MALONGESO A CHIFUKILO | MUTU NYI HAFWA SHINA MEZA KAMUHINDWISA NAWA NYI?
Yika Yakulingiwa Kuli Mutu Nyi Hafwa?
“Ami te nakunyonga ngwe te kwatwama yihela yitatu kuze mutu akuya nyi hafwa: mu malilu, mu kahia, hanji purgatório. Te ngunanyingika ngwami chishi ni upeme uze te mungutwala mu malilu hanji upi uze te mungutwala mu kahia. Te chanyingikine kanawa yika yinalumbunuka purgatório. Kanda nguchimona kama maliji jacho mu Mbimbiliya. Te nakwevwila wika kuli atu.”—Lionel.
“Ami kangulongesele ngwami, atu eswe kakuya mu malilu nyi hafwa, alioze te kuchishi kutayiza nyonga liacho. Te nakunyonga ngwami kufwa chapwa songo lia yuma yeswe. Nawa ngwami afu keshi ni kutalatala nichimwe.”—Fernando.
Hiunalihula kama ngwenyi: ‘Yika chamwenemwene yakulingiwa kuli mutu nyi hafwa? Atu waze hanafu shina kakumona lamba kumwe kuma nyi? Shina mutukeza kaamona nawa nyi? Kuchi mutuhsa kupwa ni ushindakenyo wacho?’ Lisesa hengula yize chamwenemwene Mbimbiliya yakulongesa. Chitangu tuhengulenu yize Mbimbiliya yakulongesa hakutwala kuli afu. Mba hi mutuhengula kutalatala chize Liji lia Zambi, Mbimilliya yinatwehe.
Afu kuchi apwa?
KUMBULULO LIA MU MBIMBILIYA: “Mumu amwono kanayingika ngwo, Mutukafwa, alioze afu kanyingikine nichimwe. Keshi nawa ni kwononona; keshi kwewuluka. Cheswacho moko je mawana kulinga, hilinga ni ngolo je jeswe, muma mwa afu kuze unayi kukushi milimo, hanji manyonga, hanji chinyingi, hanji mana.” *—Chilumbununyi 9:5, 10.
Muma mwa afu, mu maliji akehe, munalumbunuka kuze atu akuya nyi hafwa; hi chihela ko chize mutuhasa kumona alioze chili kuhona kunyonga hanji kusula cha mwono. Kuchi Yombi lunga washishika anyongene hakutwala muma wa afu? Iye katokesele yuma yenyi yeswe ni ana jenyi ha tangwa limuwika, nawa yakwachika mukule mujimba weswe. Aye yahula Zambi ngwenyi: Ngunazange kachi ukanguswekele muma mwa afu [“mu inferno,” Catholic Douay Version].” (Yombi 1:13-19; 2:7; 14:13) Chamwenemwene, Yombi kakanyongene ngwenyi muma mwa afu mwapwa mu chitende cha kahia, ku chihela kuze te mamona lamba linji. Alioze, iye kanyongene ngwenyi chili chihela cha uhwimino.
Kuli nawa jila yikwo yakulilongeselamo hakutwala ku kupwa cha afu. Mutuhasa kulilongesa sango ja mu Mbimbiliya hakutwala kuli atu nake waze ahindwishile.—Tala ha kasha “ Uhindukilo Nake uze Anasoneka mu Mbimbiliya.”
Nyi umwe wa kuli ayo wahanjikile ngwenyi chihela chacho te cha chiseke hanji cha lamba wakuhi. Nyi atu waze ahindwishile kayile mu chihela chacho muze afwile, kachi kakalwezele atu hakutwala ku chihela chacho? Nawa kachi nyonga liacho kalisele mu Mbimbiliya, nyi ngwami? Mu Mbimbiliya kumushi manyonga jacho. Kwamba umwenemwene, atu jacho nake kakambile nichimwe chikuma. Mumu liaka kakambile nichimwe? Mumu ayo kakapwile ni kunyingika nichimwe, kapwile ngwe waze ali mutulo. Chochene, Mbimbiliya ha mashimbu amwe yakuzachisa tulo ngwe chilweza hanga yilumbunune kufwa. Chakutalilaho, tuvumbi ashishika Ndawichi ni Eshetevau eswe aali “yaya tulo.”—Yilinga 7:60; 13:36.
Kutalatala chika afu alinacho? Shina ayo mahasa kuhinduka ku tulo jacho?
^ kax. 7 Mu Tradução do Novo Mundo das Escrituras Sagradas, liji “Muma wa afu” linakatuka ku liji lia Hepreu “Sheol” nawa liji lia Ngregu “Hades.” Mbimbiliya jimwe jakuzachisa liji “inferno” alioze nyonga lia kwamba ngwo afu kakumona lamba mu chitende cha kaya hi lia mu Mbimbiliya, ko.
