1, 2. (a) Mumu liaka amwe ali ni ushindakenyo ngwo Yehova kakuzanga atu jenyi? (Tala chizulie chili hauputukilo.) (b) Atu kalingile ni uhashi uka?

MUMU liaka tukwete ushindakenyo ngwetu Yehova kakuzanga atu jenyi? Mba tukumbulule chihula chino tutalenu yilweza yino: Ha yimwe miaka yikalu, mandumbu ni mapangi kakolwezele ni zango lieswe pangi yoze anavuluka ngwenyi Taylene. Ayo kamulwezele hanga eche kunyonga wika hali iye mwene. Aye yamba ngwenyi: “Nyi te Yehova keshi kunguzanga, kachi iye keshi kungwaha chiyulo chenyi ha mashimbu eswe.” Brigitte, yoze walelele ana aali ukawenyi muze mukwo-lunga afwile yamba ngwenyi: “Kulela ana hano hashi ha Satana chakupwa chikalu chinji, chipi-chipi nyi kanaalele kuli chisemi umuwika. Alioze ami nguli ni ushindakenyo ha zango lia Yehova, mumu iye kakungukwasa chinji ha lamba lize nakumona, nawa iye keshi kutayiza akangweseke ha yuma yize chichi kuhasa kukumba.” (1 A-Korindu 10:13) Sandra kali ni yimwe yikola yipi yize kuyishi ni uwukiso. Ha chimwe kukunguluka cha mambonge, umwe pangi kasolwele zango kuli Sandra. Lunga lia Sandra yamba ngwenyi: “Chipwe te kutwalinyingikine kanawa, zango lienyi lianehene uwahililo unji ku mbunge yetu. Chipwe maliji akehe a zango waze anakatuka  kuli mandumbu ni mapangi jetu kakusolola chize Yehova akutuzanga chinji.”

² Yehova katangile atu ni uhashi wa kupwa ni zango ni kulisolola. Chipwe chocho, chili chashi kulela mu mbunge ha mukunda wa yikola hanji kuhona mbongo hanji ha mukunda wakuhona kukalakala chinji mu sango lipema. Nyi twaputuka kunyonga ngwetu Yehova keshi kutuzanga, twatamba kwiwuluka ngwetu tuli ni ulemu unji kuli iye nawa ngwo kwali, hanga akwate moko jetu liachindume ni kutukwasa. Nyi mutushishika kuli iye, kechi katuvulama ni limwe tangwa.​—Izaia 41:13; 49:15.

3. Yika muyihasa kukolesa ushindakenyo wetu ngwo zango lia Yehova hali yetu kulishi kuhwa?

³ Yela waze avuluka kuuputukilo wa mutwe uno, kapwile ni ushindakenyo ngwo Zambi kapwile hamwe ni ayo ha mashimbu akalu. Yetu mutuhasa kupwa ni ushindakenyo wowene ngwo iye kali hamwe ni yetu. (Masamu 118:6, 7) Mu mutwe uno, mutulilongesa yikuma yiwana yize yinasolola ngwetu Yehova kakutuzanga. Yuma yacho yili yino (1) yitangiwa yenyi, (2) Mbimbiliya, (3) kulemba ni (4) ukuule. Kupukuna ha yuma yipema yize Yehova analingi muchihasa kutukwasa chinji hanga tuwahilile ni zango lienyi lize kulishi kuhwa.​—Tanga Samu 77:11, 12.

4. Yika twalilongesa ha yitangiwa ya Yehova?

⁴ Muze mutupukuna ha yitangiwa ya Yehova, twakulilongesa chize iye akutuzanga chinji. (A-Roma 1:20) Chakutalilaho, Yehova kakatangile hashi hanga tutwamoho wika. Alioze iye kakutwaha yeswe yize tunafupu hanga tupwe ni mwono. Yetu twafupa kulia, kashika Yehova akutwaha kulia cheka ni cheka hanga tuwahilile nacho! (Chilumbununyi 9:7) Umwe pangi yoze avuluka ngwo Catarina kakuwahilila chinji hakumona yitangiwa, kanji-kanji ha mashimbu akusokoloka cha yitemo mu Canada. Iye yamba ngwenyi: “Chili kukomoka ha chize yuma yeswe yili ni mwono​—ngwe kusokoloka cha yitemo ni tujila waze akufuna kuze ayanga, hamwe ni kashosha yoze wakuwana kulia haze lia kapenda wa chikuku chami. Yehova kakutuzanga, kashika akutwaha yuma yinji yipema.” Tata yetu kakuzanga yitangiwa yenyi, nawa kanazange hanga tuwahilile nayo.​—Yitanga 14:16, 17.

5. Kuchi zango lia Yehova liakusoloka ha chize atangile atu?

⁵ Yehova katutangile ni uhashi wa kukalakala kanawa ni kuwahilila ha kukalakala chacho. (Chilumbununyi 2:24) Iye kahanyine atu mulimo wa kuzalisa hashi, kulimaho, ni kufunga yishi, tujila, nawa ni yuma yikwo ya mwono yize yiliho. (Uputukilo 1:26-28) Nawa iye katutangile ni yitanga yipema hanga tuhase kumwimbulula!​—A-Efwesu 5:1.

6. Mumu liaka twatamba kuzanga chinji Liji lia Zambi?

⁶ Yehova hanatwehe Mbimbiliya ha mukunda wa zango lienyi linene lize alinalio hali yetu. Yakutulweza yuma yize twatamba kunyingika hakutwala kuli iye ni chize iye akwivwa hakutwala kuli atu. Chakutalilaho, Mbimbiliya yakutulweza chize Yehova evwile hakutwala kuli A-Izalele, kanji-kanji muze te akumwehuka. Masamu 78:38 unambe ngwo: “Alioze se iye mukwa keke, waakonekenene uhenge wo, kaajimine. Ewa, kanji-kanji watewulwile utenu wenyi; kasolwele ufwatulo wenyi weswe.” Kupukuna ha versu yacho muchihasa kutukwasa hanga tumone chize Yehova akutuzanga ni kutufunga. Mutuhasa kupwa ni ushindakenyo ngwo Yehova kakutufunga.​—Tanga 1 Petulu 5:6, 7.

7. Mumu liaka Mbimbiliya yatamba kupwa yilemu chinji kuli yetu?

⁷ Mbimbiliya yatamba kupwa ni ulemu unji kuli yetu. Mumu liaka? Mumu Yehova kakuhanjika ni yetu kupalikila mu Liji lienyi. Chisemi nyi mahanjika kanawa ni mwanenyi, ayo makolesa  zango ni ujikijilo wo kuli umwe ni mukwo. Yehova kali Tata yetu ya zango. Chipwe ngwe yetu kutushi kumumona hanji kwivwa liji lienyi, alioze iye kakuhanjika ni yetu kupalikila mu Mbimbiliya. Twatamba kumupanjika kanawa! (Izaia 30:20, 21) Muze mututanga Mbimbiliya mutunyingika Yehova ni kumufuliela, mumu iye kakutusongwela ni kutufunga.​—Tanga Samu 19:7-11; Yishima 1:33.

8, 9. Yika Yehova anazange hanga tunyingike hali iye? Hana chilweza cha mu Mbimbiliya?

⁸ Yehova kanazange hanga tunyingike ngwo iye kakutuzanga. Iye keshi kutala wika ku shili yetu mumu iye kakutala ha yuma yipema yize twakulinga. (2 Sango ja Mianangana 16:9) Tuhengulenu chize Yehova amwene yuma yipema kuli Mwanangana Yehosofate wa A-Yunda. Yehosofate kakwachile chiyulo chipi chinji hakulichinga ni Mwanangana Ahabe wa Izalele hanga aye ni kwasa jita ni A-Seria ku Remote-Ngiliate. Chipwe ngwe maprofeta a mahuza 400 ambile kuli lunga mupi Ahabe ngwo kumakumba jita, nihindu profeta wamwenemwene wa Yehova Mikaia yalweza Yehosofate ngwenyi nyi masa jita, kumamukumba. Chenacho che chalingiwile. Ahabe yafwa mu jita alioze Yehosofate yalilamwina. Hakuhwa cha jita Yehova yazachisa Jehu hanga ahane chiyulo kuli Yehosofate ha upi uze alingile. Nawa Jehu yamulweza ngwenyi: “Yimwe yuma yipema hayiwana muli yena.”​—2 Sango ja Mianangana 18:4, 5, 18-22, 33, 34; 19:1-3.

⁹ Kuuputukilo wa miaka, Yehosofate yalweza mianangana, A-Levi, ni asasendote hanga aye mu mbonge jeswe ja A-Yunda ni kulongesa atu Shimbi ja Yehova. Ayo kalingile kanawa mulimo wo, mumu chipwe atu aku yifuchi yeka kanyingikine Yehova. (2 Sango ja Mianangana 17:3-10) Chipwe ngwe Yehosofate kakwachile chiyulo chipi, nihindu Yehova kakavulamine yitanga yenyi yipema yize alingile chize kuwanuke wenyi. Chilweza chacho chili ni utakamiso unji hali yetu, mumu ha mashimbu amwe twakuvulumuna. Kashika ni mutulingila kanawa Yehova aye manunga ni kutuzanga nawa keshi kavulama yuma yipema yize twakulinga.

10. Kuchi twatamba kwivwa hakutwala ku kulemba?

¹⁰ Umwe tata wa zango kakufupa mashimbu hanga apanjike ana jenyi muze mazanga kuhanjika nenyi. Iye kakuzanga kunyingika chize ana jenyi anevu mumu iye mwe wakwaafunga. Tata yetu wa zango, Yehova, neye che akulinga. Iye kakutwivwa muze twakulemba kuli iye. Kuhanjika ni Tata yetu chili chipema chinji!

11. Mumu liaka kulemba chili chawana chilemu cha kuli Yehova?

¹¹ Mutuhasa kulemba kuli Yehova ha shimbu lieswalio. Iye kali sepa lietu, nawa iye matwivwa ha shimbu lieswalio mutulemba. Taylene yoze twavuluka kuuputukilo yamba ngwenyi: “Mutuhasa kwita yuma yeswayo mumu kukushi yize muyitukwika.” Muze mutulweza Yehova manyonga jetu a ku mbunge iye mahasa kutukumbulula kupalikila mu chimwe chisoneko, chikuma cha mikanda yetu, hanji utakamiso uze mandumbu ni mapangi jetu matwaha. Yehova kakwivwa kwita chetu, nawa iye kanatunyingika chipwe ngwe mutu nyi umwe katunyingikine. Kumbululo lienyi ha yilemba yetu liakusolola ngwo zango lienyi hali yetu kulishi kuhwa.

12. Mumu liaka twatamba kuhengula yilemba yize yili mu Mbimbiliya?

¹² Mutuhasa kulilongesa yikuma yilemu ya yilemba yize yili mu Mbimbiliya. Ha mashimbu amwe, chili chilemu chinji kulilongesa yilemba yacho ha uwayilo wa mu usoko. Yilemba yetu muyiwaha muze mutupukuna ni hamu lieswe yilemba ya tuvumbi twa Zambi aku matangwa akunyima. Chakutalilaho, mutuhasa kulilongesa chinji ha kulemba cha kulikehesa chize Yona alingile muze apwile mu jimo lia yishi. (Yona 1:17–2:10) Nawa mutuhasa kuhitulula kulemba cha mbunge yeswe chize Solomone alingile kuli Yehova muze azulwile tembele. (1 Mianangana 8:22-53) Ni kupukuna ha chilweza cha kulemba cha Yesu. (Mateu 6:9-13) Chikuma chilemu chili “kwita chenu akachinyingike kuli Zambi. Mba sambukila ya Zambi, yize yakuhiana kunyonga cheswe, muyikafunga mbunge jenu ni kunyonga” chenu. Kusakwilila chetu cha zango lia Yehova lize kulishi kuhwa muchinunga ni kukola.​—A-Fwilipu 4:6, 7.

13. Uhashi uka tulinawo ha mukunda wa ukuule?

¹³ Yehova hanatwehe chawana cha ukuule “hanga tukapwe a mwono.” (1 Yoano 4:9) Kunyonga ha zango lilemu lia Zambi, postolo Paulu yasoneka ngwenyi, ha “mwaka wa kulita Kristu wafwilile yitanganyanyi. Mumu chikalu umwe kufwila mukwa ululi: hindu hanji umwe mahamuka kufwila mutu mupema. Alioze Zambi hanasolola chinyingi cha zango lienyi kuli yetu, mumu shimbu te tuchili yivulumunyi, Kristu watufwilile.” (A-Roma 5:6-8) Ukuule uli chilweza chinene cha zango lia Zambi, nawa wakuhana atu uhashi wa kupwa ni usepa upema ni Zambi.

14, 15. Ukuule yika unalumbunuka kuli (a) akwa-Kristu akuwayisa? (b) waze ali ni kutalatala cha mwono wa mutolo hano hashi?

¹⁴ Ha mukunda wa ukuule chizavu chikehe cha  akwa-Kristu chakwivwa zango lia Zambi lize kulishi kuhwa mu jila yalipwila. (Yoano 1:12, 13; 3:5-7) Zambi kakwaawayisa ni spiritu yisandu, nawa o kakupwa ana jenyi. (A-Roma 8:15, 16) Amwe akuli ayo achili hano hashi, mba mumu liaka Paulu wambile ngwenyi ayo kanatwame, “hamwe nenyi muma wa malilu muli Kristu Yesu”? (A-Efwesu 2:6) Mumu Yehova hanehe kutalatala cha mwono wa mutolo mu malilu.​—A-Efwesu 1:13, 14; A-Kolosu 1:5.

¹⁵ Waze eswe keshi akuwayisa mahasa kupwa masepa ja Zambi nyi masolola ufulielo ku ukuule. Ayo kali ni uhashi wakupwa ana ja Zambi ni kutwama ni mwono wa mutolo mu paraisu hano hashi. Ukuule wakusolola zango lia Yehova hali yetu. (Yoano 3:16) Cho kuwaha ha kunyingika ngwo nyi twawayila Zambi ni ushishiko weswe, makatwaha mwono upema hashi haha! Kashika tusololenu ngwetu twakulemesa ukuule, uze wasolola chilweza chinene cha zango lia Zambi hali yetu lize kulishi kuhwa.

16. Yika mutulinga muze hitwapukuna ha zango lia Zambi?

¹⁶ Chili chikalu kunyingika majila eswe waze Yehova akusolwela zango lienyi hali yetu. Mwanangana Ndawichi yemba ngwenyi: “Zambi, manyonga je kuli yami cho kulema! Kwafutula hamuwika, cho kwoka! Kachi nahasa kwaalula mahina kwalula cha masekeseke.” (Masamu 139:17, 18) Kupukuna ha majila waze Yehova akusolwela zango hali yetu muchitutakamisa hanga tumuzange ni kumuwayila ni mbunge yeswe.

17, 18. Majila aka waze mutuhasa kusolwela zango lietu kuli Zambi?

¹⁷ Kuli majila anji waze mutusolwela ngwetu twakuzanga Yehova. Chakutalilaho, mutuhasa kusolola zango lietu kuli Yehova hakwambujola sango lipema lia Wanangana kuli akwetu ni zango lieswe. (Mateu 24:14; 28:19, 20) Mutuhasa kusolola nawa zango lietu kuli Zambi ha kunyongonona ni ushishiko weswe ha yuma yize yakulimika ni ufulielo wetu. (Tanga Samu 84:11; Tiangu 1:2-5.) Chipwe ngwe yipikalo yetu yili yinji, mutuhasa kupwa ni ushindakenyo ngwetu Yehova kanamono lamba lietu nawa ngwetu matukwasa, mumu tuli ni ulemu kuli iye.​—Samu 56:8.

¹⁸ Zango lietu kuli Yehova lia kutulingisa kupukuna ha yuma yeswe yipema yize atangile. Twakusolola ngwetu twazanga Yehova ni Liji lienyi ha kupwa alongi apema a Mbimbiliya. Twakulemba mashimbu eswe kuli Yehova mumu twakumuzanga nawa tunazange kukolesa usepa wetu ni iye. Muze mutupukuna ha chiwape chipema cha ukuule, zango lietu kuli iye lia kukola. (1 Yoano 2:1, 2) Wano kali amwe majila waze mutusolwela ngwetu twakulemesa zango lienyi kulishi kuhwa lize akwete hali yetu.