1. Kuchi ufulielo uli ni ulemu unji? (Tala chizulie chili hauputukilo.)

 HIUNALIHULA kama ngwenyi, ‘Shina Yehova makangulamwina ha mashimbu a luyinda munene?’ Postolo Paulu kambile ngwenyi, muhuko ulemu chinji uze twatamba kupwa nawo hanga atulamwine uli ufulielo. Ha kwamba ngwenyi: ‘Mutu keshi kuhasa kupemena kuli Zambi nyi keshi ni ufulielo.’ (A-Hepreu 11:6) Maliji wano mahasa kusoloka ngwe keshi ni ulemu, alioze kwamba umwenemwene atu “anji kafulielele.” (2 A-Tesalonika 3:2) Yisoneko yino yaali yinatukwase kunyingika ulemu wa kukolesa ufulielo wetu.

2, 3. (a) Mumu liaka ufulielo wetu uli ni ulemu? (b) Yika mutulilongesa haliapwila?

² Postolo Petulu kambile hakutwala ku “kweseka cha ufulielo.” (Tanga 1 Petulu 1:7.) Luyinda munene ha kundama kulu, kashika tunazange kupwa “akwa kufuliela ha ulamwino wa mwono.” (A-Hepreu 10:39) Ha chino, twatamba kusa tachi hanga tukolese ufulielo wetu. Tunazange kupwa ha kachi ka atu waze makalamwina muze Yesu Kristu, Mwanangana wetu meza. Kashika, chizechene ngwe lunga yoze wetele kuli Yesu hanga amuwejele ufulielo, ni yetu twambenu ngwetu: “Kwasenu kama chize chinahono ku ufulielo” wetu! (Marku 9:24) Hanji mutuhasa kupwa ngwe apostolo, ha kwamba nawa ngwetu: “Weza kama ufulielo wetu!”​—Luka 17:5.

 ³ Mu mutwe uno, mutulilongesa yikuma yino: Kuchi mutuhasa kukolesa ufulielo wetu, kuchi mutuhasa kusolola ngwetu ufulielo wetu unakolo, nawa mumu liaka mutuhasa kupwa ni ushindakenyo ngwetu Zambi matukumbulula nyi twamwita hanga atuwejele ufulielo.

4. Yilweza yika muyihasa kukolesa ufulielo wetu?

⁴ Amu ufulielo uli ni ulemu unji, Yehova kakutwaha yilweza yinji ya ufulielo mu Mbimbiliya. Yino “yasonewene mukutufumba yetu.” (A-Roma 15:4) Yilweza ya Apalahama, Serai, Izake, Yakomba, Mose, Rahape, Ngideone, Mbarake, ni ya atu akwo nawa anji muyihasa kukolesa ufulielo wetu. (A-Hepreu 11:32-35) Tuli nawa ni yilweza yipema ya ufulielo wa mandumbu ni mapangi jetu musono. a

5. Kuchi Eliya asolwele ngwo te kakwete ufulielo ukolo muli Yehova, nawa yika twatamba kulihula?

⁵ Chilweza chimwe cha mu Mbimbiliya chili cha profeta Eliya. Nyi twapukuna ha chilweza chenyi, mutuwanaho yikuma yitano, ha chikuma ni chikuma aye kasolwele ufulielo wenyi kuli Yehova. (1) Muze Eliya ahanjikile ni Mwanangana Ahabe ngwo, Yehova te kumaneha changa, aye ni ushindakenyo weswe yamba ngwenyi: “Ni mwono wa Yehova ya Izalele yoze nakumana kumeso jenyi, kukuchi kapwa mume hanji vula ha miaka yino.” (1 Mianangana 17:1) (2) Eliya kafulielele ngwenyi, Yehova te mahana kuli iye ni kuli atu akwo yuma yize te mafupa ha shimbu lia changa. (1 Mianangana 17:4, 5, 13, 14) (3) Eliya nawa kapwile ni ushindakenyo ngwenyi Yehova te mahindwisa mwana wa tuliwa. (1 Mianangana 17:21) (4) Iye kakayambashanyine ngwenyi kahia ka Yehova te kechi kwocha chitapo chenyi ha Mulundu wa Karmela. (1 Mianangana 18:24, 37) (5) Chipwe muze te kanda ku chisotoka chipwe musoto wa vula, nihindu Eliya yahanjika ni ujikijilo weswe kuli Ahabe ngwenyi: “Kanduka uye ukalie, ukanwe, mumu chinumo chiliko cha vula munji.” (1 Mianangana 18:41) Amu hitwahengula yilweza yino, mutuhasa kulihula ngwetu, ‘Shina ufulielo wami uli ukolo ngwe wa Eliya?’

6. Yika twatamba kwita kuli Yehova hanga tukolese ufulielo wetu?

⁶ Amu kutushi ni ndundo ja kukolesa ufulielo yetwene, kashika twatamba kwita spiritu yisandu ya Zambi. Mumu liaka? Mumu ufulielo uli muhuko wa ku spiritu. (A-Ngalishia 5:22) Mutupwa akwa-mana nyi twakaula chiyulo cha Yesu hanga twite spritu yisandu. Yesu yalakenya ngwenyi Yehova makahana ‘spiritu yisandu kuli waze mamwita.’​—Luka 11:13.

7. Lumbununa chize mutuhasa kukolesa ufulielo wetu?

 ⁷ Nyi twapwa ni ufulielo unji muli Zambi, twatamba kuufunga. Mutuhasa kutesa ufulielo ni kahia. Nyi twawika kahia, ku uputukilo mulengi muhasa kupwa unji. Alioze, nyi kutwawezeleho kunyi, kahia mukajima ni kusalaho wika uto. Alioze nyi twawezelaho kunyi mashimbu eswe, kahia kechi kujima. Ni ufulielo wetu che wapwa. Nyi twanunga ni kutanga ni kulilongesa Liji lia Zambi matangwa eswe, zango lietu mu Mbimbiliya ni kuli Yehova mulioka. Ha chino, mutukolesa ufulielo wetu ni kuufunga.

8. Yika nawa muyihasa kutukwasa kukolesa ni kufunga ufulielo wetu?

⁸ Kanda tuwahilila wika ni yuma yize twalilongesele muze te kanda achitupapachisa. (A-Hepreu 6:1, 2) Chakutalilaho, ha kulilongesa uprofeto wa mu Mbimbiliya uze hi unamanunuka kulu. Chino muchitukwasa kukolesa ni kufunga ufulielo wetu. Mutuhasa kuzachisa nawa Liji lia Zambi hanga tumone ni ufulielo wetu unajikiza.​—Tanga Tiangu 1:25; 2:24, 26.

9, 10. Kuchi ufulielo wetu wakukola (a) ni masepa apema? (b) ha ku kukunguluka? (c) ha kwambujola sango lipema?

⁹ Postolo Paulu kambile ngwenyi, akwa-Kristu mahasa ‘kuliwahisa ku ufulielo wa akwo.’ (A-Roma 1:12) Yika chino chinalumbunuka? Nyi twapalikisa mashimbu ni mandumbu jetu mutuhasa kukolesa ufulielo wa umwe ni mukwo. Chino chakupwa chipema chinji chipi-chipi nyi twapalikisa mashimbu ni mandumbu waze akumona ‘yeseko’ mu ufulielo wo. (Tiangu 1:3) Masepa api kakupihisa ufulielo wetu, alioze masepa apema kakukolesa ufulielo. (1 A-Korindu 15:33) Kashika, akutukolweza hanga tuye ku kukunguluka mashimbu eswe. Ku kukunguluka mutuhasa kutambula ‘utakamiso kuli umwe ni mukwo.’ (Tanga A-Hepreu 10:24, 25.) Chikwo nawa, fumbo twakutambula ku kukunguluka liakutakamisa ufulielo wetu. Mbimbiliya yakwamba ngwo, “ufulielo kuuneza ha kwivwa sango.” (A-Roma 10:17) Kashika achilihule ngwenyi, ‘Shina kukunguluka chili ni ulemu unji ku mwono wami nyi?’

¹⁰ Yetu nawa twakukolesa ufulielo wetu muze twakwambujola ni kulongesa akwetu hakutwala ku sango lipema lia mu Mbimbiliya. Chizechene ngwe akwa-Kristu aku sekulu yitangu, twakulilongesa kufuliela muli Yehova ni kuhanjika ni hamu lieswe ha mashimbu eswawo.​—Yilinga 4:17-20; 13:46.

11. Mumu liaka Kalemba ni Yoshua apwile ni ufulielo ukolo, nawa kuchi mutuhasa kupwa ngwe ayo?

¹¹ Ufulielo wetu muli Yehova wakukola muze twakumona chize iye akutukwasa ni chize akukumbulula kulemba chetu. Chino chalingiwile kuli Kalemba ni Yoshua. O kasolwele ufulielo muli Yehova muze aatumine ni kwendesa Chifuchi cha Chilakenyo. Ha kupalika cha mashimbu, ufulielo wo yiukola chinji, ha shimbu lieswe o kapwile ni kumona chize Yehova te akwaakwasa. Yoshua ni ufulielo weswe yalweza A-Izalele ngwenyi: “Nichimwe chuma kuchahonene cha yuma yize yeswe yipema Yehova Zambi yenu hanulakenya hakutwala kuli yenu.” Iye yamba nawa ngwenyi: “Kashika vwilenu woma Yehova haliapwila, numulingile ni mbunge yimuwika ni kushishika.” Yamba nawa ngwenyi, “alioze hakutwala kuli yami ni  akwa zuwo liami etu mutulingila Yehova.” (Yoshua 23:14; 24:14, 15) Nyi mutufuliela muli Yehova ni kumona chize iye akukwasa mutu ni mutu, ufulielo wetu muukola chinji.​—Samu 34:8.

12. Kuchi mutuhasa kusolola ngwetu tukwete ufulielo ukolo?

¹² Kuchi mutuhasa kusolola ngwetu tuli ni ufulielo ukolo? Kambaji Tiangu yamba ngwenyi: “Ku yitanga yami mungukulweza ufulielo wami.” (Tiangu 2:18) Yitanga yetu yakusolola nyi tuli ni ufulielo ukolo. Tutalenu kuchi chakulingiwa.

13. Kuchi twakusolola ufulielo wetu muze twakwambujola sango lipema?

¹³ Mulimo wa kwambujola sango lipema uli yimwe jila yipema yakusolwelamo ufulielo wetu. Mumu liaka? Mumu muze twakwambujola sango lipema, twakusolola ngwetu songo hiliakundama, nawa ngwetu ‘kulichi kahona!’ (Habakuke 2:3) Mba tunyingike nyi ufulielo wetu ukolo, tulihulenu ngwetu: ‘Shina mulimo wa kwambujola sango lipema uli ulemu chinji kuli yami nyi? Shina ngunase tachi jeswe hanga ngwambujole kuli akwetu hakutwala kuli Yehova? Shina nakufupa-fupa uhashi ukwo hanga ngukalakale chinji mu mulimo wa Yehova? (2 A-Korindu 13:5) Tusololenu ufulielo wetu ukolo ha ‘kwambujola sango ja ulamwino,’ chino mutuchilinga ha kwambujola sango lipema.​—Tanga A-Roma 10:10.

14, 15. (a) Kuchi mutuhasa kusolola ufulielo ku mwono wetu ha tangwa ni tangwa? (b) Shimutwinenu chimwe chilweza chize chinasolola ufulielo ukolo mu yitanga.

¹⁴ Yetu nawa twakusolola  ufulielo wetu muli Yehova muze twakupalika mu yeseko ku mwono wetu. Muze tuli ni yikola, yinyengo, kuhonga mu mbunge, uswale, hanji mulonga weswao, twatamba kufuliela ngwetu, Yehova ni Yesu makatukwasa “ha mwaka wa chikala.” (A-Hepreu 4:16) Mutusolola ngwetu, twakufuliela muli Yehova muze mutumwita ukwaso. Yesu kambile ngwenyi, mutuhasa kwita kuli Yehova hanga atwehe “tangwa ha tangwa mbolo yetu yize twakufupa.” (Luka 11:3) Mbimbiliya yinasolola ngwo Yehova mahasa kutwaha yuma yeswe yize mutufupa. Chakutalilaho, ha mashimbu a changa chinene chize chapwile mu Izalele, Yehova kahanyine kulia ni meya kuli Eliya. Mbimbiliya yinambe ngwo: “Yikwakwalo yamunehena mbolo ni yifwo ha chimene, ni mbolo ni yifwo ha chingoloshi, yanwina meya ku chitwetwe.” (1 Mianangana 17:3-6) Ngwe Eliya, ni yetu twatamba kufuliela ngwetu Yehova mahasa kutwaha yize tunafupu.

¹⁵ Tuli ni ushindakenyo ngwetu, nyi twatwama nikulita ni shimbi ja mu Mbimbiliya, mutuhasa kuwana ukwaso wa kufunga nawo usoko wetu. Rebecca umwe pangi mu Ásia yoze uli ku ulo, yalumbununa chize iye ni usoko wenyi akutwama nikulita ni shimbi jize jili mu mukanda wa Mateu 6:33 ni Yishima 10:4. Iye yamba ngwenyi, lunga lienyi kamwene ngwenyi, mulimo wenyi wapwile ni kupihisa usepa wenyi ni Yehova.  Ha chino, mukwo-lunga yecha mulimo wacho. Alioze ayo kapwile ni ana awana, kashika yaputuka kulanjisa kulia hanga aalele. Ha mukunda wa kuhondangana cho ayo te keshi kuhona mbongo ja kukwasa najo usoko wo. Iye yamba ngwenyi: Yetu yitumona ngwetu Yehova katuvulamine. Yetu te kutushi kupomba ni zala. Shina ni yena hi unamono kama yuma yino ku mwono we?

16. Yika muyilingiwa nyi twafuliela muli Zambi?

¹⁶ Kanda tukeza kahangulula ngwetu, Yehova kechi kutukwasa nyi twakaula shimbi jenyi. Paulu kavulukile maliji ja Habakuke hakwamba ngwenyi: “Mukwa ululi kumapwa ni mwono ku ufulielo.” (A-Ngalishia 3:11; Habakuke 2:4) Kashika twatamba kupwa ni ufulielo ukolo kuli Yoze mahasa kutukwasa. Paulu kanatwiwulwisa ngwo Zambi kali “yoze mahasa kulinga kuhiana chikolo cheswe mutwita, hanji chize mutunyonga, nikulita ni tachi jize jakulinga muli yetu.” (A-Efwesu 3:20) Tuvumbi a Yehova kakusa tachi jinji hanga alinge upale wenyi, alioze ayo kananyingika ngwo keshi ndundo ja kulinga yuma yeswe. Tunasakwilila chinji chize Zambi ali ni yetu ni kuwahisa tachi jetu jeswe.

17. (a) Kuchi Yesu akumbulwile apostolo? (b) Mumu liaka mutuhasa kushimbwila ngwetu Yehova makumbulula kwita chetu cha ufulielo?

¹⁷ Kulita ni yize hitwalilongesa kulu, mutuhasa kwivwa ngwe chize evwile apostolo muze etele kuli Yesu ngwo: “Weza kama ku ufulielo wetu!” (Luka 17:5) Yesu kakumbulwile ni zango lieswe tumbaji twenyi ha Pentekoste ha mwaka 33, muze ayo atambwile spiritu yisandu nawa yahasa kunyingika kanawa upale wa Zambi. Chino chakolesele ufulielo wo. Yika yalingiwile? Ayo yaputuka mulimo unene wa kwambujola sango lipema ha shimbu liacho. (A-Kolosu 1:23) Shina mutuhasa kushimbwila hanga akumbulule kwita chetu cha ufulielo? Yehova kanatulakenya ngwo, nyi tweta “chuma chimwe cha kulita ni upale wenyi” iye matwaha.​—1 Yoano 5:14.

18. Kuchi Yehova akuwahisa waze akukolesa ufulielo wo?

¹⁸ Nyi twajikijila muli Yehova iye matuzanga chinji. Iye makumbulula kwita chetu cha ufulielo unji, nawa ufulielo wetu muukola chinji, hanga “akatunyonge akwa kutela Wanangana wa Zambi.”​—2 A-Tesalonika 1:3, 5.