwilu.” (Mateu 24:30) Mbimbiliya yinambe nawa ngwo “musunya ni manyinga kuyishi kuhasa kuhinga wanangana wa Zambi.” Kashika waze makaya mu malilu chitangu katamba kwaalumuna “ha kukamuna cha liso, ha chitavwi cha kusula.” c (Tanga 1 A-Korindu 15:50-53.) Etu kutushi kuzachisa liji “kupindumuna” ha kulumbununa longeso lino, mumu lili longeso lia uwayilo wa mahuza. Ha chino, akwa-Kristu akuwayisa ashishika waze achili hano hashi makaakungulula hamuwika.

16, 17. Yika yatamba kulingiwa muze umbachiso wa Mwana-panga kanda uchilingiwa?

¹⁶ Muze akwa-Kristu akuwayisa eswe 144,000 maya mu malilu, mba ululikiso wa ulo wa Mwana-panga muuhasa kuputuka. (Usolwelo 19:9) Mba yino yilingiwe, chitangu kwatamba kulingiwa chimwe chuma chilemu. Tunyingikenu ngwetu, Ngoke makalimika ni atu ja Zambi muze masalila akuwayisa achili hano hashi. (Ezekiele 38:16) Kuchi atu ja Zambi makevwa? Ayo makononokena shimbi jino: “Kuchanutambile kwasa jita yino. Alioze lilongenu, manenu chizechene nukamone ulamwino wa Yehova hali yenu. Kanda nwivwa woma kanda nulishimwoka.” (2 Sango ja Mianangana 20:17) Mashimbu amwe muze Ngoke maputuka kulimika ni atu ja Zambi, masalila akuwayisa eswe ali hano hashi makaya mu malilu. Kashika Usolwelo 17:14 unatulweza yize muyikapwa mu malilu muze Ngoke makaputuka kulimika ni atu ja Zambi. Akwa-kole ja atu ja Zambi “kumakasa jita ni mwe Mwana-panga, alioze mwe Mwana-panga kumakaakumba, mumu iye Mwene wa ene eswe, Mwanangana wa mianangana eswe; ni waze ali hamwe nenyi, hanaatambika; hanaatongola, o amwenemwene.” Yesu hamwe ni mianangana jenyi akuwayisa 144,000 mu malilu makalamwina atu ja Zambi hano hashi.

¹⁷ Ulamwino wacho muukaneha jita ya Armagedone, chino muchikaneha uhenya ha jina lisandu lia Zambi. (Usolwelo 16:16) Atu eswe waze makapatwila ngwe pembe, waze keshi kushishika, makashiha. Mashimbu jacho hano hashi kuhechi kapwa upi, nawa “mbunga yinene” makalamwina ku jita ya Armagedone. Kusongo, mba maliji waze ali mu mukanda wa Usolwelo mahasa kumanunuka, umbachiso wa Mwana-panga! (Usolwelo 21:1-4) d Atu eswe waze makalamwina hano hashi makawahilila ni utayizo wa Zambi ni zango lienyi ni umbovu wenyi hali ayo. Tunashimbwila shimbu liacho ni usona weswe. Umbachiso wacho muukapema chinji!​—Tanga 2 Petulu 3:13.

18. Yuma yika yilemu yize kwasala hakehe hanga yilingiwe, nawa yika twatamba kulinga?

¹⁸ Ha yuma yino yilemu yize kwasala hakehe yilingiwe, yika yetu twatamba kulinga haliapwila? Yehova kazachishile postolo Petulu hanga asoneke ngwenyi: “Se yino yuma yeswe chocho muyikajindwoka, chanutamba kupwa ni kwenda chisandu ni uwayilo. Ni kutalatala, nikupwisa kuheta cha tangwa lia Zambi . . . Kashika, akwetu a zango, se nwakutalatala yino yuma, lulikenu mbunge jenu hanga iye akanuwane ni sambukila, kunushi chipeka hanji kapalia.” (2 Petulu 3:11, 12, 14) Kashika tupwenu ni hamu liakununga mu uwayilo usandu uze kuushi kulichinga ni uwayilo wa mahuza, ni kukukwasa Mwanangana wa Sambukila, Yesu Kristu.