Janete, yoze hitwavuluka kulu yamba ngwenyi, “Ha kupalika cha amwe mashimbu akehe muze tata te hafwa, mukwetu-lunga yangulweza ngwenyi, haputuka kuzanga pwo mweka. Ha mashimbu akehe, susumuku iye yatuhuka ku zuwo ni kungulweza kama ka, chipwe kungushika ka, yanguhichika ni ana aali ukawami.” Janete yawana mulimo, alioze mbongo te kujishi kukumbana kufweta zuwo. Nawa kapwile ni kupinda ni yipikalo yinji hi ya mbongo wika ko. Iye yamba ngwenyi: “Nevwile yinyengo yinji ha yiteli yize ngulinayo halapwila. Yingumona ngwe te napwile ni mulonga wakuhona kulisa kanawa ana jami ngwe chize yisemi akwo akulinga. Chipwe haliapwila, nakulihula chize atu akunyonga hali yami ni ana jami. Shina ayo kakulihula nyi yami nasele tachi hanga ngufunge ulo wami?”

Kulemba chakukwasa Janete kulihumikiza ku manyonga jenyi ni kukolesa usepa wenyi ni Zambi. Mwene yamba ngwenyi: “Ha ufuku chakupwa chikalu chinji, mumu muze mu chifuchi himwahola, henaho nakunyonga chinji ha yipikalo yami. Kulemba ni kutanga Mbimbiliya che chakungukwasa kuya tulo. Chisoneko chami nazanga chinji chili A-Fwilipu 4:6, 7: ‘Kanda nukalipikala ha chuma nichimwe, alioze ha yuma yeswe ku kulemba ni kuliumba hamwe ni kusakwila, kwita chenu akachinyingike kuli Zambi, mba sambukila ya Zambi, yize yakuhiana kunyonga cheswe, muyikafunga mbunge jenu ni kunyonga chenu muli Kristu Yesu.’ Nakupalikisa ufuku unji ni kulemba ha chino nakupwa ni sambukila ya Yehova.”

Maliji a Yesu hakutwala ku kulemba waze ahanjikile ha Longeso lienyi lia ha Mulundu kakukwasa ha yipikalo yeswayo ngwe yino: “Tatenu kananyingika yuma yize nwakufupafupa, shimbu kanda nwita kuli iye.” (Mateu 6:8) Nawa twatamba kumwita. Kulemba chili yimwe jila yitangu yize mutuhasa ‘kukundama kuli Zambi.’ Yika mutu mayukako nyi hachilinga? ‘Zambi kumakundama kuli iye.’​—Tiangu 4:8.

Chochene, kulemba ni mbunge yeswe yakutukwasa kuhuzulula yipikalo yetu nawa yili yimwe jila  yakulweza yipikalo yetu kuli Zambi. Yehova ‘Mukwa-kwivwa kulemba,’ kakukwasa waze eswe akumufupa ni ufulielo weswe. (Masamu 65:2) Kashika Yesu alongesele tumbaji jenyi ngwenyi, “chaatamba kulemba matangwa eswe.” (Luka 18:1) Kashika yetu twatamba kununga ni kwita usongwelo ni ukwaso wa Zambi, ni ujikijilo weswe ngwo iye makatakamisa ufulielo wetu. Twatambile kuhamika ha chize Yehova akulinga yuma. ‘Kulemba, chakuhona kulitwamina chakusolola ufulielo wetu ungunu’​— 1 A-Tesalonika 5:17.

Alioze ufulielo wamwenemwene yika unalumbunuka? Ufulielo unalumbunuka ‘kunyingika’ Zambi ngwe mutu. (Yoano 17:3) Chino twakuchilinga chitangu ha kunyingika manyonga ja Zambi kupalikila mu Mbimbiliya. Tunanyingika ngwetu iye kanatunyingika kanawa nawa kanazange kutukwasa. Ufulielo wamwenemwene unalumbunuka yuma yinji hi kunyingika wika ko ngwo Zambi kwali. Chino chinalumbunuka kupwa ni usepa wa vumbi ni iye. Ngwe chizechene cha kulingiwa kuli atu kutushi kuhasa kupwa susumuku masepa ja Zambi. Ufulielo wetu ‘muutohwa mashimbu eswe muze mutulilongesa chinji hakutwala kuli iye nawa mutulinga “yuma yize ya kupemena kuli iye.” (2 A-Korindu 10:15; Yoano 8:29) Ufulielo wa mutapu au we wakukwasa Janete hanga akumbe yipikalo.

Janete yamba ngwenyi, “chuma changukwashile chinji kukolesa ufulielo wami chili kukaula usongwelo wa Yehova mu yuma yeswe yize te nakulinga. Ha mashimbu amwe, twapwile ni kupinda ni uhenge wa atu akwo chino te chikalu kulimika nacho. Nyi twalemba chinji, Yehova mashimbu eswe matukwasa hanga twehuke yeswayo yize te yetwene tuchikuhasa kwehuka. Muze nakusakwila kuli Yehova, chino chakungwiwula yuma yinji yize iye halinga hali yami. Iye kakutukwasa ha shimbu ni ha ola yize yalita. a Nawa kakutwaha masepa amwenemwene mandumbu akwa-Kristu waze akwete yitanga yipema. Ayo nihindu kakupwa hamwe ni yami nawa kali chilweza chipema kuli ana jami.

“Ngunanyingika mumu liaka Yehova anambe mu Malakia 2:16 ngwenyi, “kulakula changupihila.” Kuli umwe chikwashi yoze wasamba, chikuma chino chili chuma chipi chinji. Hakupalika cha miaka chize muze mukwetu-lunga anguhichikile, nihindu nakwivwa yinyengo ku mbunge. Muze chino muchilingiwa, nakweseka kukwasa umwe mutu, nawa chino chakungukwasa chinji.” Ha kukaula shimbi ya mu Mbimbiliya ya kwehuka kulihandununa, chino chakwashile Janete kukumba yipikalo yenyi.​—Yishima 18:1. b

Janete yamba ngwenyi, “utakamiso wami wakwiza hakunyingika ngwo Zambi kali tata ya ana-ashiwa nawa sopi ya twamishi amapwo. Iye kechi katuhichika ngwe chize alingile mukwetu-lunga.” (Samu 68:5) Janete kananyingika ngwenyi Zambi keshi kutweseka “ni yuma yipi.” Alioze, iye kakutwaha mana “ni kuvungumuna” nawa kakutwaha “tachi” jahiana hanga jitukwase kukumba yipikalo yetu.”​—Tiangu 1:5, 13; 2 A-Korindu 4:7.

Alioze kuchi mba mutulinga nyi tunalipikala ku mwono ha mukunda wa ponde?