MALONGESO A CHIFUKILO | MUTU NYI HAFWA SHINA MEZA KAMUHINDWISA NAWA NYI?
Kutalatala Cha Afu—Kuchi Yena Muuhasa Kupwa ni Ushindakenyo?
Shina chili kuhona mana nyi mutu manyonga ngwenyi afu makahinduka? Postolo Paulu kakanyongene chocho. Iye kasonekene ngwenyi: “Nyi kachi kutalatala chetu muli Kristu muchipwa wika mu mwono uno, nyi chocho tuli akwa hunya hakachi ka atu eswe. Alioze Kristu hanahinduka hakachi ka afu, muhuko utangu wa kuli waze hanayi tulo.” (1 A-Korindu 15:19, 20) Paulu kapwile ni kumona ngwenyi uhindukilo uli chuma chamwenemwene. Kapwile, ni nyonga liacho ha mukunda wa uhindukilo wa Yesu. * (Yilinga 17:31) Kashika, Paulu avulukile Yesu ngwenyi “muhuko utangu”—Iye kapwile mutu mutangu yoze ahindwishile ni mwono wa mutolo. Nyi Yesu kapwile mutu mutangu kuhindwisa, chekwamba ngwo kuli nawa atu akwo waze makahindwisa.
Yombi yamba kuli Zambi ngwenyi: “Muwivwa usona ha chitanga cha moko je.”—Yombi 14:14, 15
Kuli nawa chuma chikwo chize muchihasa kutwaha ushindakenyo hakutwala ku kutalatala cha uhindukilo wa afu. Yehova kali Zambi wamwenemwene. “Zambi . . . keshi mahuza.” (Titu 1:2) Yehova keshi mahuza, iye keshi keza kalionga ni limwe tangwa. Iye hanatwehe kutalatala cha uhindukilo ni kusolola ngwenyi mahasa kumanununa chilakenyo chacho, shina iye mahasa kwalumuna yilakenyo yenyi mu mahuza nyi? Ka, iye keshi kulinga chocho!
Mumu liaka Yehova makahindwisa atu kulutwe lia matangwa? Ha mukunda wa zango lienyi. Yombi yahula ngwenyi: “Ni mutu mafwa matwama nawa ni mwono? Musanyika mba mungukumbulula; muwivwa usona ha chitanga cha moko je.” (Yombi 14:14, 15) Yombi kapwile ni ushindakenyo ngwenyi Tata yetu wa zango yoze uli mu malilu kali ni usona wa kumuhindwisa. Shina Zambi hanalumuka nyi? Aye ngwenyi, “yami Yehova chishi kwalumuka.” (Malakia 3:6) Zambi uchili ni usona wa kuhindwisa atu, ni mijimba yipema ni uwahililo. Yino ye te mahasa kulinga kuli tata mweswawo wa zango yoze wafwisa mwanenyi. Alioze hali kulisa, mumu Zambi iye kali ni ndundo ja kulinga yize aye mazanga.—Samu 135:6.
Kufwa chapwa chuma chipi chinji, alioze Zambi kali ni uhashi ungunu wa kuchihwisa
Yehova makahana ndundo kuli mwanenyi hanga akanehe chiseke kuli waze eswe hanafwisa asoko jo. Alioze kuchi Yesu akwiva hakutwala ku uhindukilo? Muze te kanda achihindwisa Lazaru, Yesu hakumona chinyengo cha ,mapangi ja Lazaru ni masepa jenyi, iye “walilile.” (Yoano 11:35) Ha shimbu likwo, Yesu kawanyine umwe tuliwa wa ku Naine, yoze wafwishile mwanenyi wa wika. Muze Yesu “Mwene amumwene, wamuvwilile keke, wambile kuli iye ngwenyi, kanda ulila.” Kawashi-kawashi wahindwishile mwanenyi. (Luka 7:13) Ha chino Yesu kakwivwa yinyengo yinji ha lamba ni kufwa. Mutukawahilila chinji muze yinyengo yacho muyikalumuka chiseke kuli atu a hashi eswe!
Yena hi unevu kama yinyengo ku mbunge? Muhasa kunyonga ngwenyi kufwa chili umwe mulonga uze kuushi songo. Alioze kumuchikahwa ni uhindukilo uze Zambi makalinga kupalikila muli Mwanenyi. Ewuluka ngwenyi Zambi kanazange hanga yena unyingike ngwenyi kufwa muuchikahwa. Iye kanazange hanga yena ukapweho ni kusambilila atu waze wazanga chinji. Achinyonga kukalakala hamuwika ni asoko ni masepa jetu ku miaka ya mutolo, chakuhona kwamba ngwenyi, uya kanawa, wawawe!
Lionel, yoze havuluka kulu, yamba ngwenyi: “Chochene, nalilongesele hakutwala ku uhindukilo. Ku uputukilo chapwile chikalu chinji kutayiza, nawa ami te chishi kutayiza mutu yoze te wakungulweza yuma yacho. Alioze ami yinguhengula mu Mbimbiliya nawa yinguwana ngwo kuma te yamwenemwene! Kashika mungushimbwila hanga ngukamone nawa kaka.
Shina muuzanga kunyingika nawa? Yela ja Yehova mawahilila chinji kukusolwela mu Mbimbiliya ye mumu liaka ayo akwete ushindakenyo ha uhindukilo wa kulutwe lia matangwa. *
