1, 2. Yika yakulingisa atu hanga alise ni tushitu?

 WONGO wa mutu walisa chinji ni wa tushitu. Chakutalilaho, atu kali ni uhashi wa kulilongesa kuhanjika limwe limi. Ha chino, limi liakutukwasa hanga tutange, tusoneke, tuhanjike ni kunyingika yuma yize twakwivwa. Chino nawa chakutwaha uhashi wa kulemba ni kuhalisa Yehova ni miaso. Yuma yeswe ai yatukulingisa hanga tulise ni tushitu. Akwa-ciencia kanyingikene kanawa chize wongo wetu uli ni uhashi wa kulinga yino yuma ya ukomokeso.

² Uhashi wetu wa kuzachisa limi uli chiwape cha kuli Yehova. (Samu 139:14; Usolwelo 4:11) Iye hanatwehe nawa chiwape chikwo chize chakutulingisa hanga tulise ni tushitu. Atu katangile mu ‘chano cha Zambi.’ Tuli ni nyonga lia kusakula chipi ni chipema. Mutuhasa kusakula kuzachisa limi lietu hanga tuwayile Yehova ni kumuhalisa.​—Uputukilo 1:27.

3. Yika yize Yehova hanatwehe hanga yitupwise akwa-mana?

³ Yehova kakutusolwela chize mutumuwayila ni  kumuhalisa mumu hanatwehe Mbimbiliya. Mbimbiliya ya muwundu hanji ya chihanda yili malimi kuhiana 2.800. Muze mutupukuna ha yuma yize Mbimbiliya yinambe, mutuhasa kupwa ni manyonga ngwe a Zambi. (Samu 40:5; 92:5; 139:17) Nawa manyonga ja Yehova kakutwaha mana ni kutusongwela ku mwono wa mutolo.​—Tanga 2 Timoteu 3:14-17.

4. Yika chinalumbunuka kupukuna, nawa yihula yika mutulilongesa?

⁴ Kupukuna chinalumbunuka kulihulikila ha chimwe chuma hanji kunyonga chinji hakutwala ku chuma chacho. (Samu 77:12; Yishima 24:1, 2) Yetu twakuyuka chinji muze twakupukuna ha yuma yize twakulilongesa hakutwala kuli Yehova ni Yesu. (Yoano 17:3) Ha mutwe uno mutukumbulula yihula yino: Kuchi mutuhasa kutanga hanga chipwe chashi kupukuna? Yuma yika mutuhasa kupukuna? Nawa yika yize muyihasa kutukwasa kupukuna mashimbu eswe ni kuchizanga?

5, 6. Yika muyihasa kukukwasa kwiwuluka ni kunyingika kanawa yuma yize utange?

⁵ Shina ena kanda uchimona kama ngwe kuli yimwe yuma yize muhasa kulinga chakuhona kunyonga ha yuma yacho, ngwe kuhwima, kwenda hashi hanji kwenda ha kinga? Ena nawa muhasa kutanga chakuhona kunyonga. Hanji ena muputuka kunyonga ha yuma yikwo muze unatange. Yika watamba kulinga hanga wehuke ndako yacho? Chili chilemu kulihulikila ha yuma yize unatange ni kunyonga ha ulumbunwiso wa yuma yacho. Ha chino, muze muheta kusongo lia paragrafu hanji mutwe ukehe wa umwe mukanda, hwima nawa pukuna wika ha yuma yize watanga. Nyonga ha yuma yize walilongesa, nawa pwako ni shindakenyo ngwe pundu lume wanyingika kanawa yuma yacho.

⁶ Akwa-ciencia hananyingika ngwo chili chashi kwiwuluka chimwe chuma nyi twachitanga ni liji mwilu. Sakatanga wetu, kanachinyingika, kashika ambile kuli Yoshua hanga atange mukanda wa Shimbi ni liji ‘mushi.’ (Tanga Yoshua 1:8.) Kutanga Mbimbiliya ni liji mwilu necho chakukwasa mutu kulihulika ni kwiwuluka kanawa yuma yize anatange.

7. Shimbu lika lipema mutuhasa kupukuna yuma ya mu Mbimbiliya? (Tala chizulie chili hauputukilo.)

⁷ Chakufupiwa kusa tachi jinji mba tupukune ni kulihulikila ha yuma yize tunalilongesa. Kashika chili chipema kupukuna ha shimbu lize kutushi kuhonga ni kupwa ha chihela chize kuheshi zungo nawa haze kuheshi yuma yize muyitupinjisa. Mukwa-kwimba Masamu Ndawichi, kapukunwine muze te analaula ha ufuku shimbu lize te ali muhela. (Samu 63:6) Yesu, yoze te mungunu, kasakwile chihela chalihumikiza hanga apukune nawa alembe.​—Luka 6:12.

8. (a) Yika mutuhasa kupukuna? (b) Kuchi Yehova akwivwa muze twakuhanjika ni akwetu hakutwala kuli iye?

⁸ Kuchingako ku yize twakutanga mu Mbimbiliya, kuli nawa yuma yikwo yize mutuhasa kupukuna. Chakutalilaho, muze mumona chimwe chitangiwa cha ukomokeso cha Yehova, uchihwima nawa achilihule ngwe: ‘Yika chino chinangulongesa hakutwala kuli Yehova?’ Pundu manyonga amutapu au makukwasa kusakwilila Yehova mu yilemba. Nawa nyi muupwa hamwe ni akwenu yena muzanga kushimutwina no manyonga je. (Samu 104:24; Yilinga 14:17) Yehova kakupanjika nawa kakuzanga muze twakupukuna, twakulemba, nawa twakuhanjika kuli akwetu hakutwala kuli iye. Mbimbiliya yinatulweze, “Mukanda wa kwiwuluka kumeso jenyi, wa waze evwilile woma Yehova, nikunyonga ha jina lienyi.”—Malakia 3:16.

9. (a) Yika yize Paulu ambile kuli Timoteu hanga apukune? (b) Yika mutuhasa kupukuna muze tunalilulieka hanga tuye ni kwambujola sango lipema?

⁹ Postolo Paulu kalwezele Timoteu hanga apukune ha chize akuhanjika, ha yitanga yenyi ni ha chize malongeso jenyi matwa kuli akwo.(Tanga 1 Timoteu 4:12-16.)Ni yena muhasa kupukuna ha yuma yino. Chakutalilaho, watamba kupwa ni shimbu hanga upukune muze wakulilulieka hanga usongwele longeso lia Mbimbiliya. Nyonga hali longi we nawa nyonga ha chihula hanji chilweza chize muyimukwasa kusenya kulutwe mu ufulielo.  Muze mulinga chocho, ufulielo we muukola nawa muujama nawa muupwa longeshi mupema wa Mbimbiliya. Nawa muyuka chinji nyi wapukuna shimbu kanda uchiya mu mulimo wa sango lipema.(Tanga Ezera 7:10.)Hanji muhasa kutanga umwe kapitulu mu mukanda wa Yilinga hanga ukukwase kupwa ni hamu mu mulimo wa sango lipema. Muhasa nawa kupukuna ha versu ja mu Mbimbiliya jize walulieka hanga ukazachise ni mikanda yize munyonga hanga ukahane kuli atu. (2 Timoteu 1:6)Nyonga hali atu amu munda we,nawa ni yuma yize muhasa kwamba hanga ayo ayizange. Nyi walilulieka chenacho, mukahasa kuzachisa kanawa Mbimbiliya hanga ukambujole sango lipema kuli akwenu.—1 A-Korindu 2:4.

10. Yuma yikwo yika yipema yize mutuhasa kupukuna?

¹⁰ Yuma yika nawa muhasa kupukuna? Nyi muusonejeka yimwe ha pande ja mbunga, ku kukunguluka cha mambonge, fupa shimbu hanga uyihengule. Nyi wachilinga, lihule ngwe, ‘Yika nalilongesa mu Liji lia Zambi hakutwala ku ululikiso wenyi?’ Ena nawa muhasa kupukuna ha sango jize jakwiza ha Kaposhi ni Despertai! ni ha mikanda yize akutuhwisa ha kukunguluka cha mambonge. Muze mutanga chilweza cha umwe ndumbu mu Anúario, hwima hanga unyonge ha chilweza chacho, nawa echa hanga chikuhete ku mbunge. Muze mutanga mikanda yetu, ena muhasa kufunjika manyonga waze alemu hanji kusonejeka kusesa lia lifwo. Chino muchikakukwasa muze mulilulieka ha kuya kuli longi, kuya ni kumeneka umwe ndumbu hanji kuhanjika jimwe pande. Chuma chilemu chili chino, muze mumana hanga upukune ha yuma yize watanga, yena uneche hanga yuma yacho yihete ku mbunge ye ni kupwa ni shimbu lia kulemba hanga usakwilile Yehova ha yuma yipema yize walilongesa.

11. Mikanda yilemu yika yize twatamba kupukuna, nawa nyi twachilinga kuchi muyitukwasa? (Tala nawa utowezo mushi.)

¹¹ Chochene, Mbimbiliya yili mukanda ulemu uze mutuhasa kutanga ni kupukuna. Alioze nyi limwe tangwa makukanjisa kupwa ni Mbimbiliya? a Niumwe mahasa kukukinda kupukuna ha yuma yize ulinayo mu manyonga, ngwe yisoneko hanji miaso ya Wanangana yize wakuzanga chinji wa kwihi. (Yilinga 16:25) Nawa spiritu ya Zambi muyikakukwasa kwiwulula yuma yize hiunalilongesa, yino muyikakukwasa hanga ununge ni kushishika.​—Yoano 14:26.

12. Kuchi muhasa kutesa umwe katalilo wa kutanga Mbimbiliya matangwa eswe?

¹² Kuchi muhasa kutesa umwe  katalilo wa kutanga Mbimbiliya matangwa eswe? Ha amwe matangwa ha poso, yena kota muhasa kutanga ni kupukuna ha Mbimbiliya, ha kukaula katalilo wa ku Shikola ya Milimo ya Zambi ha poso jeswe. Ha matangwa akwo muhasa kutanga Evangelu ya Mateu, Marku, Luka, ni Yoano ni kupukuna ha yize Yesu ambile nawa alingile. (A-Roma 10:17; A-Hepreu 12:2; 1 Petulu 2:21) Tukwete nawa mukanda uze wakulumbununa sango ja mwono wa Yesu kulita ni chize yuma yacho yalingiwile. Mukanda wacho muuhasa kukukwasa kuyuka chinji ha kutanga Evangelu.​—Yoano 14:6.

13, 14. Mumu liaka chili ni ulemu kuli yetu kununga ni kupukuna hali Yehova ni Yesu, nawa yika muyikatukwasa kuchilinga?

¹³ Kupukuna hali Yehova ni Yesu muchihasa kutukwasa hanga tupwe akwa-Kristu waze ajama ni kununga ni kukola ku spiritu. (A-Hepreu 5:14; 6:1) Mutu yoze unase shimbu likehe ha kunyonga hakutwala kuli Yehova hakehe-hakehe mahasa kutokesa usepa wenyi ni Yehova hanji kumwehuka. (A-Hepreu 2:1; 3:12) Yesu katowezele ngwo nyi kutwevwile hanji twatayijile, Liji lia Zambi ni “mbunge jipema” etu tuchi ‘kema mbuto.’ Ha chino, muchihasa kupwa chashi kupwa ni “yipikalo ni upite ni kuwaha cha mwono uno.”​—Luka 8:14, 15.

¹⁴ Kashika tunungenu ni kupukuna ha Mbimbiliya hanga tunyingike kanawa Yehova. Chino muchitukwasa hanga twimbulule yitanga ni utu wa Yehova. (2 A-Korindu 3:18) Mutuhasa kununga ni kulilongesa chinji hakutwala kuli Tata yetu wa mu malilu ni kumwimbulula ku miaka yeswe. Chino, chili uhenya unene!​—Chilumbununyi 3:11.

15, 16. (a) Kuchi mutuhasa kuyuka ha kupukuna hali Yehova ni Yesu? (b) Mumu liaka ha mashimbu amwe muchihasa kupwa chikalu kupukuna, alioze mumu liaka twatamba kununga ni kupukuna?

¹⁵ Kupukuna hali Yehova ni Yesu muchitukwasa hanga tuzange umwenemwene. Zango lietu mulikolweza mandumbu jetu ni atu waze twakuwana mu munda. Nawa muze mutupukuna ha chitapo cha Yesu chize Yehova hanatululiekela, etu mutununga ni kulemesa usepa wetu ni Zambi. (A-Roma 3:24; Tiangu 4:8) Mark, umwe ndumbu mu África do Sul yoze unakalinga miaka yitatu mu zuwo lia ususu ha mukunda wa ufulielo wenyi yamba ngwenyi: “Kupukuna muchihasa kupwa kutesa ni chimwe kuheha chipema chinji. Nyi mutupukuna chinji ha yuma ya ku spiritu, mutuwana yuma yaha yinji hakutwala kuli Zambi yetu Yehova. Ha mashimbu amwe muze nakuhonga mu mbunge hanji nguli ni yipikalo hakutwala kulutwe lia matangwa, ami nakwanda Mbimbiliya hanga ngupukune ha chimwe Chisoneko. Ngunanyingika ngwami, chino chakungukwasa chinji kuhwima mbunge.”

 ¹⁶ Mwono ha matangwa wano uli wa to ni yuma yize yakutulalwisa, kashika chili chikalu chinji kuwana shimbu ya kupukuna mu Mbimbiliya. Patrick, umwe ndumbu wa mu África, yamba ngwenyi: “Mbunge yami yili ngwe yimwe kasha ya mesage yazala to ni sango jeka ni jeka, sango jalita ni jize kujalitele, jize natamba kukwata chiyulo ha tangwa ni tangwa. Muze nakuhengula mbunge yami ha mashimbu anji nakuwanamo ‘manyonga akulipikala,’ ha chino, nakwita chitangu kuli Yehova hanga ngupwe ni mbunge yipema, muze kanda nguchiputuka kupukuna. Chipwe ngwe, kulinga chino muchihasa kumbata mashimbu anji, muze kanda nguchiputuka kupukuna ha yuma ya ku spiritu, nakwivwa ngwami ngunakundama kuli Yehova. Chino chakululieka mbunge yami hanga ngunyingike kanawa umwenemwene.” (Samu 94:19) Chochene, twakuyuka mu majila anji muze mututanga ni kupukuna mu Mbimbiliya mashimbu eswe.​—Yilinga 17:11.

17. Kuchi yena wakuwana mashimbu hanga upukune?

¹⁷ Amwe kakuhinduka chimene-mene hanga atange, apukune nawa alembe. Akwo, kakuchilinga ha mashimbu waze akuhwima hanga alie. Kota yena mashimbu apema akutanga Mbimbiliya kali ufuku hanji muze kanda uchiya ha muhela. Amwe kakuzanga kutanga Mbimbiliya ha chimene, ni ha ufuku muze kanda achiya ni kupomba. (Yoshua 1:8) Chuma chilemu chili, ‘kuzachisa ni mana mashimbu jetu,’ chino chinalumbunuka kuzachisa mashimbu a yuma yize kuyishi ni ulemu hanga tupukune ha Liji lia Zambi matangwa eswe.​—A-Efwesu 5:15, 16.

18. Yika Mbimbiliya yinalakenya kuli waze akupukuna ha Liji lia Zambi matangwa eswe, nawa ni kuli waze akukaula yuma yize analilongesa?

¹⁸ Mbimbiliya yinalakenya ngwo Yehova makawahisa atu eswe waze akupukuna ha Liji lienyi ni waze akusa tachi hanga akaule yuma yize analilongesa. (Tanga Samu 1:1-3.) Yesu yamba ngwenyi: “Kawaha waze akwivwa liji lia Zambi nikulifunga!” (Luka 11:28) Alioze chikuma chilemu chili, nyi mutupukuna ha Liji lia Zambi matangwa eswe muchitukwasa hanga tulinge yuma yize muyineha uhenya kuli Zambi. Nyi twachilinga, Yehova matuwahisa ni chiseke haliapwila ni kutwaha mwono wa mutolo mu paraisu.​—Tiangu 1:25; Usolwelo 1:3.