Mawe jacho kapwile ni kwaazachisa hakutwa yakulia hanga apwe ni unga wakwocha nacho mbolo. Mawe jacho kapwile ni kwaazachisa chinji kuli mapwo ni ngamba ha yihunda yeswe. Atu ha matangwa jacho kejilile chinji kwivwa zungo lia mawe jacho.​—Kutuhuka 11:5; Jeremia 25:10.

Yuma ya ha kale ya mu Engitu yasolola chize apwile ni kutwa yakulia yacho. Kapwile ni kusa yakulia ha liwe haze hanakuluka. Te kakumbata liwe lia kucheka nalio, ni kuputuka kucheka manona. Kulita ni umwe lusango, ngwo mawe akucheka no yakulia te kakupezala 2 hanji 4 kilograma. Mawe jacho kapwile ni kushiha atu ni mazachisa ngwe mwishi.​—Akwa Kuyula 9:50-54.

Muze kucheka yakulia chapwile chilemu chinji mu usoko, yikupwa ni shimbi mu Mbimbiliya yakukanjisa mutu kumbata liwe lia kucheka nalio yakulia lia mukwo lipwe ngwe mbwezu. Shimbi yacho yinambe ngwo: “Mutu niumwe kanda achiza mawe a kucheka no wunga, chipwe liwe lia helu kupwa chifuchi, mumu kanachiza mwono wa mutu autenge chifungo.”​—Shimbi Yamuchiali 24:6.

Mu Mbimbiliya Yesu kanamuvuluka ngwo kali “mu kondo ya Tata.” (Yoano 1:18) Maliji wano kanalumbununa usoko ukolo ni utayizo uze Yesu alinawo ni Tato. Kanatale ku ndako yize apwile nayo A-Yunda muze te anali.

Ha matangwa ja Yesu, A-Yunda kapwile ni kusendala ha yitwamo muze anali ku mesa. Hita mutu wapwile ku mesa kapwile ni kusendala ni kusa munguza wenyi wa umama ha mesa. Hachino, kwoko lienyi lia utata lie apwile ni kuzachisa. Muze eswe apwile ni kusendala sali lia umama, lusango umwe kanalumbununa ngwo “mutwe wa hita mutu wapwile hakamwihi ni pambo lia mukwo wapwile kunyima lienyi, kashika chapwile ngwe ‘kali mu kondo’ ya mukwo.”

?Mba kupwa mu kondo ya mutwe wa usoko hanji mwenya-zuwo kaachimwene kupwa chuma chilemu chinji. Kashika, ha Chizomboka chakasula chize Yesu alingile, kambaji Yoano “yoze azangile Yesu” mwe wapwile mu kondo ya Yesu. Yeyize kuma Yoano wahashile “kuzeukila mu kondo ya Yesu” ni kumuhula.?​—Yoano 13:23-25; 21:20