1, 2. Yika liji “chitwamo cha yiliato” mulihasa kulumbunuka mu Yisoneko ya Hepreu?

 YEHOVA ZAMBI ngwenyi: “Lilu liapwa ngunja yami, ni hashi chitwamo cha yiliato yami.” (Izaia 66:1) Zambi kavulukile nawa “chitwamo cha yiliato” yenyi muze ambile ngwenyi: “Mungukasa uhenya kuma kwa yiliato yami.” (Izaia 60:13) Mba kuchi akusa uhenya ku chitwamo cha yiliato yenyi hanji kuchipemesa? Nawa yika chino chinalumbunuka kuli waze atwama ha chitwamo cha yiliato yenyi, chipwe ngwetu, hashi?

² Mu Yisoneko ya Hepreu liji “chitwamo cha yiliato” kakulizachisa nawa hanga avuluke tembele yikulu ya mu Izalele. (1 Sango ja Mianangana 28:2; Samu 132:7) Tembele yacho yapwile yipema chinji kuli Yehova, mumu te chihela chilemu cha uwayilo wamwenemwene. Kapwile ni kuyizachisa hanga yihane uhenya kuli Yehova hano hashi.

3. Chihela chilemu cha uwayilo wamwenemwene musono yika, nawa shimbu lika chaputukile?

³ Mba, chihela chilemu cha uwayilo wamwenemwene musono yika? Chihela chino hi zuwo ko ngwe tembele. Alioze yili tembele ya ku spiritu yize ya kuhana uhenya kuli Zambi kuhiana  zuwo lieswalio. Mba, tembele ya ku spiritu yika? Yili umwe ululikiso wa Zambi uze wakukwasa atu hanga apwe masepa jenyi ni kumuwayila. Chino chakulingiwa wika ha mukunda wa ukuule wa Yesu. Ululikiso uno waputukile ha mwaka 29, muze Yesu amupapachishile ni kumuwayisa ngwe Sasendote wa Lutwe mu tembele ya Yehova ya ku spiritu.​—A-Hepreu 9:11, 12.

4, 5. (a) Yika tuvumbi amwenemwene a Yehova atamba kulinga kulita ni mukanda wa Masamu 99? (b) Chihula chika twatamba kulihula yetwene?

⁴ Twakusakwila chinji Zambi ha ululikiso wa uwayilo wamwenemwene. Mutusolola ngwetu twakusakwilila ha kulweza akwetu sango lipema hakutwala ku jina lia Yehova ni chawana chenyi cha ukuule. Tunawahilila chinji hakunyingika ngwetu kuli unji wa tununu nake twa akwa-Kristu amwenemwene waze akuwayila Yehova matangwa eswe! Kulisa ni akwa-mayingeleja anji waze akunyonga ngwo makawayila Zambi mu malilu muze mafwa, atu ja Yehova kananyingika ulemu wakumuwayila haliapwila hano hashi.

⁵ Muze mutuhalisa Yehova, tunembulula chilweza cha tuvumbi twa Zambi ashishika waze anasolola mu Masamu 99:1-3, 5. (Tanga.) Malunga ashishika ngwe Mose, Arone ni Samuele kakwashile ululikiso wa Zambi wa uwayilo wamwenemwene ku mashimbu akunyima. (Samu 99:6, 7) Musono, muze akwa-Kristu akuwayisa waze ali hano hashi kanda achiputuka kukalakala ngwe Asasendote hamwe ni Yesu mu malilu, ayo kanawayila Yehova ni ushishiko weswe hano hashi mu tembele yenyi ya ku spiritu. Nawa tununu a tununu a “mapanga akwo” ni ushishiko weswe kakukwasa mandumbu akuwayisa ha mulimo wo. (Yoano 10:16) Mandumbu akuwayisa ni mapanga akwo eswe kakuwayila Yehova hamuwika. Kashika, mutu ni mutu katamba kulihula ngwenyi, ‘Shina yami nakukwasa chinji ululikiso wa Yehova wa uwayilo wamwenemwene nyi?

6, 7. Mulonga uka wapwile mu chikungulwila cha akwa-Kristu, nawa yika yalingiwile ha 1914 ni 1919?

⁶ Muze te kanda kuchikumbana miaka 100 chize haze azulwile chikungulwila cha akwa-Kristu, utanguke uze ambile yiukola chinji. (Yilinga 20:28-30; 2 A-Tesalonika 2:3, 4) Hakupalika cha mashimbu wano, yuma yiyiputuka kukaliwa nawa yichipwa chikalu chinji kunyingika akwa-kuwayila Zambi amwenemwene. Muze hikwapalika kama ja miaka, Yehova yazachisa Yesu hanga anyingikise kanawa waze akuwayila Zambi mu tembele Yenyi ya ku spiritu.

⁷ Ha mwaka wa 1919, waze Zambi atayijile hanga amuwayile mu tembele yenyi ya ku spiritu kaanyingikine kanawa. Ayo kalumwine yitanga yo hanga Yehova atayize uwayilo wo. (Izaia 4:2, 3; Malakia 3:1-4) Mba hi usolwelo uze postolo Paulu amwene hakupalika cha kama ja miaka yiuputuka kumanunuka.

8, 9. “Paraisu” yamutapu uka yize Paulu amwene mu usolwelo?

⁸ Usolwelo wa Paulu, uli mu mukanda 2 A-Korindu 12:1-4. (Tanga.) Mu usolwelo wacho Yehova yasolwela Paulu chuma chize te muchisoloka ha matangwa a kulutwe. “Paraisu” yamutapu uka yize Paulu amwene? Chitangu, Muyihasa kupwa Paraisu yize muyikapwa hano hashi. (Luka 23:43) Chamuchiali, muyihasa kupwa yimwe paraisu yingunu  ya ku spiritu yize muyikapwa hashi haha. Chamuchitatu muyihasa kupwa mwono upema mu malilu mu “paraisu ya Zambi.”​—Usolwelo 2:7.

⁹ Mumu liaka Paulu ambile ngwenyi “evwile maliji aze kahashile kuahanjika; te katayijile atu kuahanjika”? Mumu wano kakapwile mashimbu waze iye te malumbununa mu yimako-yimako yuma yipema yize amwene mu usolwelo. Alioze musono Yehova kanatweche hanga tulweze akwetu hakutwala ku yiwape yize atu jenyi anawahilila nayo haliapwila.

10. Shina paraisu ya ku spiritu ni tembele ya ku spiritu yili yuma yimuwika nyi? Lumbununa.

¹⁰ Ha mashimbu eswe, twakuhanjika chinji hakutwala ku paraisu ya ku spiritu, mba paraisu yacho yika? Yili kupwa chipema cha sambukila chize Zambi akuhana kuli atu jenyi. Kashika paraisu ya ku spiritu ni tembele ya ku spiritu yili yuma yaali yalisa. Tembele ya ku spiritu yili ululikiso wa uwayilo wamwenemwene wa Zambi. Paraisu ya ku spiritu yakunyingikisa ni ushidakenyo atu waze Zambi akutayiza hanga amuwayile mu tembele yenyi ya ku spiritu.​—Malakia 3:18.

11. Mulimo uka tuli nawo musono?

¹¹ Chili chipema kunyingika ngwo chize ha mwaka wa 1919, Yehova katayijile atu akwa-uhenge akalakale, akolese ni kutatwisa paraisu ya ku spiritu. Shina ena wakukalakala ni kukwasa mulimo uno upema nyi? Shina wakuwahilila ha kukalakala ni Yehova ni kusolola uhenya wenyi hano hashi?

12. Kuchi tunanyingika ngwetu Izaia 60:17 unamanunuka?

¹² Profeta Izaia kambile hakutwala ku yuma yinji yipema yize te muyalumuka mu ululikiso wa Zambi hano hashi. (Tanga Izaia 60:17.) Akweze hanji akwa-kristu aha kakutanga hanji kwiva wika hakutwala ku kwalumuka chacho. Alioze kuli mandumbu hanji mapangi anji waze akumona kulingiwa cha yino yuma yipema! Tuvumbi wano ashishika kali ni ushidakenyo ngwo Zambi kanazachisa Mwanangana wetu, Yesu, hanga asongwele ululikiso Wenyi! Muze mutupanjika yilweza ya wano akwa-Kristu a zango, ufulielo ni ujikijilo wetu muli Yehova muukola.

13. Kulita ni Samu 48:12-14 yika twatamba kulinga?

¹³ Akwa-Kristu amwenemwene eswe katamba kulongesa akwo hakutwala ku ululikiso wa Yehova. Chili chikomokeso kunyingika ngwetu chipwe tuhu tuli mu chifuchi cha Satana, nihindu tuli ni sambukila hamwe ni mandumbu jetu a hashi heswe! Chiseke chinji mutukevwa hakulweza “chisemuko muchizaho” ululikiso wa Yehova ni paraisu ya ku spiritu!​—Tanga Samu 48:12-14.

14, 15. Yuma yika yize yalumuka kukatuka ha mwaka 1970, nawa kuchi ululikiso unayuka?

¹⁴ Mandumbu anji a makulwana mu chikungulwila chetu hanamono chize yuma yakwalumuka mu ululikiso wa Yehova hano hashi ni chize unapeme. Ayo kakwiwuluka muze mu yikungulwila mwapwile wika kavumbi umuwika wa chikungulwila, kuhona kupwa chizavu cha makulwana, muze mu yifuchi mwapwile kasongwelo umuwika wa ku mutango kuhona kupwa Chizavu cha ku Mutango, hanji muze kasongwelo wa Sociedade Torre de Vigia te akusongwela, kuhona kupwa Chizavu cha Tusongwelo cha Yela ja Yehova. Chipwe chocho, mandumbu wano eswe kapwile ni kufuliela hali mutu umuwika yoze wapwile ni kukwata yiyulo  mu yikungulwila, ku mitango ni ku chishina chinene. Hakupalika cha mwaka 1970, yuma yiyiputuka kwalumuka, yasakula chizavu cha mandumbu apwe ni chiteli cha kukwata yiyulo mu chikungulwila kuhona kupwa mutu umuwika.

¹⁵ Mumu liaka kwalumuka chino chakuyukisa ululikiso weswe? Mumu chakukatuka ha kupwa ni chinyingi chipema cha Yisoneko. Keshi kusa nawa mutu umuwika hanga akwate yiyulo yeswe, alioze ululikiso wakuyuka ha yiyulo yipema yize akukwata kuli makulwana eswe, hanji “yawana kuli atu” waze Yehova hanatwehe mu chikungulwila.—A-Efwesu 4:8; Yishima 24:6.

16, 17. Yuma yika yaha yalumuka yize yakukomwesa, nawa mumu liaka?

¹⁶ Achinyonga kama ha yuma yize yalumuka ha matangwa wano hakutwala ku mikanda yetu. Twakuzanga chinji kuhana mikanda yetu yipema yize yakukwasa atu mu munda. Nawa ni chize twakuzachisa tecnologia yaha hanga twambujole sango lipema. Chakutalilaho, site jw.org yakukwasa atu anji, hanga atambule ukwaso uze anafupu. Ha yuma yeswayi yalumuka yinasolola zango linji lize Yehova akwete hali atu.

¹⁷ Twakusakwilila chinji kuli Yehova ha kwalumuna mashimbu a kukunguluka chetu hanga tuhase kulinga uwayilo wa mu usoko hanji longeso lia wika. Twakuwahilila nawa ha ululikiso uze alinga hanga alumune katalilo wa kukunguluka cha mbonge ni cha mambonge. Ululikiso uno akulinga wakupema chinji ha mwaka ni mwaka! Twakuwahilila nawa chinji ha fumbo lize twakutambula ku ma shikola anji a Mbimbiliya. Kwalumuka cheswachi, chinasolola ngwo Yehova kakusongwela ululikiso wenyi  nawa kananungu ni kululieka paraisu ya ku spiritu hanga yipema chinji!

18, 19. Kuchi mutuhasa kukwasa kululieka kanawa paraisu ya mu spiritu?

¹⁸ Yehova kanatwehe ulemu wa kululieka paraisu yetu ya ku spiritu hanga yipeme chinji. Mba kuchi twakuchilinga? Twakuchilinga muze twakwambujola sango lipema ni zango lieswe ni kutayisa tumbaji. Ha shimbu lieswalio mutukwasa mutu hanga apwe kavumbi ka Zambi, tunakwase hanga paraisu ya ku spiritu yikole.​—Izaia 26:15; 54:2.

¹⁹ Twakukwasa nawa hanga paraisu yetu ya ku spiritu yipeme ha tachi jize twakusa hanga tululieke utu wetu wa ku spiritu. Chino che chakupemesa paraisu yetu ya ku spiritu hanga atu akwo ayizange. Chino kuchishi kulingiwa wika ha mukunda wa chinyingi chetu cha Mbimbiliya, alioze ha yitanga yetu yipema nawa ya uhumikizo yize yakukwasa atu kwiza mu ululikiso ni kukundama kuli Yehova ni Yesu.

20. Kulita ni Yishima 14:35, yitanga yika twatamba kupwa nayo?

²⁰ Yehova ni Yesu kakuwahilila chinji musono muze akumona chize paraisu yetu ya ku spiritu yinapeme. Chiseke chize twakwiva musono ha kupemesa paraisu ya ku spiritu chili wika chimwe chilweza chikepe cha chiseke chize mutukevwa kulutwe lia matangwa muze mutukakalakala hanga tupwise hashi paraisu. Twatamba kwiwuluka mashimbu eswe Yishima 14:35, unambe ngwo: “Vumbi lia mwanangana kuliapwa kuli kavumbi wa mana.” Twatamba kupwa ni mana hanga tukalakale chinji ni kululieka kanawa paraisu yetu ya ku spiritu!