Ha miaka yeswe twakufwambwisa ni kuhana kulakaji a tununu a Mbimbiliya ni mikanda yize yakulumbununa Mbimbiliya. Twakutunga mitango ni kulanda makina a kulingila mikanda hashi heswe. Kumi lia tununu a yikungulwila kakulikungulula mu yihela yipema ya kuwayila yize akuvuluka ngwo Mazuwo a Wanangana. Iya kevwe wa kufweta mbongo ja yuma yeswayi?

Mulimo wetu kakuukwasa ni milambu yize atu akuhana ku mbunge yo ene. (2 A-Korindu 9:7) Ha 1879 ‘Zion’s Watch Tower’ wamuchiali [chize apwile ni kuvuluka mukanda uno] wambile ngwo: “Yetu twakufuliela muli YEHOVA ngwe chikwashi chetu, nawa yetu kutuchikeza keta ukwaso kuli mutu niumwe.” Yetu tushi kwivwa woma ha chikuma chacho.

Milambu kakuyituma ku mitango yetu hanji kuyisa mu mishete ya milambu yize yili mu Mazuwo jetu a Wanangana. Alioze yetu tushi kwita dezimu, chipwe kukongola mbongo hanji kwita lijimo ku mulimo uze twakulinga hanji mikanda yize twakuhana. Keshi kutufupa mba twambujole sango lipema, chipwe kulongesa mu chikungulwila hanji kukwasa kutunga Mazuwo a Wanangana. Ha yino yeswe Yesu yamba ngwenyi: “Hinunatambula wana, hanenu wana.” (Mateu 10:8) Tuvumbi eswe waze akukalakala ku mitango yetu ni ku chishina, hamwe ni waze avuluka ngwo Chizavu cha Tusongwelo cha Yela ja Yehova keshi kwaafuta mbongo ja mulimo uze akulinga.

Mbongo jize akulambula kakujizachisa nawa hanga akwase najo atu waze ali mu luyinda. Akwa-Kristu atangu te kakwivwa chiseke ha kukwasa waze ali mu luyinda. (A-Roma 15:26) Chizechene ngwe ayo, nyi yetu nawa twakukwasa waze anamono lamba ha kutungulula mazuwo jo ni mazuwo a wanangana ni kwaha kulia, mahina ni uwukiso.