1, 2. Nyonga lika tuvumbi twa Yehova alinalio?

TUVUMBI twa Yehova kakushimbwila ni mbunge yeswe kumanunuka cha uprofeto. Chakutalilaho, Jeremia kashimbwile uprofeto uze wambile ngwo A-Babilonya te manongesa A-Yunda, uze te muumanunuka ha mwaka 607 K.M.J. (Jeremia 25:8-11) Izaia kambile ngwenyi, Yehova te matuhwisa A-Yunda mu undungo ni kwaatwala mu chifuchi cho, hakwamba ngwenyi: “Kawaha waze mamutwaminyina.” (Izaia 30:18) Mika neye kashimbwile ngwenyi yilakenyo ya Yehova te muyimanunuka ha kwamba ngwenyi: “Hakutwala kuli yami, mungutala kuli Yehova.” (Mika 7:7) Nawa ha tununu a miaka, tuvumbi twa Zambi kapwile ni ushindakenyo ngwo Mesaya chilakenyo hanji Kristu te kumeza.​—Luka 3:15; 1 Petulu 1:10-12. *

² Musono, ni yetu tunashimbwila kumanunuka cha uprofeto hakutwala ku Wanangana wa Yehova. Yesu, Wanangana mu wa Zambi, kwasala hakehe makalamwina tuvumbi twa Zambi ku luyinda yoze makeza hashi heswe. Iye makanongesa atu api ni kuhwisa lamba lieswe hano hashi. (1 Yoano 5:19) Kashika twatamba kushimbwila kwiza cha tangwa lia Yehova ha shimbu lieswalio, nawa tulingenu yeswawo mutuhasa hanga tangwa liacho likatuwane hitwalilulieka.

3. Nyi twakushimbwila kwiza cha songo ha miaka yinji, yika mutuhasa kulihula?

 ³ Tunashimbwila chinji tangwa lize upale wa Zambi muukalingiwa hano hashi. (Mateu 6:10) Alioze nyi twakushimbwila kwiza cha songo ha miaka yinji, kota mutuhasa kuputuka kulihula ngwetu, ‘Mumu liaka twatamba kununga ni kushimbwila songo hanga lize kawashi?’

4. Mumu liaka chili chilemu kuli yetu kununga ni ‘kukanyama?’

⁴ Yesu katowezele tumbaji twenyi hakwamba ngwenyi “kanyamenu” nawa ngwo “lenu.” Kashika chili chilemu chinji kuli yetu hanga tununge ni kushimbula kwiza cha songo. (Mateu 24:42; Luka 21:34-36) Nawa, ululikiso wa Yehova unanungu ni kutwiwulula hanga tushimbwile “kuheta cha tangwa lia Zambi” ni kutalatala ku yilakenyo ya Yehova ya hashi haha.​—Tanga 2 Petulu 3:11-13.

5. Ushindakenyo ukwo uka tulinawo ha kununga ni kushimbwila tangwa lia Yehova?

⁵ Nyi tumbaji twa Yesu ku sekulu yitangu, katambile kununga ni kushimbwila tangwa lia Yehova, ha chino kushimbwila chacho chili ni ulemu unji musono. Mumu liaka? Mumu chilayi cha Yesu chinahane shindakenyo ngwenyi Wanangana wa Zambi waputukile kuyula ha mwaka 1914 nawa ngwo tuli ha matangwa akusula, hanji “kumanunuka cha miaka.” Chakutalilaho, kulita ni chize Yesu ambile, yuma hano hashi yinapihia chinji nawa sango lipema lia Wanangana kanaliambujola hashi heswe. (Mateu 24:3, 7-14) Yesu kakambile matangwa waze te kumanunuka cha miaka muchishimbwila, alioze twatamba kulilulieka mumu songo mulihasa kwiza ha shimbu lieswalio.

6. Kuchi tunanyingika ngwetu yuma ya hano hashi muyinunga ni kupihia chinji muze tunakundama kuheta cha songo?

⁶ Mbimbiliya yinambe ngwo atu makapwa chinji yingulungulu “ha matangwa akusula.” (2 Timoteu 3:1, 13; Mateu 24:21; Usolwelo 12:12) Chipwe ngwe yuma yinapihia chinji musono, nihindu tunanyingika ngwetu, muyinunga ni kupihia chikolo. Shina twatamba kunyonga ngwetu, “kumanunuka cha miaka” chinalumbunuka mashimbu a kulutwe muze hashi heswe muhapwa ha too ni upi nyi?

7. Yika Mateu 24:37-39 unatulongesa hakutwala ku yuma yize yinalingiwa hano hashi ha matangwa akusula?

⁷ Amwe mahasa kunyonga ngwo muze mukusala hakehe hanga “luyinda munene” aputuke, ku yifuchi yeswe mukupwa jita, atu anji maputuka kuyiza ni kufwa zala. (Usolwelo 7:14) Yino nyi yalingiwa, atu eswe mahasa kumona ngwo uprofweto wa Mbimbiliya unamanunuka. Ni atu waze keshi kuzanga yize Mbimbiliya yakwamba, no mahasa kuyimona. Alioze Yesu kambile ngwenyi, ha matangwa akusula, atu anji te kechi ‘kaanyingika.’ Atu jacho te mawahilila ni mwono wo wa tangwa ni tangwa alioze te mevwa kupihia ku mbunge muze tangwa lia Yehova muliza. (Tanga Mateu 24:37-39.) Pundu lume, kutwatambile kushimbwila hanga yuma yipihie chinji muze “luyinda munene” kanda achiputuka.​—Luka 17:20; 2 Petulu 3:3, 4.

8. Amu hanatutoweza ni chilayi cha Yesu, ushindakenyo uka tulinawo?

⁸ Chilayi chize Yesu ambile kachihanyine kuli tumbaji twenyi ngwe utowezo ha mashimbu waze te matwama. Chochene, tumbaji twa Yesu kaatowezele lume. (Mateu 24:27, 42) Kuputuka ha mwaka wa 1914, yuma yeka ni yeka ya chilayi cha Yesu yinalingiwa. Tuli ni ushindakenyo ngwetu tuli ha “kumanunuka cha miaka.” Yehova hanatese tangwa lize makanongesa hashi hapi ha Satana.

9. Mumu liaka twatamba kushimbwila kuheta cha songo lize hiliakundama?

⁹ Mumu liaka twatamba kununga ni kushimbwila hanga songo lize kawashi? Mumu twakwononokena Yesu Kristu. Nawa tunamono zwalala ngwetu chilayi chize Yesu ambile hakutwala  ku matangwa akusula chinamanunuka. Tunafuliela ngwetu songo hiliakundama, hi ha yuma yize twakwivwa wika ko, alioze ha mukunda wa uprofweto wa Mbimbiliya uze unamanunuka. Twatamba kukanyama ni kulilulieka ha kuheta cha songo.

10, 11. (a) Mumu liaka Yesu ambile kuli tumbaji twenyi ngwenyi, “kanyamenu”? (b) Yika Yesu ambile kuli tumbaji twenyi hanga alinge nyi songo kuliejile kawashi ngwe chize ayo ananyongo? (Tala chizulie chili hauputukilo)

¹⁰ Anji akuli yetu, twakushishika kuli Yehova nawa ni usona weswe twashimbwila kwiza cha tangwa lienyi ha miaka yinji. Chipwe ngwe twaputukile kulu kushimbwila, nihindu twatamba kununga ni kushimbwila kwiza cha tangwa liacho, lize hiliakundama. Muze Yesu meza ni kunongesa hashi ha Satana katamba kutuwana hitwalilulieka kulu. Twiwulukenu yize Yesu alwezele tumbaji twenyi hanga alinge, iye kambile ngwenyi: “Kanyamenu, lawokenu, lembenu: mumu kunwanyingikene muze mwaka muupwa. Chinapu ngwe mutu unayi mu wenyi ku chifuchi chikwo, mahichika zuwo lienyi, mahana chiyulo kuli tuvumbi twenyi, kuli mweswe milimo yenyi, mamba kuli mukwa kufunga pito, akalee. Lenu kashika: mumu kunwanyingikene muze mwenya zuwo meza, shina ha chingoloshi, nyi shina ha muchima ufuku, nyi shina ha kutambika ndemba, nyi shina chimenemene; Kuchina, susumuku heza; anuwane mu tulo. Alioze chize ngunambe kuli yenu, ngunambe kuli eswe ngwami, Lenu.”​—Marku 13:33-37.

¹¹ Muze tumbaji twa Yesu anyingikine ngwo iye kaputukile kuyula ha mwaka 1914, ayo yanyingika ngwo kuma songo mulihasa kwiza ha shimbu lieswalio. Ha chino, yalilulieka hakutwala ku tangwa liacho, ha kukalakala chinji mu mulimo wa sango lipema. Yesu kambile ngwenyi, iye mahasa kwiza ha ‘chingoloshi, hamademba, hanji ha chimenemene.’ Nyi che muchikapwa, yika tumbaji twenyi atamba kulinga? Yesu ngwenyi: “Kanyamenu.” Chipwe ngwe mutumona ngwetu tunashimbwila chinji, nihindu kuchishi kulumbunuka ngwo, songo lili kusuku chinji hanji ngwo kulishi kwiza ha shimbu lietu.

12. Yika Habakuke ahulile Yehova, nawa kuchi Yehova amukumbulwile?

¹² Profeta Habakuke kashimbwile ni uhomboloji weswe nawa kambulwile hakutwala ku unongeso wa Yerusaleme. Aprofeta akwo atangu ni no kambulwile sango jojene ha miaka yinji. Habakuke kamwene chize upi ni ungulungulu wokele chinji. Iye yafupa ukwaso kuli Yehova, ha kumuhula ngwenyi: “Yehova ndo mwiji muka munguteta ungukwase mba yena kushi kwivwa?” Chipwe ngwe Yehova kakamulwezele shimbu lize te songo muliza, nihindu kamulakenyene ngwenyi: ‘Kulichi kahona.’ Yehova kalwezele nawa Habakuke hanga ‘atwaminyine.’​—Tanga Habakuke 1:1-4; 2:3.

13. Manyonga aka Habakuke te mahasa kupwa no, nawa mumu liaka chino te chili utoji?

 ¹³ Achinyonga nyi Habakuke kahongele ni kushimbwila ni kwamba ngwenyi: ‘Hinashimbwila unongeso wa Yerusaleme ha miaka yinji. Songo lichili kusuku chinji. Ami chatambile kununga ni kwambujola hakutwala ku unongeso. Alioze atu akwo mahasa kulinga mulimo wacho. Yika te muyilingiwa nyi iye kanyongene chocho? Kachi katokesele utayizo wa Yehova. Nawa nyi kakaliluliekele muze te songo muliza, kachi katokesele mwono wenyi.

14. Mumu liaka mutukasakwilila chinji Yehova hakutoweza hanga tununge ni kushimbwila songo?

¹⁴ Tunyongenu ngwetu tuli mu paraisu. Yuma yeswe yize Yehova hanalakenya hakutwala ku matangwa akasula yalingiwa ngwe chize iye ambile. Mutujikijila chinji kuli Yehova, nawa mutufuliela ngwetu iye mamanununa yilakenyo yenyi yeswe yize akwamba. (Tanga Yoshua 23:14.) Nawa mutusakwilila chinji Yehova ha kutesa shimbu lialita lia kuneha songo ni kutoweza atu jenyi hanga anunge ni kushimbwila ha chikuma chacho.​—Yilinga 1:7; 1 Petulu 4:7.

15, 16. Mumu liaka twatamba kulinga yeswayo mutuhasa hanga twambujole sango lipema ha mashimbu wano akusula?

¹⁵ Ululikiso wa Yehova muununga ni kututoweza hanga tuhulikile mwono wetu mu mulimo wa Yehova. Utowezo wacho mutukwasa hi wika ko kununga ni kuhondangana mulimo wa Zambi, alioze hanga tumone pundu ngwetu mulimo wetu uli wa matambu. Tuli ni ushindakenyo ngwetu chilayi chize Yesu  ambile chinamanunuka kanawa haliapwila nawa ngwetu hikwasala hakehe songo hanga lize. Kashika tusenu Yehova kulutwe ku mwono wetu ni kununga ni kwambujola sango lipema hakutwala ku Wanangana.​—Mateu 6:33; Marku 13:10.

¹⁶ Muze tunambujola sango lipema kuli akwetu, tunaakwase hanga akalilamwine ku songo lia hano hashi ha Satana lize linakundama. Umwe luyinda walingiwile mu kalunga-lwiji ha mwaka 1945 muze ulungu Wilhelm Gustloff washimbamine. Tununu twa atu kafwile. Alioze pangi umwe ni mukwo-lunga kaalamwinyine ku luyinda wacho. Pangi wacho kanewuluka ngwenyi shimbu lize ulungu te unashimbama umwe pwo yanunga ni kuteta ngwenyi: “Yikumba yami! Yikumba yami! Mikosa yami! Mikosa yami eswe ya ndando muchima lia ulungu yili. Ami natokesele yuma yeswe!” Alioze akwa-wenyi akwo kanyingikine yuma yize te yili ni ulemu unji nawa kahondanganyine chinji hanga alamwine mwono wa atu. Musono, mwono wa atu uli mu utoji. Ni yetu nawa tunazange kupwa ngwe akwa-wenyi waze asolwele zango lingunu ha kulihulikila ku mulimo wa matambu wa kwambujola sango lipema. Twatamba kulinga yuma yeswe yize mutuhasa hanga tukwase atu alilamwine ku songo lia yuma ya mwakwono.

17. Mumu liaka twatamba kufuliela ngwetu songo mulihasa kwiza ha shimbu lieswalio?

¹⁷ Mutuhasa pundu kumona ngwetu uprofeto wa Mbimbiliya unamanunuka nawa ngwetu songo lia yuma yipi hiliakundama. Tunashimbwila muze “kumi lia mbinga” ni “ngongo” makalimika ni uwayilo wa mahuza, Babilonia Yinene. (Usolwelo 17:16) Kutwatambile kwamba ngwetu, kwatamba kupalika mashimbu anji mba yuma yino yilingiwe. Kanda tuvulama ngwetu Zambi ‘makasa mu mbunge jo’ upale wakwonona uwayilo wa mahuza nawa chino muchikalingiwa kawashi ha shimbu lieswalio! (Usolwelo 17:17) Songo lia hashi hapi ha Satana hiliakundama. Kashika twatamba kukaula utowezo wa Yesu uze wakwamba ngwenyi: “Keyelenu hali yenwene kuchina hanji mbunge jenu mujilema ni upulutu, ni kuzengewa, ni yipikalo ya mwono uno, ni tangwa lize mulitulumuka hali yenu ngwe muheto susumuku hiliasoloka. Mumu chocho mulikeza hali waze eswe akutwama ha kuzazuluka cha hashi heswe.” (Luka 21:34, 35; Usolwelo 16:15) Tunungenu ni kukanyama ni kuhondangana chinji mu mulimo wa Yehova, ni ushindakenyo weswe ngwetu iye makakwasa “akwa kumutwaminyina.”​—Izaia 64:4.

18. Chihula chika mutukakumbulula ha mutwe uze muusulaho?

¹⁸ Muze tunashimbwila songo lia yuma yipi ya hashi hano, twatamba kupanjika chiyulo cha kambaji Yundase, chinambe ngwenyi: “Akwetu a zango, jikijilenu ha ufulielo wenu usandu wahiana, nikulemba muli Spiritu Musandu. Lifungenu mu zango lia Zambi, nikutalatala keke ya Mwene wetu Yesu Kristu ndo ku mwono wa mutolo.” (Yundase 20, 21) Alioze kuchi mutuhasa kusolola ngwetu tunashimbwila kwiza cha hashi haha ha Zambi nawa ngwetu tunatale yize muyikalingiwa kulutwe? Mutukalilongesa chikuma chino ha mutwe uze muusulaho.