1. Yika postolo Yoano anatukolweza kunyonga nawa mumu liaka?

POSTOLO Yoano katukolwezele hanga tunyongonone ku zango linene lize Yehova akwete hali yetu. Mu mukanda wa 1 Yoano 3:1, unambe ngwo: “Nyongenu zango lipwa haha hanatwehe mwe Tata!” Muze twakupukuna ha chize Yehova akutuzanga ni chize akusolola zango lienyi hali yetu, twakukundama kuli iye ni kumuzanga chinji.

2. Mumu liaka chili chikalu amwe kunyingika chize Zambi akwaazanga?

² Alioze amwe kanyingikine chize Zambi akwaazanga. Kakunyonga ngwe Zambi keshi kwaapala. Ayo mahasa kunyonga ngwo Zambi kakusa wika shimbi ni kumwesa lamba waze keshi kumwononokena. Ha mukunda wa malongesa a mahuza, amwe kakunyonga ngwo Zambi kali chingalwe nawa ngwo chili chikalu chinji kumuzanga. Akwo kakunyonga ngwo Zambi kakuzanga atu eswe, chipwe ngwe malinga yuma yeswayo. Alioze longeso lie lia Mbimbiliya liakukukwasa hanga unyingike umwenemwene hakutwala kuli Yehova. Yena unanyingika ngwo, zango lili muhuko wenyi unene nawa kahanyine Mwanenyi ngwe ukuule hali yena. (Yoano 3:16; 1 Yoano 4:8) Alioze ha mukunda wa yimwe yuma mu mwono we, hanji muchihasa kupwa chikalu kunyingika chize Zambi akukuzanga chinji.

3. Yika muyitukwasa kunyingika zango lize Yehova alinalio hali yetu?

 ³ Mba tuhase kunyingika zango lize Yehova alinalio hali yetu, chitangu twatamba kunyingika ngwetu, Yehova mwe watulingile. Iye mwe watwehele mwono. (Tanga Samu 100:3-5.) Kashika Mbimbiliya yinambe ngwo mutu kali “mwana Zambi.” (Luka 3:38) Nawa Yesu katulongesele hanga tusanyike Yehova ngwo “Tata nuli mu malilu.” (Mateu 6:9) Kashika Yehova kali Tata yetu, nawa iye katuzanga chinji ngwe chize umwe chisemi akuzanga ana jenyi.

4. (a) Yehova kali Tata wamutapu uka? (b) Yika mutulilongesa mu mutwe uno ni mu mutwe uze muusulaho?

⁴ Chili chikalu kuli atu amwe kunyonga ngwe a tato kali yisemi a zango. Kota kakunyonga chocho, ha mukunda lia lamba lize yisemi jo te akwaamwesa. Yehova kechi keza kamwesa ana jenyi lamba. Mumu iye kali Tata yetu mupema chinji. (Samu 27:10 ) Iye kakutuzanga ni kutufunga mu majila anji. Nyi mutunyonga chize Yehova akutuzanga chinji, ni yetu mutumuzanga chinji. (Tiangu 4:8) Mu mutwe uno mutulilongesa majila awana waze Yehova akusolwelamo zango lienyi hali yetu. Nawa mu mutwe uze musulaho, mutukalilongesa majila awana waze mutuhasa kusolwelamo zango lietu kuli Yehova.

5. Yika Zambi akuhana kuli atu?

⁵ Muze postolo Paulu apwile mu Atene, Ngresia, iye wamwenemo tuponya anji nawa atu jamo te kakufuliela ngwo tuponya jacho e te tuzambi two waze ahele mwono. Kashika iye yaalweza hakutwala kuli “Zambi yoze watangile hashi ni yuma yeswe yiliho. Se iye mwene kakuhana kuli eswe mwono, ni mwiku.” Iye yamba nawa ngwenyi, “muli iye tuli ni mwono, muli iye twakwenda.” (Yilinga 17:24, 25, 28) Yehova kakutwaha yuma yeswe yize twakufupa hanga tupwe ni mwono hamwe ni uwahililo. Achinyonga yimwe yuma yize iye akutwaha ha mukunda wa zango lienyi hali yetu.

6. Chihela chamutapu uka Yehova atwehele? (Tala chizulie chili hauputukilo)

⁶ Chakutalilaho, Yehova hanatululiekela chimwe chihela chipema chinji. (Samu 115:15, 16) Hashi halisa chinji ni ma planeta eswe waze iye atangile. Akwa-ciencia waze akuya mu matetela hanawane ma planeta anji, alioze kanda achiwana planeta yikwo yize yili ni yuma yeswe yize atu akufupa hanga apwe ni mwono. Yehova kakatwehele wika yuma yize twakufupa hanga tununge ni mwono, alioze kaluliekele kanawa hashi, ya pemesaho, ni kupwisaho chihela chingunu chize mutuhasa kuwahilila ku mwono. (Izaia 45:18) Muze mutunyonga hakutwala ku chihela chize Tata yetu, Yehova atwehele, twakumona pundu chize iye akutuzanga.—Tanga Yombi 38:4, 7; Samu 8:3-5.

7. Kuchi chize Yehova atutangile chinasolola pundu ngwo kakutuzanga?

⁷ Jila yikwo yize Yehova akusolwelamo zango lienyi hali yetu yili chize atutangile ni uhashi wa kumwimbulula. (Uputukilo 1:27) Chino chinalumbunuka ngwo mutuhasa kumona zango lienyi hali yetu ni yetu mutuhasa kusolola zango lietu kuli iye. Aye kananyingika ngwenyi chino che chakutunehena uwahililo ungunu. Kwamba umwenemwene, ana kakuwahilila nyi mamona ngwo yisemi jo kakwaazanga. Iwulukenu nawa ngwo Yesu katulongesele ngwo mutupwa ni chiseke nyi mutukundama kuli Tata yetu wa mu malilu. (Mateu 5:3) Iye kakutwaha “yuma yeswe ya kulumbama, hanga tukawahe nayo.” Chamwenemwene, iye kali chihanyi nawa kakutuzanga chinji.—1 Timoteu 6:17; Samu 145:16.

8. Mumu liaka Yehova akuzanga kutulongesa?

⁸ Chisemi meswe kakuzanga ana jenyi nawa keshi kuzanga hanga apiangule hanji kwoonga. Alioze yisemi anji musono keshi kutayiza shimbi  ja mu Mbimbiliya ja chipi ni chipema. Kashika ayo keshi kuhasa kusongwela kanawa ana jo, chino kanji-kanji chakuneha yinyengo ni mbwanja. (Yishima 14:12) Chipwe chocho, Yehova kakuhana kuli ana jenyi usongwelo upema mumu iye kali “Zambi wamwenemwene.” (Samu 31:5) Iye kakuzanga kutulongesa umwenemwene hakutwala kuli iye. Nawa kakutulongesa chize mutumuwayila, nawa iye kakutusolwela jila yipema yize twatamba kwendalamo ku mwono wetu. (Tanga Samu 43:3.) Yika yize Yehova hanatulongesa yize yinasolola zango lienyi kuli yetu?

9, 10. (a) Mumu liaka Yehova akutulweza hakutwala kuli iye? (b) Yika yize iye akutulongesa hakutwala ku upale wenyi?

⁹ Chitangu, Yehova kakutulweza hakutwala kuli iye mwene. Iye kanazange hanga tumunyingike. (Tiangu 4:8) Iye kakutulweza jina lienyi. Kwamba umwenemwene, Mbimbiliya yinavuluka chinji jina lienyi kuhiana jina lieswalio. Yehova nawa kanatulweza chize Iye apwa. Muze twakumona yuma yize alingile, yetu twakulilongesa ngwetu iye kali mukwa-ndundo nawa mukwa-mana. (A-Roma 1:20) Nawa muze twakutanga Mbimbiliya, twakulilongesa chize Zambi ali mungunu ni chize akutuzanga chinji. Muze mutunyingika yitanga yipema ya Yehova, twakukundama kuli iye.

¹⁰ Yehova nawa kakutulongesa chize upale wenyi wapwa. Kakutulweza ngwetu yetu tuli chihanda cha usoko wenyi. Nawa kakutulongesa yize ashimbwila kuli yetu hanga tuhase kukalakala hamuwika ni sambukila ni mutu mweswao wa mu usoko wenyi. Mbimbiliya pundu lume yinasolola ngwo Zambi kakatutangile  hanga tupwe ni kulisakwila yetwene chipi ni chipema. (Jeremia 10:23) Iye kananyingika yuma yize yipema kuli yetu. Mutuhasa kupwa ni sambukila ni uwahililo ku mwono nyi twatayiza chiyulo chenyi ni kumwononokena. Yehova kakutulongesa umwenemwene uno ulemu mumu kakutuzanga chinji.

11. Yika Tata yetu wa zango atulakenya hakutwala ku kulutwe lia matangwa?

¹¹ Chisemi wa zango kakunyonga chinji chize mwono wa ana jenyi muukapwa kulutwe lia matangwa. Mumu kakuzanga hanga ana jenyi akapwe ni mwono upema. Alioze ni chinyengo cheswe, atu anji musono kakulipikala hakutwala matangwa akulutwe, nawa akwo kukalakala chinji ha kufupa yuma yize yili ya matangwa akehe. (Samu 90:10) Tunawahilila chinji kupwa ni Tata yetu Yehova, yoze wakutulongesa chize mutuwahilila ku mwono haliapwila ni kutulakenya yuma yipema ya kulutwe lia matangwa!

12. Kuchi Yehova esekele kukwasa Kene ni Baruke?

¹² Muze Yehova amwene ngwenyi Kene kanambe kulinga chuma chipi, iye yeseka kumukwasa ha kumuhula ngwenyi: “Ufwatulo waka? Kuchi te unanyakana ku meso? Nyi mulinga kanawa kechi kukutambula nyi?” (Uputukilo 4:6, 7) Kene kalitunyine ukwaso wa Yehova, ha chino, iye yamona lamba ha yitanga yacho. (Uputukilo 4:11-13) Ha shimbu limwe, Yehova kamwene ngwenyi yitanga yipi ya Baruke te yinamuhongesa ni kulela ku mbunge. Ha chino, Yehova yalweza Baruke ngwenyi manyonga jenyi te api nawa te katamba kwaalumuna. Baruke kapanjikile kanawa chiyulo cha Yehova, nawa chino chalamwinyine mwono wenyi.—Jeremia 45:2-5.

13. Yika tuvumbi ashishika a Yehova alilongesele ku lamba lize amwene?

¹³ Yehova kakutusongwela ni kutufumba mumu iye kakutuzanga chinji. Iye keshi kufupa wika kutufumba, alioze iye nawa kakutulongesa. (A-Hepreu 12:6) Mu Mbimbiliya, twakutanga sango ja tuvumbi ashishika waze Yehova alongesele hanga apwe atu apema. Chakutalilaho, Yosefwe, Mose, ni Ndawichi kamwene lamba linji. Muze o te anamona lamba Yehova kapwile hamwe no. Nawa yuma yize ayo alilongesele ha matangwa jacho alamba yinakakwasa muze Yehova ahele yiteli yinene-yinene. Muze mututanga mu Mbimbiliya chize Yehova akwashile ni kulongesa atu jenyi, mutumona ngwetu kumana Yehova kakutuzanga chinji.—Tanga Yishima 3:11, 12.

14. Nyi twalinga chuma chipi, kuchi Yehova akusolola zango lienyi hali yetu?

¹⁴ Chipwe muze mutulinga chuma chipi, nihindu Yehova manunga ni kutuzanga. Nyi mutukaula fumbo lienyi ni kulikonyeka, iye matwaha “ukonekeno wa kulumbama.” (Izaia 55:7) Maliji wano yika analumbunuka? Maliji ja Ndawichi hakutwala ku ukonekeno wa Yehova kanatulweza chize Yehova ali Tata yetu mukwa-keke: “Iye kakukonekena mulonga we weswe, kakuwuka misongo ye yeswe. Kakukuula ku mwono we ku kwonwona, kakukusa chipangula cha utu wa zango ni keke. Chize wapwa usuku wa Chivumbuko ndo ku Chitokelo, chocho akuhandununa kuli yetu utanguko wetu.” (Samu 103:3, 4, 12) Yehova kakufumba ni kutusongwela mu majila eka ni eka. Shina mutuhasa kwalumuna kawashi yitanga yetu? Ha mashimbu eswe twiwulukenu ngwetu Yehova kakutufumba mumu iye kakutuzanga chinji.—Samu 30:5.

15. Jila yika yikwo Yehova akusolwelamo zango lienyi hali yetu?

¹⁵ Chisemi mweswe wa zango kakufunga usoko wenyi ku ponde. Ni Tata yetu, Yehova neye che akulinga hali yetu. Mukwa-kwimba masamu yamba hakutwala kuli Yehova ngwenyi: “Kakufunga  mwono wa asandu jenyi, kakuapulula ku kwoko lia chingulungulu.” (Samu 97:10) Achinyonga chino: Ngwe chizechene twakufunga kanawa meso jetu mumu kali alemu chinji kuli yetu, ni Yehova neye kakufunga kanawa tuvumbi twenyi mumu kali alemu chinji kuli iye.—Tanga Zekaria 2:8.

16, 17. Kuchi Yehova afungile atu jenyi ku matangwa akunyima ni ha matangwa wano?

¹⁶ Yimwe jila yikwo yize Yehova akufungilamo atu jenyi kukatuka ku mashimbu akunyima ni mashimbu wano, kali kupalikila muli angelo. (Samu 91:11) Mungelo umuwika kashihile maswalale A-Suria 185,000 ha ufuku umuwika nawa yalamwina atu ja Zambi. (2 Mianangana 19:35) Ku sekulu yitangu, angelo kapulwile Petulu, Paulu, ni tumbaji akwo mu zuwo lia ususu. (Yilinga 5:18-20; 12:6-11) Ha matangwa wanowene, mu chimwe chifuchi cha mu África mwapwanga jita. Chifuchi chapwile ni vunda ha mukunda wa jita, wiji, ungulungulu ni kulishiha. Chipwe chocho nyi umwe ndumbu kakafwile, anji akuli ayo katokesele yuma yeswe yize apwile nayo. Alioze ayo eswe kamwene zango lia Yehova ni kunyingika ngwo Yehova kakwaafunga. Chipwe ngwe kamwene lamba lieswali nihindu o kapwile ni chiseke chinji. Muze tusongwelo aku chishina chinene ayile ni kwaameneka nawa yahula kuli mandumbu ni mapangi jacho chize yuma te yinende, mandumbu jacho yamba ngwo: “Yuma eswe yinende kanawa, tunasakwila chinji kuli Yehova!”

¹⁷ Chochene, amwe tuvumbi twa Yehova, ngwe chizechene apwile kambaji Eshetevau ni tumbaji akwo, kafwile mumu lia ushishiko wo. Yehova nihindu keshi kukinda yuma yacho hanga yihone kulingiwa. Alioze iye kakufunga atu jenyi ngwe chizavu ni kwaatoweza hakutwala ku majila waze Satana akuzachisa hanga apiangwilemo atu ja Zambi (A-Efwesu 6:10-12) Twakuwana utowezo wacho mu Mbimbiliya ni mu mikanda ya mu ululikiso wetu. Chakutalilaho, twakutanga hakutwala ku ponde yize yakwiza ku Internet, ku zango lia mbongo, ku utanji ni ku yiheho ya ungulungulu, mikanda hanji yiheho ya game. Chochene, Yehova kakutuzanga chinji nawa kanazange hanga atufunge.

18. Kuchi twakwivwa hakutwala ku zango lia Yehova hali yetu?

¹⁸ Muze Mose anyongene hakutwala ku miaka yeswe iye alingile mu mulimo wa Yehova, iye yapwa ni ushindakenyo ngwo Yehova te kakumuzanga ha kwamba ngwenyi: “Utuyukise kama ha chimene ni utu wa zango lie, hanga tukawahilile ni chiseke matangwa jetu eswe.” (Samu 90:14) Tukwete yiwape ha kunyingika ni kwivwa ngwetu Yehova kakutuzanga. Chili uhenya unene kupwa atu waze Yehova akuzanga chinji! Twakwivwa ngwe postolo Yoano, yoze wambile ngwenyi: “Nyongenu zango lipwa haha hanatwehe mwe Tata!”—1 Yoano 3:1.