1, 2. Kuchi amwe atu akunyonga hakutwala kuli Zambi?

 ATU anji kakunyonga ngwo Zambi keshi kupala yuma yeswayo yize ayo malinga. Ayo kakunyonga ngwo pundu lume Zambi keshi kulihulumba ku yuma yize yakulingiwa kuli ayo. Chakutalilaho, muze kwapwile umwe kakundukundu wa ngolo ku limwe sali lia Filipina mu Novembro 2013, nguvulu wa yimwe mbonge yamba ngwenyi: “Zambi kota kweka ali.”

² Atu akwo kakunyonga ngwo Zambi kechi kuhasa kumona yuma yize ayo akulinga. (Izaia 26:10, 11; 3 Yoano 11) Amwe atu ha mashimbu a postolo Paulu no che anyongene. Paulu yamba hakutwala kuli ayo ngwenyi: “Mba, se katayile kupwa ni Zambi.” O kali yihenge, yingulungulu, akwa-kuzo nawa api.​—A-Roma 1:28, 29.

3. (a) Yihula yika twatamba kulihula yetwene? (b) Mu Mbimbiliya ha mashimbu akwo “kwoko” lia Zambi yi ka lialumbunuka?

³ Mba yetu? Tunanyingika ngwetu Yehova kakumona yuma yeswe yize twakulinga. Alioze, tuli ni ushindakenyo ngwetu Yehova katupala? Kutala kama twakumona ukwaso wa kwoko lienyi ku mwono  wetu nyi? Mu Mbimbiliya, “kwoko” lia Zambi ha mashimbu akwo lialumbunuka ndundo jize akwete. Iye kakuzachisa ndundo jenyi hanga akwase tuvumbi twenyi ni kukumba akwa-kole jenyi. (Tanga Shimbi Yamuchiali 26:8.) Yesu kambile ngwenyi amwe “kumakamona Zambi.”(Mateu 5:8) Shina yetu tuli amwe akuli atu jacho? Kuchi mutuhasa ‘kumona Zambi’? Tulilongesenu mu Mbimbiliya yilweza ya amwe atu waze amwene kwoko lia Zambi ku mwono wo ni yilweza ya waze kakamwene kwoko lienyi. Nawa mutulilongesa chize ufulielo wakutukwasa kumona kwoko lia Zambi.

4. Mumu liaka akwa-kole ja A-Izalele alitunyine kumona kwoko lia Zambi?

⁴ Ku mashimbu akunyima, atu anji kapwile ni uhashi wa kumona kwoko lia Zambi nawa kevwile chize Zambi akwashile A-Izalele. Yehova kalingile yikomokeso hanga atusule atu jenyi mu Engitu ni kukumba mianangana anji mu Chifuchi cha Chilakenyo. (Yoshua 9:3, 9, 10) Chipwe ngwe mianangana akwo kevwile nawa kamwene chize Yehova alamwinyine atu jenyi, nihindu ayo “alikungulwile ni mbunge yimuwika akase jita ni Yoshua ni A-Izalele.” (Yoshua 9:1, 2) Muze ayo ashile jita ni A-Izalele, mianangana jacho kapwile ni uhashi wa kumona kwoko lia Zambi. Ha chino, ku ndundo jinene ja Yehova, “tangwa liamanyine ni kakweji kendele ndo akwa vungu lia Izalele hakala milonga ya akwa kole jo.” (Yoshua 10:13) Alioze Yehova kechele mbunge ja akwa-kole A-Izalele ‘jikale’ mbe, ha chino o yasa jita ni A-Izalele. (Yoshua 11:20) Akwa-kole ja A-Izalele yaakumba mumu ayo kalitunyine kutayiza ngwo Yehova te kanase jita hanga apulwile atu jenyi.

5. Yika Mwanangana mupi Ahabe ahonene kutayiza?

⁵ Ha kupalika cha mashimbu, Mwanangana mupi Ahabe kapwile ni uhashi wa kumona kwoko lia Zambi. Eliya kamulwezele ngwenyi: ‘Kukuchi kapwa mume hanji vula ha miaka yino, ndo shina ku liji liami!’ (1 Mianangana 17:1) Chino chalingiwile ha mukunda wa kwoko lia Zambi, alioze Ahabe yahona kutayiza yuma yacho. Kulutwe lia yino yuma, Eliya yalemba kuli Yehova, Zambi yakumbulula kulemba chenyi ha kutuma kahia ka mu malilu. Ahabe neye, kamwene yuma yacho. Mba hi Eliya yamba kuli Ahabe ngwenyi, Yehova mapatula changa ni kuneha vula munji. (1 Mianangana 18:22-45) Ahabe kamwene yikomokeso yino yeswe, alioze nihindu yahona kutayiza ngwo kamwene ndundo ja Yehova. Yika mutuhasa kulilongesa ku yilweza yino? Twatamba kumona kwoko lia Yehova ku mwono wetu.

6, 7. Yika A-Ngibeone ni Rahape afulielele?

⁶ A-Ngibeone te kalisa ni mavungu akwo waze te asulangana no. O kamwene kwoko lia Zambi. O kakazangile kwasa jita ni A-Izalele alioze yazanga kulinga no sambukila. Mumu liaka? O yamba ngwo mumu hanevu hakutwala kuli Yehova ni yuma yeswe yize alingile. (Yoshua 9:3, 9, 10) O kasolwele mana ha kufuliela ngwo Yehova te kanapulwila A-Izalele.

 ⁷ Rahape neye kamwene kwoko lia Yehova. Iye te hi Ka-Izalele ko, alioze kevwile chize Yehova apulwile atu jenyi mu Engitu. Muze ngendeshi aali A-Izalele ayile ku zuwo lienyi, aye yamba ngwenyi: “Ngunanyingika ngwami Yehova hanwaha chifuchi.” Rahape yafuliela ngwo Yehova mahasa kumulamwina hamwe ni usoko wenyi. Iye kafulielele muli Yehova chipwe ngwe te kananyingika ngwo chuma chize analingi chili cha ponde.​—Yoshua 2:9-13; 4:23, 24.

8. Kuchi amwe A-Izalele amwene kwoko lia Zambi?

⁸ A-Izalele amwe waze amwene kahia ka mu malilu ha kumbululo lia kulemba cha Eliya kanyingikine ngwo, Zambi mwe walinga yuma yacho, alioze Mwanangana mupi Ahabe yahona kuchitayiza. O yamba ngwo: “Yehova iye Zambi” wamwenemwene! (1 Mianangana 18:39) Kuli ayo chino chasolwele pundu ngwo, kamwene ndundo ja Zambi.

9. Kuchi twakumona Yehova hamwe ni kwoko lienyi musono?

⁹ Twahengula yilweza yipema ni yipi yize yatukwasa kunyingika yika chinalumbunuka “kumona Zambi” hanji kumona kwoko lia Zambi. Nyi twanyingika Yehova hamwe ni yitanga yenyi, mutumona kwoko lienyi ni ‘meso a mbunge yetu.’ (A-Efwesu 1:18) Chino muchitukolweza hanga twimbulule atu ashishika aku mashimbu akunyima ni a mashimbu wano waze hanamono chize Yehova akukwasa atu jenyi. Shina tuli ni ushindakenyo ngwetu Yehova kakukwasa atu jenyi musono?

10. Ushindakenyo uka tulinawo ngwetu Yehova kakukwasa atu musono? (Tala chizulie chili hauputukilo.)

¹⁰ Tuli ni yuma yinji yize yinasolola ngwo Yehova kananungu ni kukwasa atu musono. Kanji-kanji twakwivwa sango ja atu waze alembele ha kwita ukwaso wa Zambi ku mwono wo nawa iye yakumbulula yilemba yo. (Samu 53:2) Chakutalilaho, Allan muze te anambujola mu chimwe chihunda ku Filipina, kawanyine pwo yoze waputukile kulila. Iye yamba ngwenyi: “Ha chimene chizechene, pwo wacho kalembele kuli Yehova hanga amutumine umwe Chela chenyi ku zuwo lienyi.” Muze apwile mwana-pwo, aye kalilongesele Mbimbiliya ni Yela ja Yehova, alioze muze amumbachile, aye yatutuluka mu chihunda chacho, kakanungine nawa ni kulilongesa Mbimbiliya. Zambi yakumbulula kulemba chenyi kawashi-washi, chino chamukwachile ku mbunge. Aye kakakumbanyishine mwaka umuwika, yamupapachisa ngwe Chela cha Yehova.

11, 12. (a) Kuchi Yehova akukwasa atu jenyi? (b) Lumbununa chize Yehova akwashile umwe pangi?

¹¹ Tuvumbi twa Yehova kakumona kwoko lienyi lia ukwaso muze o akwecha kulinga yitanga yipi ngwe kunwa makanya, droga, hanji kutala pornografia. Amwe kakwamba ngwo ayo kesekele kwecha yitanga yacho kutachi jo ene alioze kakahashile. Ha chino, muze o etele ukwaso kuli Yehova, iye yaha ‘tachi jahiana’ mba hi yapwa ni uhashi wakwecha yitanga yacho yipi.​—2 A-Korindu 4:7; Samu 37:23, 24.

¹² Yehova nawa kakukwasa tuvumbi twenyi hanga akumbe yipikalo yo. Chino chalingiwile kuli Amy. Kamwehele mulimo hanga akwase kutunga Zuwo lia Wanangana ni zuwo lia mishionaliu mu chihunda chikehe cha ku Kalunga-Lwiji Pacífico. Ndako jako te jalisa, ha mashimbu anji te kwakuhona kahia kazembwe hanji meya, mu majila te mwakuzala to ni meya, iye yahichika asoko jenyi nawa te kakutwama mu yimwe hotel yikepe. Limwe tangwa aye yazwela ni umwe pangi te wakukalakala nenyi hamuwika. Aye yevwa yinyengo yinji ha yize alingile. Muze hafuna mu chipatulo chenyi muze te munalaa, aye yalemba kuli Yehova ni kumwita ukwaso. Ha chino, muze kahia kejile, aye yatanga chimwe chikuma mu Kaposhi hakutwala ku shikola ya Gileade. Chikuma chacho te chinahanjika hakutwala ku kapalia yomwene iye te analimika nenyi. “Aye yamba ngwenyi: “Nevwile ngwami Yehova kanahanjika ni yami ha ufuku wacho. Chino, changukwashile kununga mu mulimo wami.”​—Samu 44:25, 26; Izaia 41:10, 13.

13. Ushindakenyo uka tulinayo ngwetu Yehova kakukwasa atu jenyi hakukalila ulite wo wa kwambujola?

¹³ Yehova nawa kakukwasa atu jenyi kukalila ni kusonekesa mulimo wa sango lipema kuli manguvulu. (A-Fwilipu 1:7) Chakutalilaho, muze amwe manguvulu akweseka kukwika mulimo wa kwambujola, yetwene twakuukalila ku ma tribunal. Yetu hitwakumba kulu ku chota-chinene cha hashi heswe yisuho 268, kukatuka ha mwaka 2000  hitwakumba yisuho 24 ku Corte Europeu dos direitos humanos. Chino chinasolola ngwo kukushi mutu niumwe yoze makinda kwoko lia Yehova!​—Izaia 54:17; tanga Izaia 59:1.

14. Ushindakenyo ukwo uka tuli nayo uze unasolola ngwo Zambi kali hamwe ni atu jenyi?

¹⁴ Mulimo wa kwambujola sango lipema hashi heswe unasolola ushindakenyo ukwo ha ukwaso wa kwoko lia Zambi. (Mateu 24:14; Yilinga 1:8) Nawa unungiso uze uli hakachi ka tuvumbi twa Yehova aku mavungu eswe muuhasa kusoloka wika ha mukunda wa ukwaso wa Yehova. Unungiso wacho uli wika kuli ayo! Chipwe atu waze keshi kuwayila Yehova kakukomoka ngwo: “Pundu, Zambi hwali hakachi kenu.” (1 A-Korindu 14:25) Tuli ni ushindakenyo unji uze unasolola ngwo Zambi kali hamwe ni atu jenyi. (Tanga Izaia 66:14.) Yika mba mutwamba hakutwala kuli yena? Shina yena wakumona kwoko lia Yehova ku mwono we nyi?

15. Ha amwe mashimbu, mumu liaka kutuchi kuhasa kumona kwoko lia Yehova ku mwono wetu?

¹⁵ Ha mashimbu akwo, hanji kutuchi kuhasa kumona kwoko lia Zambi mu mwono wetu. Mumu liaka? Nyi tuli ni yipikalo yinji, mutuhasa kuvulama ngwetu Yehova te kakutukwasa chinji ha mashimbu amwe. Chino chalingiwile kuli Eliya. Aye kapwile ni hamu, alioze muze Mwazovu Jezebele afupwile kumushiha, aye yevwa woma unji. Ha mwe mashimbu aye yavulama chize Yehova te akumukwasa chitangu. Mbimbiliya yinambe ngwo, Eliya wazangile kufwa. (1 Mianangana 19:1-4) Kulihi iye te mawana ukwaso ni hamu? Iye katambile kushimbwila kuli Yehova!—1 Mianangana 19:14-18.

16. Kuchi mutuhasa kumona Zambi muze tuli mu lamba?

¹⁶ Yombi kapwile ni kulihulikila ha lamba lienyi,  kashika iye kakahashile kumona lamba lienyi ngwe chize Yehova alimwene. (Yombi 42: 3-6) Ha mashimbu amwe, ni yetu muchihasa kupwa chikalu kumona Zambi ha mukunda wa lamba lietu. Yika muyihasa kutukwasa hanga tumone yuma yize Zambi akulinga hali yetu? Twatamba kupukuna ha yize Mbimbiliya yakwamba hakutwala ku lamba lietu. Chocho, mba Yehova mapwa mutu wamwenemwene kuli yetu, nawa yetu mutupwa ni uhashi wa kwamba ngwetu: “Nevwile ni matwi jami lufuma wenu, alioze haliapwila ngunanumono zwalala.”

17, 18. (a) Kuchi muuhasa kumona kwoko lia Yehova ku mwono we? (b) Tongola chilweza chize chinasolola ngwo Zambi kanatukwase haliapwila?

¹⁷ Kuchi mutuhasa kumona kwoko lia Yehova ku mwono wetu? Tutalenu yilweza yitano. Chitangu, ena muhasa kwivwa ngwenyi Yehova kakukukwasa ha kunyingika umwenemwene. Chamuchiali, ena muhasa kwiwuluka unayi ku kukunguluka cha akwa-Kristu, muwivwa pande, nawa mwamba ngwenyi: “Yino ye te ngunafupu!” Chamuchitatu, kota ena hiunamono chize Yehova akumbulwile chimwe kulemba che. Chamuchiwana, kota ena wazangile kulingila chinji Yehova nawa wamwene chize iye akukwashile hanga ulinge kanawa mulimo we. Chamuchitano, kota hiunatokesa mulimo we mumu te wakumbata mashimbu anji kuhiana waze te wakulingila Yehova, nawa yena wamwene chize Zambi amanunwine chilakenyo chenyi chakwamba ngwo: “Chichi kukuhichika.” (A-Hepreu 13:5) Nyi tuli ni usepa upema ni Yehova, muchihasa kupwa chashi kumona kwoko lienyi ku mwono wetu.

¹⁸ Sara, umwe pangi mu Kenya, yamba ngwenyi: “Nalembele hakutwala kuli umwe longi yoze te nakunyonga ngwami keshi kuzanga kulilongesa Mbimbiliya. Yingwita kuli Yehova nyi natamba kwecha kulilongesa nenyi. Hazehene muze nambile ngwenyi ‘Amene,’ telefone yami yiyisanyika. Longi wacho yasanyika hanga anguhule nyi mahasa kuya ku kukunguluka hamwe ni yami! Ngunakakomoka chinji.” Nyi mututala ku yuma yize Zambi akulinga hali yetu, mutumona kwoko lienyi lia ukwaso. Rhonna, umwe pangi yoze watwama mu Asia yamba ngwenyi, chakutamba mashimbu hanga tumone chize Yehova akutukwasa ku mwono wetu. Aye yawejela nawa ngwenyi: “Nyi walinga chino, yena muunyingika chize iye akutuzanga!”

19. Yika nawa twatamba kulinga mba tumone Zambi?

¹⁹ Yesu kambile ngwenyi waze ‘makamona Zambi’ katamba “kupema mu mbunge” (Mateu 5:8) Yika maliji wano analumbunuka? Kanalumbunuka ngwo twatamba kupwa ni manyonga apema ni kwehuka kulinga yuma yipi. (Tanga 2 A-Korindu 4:2.) Mu mutwe uno, twalilongesa chize mutuhasa kumona Zambi, nawa ni chize twatamba kukolesa usepa wetu ni iye. Mutwe uze muusulaho, mutukalilongesa chize ufulielo muhasa kutukwasa hanga tumone kanawa kwoko lia Yehova ku mwono wetu.