1. Muhuko uka ulemu chinji wa Yehova, nawa kuchi twakwivwa hakutwala kuli iye?

MBIMBILIYA yinambe ngwo “Zambi iye zango.” (1 Yoano 4:8) Alioze yika chino chinalumbunuka? Zango hi wika ko muhuko utangu upema wa Yehova. Alioze lili muhuko ulemu chinji wa Yehova. Iye keshi wika ni zango. Alioze iye kali zango. Zango lie liakusongwela yuma yeswe yize iye akulinga. Twakuwahilila chinji ha zango lize Yehova asolwele ha kutanga yuma yeswe!

2. Ushindakenyo uka zango lia Yehova unatwehe? (Tala chizulie chili hauputukilo.)

² Yehova kali ni umbovu ni zango linji hali yitangiwa yenyi. Zango lienyi hali yetu linatwehe shindakenyo ngwo upale wenyi hali atu pundu lume muukalingiwa. Waze akumwononokena makazuka sambukila yamwenemwene. Chakutalilaho, ha mukunda wa zango lienyi, Yehova “hanasela lie tangwa muze makasopesa akwa yifuchi yeswe ya hashi mu ululi kuli mwe lunga yoze hanamuselacho,” Yesu Kristu. (Yilinga 17:31) Tunafuliela ngwetu usopeso uno muukalingiwa. Ha chino, atu waze akumwononokena makapwa ni mwono upema ku miaka yeswe.

3. Kuchi mwono te muupwa, nyi Zambi kakazangile atu?

 ³ Kuchi te muchipwa kutalatala cha atu kulutwe lia matangwa nyi te zango kuliapwile muhuko ulemu wa Yehova? Atu te manunga ni kuliyula ene, ha kwaasongwela kuli Satana, zambi yoze keshi zango. (2 A-Korindu 4:4; 1 Yoano 5:19; tanga Usolwelo 12:9, 12.) Nyi Yehova kakatuzangile, kachi mwono kulutwe lia matangwa te mupihia chinji!

4. Mumu liaka Yehova echele Satana kulimika ni chiyulo chenyi?

⁴ Muze Satana ahangulwile chiyulo cha Zambi, iye nawa yalingisa yisemi jetu atangu hanga alimike ni Zambi. Iye kahamikine ha ulite wa Yehova kupwa Mwata wa Yuma yeswe. Satana kambile ngwenyi kuyula chenyi te muchipema chinji kuhiana cha Zambi. (Uputukilo 3:1-5) Ni mana eswe, Yehova yecha Satana ha shimbu likehe hanga asolole nyi maliji jenyi te amwenemwene. Alioze kwamba umwenemwene, yuma yeswe yinasolola ngwo chipwe atu, chipwe Satana keshi kuhasa kupwa manguvulu apema.

5. Yika yitanga ya atu chize kushakulu yakusolola?

⁵ Musono, hashi heswe hananungu ni kupihia chinji. Ha kupalika cha 100 wa miaka atu anji afwa ku jita. Mbimbiliya yinambe hakutwala ku “matanga a kusula” ngwo: “Yingulungulu ni akwa kwonga kumakapiha kuhiana.” (2 Timoteu 3:1, 13) Mbimbiliya yinambe nawa ngwo: “Yehova, ngunanyingika jila ya mutu kuyapwile ya kuli iye mwene; kuchatwamine muli mukwa kwenda kusongwela mashimbo jenyi.” (Jeremia 10:23) Chize kushakulu maliji wano kanasolola pundu ngwo kali amwenemwene. Yehova kakatangile atu ni uhashi wa kuliyula ene chakuhona usongwelo wenyi.

6. Mumu liaka Zambi akwecha upi?

⁶ Hakwecha yuma yipi hanga yinunge ni kulingiwa ha mashimbu amwe, Yehova kakusolola nawa ngwo iye wika mahasa kuyula kanawa. Kashika, kulutwe lia matangwa Zambi makahwisa yuma yeswe yipi. Muze yuma yino muyikapalika, mutu mweswe yoze makalimika ni chiyulo chenyi cha zango, Zambi makoonona hazehene. Iye makazachisa yitanga ya atu hanga asolole ngwo yingulungulu katamba kwanongesa washi-washi. Upi kuuchi kapwako nawa.

7, 8. Kuchi Yehova akusolola zango lienyi?

⁷ Yehova kakusolola zango lienyi mu majila anji. Achinyongenu kama hakutwala ku unene ni upeme wa hashi ni malilu. Muli tununu-a-tununu twa galáxia, mu galáxia yeswe muli nawa tununu-a-tununu a tutongonoshi ni ma planeta. Galáxia wetu yoze avuluka ngwo Via Láctea, katongonoshi munene yoze ulimo kali tangwa. Nyi tangwa te kulishimo kachi hano hashi mwono kuushiho. Yitangiwa yeswe ai, yinasolola ngwo Yehova mwe Sakatanga wetu, nawa yinasolola yitanga yenyi ngwe, ndundo, mana, ni zango. Chochene, yitanga ya Zambi ‘ni tachi jenyi ja mutolo jize kujishi kumoneka, yinasoloka pundu mu yuma yize hanatange.’—A-Roma 1:20.

⁸ Yehova katangile hashi hanga hatwame yuma yeswe yize yikwete mwono. Yuma yeswe yize yili hano hashi yakukwasa atu ni tushitu. Zambi kalingile chimwe chihela chipema chinji hanga atu atwamemo, nawa yaaha mana ni mijimba yingunu hanga atwame ku miaka ya mutolo. (Tanga Usolwelo 4:11.) Iye nawa, “kakuhanahana kulia kuli akwa musunya eswe; mumu utu wa zango lienyi wa mutolo.”—Samu 136:25.

9. Chipwe ngwe Yehova kapwa Zambi ya zango, yuma yika iye akuvwila kole?

⁹ Yehova Zambi iye zango, kashika kakwivwila kole yuma yipi. Chakutalilaho, mukanda wa Masamu 5:4-6 unambe hakutwala kuli Yehova ngwo: “Mumu hi uli umwe Zambi wakuwahilila mu ungulungulu ko . . . wakuvwila kole waze akulinga uhenge.” Iye kanambe nawa ngwenyi, “kakuvwila lwaji mukwa kumwanga manyinga ni mukwa kwonga.”

10, 11. (a) Yika muyikalingiwa kuli yingulungulu? (b) Kuchi Zambi makayukisa atu waze akumwononokena?

 ¹⁰ Ha mashimbu alita, Yehova makachiza yuma yeswe yipi hano hashi, mumu yiye kali Zambi ya zango nawa kakwivwila kole yuma yipi. Mukanda wa Zambi unambe ngwo: “Mumu akwa kutanga yipi kumakaapatula, alioze waze akutwaminyina Yehova kumakahinga chifuchi. Mumu kwasala hakehe mba yingulungulu hi akuhi.” Akwa kole ja Yehova “kumapwa ngwe mwishi muwanduka.”—Samu 37:9, 10, 20.

¹¹ Liji lia Zambi linalakenya ngwo: “Akwa ululi kumakazuka chifuchi; kumakatwamamo ku miaka ya mutolo.” (Samu 37:29) Atu waze ashishika “kumawahilila mu kulumbama cha sambukila.” (Samu 37:11) Mumu liaka? Mumu Zambi yetu ya zango kakulinga yuma yipema hali tuvumbi twenyi ashishika. Mbimbiliya yinambe ngwo: “Iye makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu.” (Usolwelo 21:4) Atu waze akwononokena Yehova ni kuwahilila ha zango lienyi, kali ni kutalatala chipema!

12. “Mutu mungunu” iya?

¹² Mbimbiliya yinambe ngwo: “Usele chinyingi hali mutu mungunu; tala mwe mukwa kululama, mumu songo lienyi mulipwa sambukila. Alioze yitanguke kumakaonwona hamuwika; songo lia yingulungulu kumakalitetako.” (Samu 37:37, 38) “Mutu mungunu” kakunyingika Yehova ni Mwanenyi, nawa kakulinga upale wa Zambi ni zango lieswe. (Tanga Yoano 17:3.) Aye kakufuliela ngwenyi “ya hashi muyipalika, ni usolo wayo: alioze yoze malinga upale wa Zambi matwama ndo ku miaka ya mutolo.” (1 Yoano 2:17) Kashika, twatamba ‘kutwaminyina Yehova ni kufunga jila yenyi’ mumu songo lia yuma ya hano hashi hiliakundama.—Samu 37:34.

13. Zango lika linene lize Yehova hanasolola hali yetu?

¹³ Chipwe ngwe tuli akwa-uhenge, nihindu mutuhasa kwononokena Zambi. Mutuhasa nawa kupwa ni usepa upema ni Yehova ha mukunda wa chitapo cha ukuule wa Yesu, uze wakusolola zango linene lia Zambi. Yehova hanahane ukuule kashika atu waze akwononoka mahasa kupwa ni uhashi wakutusuka ku shili ni kufwa. (Tanga A-Roma 5:12; 6:23.) Yesu kashishikile kuli Zambi ha mashimbu eswe waze apwile mu malilu, kashika Yehova apwile ni shindakenyo ngwenyi Mwanenyi te mashishika hano hashi. Amu ali Tata ya zango, Yehova kevwile chinyengo chinji muze amwene Mwanenyi kanamumwesa lamba linji kuli atu. Chipwe chocho, Yesu ni ushishiko weswe yakalila ulite wa kuyula cha Zambi ni kusolola ngwenyi mutu mungunu mahasa kushishika kuli Zambi chipwe muze mamona lamba.

14, 15. Yika kufwa cha Yesu chinanehe hali yetu?

¹⁴ Chipwe ngwe Yesu kamwene yeseko yinji, nihindu iye kanungine ni kushishika ni kukwsa chiyulo chiyulo chinguna cha Yehova. Twatamba kusakwilila, mumu ha kufwa chenyi, Yesu kaafuchile ukuule uze wahanyine uhashi kuli atu hanga akatwame ku miaka ya mutolo mu paraisu! Postolo Paulu kanakalumbununa zango lize Yehova ni Yesu asolwele kupalikila mu ukuule. Iye yamba ngwenyi: “Shimbu te yetu kutushi tachi, ha mwaka wa kulita Kristu wafwilile yitanganyanyi. Mumu chikalu umwe kufwila mukwa ululi: hindu hanji umwe mahamuka kufwila mutu mupema. Alioze Zambi hanasolola chinyingi cha zango lienyi kuli yetu, mumu shimbu te tuchili yivulumunyi, Kristu watufwilile.” (A-Roma 5:6-8) Postolo Yoano yasoneka ngwenyi: “Hanasolola zango lia Zambi hakutwala kuli yetu, se Zambi hanatumu Mwanenyi wa wika hano hashi, hanga tukapwe a mwono muli iye. Muno mulili zango, kuchapwile ngwe yetu twazangile Zambi ka, alioze iye watuzangile yetu, watumine Mwanenyi kupwa kuka ha milonga yetu.”—1 Yoano 4:9, 10.

¹⁵ Yesu kambile ngwenyi, “Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo.” (Yoano 3:16) Chipwe ngwe chino chanehene yikola yinji kuli Yehova, nihindu aye kahanyine Mwanenyi ngwe ukuule. Chino chinasolola zango linene lize Zambi akwete hali atu. Nawa, zango liacho mulinunga ku miaka yeswe. Paulu yasoneka ngwenyi: “Ngunakunuka ngwami, Chipwe kufwa, chipwe mwono, chipwe angelo, chipwe yiyulo, chipwe yuma ya haliapwila, chipwe yuma yize muyizaho, chipwe tachi, chipwe usuku kwilu, chipwe usuku kushi, chipwe chuma chikwo chize atangile, nichimwe chuma muchihasa kutuhandununa ku zango lia Zambi lize lili muli Kristu Yesu Mwene wetu” chakuhi.—A-Roma 8:38, 39.

16. Wanangana wa Mesaya yika, nawa iya Yehova asakwile hanga apwe Mwanangana wamo?

¹⁶ Unguvulu wa Zambi, Wanangana wa Mesaya, unasolola nawa zango lia Yehova hali atu. Kuchi chenacho? Yehova hanase Yesu Kristu ngwe Mwanangana yoze ukwete zango hali atu, nawa wajama ni kuyula. (Yishima 8:31) Zambi hanasakula atu 144,000 hanga ayule hamuwika ni Kristu mu malilu. Muze akwaahindwisa, ayo keshi kuvulama mwono uze apwile nawo hano hashi. (Usolwelo 14:1) Muze Yesu apwile hano hashi, Wanangana wapwile chikuma chilemu cha longeso lienyi, nawa yalongesa tumbaji twenyi kulemba ngwenyi: “Wanangana wenu wize. Upale wenu ulingiwe hashi chizechene ngwe unalingiwa mwilu.” (Mateu 6:9, 10) Tunashimbwila kumanunuka cha kulemba chacho muze Wanangana wa Zambi muuneha yiwape yinji kuli atu!

17. Kuchi kuyula cha Yesu chalisa ni kuyula cha atu?

¹⁷ Hali kulisa chinene chinji hakutwala ku kuyula cha zango cha Yesu ni kuyula cha atu. Kuyula cha atu chakuneha jita yize yakushiha atu anji. Alioze Mwanangana wetu Yesu, kakutuzanga, nawa kakwimbulula yitanga yipema ya Zambi, chipi-chipi zango lienyi. (Usolwelo 7:10, 16, 17) Yesu yamba ngwenyi: “Tweyenu kuli yami, yenu eswe nwakukilikita nikulemewa, ni yami kumungunuhwimisa. Lilemenu ku kanga yami, lilongesenu kuli yami; mumu nguli mukwa kushimbika, mukwa kulikehesa mu mbunge; mba kumunuwana uhwimino ku mbunge jenu. Mumu kanga yami yashi, ni chiteli chami chilelu.” (Mateu 11:28-30) Chino chili chilekenyo cha zango linji!

18. (a) Yika yakulingiwa chize ha mwaka wa 1914? (b) Yika mutulilongesa ha mutwe uze muusulaho?

¹⁸ Mbimbiliya yinasola ngwo, Wanangana wa Zambi waputukile kuyula ha mwaka 1914. Ha mashimbu waze ene yaputuka kukunga masalila waze makayula ni Yesu mu malilu, ni “mbunga yinene” ya atu waze makalamwina ha kusula cha hano hashi hapi ni kunjila mu chifuchi chaha. (Usolwelo 7:9, 13, 14) Shina chizavu chino cha mbunga chili chinene musono? Yika Zambi anazange hanga ayo alinge? Mutwe uze muusulaho muukumbulula yihula yino.