Mushete wa milambu wa mu tembele te watwama mu Chipatulo cha Mapwo. Mukanda O Templo​—Seu Ministério e Seus Serviços unambe ngwo: “Mu chipatulo chacho te mukwete limwe senge lisuku. Senge liacho te liakwata kuchikalakala cha tembele, he te akusa mishete ya milambu 13 hanji yitavwi, muze te akusa mbongo jize te akulambula.”

Mishete yacho te kayivuluka ngwo yitavwi, mumu lia kupwa chawo, chikehe kwilu chinene kushi. Yitavwi yacho te kayinyingika kulita ni milambu yize te akusamo. Mbongo jize te akusa mu mushete weswe te jikwete mulimo uze te akujilingila. Mu Chipatulo cha Mapwo mwe Yesu apwile muze amwene atu anji kanase milambu, kuchingaho ni tuliwa chiswale, yoze wahanyine milambu.​—Luka 21:1, 2.

Mishete yaali yitangu, yapwile wika ya mbongo ja lijimo lia tembele, mushete umwe wa mwaka uze alinawo, ukwo wa mwaka uze te hiwapalika kulu. Milambu ya mishete 3 ndo 7 te kakusamo milambu ya ndando yize te hanatese ha tutele, membe, insensu ni yikwachilo ya oru. Mukwa-kulambula ni mazanga kuhana mulambu unene kuhiana uze hanatese, iye te mahasa kusa uze muusala mu mishete yize muyisalaho. Mushete 8 te wapwa wa mbongo jize jakusala ku mulambu wa shili. Mishete 9 ndo 12 te kakutulikilamo mbongo jize te jakusala ku milambu yaulamikizo, ya yitapo ya tujila, ya milambu ya A-nazireu ni ya akwa-mbumba waze hapwa kuwuka. Mushete 13 wapwile wa milambu yize te atu akuhana nyi mazanga ku mbunge yo.

Luka mwe wasonekene evangelu yino yili ni jina lienyi, ni mukanda wa Yilinga ya Apostolo. Luka kambile ngwenyi hingunahengula “yuma yeswe pundu chize ku uputukilo,” alioze akwa-kulilongesa akwo kakuhangulula sango jenyi. (Luka 1:3) Shina yuma Luka asonekene yili yamwenemwene nyi?

Luka katongwele sango jamwenemwene jize jili ni ushindakenyo ungunu. Chakutalilaho, hakuhanjika hakutwala kuli mangana A-Roma, aye yazachisa yisanyiko yinji yalita, yize atu te kayinyingikine chinji. Iye yatongola, tupitau mu Fwilipu; akwa-kuyula a mbonge mu Tesalonika, ni asiarca hanji atu alemu mu Efwesu. (Yilinga 16:20, Interlinear do Reino; 17:6; 19:31) Luka yavuluka Heronde Andipa ngwo nguvulu wa mbonge, ni Sergio Paulu yamuvuluka ngwo mwata wa Shipre.​—Yilinga 13:1, 7.

Luka kazachishile yisanyiko yino kanawa. Chino chili chamwenemwene, mumu muze yikuma ya mafwefwe mu Roma te yakwalumuka chisanyiko cha nguvulu necho te chakwalumuka. Ha chino, akwa-kuhengola Mbimbiliya Bruce Metzger yamba ngwenyi: “Yikuma yili mu mukanda wa Yilinga kakuyitayiza mashimbu eswe kulita ni chihela ni mwaka uze yalingiwile.” William Ramsay yamba ngwenyi, Luka kali “mukwa-sango ja ujikijilo unji.”