1, 2. (a) Kulita chika chili ha kushishika kuli Yehova ni kuhona kulinjisa mu mafwefwe a hano hashi? (Tala chizulie chili ha uputukilo.) (b) Atu anji kakushishika ku yuma yika, alioze yika yakwizako?

  TUVUMBI twa Yehova keshi kulinjisa mu mafwefwe, chipwe mu yuma yize yakuhandununa atu, ngwe chisemuko, vungu hanji ndako. Mumu liaka? Mumu twakuzanga Yehova, twashishika kuli iye, nawa twakumwononokena. (1 Yoano 5:3) Chipwe kweswako twatwama hanji kuze twejile, nihindu twakukaula shimbi ja Zambi. Kushishika kuli Yehova ni ku Wanangana wenyi chili chilemu chinji kuhiana chuma cheswacho. (Mateu 6:33) Kashika mutuhasa kwamba ngwetu, ‘hi tuli akwa hashi ko.’​—Tanga Yoano 17:11, 15, 16; Izaia 2:4.

² Atu anji musono kashishika ku chifuchi cho, ku munyachi wo hanji ku ndako jo, chipwe hanji ku chizavu cha akwa-yiheho. Yuma yino yakulingisa atu anji hanga alitachike, kulivwila kole, nawa ha mashimbu akwo kakushiha waze anakwase chizavu chikwo. Chipwe ngwe kutushi kulinjisa mu yuma jacho, alioze yuma yacho muyihasa kutupinjisa hamwe ni asoko jetu, nawa mutuhasa kumona lamba liakamokomoko. Muchihasa kupwa chashi kupwa  sali lia chimwe chizavu cha mafwefwe nyi manguvulu makwata yiyulo yize kuyishi kupema, mumu Zambi katulingile ni uhashi wakunyingika yuma yipema ni yipi. (Uputukilo 1:27; Shimbi Yamuchiali 32:4) Kuchi yena wakwivwa nyi kwalingiwa chimwe chuma chipi? Shina wakuhasa kwehuka kulinjisa mu mafwefwe, nyi shina wakupwa sali lia chimwe chizavu cha mafwefwe?

3, 4. (a) Mumu liaka kutushi kulinjisa mu mafwefwe? (b) Yika mutulilongesa ha mutwe uno?

³ Atu anji kakupwa sali lia mafwefwe muze mukupwa vunda mumu manguvulu kakwaamba ngwo che chuma chipema chize atu a mu chifuchi atamba kulinga. Alioze yetu, twakukaula Yesu. Kashika kutushi kulinjisa mu mafwefwe, nawa kutushi kwasa jita. (Mateu 26:52) Akwa-Kristu amwenemwene keshi kunyonga ngwo, yifuchi yimwe ya hano hashi ha Satana yili yipema kuhiana yifuchi yikwo. (2 A-Korindu 2:11) Yetu kutwazangile kulinjisa mu vunda nijimwe ja hano hashi.​—Tanga Yoano 15:18, 19.

⁴ Amu tuli akwa-shili, amwe akuli yetu kota achili ni amwe manyonga api hakutwala kuli atu aku vungu lieka. (Jeremia 17:9; A-Efwesu 4:22-24) Ha mutwe uno, mutulilongesa shimbi jize mujitukwasa kwehuka manyonga waze akuhandununa atu. Nawa mutulilongesa chize mutuhasa kushishika ku Wanangana ha kulilongesa yetwene hanga tunyonge chize Yehova ni Yesu no akunyonga.

5, 6. Muze Yesu apwile hano hashi kuchi te akunyonga hali atu aku ma vungu akwo, nawa mumu liaka?

⁵ Nyi twamona ngwetu chili chikalu kwehuka kulinjisa mu mafwefwe, tulihulenu ngwetu, ‘Nyi Yesu kachi te yika malinga?’ Muze Yesu apwile hano hashi, kwapwile kavunda-vunda ni kulitachika mukachi ka A-Yunda, A-Ngalileya ni A-Samaria. Tutalenu yimwe yilweza. A-Samaria ni A-Yunda te keshi kulihanjikisa. (Yoano 4:9) A-Fwariseu ni A-Saduseu te keshi kulivwashana ha yuma yinji. (Yilinga 23:6-9) A-Yunda waze alilongesele shimbi, te kakunyonga ngwo kahiana waze kakalilongesele shimbi. (Yoano 7:49) Nawa anji akuli ayo te kakwivwila kole akwa-kutambula lijimo ni A-Roma. (Mateu 9:11) Alioze Yesu kakalinjishile mu vunda jacho. Chipwe ngwe iye te kakulongesa umwenemwene hakutwala kuli Yehova ni kunyingika ngwenyi A-Izalele kali vungu lia Zambi, nihindu kakalongesele tumbaji twenyi ngwenyi ayo kali alemu chinji kuhina akwo. (Yoano 4:22) Alioze, iye yalongesa hanga azange atu eswe.​—Luka 10:27.

⁶ Mumu liaka Yesu kakamwene ngwenyi vungu limwe liapwile ni ulemu kuhiana vungu likwo? Mumu ha chize iye ni Tato akwivwa hali atu. Yehova katangile atu hanga azalise hashi ni minyachi yeka ni yeka. (Uputukilo 1:27, 28) Kashika, Yehova ni Yesu keshi kunyonga ngwo, vungu, chisemuko hanji limi limwe linahiane likwo, ka. (Yilinga 10:34, 35; Usolwelo 7:9, 13, 14) Twatamba kukaula chilweza cho chipema.​—Mateu 5:43-48.

7, 8. (a) Sali liaya twatwama, nawa mumu liaka? (b) Yika twatamba kwiwuluka ku kuhwa cha lamba lia atu?

⁷ Mumu liaka yetu kutushi kukwasa unguvulu wa atu niumwe? Mumu tuli sali lia Yehova. Aye kali Mwata wetu. Mu munda wa Endene, Satana kambile ngwo Yehova hi mwata mupema ko kuyula atu. Satana kazangile hanga atu afuliele ngwo chize iye akulinga yuma chili shinoho kuhiana Zambi. Yehova kakutwecha hanga tusakule sali lieswalio tunazange kupwa. Mba yena? Shina wakwononokena Yehova mumu wafuliela ngwenyi, chize akulinga  yuma chili shinoho kuhiana chize wakuyilinga nyi? Wakufuliela pundu ngwenyi, Wanangana wenyi we wika muhasa kuhwisa vunda? Nyi hanji wakunyonga ngwenyi, atu mahasa kuliyula ene kanawa kuhona kutambula usongwelo wa Zambi?​—Uputukilo 3:4, 5.

⁸ Chakutalilaho, nyi mutu makuhula chize yena wakunyonga hakutwala ku chimwe chizavu cha mafwefwe, milimo ya yimwe yizavu, hanji ululikiso ukwo walifwa, kuchi mukumbulula? Atu amwe aku yizavu yacho mahasa kupwa ni manyonga apema nawa mazanga kukwasa atu. Alioze etu tunanyingika ngwetu Wanangana wa Yehova we wika muhasa kuhwisa lamba lia atu ni kuchiza uhenge weswe. Etu twakukaula nawa usongwelo wa Yehova mu chikungulwila, kuhona mutu ni mutu kulinga yuma yize ananyongo ngwenyi yinamupemena. Ha kukaula chikuma chino, kashika chikungulwila chalinunga.

9. Mulonga uka wapwile mu kachi ka akwa-Kristu ku sekulu yitangu, nawa yika ayo te chatamba kulinga?

⁹ Kusekulu yitangu, amwe akwa-Kristu mu Korindu kapwile ni kuzwela umwe ni mukwo ni kwamba ngwo, “Ami nguli wa Paulu; mukwo ngwenyi, Ami nguli wa Apolu; au ngwenyi, ami nguli wa Sefwa; ni mukwo nawa ngwenyi, Ami nguli wa Kristu. Muze Paulu anyingikine chikuma chacho, kevwile yinyengo yinji. Chikuma chino chapwile mulonga ulemu, mumu sambukila ya chikungulwila yapwile mu kapalia. Kashika ahulile mandumbu jenyi ngwenyi: “Kristu kalihandunwona, nyi?” Paulu yaatoweza ngwenyi: “Ngunaliumbu kuli yenu, mandumbu, mu jina lia Mwene wetu Yesu Kristu, nukahanjike chuma chimuwika. Kanda nulihandunyona, alioze nukalinunge hamuwika mu kunyonga chimuwika ni upatwilo umuwika. Ni musono yuma yacho yili yamwenemwene. Chatambile kulihandununa mu chikungulwila.​—1 A-Korindu 1:10-13; tanga A-Roma 16:17, 18.

10. Paulu kewulwile akwa-Kristu ha yuma yika, nawa yika twalilongesa ha chikuma chino?

¹⁰ Paulu kewulwile akwa-Kristu akuwayisa ngwo ayo chifuchi cho chili mu malilu nawa ngwo katambile kukaula “yuma ya hashi.” (A-Fwilipu 3:17-20) a Akwa-Kristu akuwayisa ayo kali tunganda twa Zambi ni Kristu hano hashi. Nyi umwe kanganda kali ku chifuchi cheka, iye keshi kulinjisa mu milonga yambala ni yuma ya mafwefwe ya mu chifuchi chacho. Chizechene nawa, kuchichi kulita nyi umwe mukwa-Kristu wa kuwayisa malinjisa mu milonga ni mu yuma ya mafwefwe ya hano hashi. (2 A-Korindu 5:20) Waze ali ni kutalatala cha kupwa ni mwono wa mutolo hano hashi no nawa kashishika ku Wanangana nawa keshika kulinjisa ku yuma ya mafwefwe ya hano hashi.

11, 12. (a) Manyonga aka api waze twatamba kwehuka ni tunazange kushishika ku Wanangana wa Zambi? (b) Kuchi umwe pangi evwile hakutwala kuli amwe atu, alioze yika yamukwashile kwalumuna manyonga jenyi?

¹¹ Atu anji mu chifuchi kakwete zango linji hali atu a mu vungu lio, akwete ndako jo nawa a kuhanjika limi lio. Ayo kanji-kanji kakulinangamisa chinji ha mukunda wa kuze akatukile. Alioze yetu kutwatambile kupwa chocho. Twatamba kwalumuna manyonga jetu ni kufumba mbunge yetu hanga tununge ni kwehuka yuma yeswe ya mafwefwe chipwe muze mutupwa ni uhashi wa kuchilinga. Kuchi mutuhasa kulinga chino?

¹² Chakutalilaho, Mirjeta b kasemukine mu  chimwe chifuchi chize te akusanyika ngwo Yugoslavia. Kuma kuze akolelele, atu te kakwivwila kole akwa-Sérvia. Muze aye halilongesa hakutwala kuli Yehova yamona ngwenyi Zambi keshi kulemesa vungu nyilimwe kuhiana likwo, alioze Satana mwe wakuzanga hanga atu alivwile kole umwe ni mukwo. Ha chino aye yasa tachi hanga alumune manyonga jenyi. Alioze muze jita yaputukile mu kachi ka minyachi kuze aye te atwama, Mirjeta yaputuka nawa kwivwila kole akwa-Sérvia. Iye te keshi kuzanga nawa kwambujola sango lipema kuli atu jacho. Iye te kananyingika ngwenyi chino chili chipi, kashika yeta kuli Yehova hanga amukwase kwehuka manyonga jacho. Yeta nawa hanga amukwase kuputuka mulimo wa upionelu. Mirjeta yamba ngwenyi: “Kulihulikila mu mulimo wa sango lipema che chakungukwasa kuzanga atu. Mu mulimo wa sango lipema, nakweseka kwimbulula utu wa zango lia Yehova, chino chinangukwasa kwehuka manyonga api waze te ngukwete.”

13. (a) Yika yalingiwile kuli Zoila, nawa yika aye alingile? (b) Yika mutuhasa kulilongesa ha chilweza cha Zoila?

¹³ Zoila, umwe pangi wa mu Mexico, kayile mu Europa. Mu chikungulwila chenyi muli mandumbu ni mapangi waze akatukile mu yifuchi yikwo ya mu America Latina. Zoila yamba ngwenyi, amwe akuli mandumbu jacho kakungusosomba ha mukunda wa miaso ni ndako ja ku chifuchi chize nejile. Yino te yakumunehena yinyengo yinji, kashika alembele kuli Yehova hanga amukwase achine kunyonga ngwe kanamutuka. Chino nyi te muchilingiwa kuli yetu yika te mutulinga? Amwe akuli mandumbu jetu machipinda ni manyonga jo muze akwivwa yuma yipi hakutwala ku chihela kuze akatukile. Kashika kutwatambile kwamba hanji kulinga chimwe chuma chize muchisolola ngwo atu amwe kali apema kuhiana akwo. Kutwazangile kuneha kahandunununo mu chikungulwila hanji kweswako, ka.—A-Roma 14:19; 2  A-Korindu 6:3.

14. Yika muyihasa kutukwasa kunyonga hali atu ngwe chize Yehova akwaanyonga?

¹⁴ Yetu eswe tunanyingika ngwetu tuvumbi twa Yehova kali atu alinunga, kashika kutwatambile kunyonga ngwetu chihela hanji chifuchi chimwe chipema kuhiana chikwo. Alioze asoko jetu ni waze twakola no hamuwika mahasa kutushinjila hanga tuzange ku chihela kuze twejile. Hanji ha shimbu limwe wakunyonga chipi hakutwala kuli atu aku yifuchi yikwo, ndako, malimi, hanji mavungu. Yika muyihasa kukukwasa hanga wehuke manyonga wano? Twatamba kupukuna ha chize Yehova akwivwa hakutwala kuli atu waze akulizata ha mukunda wa chifuchi cho hanji ngwo ayo kali apema chinji kuhiana akwo. Hengula yikuma yino ha longeso lie lia wika hanji mu uwayilo wa mu usoko. Eta kuli Yehova hanga akukwase kunyonga ngwe chize iye akunyonga hali atu.​—Tanga A-Roma 12:2.

15, 16. (a) Amwe yika mahasa kutulinga mumu ha kulisa ni atu akwo? (b) Kuchi yisemi mahasa kukwasa ana jo hanga ashishike kuli Yehova?

¹⁵ Amu tunazange kuwayila Yehova ni mbunge yipema, ha mashimbu amwe mutusoloka ngwe twalisa ni atu waze twakukalakala no, twakulilongesa no, ni enyembo jetu hanji ni asoko jetu. (1 Petulu 2:19) Yesu katutowezele ngwenyi, atu akwo matuvwila kole ha mukunda wa kupwa atu alisa. Twiwulukenu ngwetu, atu anji akulimika ni yetu kanyingikine Wanangana wa Zambi. Kashika ayo keshi kunyingika mumu liaka chili chilemu kuli yetu kupwa atu waze ashishika ku Wanangana kuhona kushishika kuli manguvulu ja atu.

¹⁶ Mba tushishike kuli Yehova, twatamba kumwononokena chipwe ngwe atu amwe malinga hanji mamba yeswayo anazange hali yetu.  (Daniele 3:16-18) Chino muchihasa kupwa chikalu kuli akweze kulisa ni akwo. Yisemi kwasenu ana jenu hanga apwe ni hamu ku shikola. Ana jenu mahasa kwivwa woma hakulituna kuwayila pendelo, hanji kulituna kuya ku yiwanyino ya chifuchi. Ha uwayilo wenu wa mu usoko munuhasa kulilongesa chinji ha chize Yehova akunyonga ha yuma yacho. Alongesenu chize malumbununa kanawa ufulielo wo ni vumbi lieswe. (A-Roma 1:16) Nawa nyi muchilita, kwasa ana je hanga ahanjike ni alongeshi jo ni kwalumbunwina yize twafuliela.

17. Manyonga aka twatamba kwehuka, nawa mumu liaka?

¹⁷ Kwamba pundu, twakuwahilila ni kulia, limi, yitangiwa, ni ndako ja kuze twakolele. Alioze, kutala twakunyonga ngwetu yuma yize etu twakuzanga yinahiane yize atu akwo akuzanga nyi? Yehova kanazange hanga tuwahilile ni yuma yamutapu weswe yize atangile. (Samu 104:24; Usolwelo 4:11) Ha chino, mba mumu liaka twakujijiminya ngwo, nyonga lietu lia kulinga yimwe yuma linahiana lia atu akwo?

18. Mumu liaka chili chipema kunyonga hali akwetu ngwe chize Yehova akwaanyonga?

¹⁸ Yehova kanazange ngwo atu amutapu weswe amunyingike, amuwayile, ni kutwama ni mwono wa mutolo hano hashi. (Yoano 3:16; 1 Timoteu 2:3, 4) Ha chino muze mandumbu jetu mamba limwe nyonga liakacheka mutuhasa kwapanjika nyi nyonga liacho linalite ni lia Yehova. Nyi twalinga chocho, mutuwahilila ku mwono nawa mutulinunga ni mandumbu jetu. Ngwe chize twalilongesa kulu, twashishika kuli Yehova ni Wanangana wenyi, kashika kutushi kulinga yuma ya mafwefwe ya hano hashi. Twakwivwila kole kulizata ni kulitachika cha hano hashi ha Satana. Tunawahilila chinji hakunyingika ngwetu, Yehova kanatulongesa hanga tuzange sambukila ni kupwa yimbovu! Twakwivwa ngwe mukwa-masamu yoze wambile ngwenyi: “Talenu cho kupema, cho kuwaha, muze mandumbu matwama hamuwika ni mbunge yimuwika!”​—Samu 133:1.