Paulu yoze ukwete ana aali, yamba ngwenyi: “Muze mbongo japutukile kukaliwa chinji mu chifuchi chetu, ni kulia necho yichiputuka kufwika ndando yinji. Twapwile ni kumana mu milongo ha maola anji, hanga tulande kulia, alioze kanji-kanji muze mutuheta kulutwe mutuwana kulia hi chahwa. Atu anji yawangama chinji ha mukunda wa zala, akwo te kakulimbwokela mu matapalo. Ndando ya yuma yikehe-yikehe yiyinyina. Mbongo ja mu chifuchi chetu hi kujapwile nawa ni ulemu. Konta yami ku banku yiyitoka ni je mbongo jeswe naselemo.”

Paulu kanyingikine kanawa yuma yeswe ai, mba yazachisa “mana angunu” hanga afunge kanawa usoko wenyi. (Yishima 3:21) Mwene yalumbununa ngwenyi: “Atu te kakungusanyika hanga ngwalingile milimo ya kahia kazembwe, alioze napwile ni kulinga mulimo weswawo, chipwe ngwe te unafwike mbongo jikehe. Amwe kapwile ni kungwaha wika kulia hanji yuma ya mu zuwo. Nyi mangwaha zapa jiwana, twapwile ni kuzachisa jaali ni kulanjisa jikwo. Mba yingupwa ni ana-tusumbi 40. Muze akolele, yingwalanjisa ni kulanda akwo 300. Mba yinguhana tusumbi 50 hanga angwehe saku jaali ja pezu ya 50kg ja chivwale. Yitulia chivwale chacho ni usoko wami ni akwetu akwo ha shimbu lisuku.

Paulu yanyingika nawa ngwenyi chuma chilemu atamba kulinga hita mutu ndo kufuliela muli Zambi. Nyi mutulinga yize anafupu, matukwasa. Hakutwala kukufupa yakulikwasa nayo ku mwono, Yesu yamba ngwenyi: “Kanda nulipikala . . . tatenu kananyingika yuma yino nunahono.”​—Luka 12:29-31.

Alioze, Satana, mukwa-kole munene wa Zambi kakwonga atu anyonge ngwo chili chipema kusa wika mbunge kukufupa yuma ya kumusunya. O kakulipikala ni kukilikita chinji kufupa yuma yize te kuyafupiwile chinji ku mwono wo. Anji kakutambula mikuli ni kulipwisa ene ‘ndungo ja enya mikuli’ yacho.​—Yishima 22:7.

 Eka kakukwata yiyulo yipi. Paulu yamba ngwenyi: “Enyembo jetu anji hanahichika asoko ni masepa jo ni kuya ku yifuchi yeka kuze akunyonga ngwo kuli upite unji. Amwe hakachi ko keshi kupwa ni mikanda ya kwaatayiza kunjila mu chifuchi anayi mba keshi kuwana milimo. Kanji-kanji kakuchina-china ma policia ni kupomba mu yipendo. Keshi kufupa Zambi aakwase. Etu ni usoko wami yitulitesa kutala ha yipikalo yetu ya mbongo hamuwika, ni kutala kuli Zambi atukwase.”

Paulu yamba ngwenyi: “Yesu kambile ngwo: ‘Kanda nulipikala ha tangwa lia hamene. Mumu tangwa lia hamene likwete yipikalo yalio, yipi ya tangwa lieswe muyilita ni lie tangwa.’ Kashika tangwa ha tangwa napwile ni kwita Zambi ‘atwehe kulia chize chafupiwile hita tangwa’ hanga tununge ni mwono.’ Mba yatukwasa kulita ni maliji ja Yesu. Chipwe chocho, ha matangwa akwo twakapwile ni kuwana yize te twakufupa. Tangwa limwe yingumana mu mulongo chakuhona kunyingika yize apwile ni kulanjisa. Muze nahetele kulutwe, kuwana kanalanjisa yogurte. Ami kuchishi kuzanga yogurte. Alioze yinguyilanda, mba ufuku ye twalile. Nakusakwila Zambi mumu shimbu lieswe ali, kukushi tangwa nilimwe twapombele ni zala.” a

“Haliapwila yuma yinashiwa chinji ku mwono wetu. Alioze kapinda twamona, katulongesa ngwetu, chuma chilemu mu mwono ndo kufuliela muli Zambi. Yehova b matukwasa nyi mutufupa kulinga chitangu upale wenyi. Hitwamona umwenemwene wa maliji ali ha Samu 34:8, akwamba ngwo: ‘Panjikenu nukambe ngwenu, Yehova iye mupema.’ Kashika kutushi nawa ni woma wakupalika mu yipikalo yikwo hakutwala ku mbongo.

“Hitwanyingika pundu ngwetu, mutu kakufupa kulia mba apwe ni mwono, hi milimo ni mbongo wika ko. Tunashimbwila shimbu lize chilakenyo cha Zambi muchikamanunuka, chakwamba ngwo: ‘Kumukukapwa kulumbama cha mbuto mu mavu.’ Kashika ‘nyi tuli ni ya kulia ni ya kuzala, chatamba kuyuka nayo.’ Maliji a mu Mbimbiliya akututakamisa kali ngwo: ‘Ndako jenu jikapwe kujishi kufwila cha mbongo; pwenu akwa kuyuka ni yuma yize nuli nayo; mumu iye mwene hanambe ngwenyi, Chichi kukuhichika nichimwe, chipwe kukwehuka, ka. Chocho ni kuhamuka tunambe ngwetu, Mwene iye Chikwashi chami; chichi kevwa woma.’” c

Mutu katamba kupwa ni ufulielo mba ‘ende ni Zambi’ ngwe chize analingi Paulu ni usoko wenyi. (Uputukilo 6:9) Chipwe ngwe mbongo mujikaliwa hanji mutupinda ni yipikalo yeswayo kulutwe lia matangwa, nihindu chilweza cha ufulielo wa Paulu ni mana angunu azachishile chatulongesa yuma yinji yilemu.

Alioze kuchi mba mutulinga nyi tunazakalala ni yipikalo mu usoko?