MALONGESO A CHIFUKILO | YELA JA YEHOVA AYA?
Mumu Liaka Twakwambujola Sango Lipema?
Kota chuma chize chakutunyingikisa ngwo twalisa chinji ni atu akwo chili mulimo wetu wakwambujola sango lipema uze twakulinga—ku zuwo ni zuwo, ha mbunga, nawa kweswako mutuwana atu. Mumu liaka twakulinga chocho?
Yela ja Yehova kakwambujola sango lipema hanga ahalise Zambi ni kunyingikisa jina lienyi. (A-Hepreu 13:15) Yetu nawa tunazange kwononokena maliji a Yesu Kristu waze anambe ngwo: “Yeenu nukatayise tumbaji a ku mavungu eswe, . . . nikualongesa kufunga yuma yize yeswe nanuhele.”—Mateu 28:19, 20.
Chikwo nawa, yetu twakuzanga enyembo jetu. (Mateu 22:39) Chochene, tunanyingika ngwetu atu anji kali ni mayingeleja jo nawa ngwetu, anji akuli ayo keshi kuzanga kwivwa sango lipema. Chipwe chocho, tunanyingika ngwetu malongeso amu Mbimbiliya kakupulwila mwono wa atu. Kashika kutushi “kalitwaminyineko kulongesa, nikwambujola Sango Lipema ngwo, Yesu iye mwe Kristu” ngwe chize apwile ni kulinga akwa-Kristu aku sekulu yitangu.—Yilinga 5:41, 42.
Sociólogo Antonio Cova Maduro yasoneka hakutwala ku “kuhondangana ni tachi jeswe jize Yela ja Yehova akusa chipwe mahonga . . . , alioze kakuzanga hanga maliji asandu ahete ku masongo eswe a hashi.”—El Universal mukanda wa sango wa mu, Venezuela
Atu anji waze akutanga mikanda yetu hi Yela ja Yehova, ko. Tununu a tununu twa atu waze twakulilongesa no Mbimbiliya kakwete mayingeleja jo. Chipwe chocho, ayo kakusakwilila chinji, amu Yela ja Yehova akuya ni kuhanjika no.
Chamwenemwene, yena muhasa kupwa ni yihula yikwo hakutwala kuli Yela ja Yehova. Yetu tunakwite hanga uwane kumbululo ha
-
Kuhanjika ni umwe Chela cha Yehova.
-
Kunjila mu site yetu, www.pr418.com..
-
Kuya kukunguluka chetu, keshi kwitako mbongo mutu mweswe mahasa kuyako.
