1, 2. Nyonga lika mukwa-Kristu mweswe ali nalio? Hana chilweza.

YIKA pwo wa ku zuwo akunyonga muze anasakula mihuko ha chitanda? Kota, keshi kuhasa kusakula wika mihuko yinene-yinene hanji yikehe-yikehe, alioze iye kakusakula mihuko yili ni vumba lipema nawa yipema, yichila nawa yize kwasala hakehe ni kuyilia. Aye kakuzanga kusakula mihuko yize yinambe kuchila hanji yize hiwachila.

² Muze mutu halilongesa hakutwala kuli Yehova nawa makwata chiyulo hanga amupapachise, usepa wenyi ni Zambi wa kununga ni kukola. Nyonga lienyi lili kupwa mukwa-Kristu wajama mu ufulielo. Kukola chacho kuchishi kulumbunuka kupwa mukulwana ku miaka, ka. Alioze chinalumbunuka kukola ku spiritu, hakupwa ni usepa ungunu ni Yehova. Postolo Paulu yazanga hanga akwa-Kristu mu Efwesu akole chinji mu ufulielo. Iye yaakolweza hanga alinunge mu ufulielo nawa anunge ni kulilongesa hakutwala kuli Yesu ha kupwa “mutu mungunu, ku cheseko cha chizundamo cha kuzala too cha Kristu.”—A-Efwesu 4:13.

3. Kuchi chikungulwila cha mu Efwesu anachitese ni atu ja Yehova musono?

³ Chikungulwila cha mu Efwesu te hichalinga yimwe miaka muze Paulu aasonekenene mukanda uno. Mandumbu anji mu chikungulwila chacho, te kali akwa-Kristu ajama mu ufulielo. Chipwe chocho,  mu chikungulwila chacho mwapwile amwe waze te atamba kukolesa usepa wo ni Yehova. Ni musono nawa, mandumbu ni mapangi anji kakulingila Yehova ha miaka yinji nawa hanapu akwa-Kristu ajama chinji mu ufulielo. Alioze, amwe mu yikungulwila keshi kujama mu ufulielo. Chakutalilaho, tununu a atu kanapapachisa hita miaka, ha chino amwe akuli ayo katamba kujama mu ufulielo. Mba yena?—A-Kolosu 2:6, 7.

4, 5. Akwa-Kristu waze ajama kalisa umwe ni mukwo, alioze yuma yika yalifwa yize alinayo? (Tala chizulie cha uputukilo.)

⁴ Nyi mutala mihuko yize yinachila ha chitanda, ena muumona ngwenyi mihuko yacho yinalisa. Alioze yili ni yimwe yuma yalifwa yize muyisolola ngwo yinachila. Chizechene nawa, ni akwa-Kristu amwenemwene waze ajama ni no che apwa. Ayo keshi atu amuwika. Kali atu aku yifuchi ni yihela yeka ni yeka. O kali ni miaka yalisa nawa yuma yize akuzanga yalisa. Chipwe chocho, akwa-Kristu eswe waze ajama kali ni yitanga yimwe yalifwa yize yakwaanyingikisa ngwo hajama. Yitanga yacho yika?

⁵ Mukwa-Kristu yoze wajama kakwimbulula Yesu nawa kakukaula “mu ngano jenyi.” (1 Petulu 2:21) Yesu kambile ngwenyi chili chilemu mutu kuzanga Yehova ni mbunge yenyi yeswe, ni mwono wenyi weswe, ni kunyonga chenyi cheswe, nawa akazange mwenyembo wenyi ngwe chizechene akulizanga mwene. (Mateu 22:37-39) Mukwa-Kristu yoze wajama kakusa tachi jinji hanga akaule shimbi yino. Kutwama ni kupwa cha mwono wenyi muchisolola ngwenyi usepa wenyi ni Yehova ni zango lienyi hali akwo yili ni ulemu unji kuli iye.

6, 7. (a) Yitanga yika yikwo yize yakunyingikisa akwa-Kristu waze ajama? (b) Yika twatamba kulihula yetwene?

⁶ Mukwa-Kristu yoze wajama kakusolola zango. (A-Ngalishia 5:22, 23) Iye nawa kakusolola umbovu, kushishika ni kulihumikiza. Yitanga yino muyihasa kumukwasa kulimika ni yipikalo chakuhona kuhonga ku mbunge, nawa kulimika ni yitanga yize ya kulemeka ku mbunge chakuhona kutokesa kutalatala. Ha longeso lienyi lia wika, mukwa-Kristu wajama kakuhengula shimbi jize mujimukwasa kunyingika upeme ni upi. Ha chino, muze iye mazachisa manyonga jenyi waze anakatuka mu Mbimbiliya, mahasa kukukwata kanawa yiyulo ya mana. Mukwa-Kristu yoze wajama mu ufulielo kapwa chihomboloji, nawa kakutayiza ngwenyi Yehova kanasongwela ululikiso wenyi nawa ngwo shimbi ja Zambi mashimbu eswe japwa jipema kuhiana ni jenyi. * Iye kakwambujola sango lipema ni mbunge yeswe nawa kakulinga yuma yize mahasa hanga akwase kulinunga cha mandumbu mu chikungulwila.

⁷ Chipwe ngwe tuli ni miaka yinji hanji yikehe mu ululikiso wa Yehova, etu eswe twatamba kulihula ngwetu: “Yitanga yika natamba kwalumuna hanga ngukaule kanawa ngano ja Yesu? Shina kuli jila jize munguhasa kwalumwinamo yitanga yami?

8. Yika yinasolola ngwo Yesu te kanyingika kanawa Mbimbiliya ni ulumbunwiso wayo?

⁸ Yesu te kanyingika kanawa Yisoneko ni ulumbunwiso wayo. Chipwe muze apwile ni miaka 12, iye kazachishile Yisoneko muze apwile ni kuhanjika ni alongeshi mu tembele. “Waze eswe amuvwile, alishikishilile ha malinjiekela jenyi ni makumbululo jenyi.” (Luka 2:46, 47) Hakupalika cha matangwa, muze te anambujola, iye kazachishile kanawa Liji lia Zambi hanga aholese akwa-kole jenyi.—Mateu 22:41-46.

9. (a) Katalilo muka wa longeso yoze wakujamisa mukwa-Kristu? (b) Mumu liaka twakulilongesa Mbimbiliya?

 ⁹ Ndumbu yoze unazange kupwa mukwa-Kristu wajama katamba kwimbulula chilweza cha Yesu ni kusa tachi hanga anyingike kanawa Mbimbiliya. Iye kakuhengula umwenemwene wa mu Yisoneko matangwa eswe, mumu kananyingika ngwo “kulia cha tachi kuchapwa kulia cha waze hakola.” (A-Hepreu 5:14) Mukwa-Kristu wajama kakuzanga kupwa ni “chinyingi” chamwenemwene cha mu Mbimbiliya. (A-Efwesu 4:13) Kashika, achilihule kama ngwenyi: “Shina nakutanga Mbimbiliya matangwa eswe? Shina nguli ni katalilo wa longeso lia wika? Shina nakulinga uwayilo wa mu usoko ha poso jeswe? Muze mulilongesa Mbimbiliya, fupa shimbi jize mujihasa kukukwasa hanga unyingike chize Yehova akwivwa ni kunyonga. Ni wawana shimbi jacho jizachise muze unakwata yiyulo. Chino muchikukwasa hanga ukundame kuli Yehova.

10. Kuchi mukwa-Kristu wajama akunyonga hakutwala ku chiyulo ni shimbi ja Zambi?

¹⁰ Mukwa-Kristu yoze wajama katamba kunyingika kanawa yisoneko kuhiana kunyingika wika yize Mbimbiliya yinambe. Iye katamba kuzanga chiyulo ni shimbi ja Zambi. Ha chino, iye masolola zango liacho ha tachi jize akusa hanga alinge upale wa Zambi, hi wa mwene ko. Chipwe kwalumuna ndako ja kutwama chenyi, kunyonga ni yize akulinga. Chakutalilaho, iye membulula Yesu ha kupwa ni utu waha, uze hanautange “mu ululi ni usandu wamwenemwene nikulita ni Zambi.” (Tanga A-Efwesu 4: 22-24.) Chili chilemu  kunyingika ngwo Yehova kazachishile spiritu yenyi yisandu hanga yisongwele atu waze asonekene Mbimbiliya. Kashika, muze mukwa-Kristu malilongesa Mbimbiliya, spiritu yisandu ya Zambi muyimukwasa kukola mu chinyingi chamwenemwene, kukola mu zango ni kukolesa usepa wenyi ni Yehova.

11. Yika Yesu alingile muze apwile hano hashi?

¹¹ Yesu kapwile mutu mungunu. Chipwe chocho, muze apwile hano hashi, Yesu kapwile mukachi ka yihenge. Yisemi ni mandumbu jenyi eswe te yihenge. Chipwe masepa waze Yesu alikachileno chinji kasolwele yitanga yipi ngwe kulizata ni kuzo. Chakutalilaho, ha ufuku muze te kanda achifwa, tumbaji twenyi yazwela ha kachi ko hanga anyingike “yoze wa kuli ayo mamuvuluka ngwo, Munene wahiana akwo.” (Luka 22:24) Chipwe ngwe kapwile ni manyonga auhenge, Yesu te kananyingika ngwenyi kulutwe lia matangwa tumbaji twenyi te mapwa akwa-Kristu waze ajama mu ufulielo nawa te malinga chikungulwila chize chalinunga. Ha ufuku wowene, Yesu kalembele hanga ayo apwe ni kulivwashana. Iye yeta kuli Tato wa mu malilu hanga o eswe akapwe umuwika, ha kwamba ngwenyi: “Chizechene ngwe yena Tata uli muli yami, ni yami nguli muli yena.” Yawejela nawa ngwenyi: “Hanga akapwe umuwika chizechene ngwe yetu tuli umuwika.”—Yoano 17:21, 22.

12, 13. (a) Amu tuli akwa-Kristu chikuma chika chilemu chize twatamba kulinga? (b) Kuchi umwe ndumbu alilongesele kuneha kulinunga?

¹² Mukwa-Kristu wajama kakukwasa chikungulwila hanga chilinunge. (Tanga Efwesu 4:1-6, 15, 16.) Amu tuli akwa-Kristu, mulimo wetu uli “wakusepekenya nikununga,” unalumbunuka kukalakala hamuwika ni kulivwashana. Mba tupwa ni kulinunga chacho, mukwa-Kristu katamba kupwa chihomboloji. Chipwe ngwe mamona uhenge wa akwo, mukwa-Kristu wajama kakulikolweza hanga afunge kulinunga cha chikungulwila hanga chikole. Kashika twatamba kulihula ngwetu: ‘Kuchi nakwivwa nyi umwe ndumbu hanji pangi malinga umwe upi? Kuchi nakwivwa nyi umwe mutu mamba chuma chize muchingulemeka? Shina nakwecha kuhanjika ni mutu wacho? Nyi nakusa tachi hanga ngululieke usepa wetu?’ Mukwa-Kristu yoze wajama kakuzanga kuhwisa mulonga, ha mutwe wa iye kupwa mulonga kuli akwo.

¹³ Tutalenu chilweza cha ndumbu Uwe. Ku mashimbu akunyima, iye kapwile ni kwecha uhenge wa mandumbu hanga umupinjise. Ha chino, aye yakwata chiyulo cha kuzachisa Mbimbiliya ni Estudo Perspicaz hanga alilongese mwono wa Ndawichi. Mumu liaka Ndawichi? Mumu Ndawichi ni neye kamumwesene lamba liacho kuli amwe tuvumbi twa Zambi. Chakutalilaho, Mwanangana Saulu kafupile kushiha Ndawichi, atu amwe kazangile kumushiha ni mawe, nawa chipwe mukwo-pwo yamulelesa. (1 Samuele 19:9-11; 30:1-6; 2 Samuele 6:14-22) Alioze, chipwe ngwe akwo che amulingile, nihindu Ndawichi kazangile Yehova nawa kajikijile muli iye. Ndawichi nawa kasolwele keke. Uwe yamona ngwenyi ni iye che atamba kulinga. Mu longeso lienyi lia Mbimbiliya, iye yalilongesa ngwenyi te katamba kwalumuna manyonga jenyi ha chize te akunyonga hakutwala ku uhenge wa mandumbu. Iye te katamba kwecha kwiwuluka upi uze ayo akulinga ni kuneha kulinunga mu chikungulwila. Ni yena che unanyonga kulinga nyi?

14. Kuchi Yesu asakwile masepa jenyi?

¹⁴ Yesu kapwile ni usepa upema ni atu. Malunga ni mapwo akweze ni makulwana, nawa ni twanuke, ayo te kakwivwa kuwaha ha kupwa  hamwe ni Yesu. Alioze, iye kasakwile kanawa masepa jenyi. Iye kambile kuli apostolo jenyi ngwenyi: “Yenu nuli tusendo twami, nyi munulinga cheswacho mungunwamba.” (Yoano 15:14) Yesu kasakwile masepa jenyi hakachi ka atu waze te akumukaula ni ushishiko weswe nawa waze te akuzanga Yehova ni kumuwayila. Shina yena wakusakula masepa waze akuzanga Yehova ni mbunge yo yeswe? Mumu liaka chikuma chino chili ni ulemu?

15. Kuchi akweze mahasa kuyuka hakulinga usepa ni akwa-Kristu waze ajama?

¹⁵ Mihuko yinji yakuchila kanawa ni yili ha mwalwa. Chizechene nawa, zango lia mandumbu ni mapangi jetu mulihasa kukukwasa hanga upwe mukwa-Kristu yoze wajama. Shina yena uli mukweze yoze unafupu yize muhasa kulinga ku mwono we? Ni chenacho, chili chipema kufupa masepa waze akuwayila Yehova ha miaka yinji nawa waze akwete ndako jakununga chikungulwila. Ayo kota hanamono yipikalo mu mwono wo nawa kota kakulimika ni yipikalo yacho ha kuwayila Yehova. Ayo mahasa kukukwasa kupwa ni mwono upema. Nyi mupalikisa mashimbu hamwe ni mandumbu jacho, ayo mahasa kukukwasa hanga ukwate yiyulo ya mana ni kupwa mukwa-Kristu wajama.—Tanga A-Hepreu 5:14.

16. Kuchi makulwana mu chikungulwila akwashile umwe pangi muze apwile mukweze?

¹⁶ Helga kanewuluka mwaka wenyi wa kusula ku shikola, atu anji waze apwile ni kulilongesa no kapwile ni kuhanjika yize te malinga kulutwe lia matangwa. Anji akuli atu jacho te kakuzanga kulilongesa ku mashikola anene-anene, hanga te apwe ni lufuma. Ha chino, Helga yahanjika ni masepa waze ajama mu chikungulwila chenyi. Aye yamba ngwenyi: “Amwe akuli masepa jacho te makulwana kuhiana yami, nawa ayo kangukwashile chinji. Ayo kangukolwezele hanga ngukwate chiyulo cha kunjila mu mulimo wa mashimbu eswe. Ha chino, napwile ni uhashi, wakulinga miaka yitano mu mulimo wa pionelu. Halapwila, ami nguli ni chiseke chinji ha kukalakalila Yehova muze te nguchili mukweze. Kungushi ni chitela cha kwivwa chinyengo ha mulimo uze nakulinga.

17, 18. Kuchi mutuhasa kuwayila kanawa Yehova?

¹⁷ Nyi mutwimbulula Yesu, mutukola ku spiritu ni kupwa akwa-Kristu waze ajama. Mutukundama kuli Yehova, nawa zango lietu lia kumuwayila mulioka. Mutu nyi hajama mu ufulielo kakuwayila kanawa Yehova. Yesu kakolwezele tumbaji twenyi ngwenyi: “Chizechene pangu lienu likatemuke kumeso ja atu, hanga akamone yitanga yenu yipema, akachichimieke Tatenu yoze uli mu malilu.”—Mateu 5:16.

¹⁸ Twalilongesa chize mukwa-Kristu wajama mahasa kupwa chikwashi munene mu chikungulwila. Mukwa-Kristu nawa kakusolola kujama chenyi ha chize akuzachisa manyonga jenyi. Kuchi manyonga jetu mahasa kutukwasa hanga tukwate yiyulo ya mana? Nawa kuchi mutuhasa kuvumbika manyonga ja akwetu? Mutukumbulula yihula yino mu mutu uze muusulaho.