MALONGESO A CHIFUKILO
Yela ja Yehova Aya?
Ami nanyingike Mike ha miaka yinji. Aye kali Chela cha Yehova. Alioze ulembelo wenyi kuushi kungulumbunukina kanawa. Yehova mba iya? Mumu liaka Yela ja Yehova keshi kuwahilila ha matangwa akunanga? Shina Mike kali mu umwe uwayilo nyi?”—Becky, California, U.S.A.
“Muze enyembo jami aputukile kulilongesa Mbimbiliya ni Yela ja Yehova, yami te nakulihula ngwami: ‘Jina Yela ja Yehova yika linalumbunuka? Ulembelo uno uli ni jina lipi chinji!’”—Zenon , Ontario, Canada.
Yami ni mukwetu-pwo twanyongene ngwetu Yela ja Yehova kakutufupa hanga atwiwulule yitanga yetu ya uhenge, mumu te tushi kuya mu yingeleja niyimwe. Yetu yitunyonga ngwetu nyi ma ulembelo anene-anene keshi ni yuma yize tunafupu, shina ka ulembelo kano ka Yela ja Yehova mukahasa kupwa nayo?”—Kent, Washington, U.S.A.
“Kwamba umwenemwene, ami te chanyingikine nyi ayo te aya, nawa yika te akufupa.”—Cecilie, Esbjerg, Denmark.
Ena hanji wakwamona kanambujola ku zuwo ni zuwo hanji ha mbunga ni kuhana mikinda yize yakulumbununa Mbimbiliya ni kuhana malongeso a Mbimbiliya awana kuli atu. Ena kota watambula mukanda uno kuli umwe wakuli ayo. Nihindu, yena muhasa kulihula, mba Yela ja Yehova aya. Kota manyonga je kali ngwe a umwe wakuli atu waze twatongola helu.
Nyi uli ni yihula nawa unafupu kumbululo, kulihi muhasa kuwana kumbululo? Kuchi muhasa kunyingika yize pundu Yela ja Yehova akufuliela, mulimo wo wa kwambujola kuchi wapwa nawa iya wa kufweta yihela yo ya uwayilo, nawa mumu liaka o akuya ku zuwo lie nawa akufupa kuhanjika ni yena ha mbunga?
Cecilie, yoze twavuluka ku uputukilo yamba ngwenyi: “Natanga chinji hakutwala kuli Yela ja Yehova ha Internet. Nevwile umwe swe-swe-swe, ni yuma yipi yize atu akwamba hakutwala kuli ayo. Ha chino yingupwa ni manyonga api hakutwala kuli Yela ja Yehova.” Ha kupalika cha mashimbu, Cecilie yahanjika ni Yela ja Yehova ene, nawa yawana ma kumbululo apema a yihula yenyi.
Shina unazange kuwana kumbululo liamwenemwene lia yihula ye hakutwala kuli Yela ja Yehova? Tunakukolweza hanga ufupe chishina cha chinyingi chipema kuli ene Yela ja Yehova, waze akufwambwisa mukanda uno. (Yishima 14:15) Tunalembe ngwetu mitwe yino muyikukwasa kunyingika yetu tuli aya nawa ni yize twafuliela nawa hanga unyingike mulimo uze twakulinga.
