Nasemukinyine mu Acul, mbonge yize yatwama kusuku, ku milundu yize yili ku chitokelo cha Guatemala. Asoko jami kali a ku vungu lia ixil, munyachi wa chizavu avuluka ngwo, maias. Chize mu wanuke wami, nakuhanjika espanhol ni limi lia vungu liami, ixil. Nakolelele ha mashimbu waze mu Guatemala te muli jita, yize yalingile 36 a miaka. Ha mashimbu jacho, atu anji a ku vungu lia ixil kafwile.

Muze te nguchili ni miaka yiwana, yaya yoze wapwile ni miaka shimbiali, te kanahehe ni mbomba, susumuku mbomba yacho yiyilozoka. Kashika, meso jami yafwa. Alioze, iye yatokesa mwono wenyi. Hakupalika cha amwe mashimbu, yangutwala ku shikola yize akufungila twanuke waze ali tupuputa, mu mbonge ya Guatemala, kuze nalilongesele braile. Kuzekwene, tufunga waze apwileko yangukanjisa kuhanjika ni twanuke ni akwetu. Chikwo nawa, akwa-shikola ni akwetu te kakunguchina chipwe ngwe te chanyingikine mumu liaka. Napwile ni kulivwa ukawami, kashika, te nakushimbwila chinji tukweji aali waze te nakupwa ni mama ku zuwo, mumu iye te kakungufunga kanawa. Chaluyinda, muze napwile ni miaka kumi mama yafwa. Nevwile ngwe natokesa mutu yoze te wakunguzanga chinji hano hashi. Nevwile chinyengo chinji.

Muze napwile ni miaka 11, yinguhiluka ku mbonge yize nasemukinyine hanga ngutwame ni usoko wa ndumbwami. O kapwile ni kungufunga ku musunya, alioze te keshi kungukwasa ngulivwe kanawa ku mbunge. Ha mashimbu amwe te nakuhula Zambi ngwami: “Mumu liaka mama afwile? Mumu liaka nguli kapuputa?” Atu anji te kakwamba ngwo, yuma yacho yakulingiwa mumu we upale wa Zambi. Hachino, yinguputuka kunyonga ngwami, Zambi kakwete mbunge yikalu, keshi zango. Nazangile kulisukika, alioze chakapwile ni uhashi wacho.

Kupwa kapuputa chakunguhongesa mu manyonga ni ku mujimba. Mumu muze te nguchili kanuke, kangupihishile hanji kungupomba ha yisuho yinji. Kanda ngwambulula kama yuma yino, mumu napwile ni kunyonga ngwami niumwe kechi kungupala. Te chishi kuhanjika ni mutu niumwe, chipwe atu akwo no te chakupwa chikalu kunguhanjikisa. Napwile ni kupinda mu mbunge ni kulivwa ukawami, kashika te chishi kujikijila hali mutu niumwe.

Muze te nguchili kanuke, Yela ja Yehova aali, lunga ni pwo yeza ni kuhanjika ni yami ha mashimbu a kuhwima ku shikola. Longeshi wami, yoze te wakunguvwila keke yinji mwe wechile kuli ayo hanga eze ni kuhanjika ni yami. O yangusolwela chilakenyo cha mu Mbimbiliya chinambe ngwo, afu makahinduka ni tupuputa no makamona. (Izaia 35:5; Yoano 5:28, 29) Nazangile chinji yuma yize nevwile, alioze, chapwile chikalu kuhanjika mumu kanda te ngwijilila kuhanjika ni atu. Chipwe ngwe chasolokele ngwe chisolo kwapanjika, nihindu o yangusolwela zango ni uhomboloji ni kununga ni kungumeneka hanga angulongese hakutwala ku Mbimbiliya. O kapwile ni kwenda 10 lia quilômetros ni kupalikila mu jila yize yapwile ni milundu yinji mba ahase kuheta ku zuwo liami.

Ndumbwami kapwile ni kuhanjika hali Yela ja Yehova jacho ngwo, o kakulilulieka kanawa chipwe ngwe kali yiswale. Chipwe chocho, o kapwile ni kungusolwela zango liamwenemwene ni kungunehena yawana. Kuli yami, akwa-Kristu amwenemwene e akusolola zango lia mutapu au.

Nalilongesele Mbimbiliya ni mikanda yize yapwile mu braile. Chipwe ngwe yuma yize napwile ni kulilongesa te yakungulumbunuka, nihindu te chakupwa chikalu kutayiza yuma yimwe mu mbunge. Chakutalilaho, chapwile chikalu kutayiza ngwami, Zambi ni atu akwo kakulihulumba hali yami. Nanyingikine mumu liaka Yehova akwecha hanga yuma yipi yilingiwe, alioze, te chakupwa chikalu kumona Yehova ngwe Tata wa zango. a

Hakupalika cha mashimbu, yuma yize nalilongesele mu Mbimbiliya yiyingukwasa kwalumuna manyonga jami. Chakutalilaho, nalilongesele ngwami, Zambi keshi kuwahilila muze atu anamono lamba. Hakutwala kuli tuvumbi twenyi waze te anamono lamba, Zambi yamba ngwenyi: “Chamwenemwene hinamona luyinda wa atu jami . . . ngunanyingika yinyengo yo.” (Kutuhuka 3:7) Muze naputukile kuzanga chinji yitanga ya Yehova, yingulihana kuli iye. Ha mwaka 1998, yangupapachisa.

Ha kupalika cha mwaka umuwika, yingulisonekesa ku shikola ya tupuputa yize yapwile hakamwihi ni mbonge ya Escuintla. Umwe mukulwana wa mu chikungulwila, yamona chize te nakupinda ha kuya ku kukunguluka mu mbonge yize te natwama. Napwile ni kwenda wenyi usuku mba nguye ku kukunguluka ku chikungulwila chize chapwile hakamwihi sali likwo lia mulundu. Chikungulwila chacho mwe te atwama atu waze angulongesele Mbimbiliya. Wenyi wacho wapwile ukalu chinji kuli yami. Mukulwana wa mu chikungulwila yahanjika ni umwe usoko mu Escuintla hanga ngutwame no apwe ni kungukwasa kuya ku kukunguluka. Ndo musono, usoko wacho wakungufunga kanawa.

Mashimbu jetu akehe, kachi munguhanjika ha yilweza yikwo yinji ya zango liamwenemwene lize mandumbu mu chikungulwila akungusolwela. Yuma yeswe ayi, yakungwaha shindakenyo ngwami, kupwa Chela cha Yehova, changukwasa kupwa hakachi ka akwa-Kristu amwenemwene.—Yoano 13:34, 35.

Haliapwila nguli ni kutalatala, chishi kunyonga nawa ngwami, nguli ukawami. Nguli mu mulimo wa shimbu lieswe, nakukwasa atu kunyingika Yehova. Chino chakungukwasa nguhone kulihulikila ha ulema wami, alioze, hali akwetu. Chikwo nawa, nguli ni chiwape cha kukalakala ngwe mukulwana wa mu chikungulwila ni kuhanjika pande ja mbunga mu mbonge yize natwama. Napwa nawa ni uhashi wa kuhanjika pande ha kukunguluka cha mambonge.

Ha mwaka 2010, mu El Salvador, yangusanyika ku Shikola ya Kulilongesa Milimo ya mu Ululikiso (yize musono akusanyika ngwo, Shikola ya Akwa-Kwambujola Wanangana.) Shikola yino yangukwashile kulinga kanawa mulimo wami mu chikungulwila. Fumbo lize natambwile, liakungukwasa kumona nawa ngwami, Yehova kakunguzanga chinji, mahasa kuzachisa mutu mweswawo hanga amanunune upale wenyi.

Yesu kambile ngwenyi: “Chinawaha kutambula alioze shinaho kuhana.” (Yilinga 20:35) Haliapwila munguhasa kwamba ngwami, nakuwahilila chinji, munguhasa kulinga chuma chize kanda ngunyonga kama: Kukwasa akwetu.