Achinyonga nyi waya ku chifuchi cheka ha chisuho chitangu. Ku chifuchi waya hanji mianda, kulia ni mbongo muwana ko, yalisa ni ya ku chifuchi che. Kwamba umwenemwene, yuma muyihasa ku kukalila chinji.

Hanji che chize muhasa kwivwa muze mutanga Mbimbiliya chisuho chitangu. Chili ngwe kufuna ku chifuchi cha ha shakulu. Ku chifuchi chacho, muwanako A-Filistea, ni mianda yili ngwe ‘kusuwa mazalo.’ Muwanako nawa kulia avuluka ngwo mana ni mbongo jize avuluka ngwo dracma. (Kutuhuka 16:31; Yoshua 13:2; 2 Samuele 3:31; Luka 15:9) Yeswe ayi muyihasa kukukaliwila. Kashika, shina muchilita kwita ukwaso kuli mutu yoze mahasa kukulumbunwina yuma yacho nyi?

Pundu lume muze aliangile kusoneka mukanda usandu ha sekulu 16 K.M.J, atu kapwile ni kwaakwasa hanga anyingike yisoneko. Chakutalilaho, Mose, yoze wapwile kasongo mutangu wa A-Izalele kaputukile “kulumbununa” shimbi jize asonekene.—Shimbi Yamuchiali 1:5.

Hakupalika cha kama ja miaka, akwa-kulongesa atu Yisoneko nihindu te anachilongesa atu. Ha mwaka wa 455 K.M.J, A-Yunda anji yalikungulula hamuwika ni twanuke mu Yerusaleme. Akwa-kulongesa Mbimbiliya waze apwileho “yatanga mwilu mu mukanda, . . . nikulumbununa hanga kutanga chikaalumbunuke.”—Nehemia 8:1-8.

Hakupalika cha miaka 500, Yesu Kristu yeza ni kulinga mulimo wowene wakulongesa atu. Kafwa, atu kapwile ni kumuvuluka ngwo Longeshi. (Yoano 13:13) Aye yalongesa mbunga ja atu ni mutu umuwika-umuwika. Shimbu limwe yalongesa mbunga yinene ni Longeso lia ha Mulundu, mba atu mu “mbunga alishimwokene ha longeso lienyi.” (Mateu 5:1, 2; 7:28) Mu mwaka wa 33 M.J, Yesu yahanjika ni tumbaji twenyi aali muze te anayi ku chihunda chapwile hakamwihi ni Yerusaleme, mba “yaalumbunwina mu Yisoneko yeswe.”—Luka 24:13-15, 27, 32.

Tumbaji twa Yesu no kapwile ni kulongesa atu Liji lia Zambi. Limwe tangwa umwe chilolo Ka-Etiopia te kanatange chimwe Chisoneko. Umwe kambaji avuluka ngwo Fwilipu yamukundama nawa yamuhula ngwenyi; “Unanyingika chize unatange, nyi? Ka-Etiopia yakumbulula ngwenyi, Kuchi munguhasa? Shina umwe mangusongwela!” Mba Fwilipu yamulumbunwina chisoneko chacho.—Yilinga 8:27-35.

Ngwe akwa-kulongesa atu Yisoneko ku mashimbu a kunyima, ni musono Yela ja Yehova kakulongesa atu Mbimbiliya mu unji wa yifuchi 239 hashi heswe. (Mateu 28:19, 20) Poso jeswe, ayo kakukwasa tununu ni tununu twa atu kunyingika Mbimbiliya. Anji akuli atu waze twakulilongesa no Mbimbiliya keshi kuya mu yingeleja. Malongeso jetu awana, nawa mahasa kupwa kulingila ku mazuwo ja atu hanji ku yihela yikwo, yize mutu mwene mazanga. Alioze atu amwe kakuzanga kulilongesela Mbimbiliya ku telefone, ha kutala yinema, ku computador hanji mu majila akwo.

Muhasa kufupa umwe Chela cha Yehova hanga akukwase kulilongesa Mbimbiliya. Ena munyingika ngwo Mbimbiliya hi mukanda ukalu ko kuunyingika, alioze “kuyafumbuka ha kulongesa, ni ha kukumika, ni ha kululamisa, ni ha kufumba mu ululi: hanga mutu wa Zambi akapwe mukwa kujama wakutela liakulu yitanga yeswe yipema.”—2 Timoteu 3:16, 17.