Chitangu tala chikuma chino chilemu: Zambi kakumona lamba lize linasoloka hano hashi, nawa iye kanazange kulihwisa. (Samu 72:13, 14) Mu Liji lienyi Mbimbiliya, iye kanalakenya ngwenyi yenu eswe “nunamono lamba nukahwime hamwe ni yetu.” Tangwa lika? “Ha usolwelo wa Mwene Yesu mwilu hamwe ni angelo jenyi a tachi mu kahia ka kulekwoka, akakale milonga ya waze kanyingikine Zambi, ni waze keshi kwononoka ku Sango Lipema lia Mwene wetu Yesu.” (2 A-Tesalonika 1:7, 8) Usolwelo uno wa Yesu, muukalingiwa kulutwe lia matangwa, ngwe chize Mbimbiliya yinambe mu “jita ya tangwa linene lia Zambi Mukwa-Ndundo-Jeswe,” yize avuluka nawa ngwo Armagedone.—Usolwelo 16:14, 16.

Jita yacho ya kulutwe lia matangwa, Zambi kechi kazachisa atu, alioze Mwanenyi, Yesu Kristu, ni yitangiwa yikwo ya ku spiritu ya ndundo hanga akase jita ni akwa-kole. Angelo makanongesa yuma yeswe yipi hano hashi.—Izaia 11:4; Usolwelo 19:11-16.

Ni musono nyonga lia Zambi hakutwala ku jita kulialumukine. Nihindu uchili ni nyonga lialita hakutwala ku jita hanga anehe songo lia yuma yipi. Alioze ngwe chize sango jinasolola, Zambi wika mwe ukwete ulite wakutayiza tangwa lize jita muyilingiwa ni waze mayasa. Ngwe chize twamona, Zambi hanatesa kulu shimbu lize Mwanenyi Yesu Kristu makasa jita, yize muyikahwisa upi ni kukalila atu waze akumona lamba. Chino chinalumbunuka ngwo jita jize  jinalingiwa musono hano hashi kujishi ni utayizo wa Zambi, chipwe ngwe jita jacho jili ni yitela yeswayo nihindu kujishi ni utayizo wa Zambi.

Chakutalilaho: Achinyonga, mwakwo ni yayo maputuka kulilamba muze tato keshi ku zuwo. Ha mashimbu akehe, o mecha kulilamba, mba hi ayo masanyika tato ku telefone. Umwe mamba ngwenyi, mukwo mwe waputukanga mbwanja, mukwo mamba ngwenyi, kamutukanga. Ayo eswe malikalila kuli tato ni kushimbwila ukwaso. Ha chino, muze tato maapanjika, aye malweza hanga eche kuzwela ni kumushimbwila muze mafuna ku zuwo. Muze ana jacho anashimbwila, susumuku, maputuka kulilamba nawa. Muze tato maheta ku zuwo, aye kechi kukwasa mwana umuwika, alioze maalamba eswe aali mumu kamwononokene.

Musono yifuchi yize yili mujita, kanji-kanji yakwita ukwaso kuli Zambi. Alioze Iye keshi kukwasa jita jize jakulingiwa musono hano hashi. Mumu, mu Liji lienyi Mbimbiliya, iye kanambe ngwenyi: “Kanda nufwetesa niumwe yipi ha yipi,” nawa “kanda nulikalila milonga yenwene.” (A-Roma 12:17, 19) Iye nawa hanalweza atu ngwenyi katamba ‘kutwaminyina ni uhumikizo’ ndo muze makahwisa lamba kupalikila ku jita ya Armagedone. (Samu 37:7) Amu akwa-mavungu keshi kuhasa kushimbwila kuli Zambi hanga ahwise lamba, chakuhona kuya ni kwasa jita, yino Zambi kakuyimona ngwe yitanga ya kulizata yize aye keshi kuzanga. Ha chino, mu jita ya Armagedone, Zambi makasolola uli wenyi ni kulimika ni akwa-mavungu eswe ha shimbu liacho hanga akahwise “jita ndo kusongo lia hashi.” (Samu 46:9; Izaia 34:2) Kashika, Armagedone muyikapwa jita yize muyikahwisa jita jeswe.

Kuhwa cha jita chili chimwe chiwape cha Wanangana wa Zambi. Yesu kanakamba hakutwala ku unguvulu wacho ha kulemba ngwenyi: “Wanangana wenu wize. Upale wenu ulingiwe hashi chizechene ngwe unalingiwa mwilu.” (Mateu 6:10) Wanangana wa Zambi kuuchi kahwisa wika jita jeswe, alioze muukahwisa chishina chacho ni ungulungulu. * (Samu 37:9, 10, 14, 15) Hi kukomoka ko, kunyingika ngwo tumbaji twa Yesu kakushimbwila yiwape ya mu Wanangana wa Zambi.—2 Petulu 3:13.

Mashimbu angahi twatamba kushimbwila Wanangana wa Zambi hanga uhwise lamba, yinyengo ni ungulungulu? Kumanunuka cha uprofeto wa mu Mbimbiliya unasolola ngwo tuli “ha matangwa a kusula” cha yuma ya mwakono. (2 Timoteu 3:1-5) * Kwasala hakehe, hanga Wanangana wa Zambi uhwise yuma yeswe yipi yino ku jita ya Armagedone.

Ngwe chize twevwa ku uputukilo, waze makafwa ku jita ya kasula kali waze akulituna “kwononoka ku Sango Lipema lia Mwene wetu Yesu.” (2 A-Tesalonika 1:8) Alioze twiwulukenu ngwetu, Zambi keshi kuwahilila ni kufwa cha mutu niumwe, chipwe kufwa cha chingulungulu. (Ezekiele 33:11) Mumu “kazangile niumwe kutoka” ku jita ya kasula, iye kanazange hanga sango lipema lia Mwene Yesu lipwe “kwambujola mu yifuchi yeswe ya hashi mukukapwa shindakenyo ku mavungu eswe” shimbu songo kanda lichiza. (2 Petulu 3:8, 9; Mateu 24:14; 1 Timoteu 2:3, 4) Musono, mulimo wa kwambujola sango lipema hashi heswe unakwase atu hanga apwe ni uhashi wa kunyingika Zambi, hanga ononokene ku sango lipema hakutwala kuli Yesu ni kutwama hanga akamone mashimbu waze jita kuyichi kapwa ko nawa.