MALONGESO A CHIFUKILO | MUHASA KUNYINGIKA MBIMBILIYA
Mumu Liaka Twatamba Kunyingika Kanawa Mbimbiliya?
“Mbimbiliya yili mukanda wa akwa-kuwayila Zambi. Alioze atu aku chifuchi cha China kaunyingikine. Nawa kuushi ni ulemu kuli ayo.”—LIN, CHINA.
“Chanyingikine kanawa mukanda usandu wa uwayilo wetu wa Hindu. Mba kuchi munguhasa kunyingika Mbimbiliya Yisandu?”—AMIT, INDIA.
“Kuli yami, Mbimbiliya yili mukanda ukulu uze amba ngwo kakuulanda chinji kuli atu. Alioze kanda nguchiumona kama.”—YUMIKO, JAPÃO.
Atu mu yifuchi yeswe kakuvumbika chinji Mbimbiliya. Alioze kanyingikine yize yatwama mu Mbimbiliya. Chipwe ngwe achi chinasoloka chinji mu yifuchi ya ku Asia, alioze chakusoloka nawa mu yifuchi muze atu anji akwete Mbimbiliya.
Kashika, muhasa kulihula ngwe, ‘Mumu liaka natamba kunyingika Mbimbiliya?’ Kunyingika kanawa mukanda uno usandu muchikukwasa:
-
Upwe ni uwahililo
-
Ukumbe yipikalo yize muyisoloka mu usoko we
-
Muze muzakalala ku mbunge
-
Upwe ni usepa upema ni akwenu
-
Ufunge kanawa mbongo je
Tuchitalenu hali Yoshiko wa ku Japão. Te kanyingikine yize yatwama mu Mbimbiliya mba yanyonga kuyitanga mwene. Kuchi yamukwashile? Mwene yamba ngwenyi: “Mbimbiliya yangukwasa kunyingika ulemu wa mwono ni kungwaha kutalatala.” Yamba nawa ngwenyi: “Haliapwila mwono wami uli ni ulemu.” Amit, yoze twalianganga kuvuluka, neye yahengwola Mbimbiliya mwene. Mba yamba ngwenyi: “Nakomokene chinji hakuwana yikuma yili mu Mbimbiliya yize muyihasa kukwasa atu.”
Mbimbiliya yakukwasa chinji atu. Kashika watamba kuyihengwola yena mwene hanga umone chize muyikukwasa.
