MALONGESO A CHIFUKILO | SHINA KULEMBA CHIKWETE ULEMU NYI?
Kulemba—Kuchi muchihasa kukukwasa?
Che chuma cheswe, shimbu kanda uchichilinga muchilita kulihula ngwe: ‘Yika munguzukako? Shina chili chipi kuhula chimwe chuma hakutwala ku kulemba nyi? Ka, hi chipi ko. Alioze kwamba umwenemwene etu twakuzanga kunyingika nyi mutufumbukako chimwe chuma chipema.
Ha mitwe yize twahichika, twalilongesa ushindakenyo uze unasolola ngwo kulemba hi wika ko kuya ku ulembelo hanji ngwo chili uwukiso wa atu akwete mazalu-zalu. Pundu lume, Zambi wamwenemwene kakwivwa kulemba. Nyi twalemba nikulita ni upale wa Zambi ni yuma yize yalita, iye matwivwa. Kwamba umwenemwene, iye kanatukolweza hanga tukundame kuli iye. (Tiangu 4:8) Kashika, tupwenu ni kulemba mashimbu eswe ku mwono wetu. Haliapwila tutalenu yimwe yiwape yize yakwiza ha kulemba.
Sambukila ya ku mbunge.
Muze twakumona lamba ni yipikalo ku mwono wetu, shina mbunge jetu jakulipikala chinji? Ha mashimbu jacho, Mbimbiliya yinatukolweza hanga ‘tulembe mashimbu eswe’ nawa hanga tunyingikise ‘kwita chetu kuli Zambi.’ (1 A-Tesalonika 5:17; A-Fwilipu 4:6) Mbimbiliya yinatwehe ushindakenyo ngwo, nyi mutulemba kuli Zambi, “sambukila ya Zambi, yize yakuhiana kunyonga cheswe, muyikafunga mbunge [jetu] ni kunyonga [chetu].” (A-Fwilipu 4:7) Mutuhasa kuzukako uhumikizo hakusolola yipikalo yetu kuli Tata yetu wa mu malilu. Kwamba umwenemwene, iye kanatukolweza hanga tulinge yize yili mu Masamu 55:22, unambe ngwo: “Mbila chiteli che hali Yehova, iye makakukolesa.”
“Mbila chiteli che hali Yehova, iye makakukolesa.”—Samu 55:22
Atu anji hano hashi kakupwa ni sambukila yacho. Hee Ran wa mu Korea yamba ngwenyi: “Chipwe
muze nakupwa nyi yipikalo yinji, nyi nalemba hakutwala ku yipikalo yacho nakwivwa uhuzululo wa yiteli yize ngulinayo, nawa nakupwa ni tachi ja kunyongonona.” Cecilia, wa mu Filipinas, yamba ngwenyi: “Kupwa chisemi hi chashi ko, nakulipikala chinji hali ana jami a mapwo ni hali mama, yoze keshi kuhasa nawa kwiwuluka yuma ha mukunda wa yikola yenyi. Alioze kulemba, chinangukwase kufunga kanawa yiteli yami ya tangwa ni tangwa chakuhona kulipikala chinji. Ngunanyingika ngwami Yehova mangukwasa kuyifunga kanawa.Ukolwezo ni utakamiso ha mashimbu a yipikalo.
Shina yena unapinji ni yipikalo, yikola hanji mashimbu akalu? Kulemba kuli “Zambi ya kulembejeka cheswe” muchihasa kukukwasa kuwana uhuzululo. Mbimbiliya yinambe ngwo, iye kali “yoze wakututakamisa mu lamba lietu lieswe.” (2 A-Korindu 1:3, 4) Chakutalilaho, limwe tangwa muze Yesu te analipikala chinji, iye “yaliumba ha makungunwa nikulemba.” Mba yika yalingiwile? Umwe “mungelo wa mwilu wasolokele kuli iye, nikumutakamisa.” (Luka 22:41, 43) Nehemia, umwe lunga mukwo mukwa-kushishika, kamumwesene lamba kuli atu api waze azangile kumukwika kulinga mulimo wa Zambi. Aye yalemba kuli Zambi ngwenyi: “Ungukolese moko jami haliapwila.” Yuma yize yalingiwile kulutwe yinakasolola pundu ngwo Zambi kamukwashile hanga achine kwivwa woma ni kulinga mulimo wenyi kanawa. (Nehemia 6:9-16) Reginald, wa mu Gana, kanalumbununa chize kulemba chakumukwasa hakwamba ngwenyi: “Muze nakulemba, chipi-chipi ha mashimbu a yipikalo, nakwivwa ngwe nasolola kapinda kami mweswe kuli umwe mutu yoze uli ni uhashi wa kungukwasa, nawa yoze wakungulakenya ngwo kuwatambile kulipikala.” Chochene, Zambi mahasa kutulembejeka muze mutulemba kuli iye.
Malinjekela Akuli Zambi.
Yimwe yiyulo yize twakukwata muyihasa kutupinjisa hanji kupinjisa akwetu. Mba kuchi mutuhasa kukwata yiyulo yipema? Mbimbiliya yinambe ngwo: “Nyi kachi umwe wa kuli yenu mahona mana [kanji-kanji ha mashimbu a yeseko], akete kuli Zambi, yoze wakuhana kuli eswe ni kuvungumuna, mba kumakamwaha-o ni kuchokana chakuhi.” (Tiangu 1:5) Nyi twalemba hanga tupwe ni mana, Zambi mahasa kuzachisa spiritu yenyi yisandu hanga yitukwase kukwata yiyulo ya mana. Kwamba umwenemwene, yetu mutuhasa kwita spiritu yisandu mumu Yesu kanatulakenya ngwo ‘Tata wa mwilu makahana spiritu yisandu kuli waze mamwita.’—Luka 11:13.
“Ami nalembele chinji kuli Yehova hanga angusongwele kukwata yiyulo ya mana.”—Kwabena, Ghana
Chipwe Yesu neye kamwene ulemu wa kwita ukwaso kuli Tato hakutwala ku chikuma cha kukwata yiyulo yilemu. Mbimbiliya yinatulweze ngwo muze iye azangile kusakula malunga 12 waze te mapwa apostolo, ‘iye wahwishile ufuku weswe nikulemba kuli Zambi.’—Luka 6:12.
Chizechene ngwe Yesu, atu anji musono no kakuwana ushindakenyo muze akumona chize Zambi akukumbulula yilemba ayo ha kwita ukwaso hanga akwate yiyulo ya mana. Regina wa mu Filipinas, yoze lunga lienyi hanafu, kanambe hakutwala ku kapinda munji yoze akumona, ngwe kuhona mulimo, kulikwasa mwene, usoko wenyi ni kapinda wa kulela ana. Yika yakumukwasa kukwata yiyulo ya mana? Aye kanambe ngwenyi: “Ami nakujikijila kuli Yehova hanga angukwase muze nakulemba.” Kwabena, wa mu Gana, kanambe mumu liaka etele kuli Zambi hanga amukwase, aye yamba ngwenyi: “Ami nakatukile ku mulimo uze te nakutambula fweto lipema.” Alioze muze aye anyongene kanawa ha mwono wenyi, yamba ngwenyi: “Ami nalembele chinji kuli Yehova hanga angusongwele kukwata yiyulo ya mana.” Nawa ngwenyi: “Yami nakwivwa ngwami Yehova kangukwashile kusakula umwe mulimo uze te muungukwasa ku spiritu ni ku mwono.” Ni yena muuhasa kupwa ni usongwelo wa Zambi ha kulemba kuli iye hakutwala ku yuma yize muyihasa kupinjisa usepa we ni iye.
Twatongola wika yuma yikepe yize yinasolola chize kulemba muchihasa kulinga hali yena. (Tala nawa yilweza yikwo ha mushete “ Kuyuka Chize Chakwiza ha Kulemba.”) Alioze mba uyuke yiwape yacho, yena watamba chitangu kunyingika Zambi ni upale wenyi. Nyi che unazange, tunakukolweza hanga wite ukwaso kuli umwe Chela cha Yehova hanga ulilongese Mbimbiliya. a Chino muchihasa kupwa jila yitangu yize yena muhasa kukundama kuli Yoze “wakwivwa kulemba.”—Samu 65:2.
a Nyi unazange kunyingika nawa, fupa Yela ja Yehova kuze watwa hanji yako mu site yetu, www.pr418.com/cjk.