MALONGESO A CHIFUKILO
Kuchi Zambi Akunyonga Hakutwala Ku Jita?
Kuchi yena muhasa kukumbulula chihula achi? Atu anji kakunyonga ngwo Zambi kakutayiza jita. Ayo kakwamba ngwo, Zambi katumine amwe tuvumbi twenyi aku mashimbu akunyima hanga aye ni kwasa jita, Mbimbiliya che yinasolola. Mba atu akwo, kakwamba ngwo Mwana wa Zambi, Yesu, kalongesele tumbaji twenyi ngwenyi, o katamba kuzanga akwa-kole jo. (Mateu 5:43, 44) Kashika ha mukanda wa yino, ayo kakunyonga ngwo, musono Zambi hanalumuna manyonga jenyi hakutwala ku jita, ngwo iye keshi kuyitayiza.
Mba yena kuchi wakunyonga? Shina Zambi kakutayiza jita nyi? Nyi chenacho, shina iye kakukwasa jita yize atu akulinga musono nyi? Kunyingika kumbululo lia yihula ai, muchihasa kukukwasa ha chize yena wakunyonga hakutwala ku jita. Chakutalilaho, nyi munyingika ngwo Zambi keshi kutayiza wika jita, alioze iye nawa kakukwasa sali lize yena uli, kota yena mwivwa kuwaha chinji hakutwala ku chikuma chacho ni kupwa ni ushindakenyo ngwo sali lie mulikumba. Alioze kuchi te mwivwa nyi munyingika ngwo Zambi kakukwasa nawa sali lieka? Nyi chocho, kota yena mwalumuna manyonga je ha chikuma chacho.
Kuli chimwe chuma chilemu chize twatamba kunyingika. Nyi mutunyingika chize Zambi akunyonga hakutwala ku jita, chino muchitukwasa kunyingika chize twakunyonga hakutwala kuli Zambi. Nyi yena uli umwe wa kuli tununu twa atu waze akumona lamba ha mukunda wa jita, chili chilemu kunyingika kumbululo lia chihula: Shina Zambi kakukwasa hanji kutayiza jita yize yakumwesa atu lamba, ngwe chize amwe akufuliela nyi? Nyi shina keshi kwivwila keke atu waze akumona lamba ku jita?
Yena muhasa kukomoka chinji ha kunyingika ngwo kumbululo lia mu Mbimbiliya linalisa ni manyonga eswawo. Kwamba umwenemwene, chize ku mashimbu akunyima ndo musono, Zambi kalumwine manyonga jenyi hakutwala ku jita. Tushimutwinenu yize Mbimbiliya yinambe hakutwala ku chize Zambi te akunyonga hakutwala ku jita ku mashimbu akunyima ni ku sekulu yitangu muze Yesu apwile hano hashi. Chino muchitukwasa kunyingika chize Zambi akumona jita musono, nawa nyi jita muyikanunga kulutwe lia matangwa.
