MALONGESO A CHIFUKILO | KUCHI ZAMBI AKUNYONGA HAKUTWALA KU JITA?
Chize Zambi Apwile ni Kunyonga ha Jita mu Sekulu Yitangu
KU SEKULU YITANGU A-Izalele kapwile ni kwamwesa lamba. Ngwe tulamba two, A-Yunda ku sekulu yitangu kapwile ni kulemba kuli Zambi hanga alamwine ku lamba lize te nguvulu wa A-Roma akwaamwesa. Mba hi o yevwa sango hakutwala kuli Yesu, yoze amwe apwile ni kunyonga ngwo kali Mesaya chilamwina, yoze alakenyene. Kashika, hi kukomoka ko ngwo, atu anji apwile ‘nikutalatala ngwo hanji iye mwe makuula A-Izalele’ ku moko lia A-Roma. (Luka 24:21) Chino kuchakalingiwile. Alioze, ha mwaka 70 M.J., chizavu cha maswalale A-Roma yichinongesa Yerusaleme hamwe ni tembele yamo.
Yika yalingiwileko? Mumu liaka Zambi kakakwashile A-Yunda hanga ase jita, ngwe chize alingile ku shakulu? Nawa mumu liaka Zambi kakaatayijile hanga o ase jita ni kulipulwila ha lamba lize apwile ni kumona? Shina nyonga lia Zambi hakutwala ku jita lialumukine? Ka. Alioze, kuli chuma chimwe chize chalumukine hakutwala kuli A-Yunda. Ayo kakatayijile Mwana wa Zambi, Yesu ngwo iye te mwe Mesaya. (Yilinga 2:36) Ha chino, vungu lia Izalele litokesa usepa wo upema ni Zambi.—Mateu 23:37, 38.
Vungu lia A-Yunda ni Chifuchi cho cha Chilakenyo te kuchishi nawa ni ukwaso wa Zambi, nawa A-Yunda te kechi kuhasa kwasa jita ni utayizo wa Zambi chipwe kutambula ukwaso wenyi. Ngwe chize Yesu ambile, yiwape, ni ukwaso uze Zambi apwile nikuhna hali vungu lia A-Izalele kauchijile ni kuyihana ku vungu liaha lia ku spiritu, lize anavuluka mu Mbimbiliya ngwo “A-Izalele a Zambi.” (A-Ngalishia 6:16; Mateu 21:43) Akwa-Kristu akuwayisa, kasolwele yitanga yize yakwashile kupwa A-Izalele aku spritu a Zambi. Ku sekulu yitangu o kalwezele ngwo: “Haliapwila nuli atu a Zambi.”—1 Petulu 2:9, 10.
Chize muze akwa-Kristu aku sekulu yitangu apwile “atu a Zambi,” shina Zambi kakwashile kwasa jita hanga aapulwile ku moko ja A-Roma? Nyi hanji Zambi kaatayijile hanga ayo aye ni kwasa jita ni akwa-kole jo? Ka, Zambi kakalingile chocho. Mumu liaka? Hakutwala ku jita yize Zambi akutayiza, iye mwene, mwe wakusakula tangwa lize jita yacho muyilingiwa, ngwe chize twamona ha mutwe uze wahwa. Zambi kakashile jita hanga apulwile akwa-Kristu aku sekulu yitangu, chipwe kwatuma hanga aye ni kwasa jita. Chino chinasolola pundu ngwo, sekulu yitangu yakapwile shimbu ya Zambi kwasa jita ni akwa-kole jenyi.
Chizechene ngwe tuvumbi twa Zambi akushakulu, ni akwa-Kristu aku sekulu yitangu kapwile ni kushimbwila shimbu lize Zambi makahwisa yuma yeswe yipi. Nawa Zambi kakatayijile hanga ayo ene ase jita ni akwa-kole jo. Yesu Kristu kalumbunwine kanawa chikuma chino ha malongeso jenyi. Chakutalilaho, Yesu kakalongesele tumbaji twenyi hanga aye ni kwasa jita, alioze aye yaalweza ngwenyi: “Zangenu akwa kole jenu, lembenu hali waze akunusaula ni waze akunuhungumiona.” (Mateu 5:44) Ha chino, Yesu yalweza tumbaji twenyi hanga achine kutwama mu Yerusaleme chipwe kwasa jita, muze te mayinongesa kuli A-Roma ku sekulu yitangu, che ayo alingile.—Luka 21:20, 21.
Nawa ni ukwaso wa Yehova apostolo Paulu yasoneka ngwenyi: “Kanda nulikalila milonga yenwene, . . . mumu chinasonewa ngwo, Kukala mulonga chili kuli yami; yami kumungukafwetesa, chocho anambe Mwene.” (A-Roma 12:19) Paulu kavulukile maliji waze ene Zambi ambile mu mukanda wa Ulevi 19:18; ni Shimbi Yamuchiali 32:35. Ngwe chize twamona ha mutwe uze wapalika, Zambi te kakukalila atu jenyi ha kwakwasa hanga ase jita ni akwa-kole jo. Maliji wano a Paulu, kanasolola ngwo nyonga lia Zambi hakutwala ku jita kulialumukine. Ku sekulu yitangu, Zambi nihindu te kakumona jita ngwe yimwe jila yalita yakupulwilamo tuvumbi twenyi, nawa ni kuhwishilamo upi. Kashika, Zambi wika mwe wapwile ni kusakula tangwa lize jita muyilingiwa ni waze te mayasa.
Pundu lume, Zambi kakechele hanga akwa-Kristu aku sekulu yitangu ase jita. Mba musono? Shina musono Zambi kakutuma chimwe chizavu cha atu hanga chase jita? Nyi wano e mashimbu alita waze Zambi atamba kwasa jita ha mukunda wa tuvumbi twenyi? Kuchi Zambi akunyonga hakutwala ku jita musono? Mutwe wa kusula muukumbulula chihula chino.
