MALONGESO A CHIFUKILO | YELA JA YEHOVA AYA?
Yela ja Yehova Kali Atu Amutapu Uka?
Ululikiso wetu uli mu yifuchi yeswe, tushi kulichinga ni mayingeleja akwo. Chipwe ngwe chishina chetu chinene chili mu Estados Unidos, alioze Yela ja Yehova anji katwama mu yifuchi yikwo. Kwamba umwenemwene, amwe tununu nake atununu kakulongesa atu Mbimbiliya mu unji wa yifuchi 230. Twakulinga chino kulita ni maliji a Yesu akwamba ngwo: “Sango lino lipema lia wanangana kumakaliambujola mu yifuchi yeswe ya hashi.”—Mateu 24:14.
Chipwe ngwe twatwama ku yihela yeka ni yeka, nihindu twakwononokena shimbi ja manguvulu. Nawa twakusa tachi hanga twehuke kulinjisa mu yuma ya mafwefwe. Twakulinga chino mumu twakukaula usongwelo wa Yesu wakwamba ngwo, akwa-Kristu “hi akwa hashi ko.” Kashika tushi kulinga chihanda ku yuma ya mafwefwe hanji kwasa jita. (Yoano 15:19; 17:16) Ha chino, muze kwapwile Jita II ya Hashi Heswe, Yela ja Yehova kaasele mu mazuwo a ususu, kaamwesene lamba, mumu ayo kakapwile ni kutayiza kulinga yuma ya mafwefwe. Umwe ngana wa yingeleja mu Alemanha yasoneka ngwenyi: “Pundu lume ayo mahasa kulilamba ha pambo ngwo ayo wika alitunyine kuwayila Reich wa Muchitatu.”
“[Yela ja Yehova] kakwete yitanga yipema chinji. Tunafupu atu amutapu au, waze akwete zango lingunu, chipwe ku yipatulo yilemu ya mafwefwe. Alioze tuchi keza kamona malinga mulimo wacho. . . . O kakuvumbika wata wa manguvulu, alioze kakufuliela ngwo Wanangana wa Zambi we wika uli ni uhashi wa kuhwisa milonga ya atu eswe.”
—Mukanda wa sango ja Nová Svoboda newspaper, mu chifuchi cha Tcheca.
Yetu tushi kulisosolola ni akwetu. Yesu kalembele hanga Zambi afunge tumbaji twenyi ha kwamba ngwenyi: “Chalembele hanga uachize hashi.” (Yoano 17:15) Kashika yena muhasa kutumona ku milimo ku yitanda ni ku ma shikola.
