1, 2. Mumu liaka Mbimbiliya yinatese uhashi wetu wakuhanjika ni kahia?

HA MWAKA 1871, kahia yikaputuka mu musenge wa Wisconsin, mu Estados Unidos. Kahia kacho yikalitanda ni kwocha mitondo yinji. Atu kuhiana 1,200 yafwa ku kahia kacho. Kwamba umwenemwene, atu waze afwile ku kahia kacho kanahiane atu eswe waze akufwa ku kahia kamutapu au mu Estados Unidos. Chinasolola ngwo, kahia kakehe wika totokele ku kumboio yikalitanda ni kwocha musenge weswe. Chikuma chino chinatwiwulula yimwe versu ya mu Mbimbiliya yakwamba ngwo: “Talenu, musenge upwahaha muuwema ni kahia kakepe-kepe!” (Tiangu 3:5) Mumu liaka Tiangu asonekene maliji wano?

² Aye yalumbununa ngwenyi: “Limi linapu ngwe kahia.” (Tiangu 3:6) “Limi” liakutukwasa hanga tuhanjike. Alioze ngwe chize chapwa kahia, yuma yize mutuhanjika muyihasa kuneha milonga yinji. Maliji jetu mahasa kupwa ni ndundo jinji hali akwetu. Kashika Mbimbiliya yinatulweza ngwo, yize twakuhanjika muyihasa kuneha mwono hanji kufwa hali akwetu. (Yishima 18:21) Shina chino chinalumbunuka ngwo kutwatambile kuhanjika, mumu ngwo nyi twahanjika mutwamba yuma yipi? Ka, hi chocho ko. Yetu kutuchi kwecha  kuzachisa kahia mumu ngwo mutuwema. Alioze, twakukanyama muze tunazachisa kahia. Chakutalilaho, mutuhasa kuzachisa kahia hanga tuteleke, twote nawa hanga tupwe ni pangu. Chizechene nawa, nyi mutukanyama ha yize twakuhanjika, mutuhasa kuzachisa limi lietu hanga tuhalise Yehova ni kukwasa akwetu.—Samu 19:14.

3. Yuma yika yitatu yize muyitukwasa hanga tukolweze akwetu muze mutuhanjika no?

³ Yehova hanatwehe uhashi wakulweza akwetu yize twakwivwa ni kunyonga, kupalikila mu kuhanjika hanji kulahula ni moko. Ha chino, kuchi mutuhasa kuzachisa chawana chino chilemu hanga tukolweze akwetu? (Tanga Tiangu 3:9, 10.) Twatamba kunyingika shimbu lize mutuhanjika, yuma yize mutuhanjika, ni mwakuhanjikila yuma yacho.

4. Shimbu lika twatamba kuhola?

⁴ Ha mashimbu amwe chili chipema kuhola. Mbimbiliya yinambe ngwo kuli “tangwa lia kuhola.” (Chilumbununyi 3:7) Chakutalilaho, kuhola muze akwetu anahanjika muchisolola ngwo tunavumbika. (Yombi 6:24) Nawa, kutwatambile kuhanjika yuma yambala, yize atu akwo katambile kuyinyingika. (Yishima 20:19) Alioze nyi umwe mutu matuvwisa uli, mutupwa akwa-mana nyi mutulihumikiza ni kuhola kulu.—Samu 4:4.

5. Kuchi mutusolola kuli Yehova ngwetu tunasakwila kuli iye hakutwaha uhashi wakuhanjika?

⁵ Alioze kuli nawa mashimbu apema waze twatamba kuhanjika. (Chilumbununyi 3:7) Wano kali mashimbu waze twakuhalisa Yehova, hanga tukolweze akwetu, asolole manyonga jo, ni kulweza kuli akwetu ukwaso uze tunafupu. (Samu 51:15) Nyi mutuzachisa uhashi wetu wa kuhanjika mu jila yino, mutusolola kuli Yehova ngwetu tunasakwila chinji kuli iye hakutwaha chawana chino. Chikwo nawa, tunyingikenu ngwetu, muze umwe sepa lietu matwaha chawana chipema, twakuzanga kuchizachisa kanawa.

6. Mumu liaka chili ni ulemu kusakula shimbu lialita mba tuhanjike?

⁶ Mumu liaka chili chilemu kusakula shimbu lize lialita hanga tuhanjike? Mumu mukanda wa Yishima 25:11, unambe ngwo: “Liji lia kuhanjika haze hanalite liapwa ngwe mihuko ya oru mu mutonga wa prata.” Mihuko ya maçã a oru yakupema, alioze yakupema chinji kuhiana nyi mayichinga ni prata. Chizechene nawa, mutuhasa kupwa ni chimwe chuma chipema chakuhanjika ni akwetu. Alioze nyi mutusakula shimbu lize lialita mba tuhanjike, mutuhasa kukwasa atu anji. Kuchi mutuhasa kuchilinga?

7, 8. Kuchi mandumbu jetu mu Japão embulwile chilweza cha Yesu?

⁷ Nyi mutuhanjika ha shimbu lize kulialitele, atu kechi kwivwa yize tunahanjika, nawa kechi kutayiza yize tunaalweza. (Tanga Yishima 15:23.) Chikutalilaho, ha Kakweji wa Março 2011 umwe munyiko ni tsunami yinakapihisa mbonge jinji kuuto ya Japão. Atu kuhiana 15,000 afwile. Alioze, chipwe ngwe Yela ja Yehova anji katokesele asoko ni masepa jo, nihindu o yazachisa Mbimbiliya hanga akwase akwo waze no apwile mu lamba lioliene. Ayo te kananyingika ngwo anji akuli atu jacho te Budista nawa te keshi kunyingika yuma yinji hakutwala ku Mbimbiliya. Chipwe chocho, yaalweza hakutwala ku tangwa lize mukukapwa uhindukilo wa afu, mandumbu jetu yakolweza atu jacho ni kwaalumbunwina mumu liaka yuma yacho yipi yinalingiwa kuli atu apema.

⁸ Mandumbu jacho kembulwile Yesu. Mumu iye te kanyingika shimbu lia kuhola, nawa te kanyingika shimbu lize mahanjika. (Yoano 18:33-37; 19:8-11) Nawa iye te kakufupa shimbu lize lialita hanga alongese tumbaji twenyi. (Yoano 16:12) Mandumbu jetu mu Japão yanyingika shimbu lize lialita hanga jihanjike hakutwala ku uhindukilo wa afu. Muze hikwapalika miaka  yaali ni chipinji chize haze kwapwile tsunami, ayo yahana kuli atu lifwo liakwamba ngwo, Chamwenemwene Afu Makahinduka? Atu yatambula lifwo liacho, nawa yijiwana utakamiso ha yize apwile ni kutanga. Ni yetu nawa twatamba kunyonga ha minyachi ni yuma yize atu amu ngiza yetu akufuliela, hanga tuhase kuwana shimbu lize lialita lia kuhanjika no.

9. Ha yuma yikwo yika yize twatamba kushimbwila mashimbu waze alita mba tuhanjike?

⁹ Ha yuma yikwo yika yize twatamba kushimbwila mashimbu waze alita mba tuhanjike? Hanji umwe mutu mamba chimwe chuma chize muchitulemeka ku mbunge. Shimbu tuhanjike kalusu-lusu chimwe chuma chipi, twatamba kunyonga kanawa ni kulihula ngwetu: ‘Mumu liaka iye anahanjika yuma yamutapu au? Shina natamba kumukumbulula lume ha yize anangwambe nyi? Muchiwaha ni kutwahanjikile chuma nichimwe. Alioze ni muchilita kuhanjika nenyi, twatamba kushimbwila ndo muze mahwima mbunge. (Tanga Yishima 15:28.) Hanji mutuzanga kukolweza asoko jetu waze hi Yela ja Yehova ko hanga anyingike Yehova. Alioze twatamba kupwa yimbovu, kunyonga kanawa ha yuma yize mutuhanjika no, nawa twatamba kuhanjika no ha shimbu lize ayo anazange kutupanjika.

10. (a) Mumu liaka twatamba kusakula kanawa yize mutuhanjika? (b) Yuma yika yize twatambile kuhanjika?

¹⁰ Yuma yize twakuhanjika muyihasa kwivwisa akwetu kuwaha hanji kwaalemeka ku mbunge. (Tanga Yishima 12:18.) Atu anji hano hashi ha Satana kakuhanjika “maliji asasu” waze ali ngwe “katana” hanji “mivu” mumu maliji jacho kakulemeka atu ku mbunge ni kwevwisa yinyengo. (Samu 64:3) Atu anji kakulilongesa kuhanjika chacho ha yinema yize akutala ku ma televisão. Alioze akwa-Kristu katambile kuhanjika chuma nichimwe chize muchihasa kulemeka mutu ku mbunge chipwe mu miselo, ka. Miselo yipema muyihasa kuwahisa yuma yize mutuhanjika. Alioze kutwatambile kuhanjika maliji asonyi, hanji waze mahasa kulemeka mutu ku mbunge mumu ngwo, tunazange hanga akwetu waze tulino asehe. Mbimbiliya yinatoweza akwa-Kristu ngwo katambile “kutukana.” Yinambe nawa ngwo: “Nilimwe liji lia kupihisa kanda lituhuka mu makanwa jenu, alioze shinaho lize lipema ha kukolesa akwenu, nikulita ni chize chinatela, hanga likahane vumbi kuli waze akwivwa.”—A-Efwesu 4:29, 31.

11. Yika muyihasa kutukwasa kusakula maliji apema?

¹¹ Yesu kalongesele ngwenyi, “kanwa liakuhanjika yize yakulumbama mu mbunge.” (Mateu 12:34) Chino chinalumbunuka ngwo yuma yize twakuhanjika yakusolola yuma yize tulinayo mu mbunge. Kashika, ni twakuzange atu ni kufupa kwakwasa, twatamba kusakula maliji apema waze mutuhanjika no. Yuma yize mutuhanjika muyakwasa ni kwaakolweza.

12. Yika nawa muyihasa kutukwasa hanga tusakule maliji waze alita?

¹² Chakufupiwa kusa tachi jinji mba tusakule kanawa maliji waze mutuhanjika. Chipwe Mwanangana Solomone, kafupwile “maliji apema” hanga asoneke yuma yize yalita, nawa yashi kutanga. (Chilumbununyi 12:9, 10) Yika muyihasa kutukwasa hanga tusakule kanawa maliji waze mutuhanjika? Mutuhasa kutanga Mbimbiliya ni mikanda yetu hanga tuwane jila yaha yakuhanjikilamo. Mutuhasa kunyingika ulumbunwiso wa maliji waze twanyingikine kanawa. Mutuhasa nawa kulilongesa chilweza cha Yesu hakunyingika jila yipema ya kuhanjikila hanga tukwase akwetu. Iye te kanyingika yize mahanjika mumu Yehova kamulongesele ‘kulongoloka hanga anyingike kukolesa mukwa yikatalo ni liji.’ (Izaia 50:4) Chili nawa ni ulemu kunyonga ha chize maliji jetu matwa kuli akwetu. Mutuhasa kulihula ngwetu: ‘Nyi namba chuma chino shina mutu mewva yize ngunambe kumulweza nyi? Yika iye manyonga?’

13. Mumu liaka twatamba kuhanjika ni maliji waze ashi kunyingika?

 ¹³ A-Izalele kapwile ni kuzachisa zungo lia chitavwi hanga ahane utowezo weka ni weka kuli mbunga. Zungo limwe te liakukwasa atu kunyingika ngwo te katamba kulikungulula hamuwika. Likwo te liakukwasa maswalele kunyingika ngwo mashimbu akwasa jita haheta. Achinyonga yize te muyilingiwa kuli maswalele nyi zungo lia chitavwi kuliaalumbunukine kanawa! Mbimbiliya yinatesa zungo lia chitavwi lize lialumbunuka kanawa ni maliji waze ashi kunyingika. Nyi kutwalumbunwine kanawa yuma, atu mahasa kupwa mu kalumbanganyiso, hanji kufuliela yuma yize hi yamwenemwene ko. Chipwe ngwe, twakuhanjika kanawa, alioze twatamba kukanyama hanga maliji jetu achine kupwa akalu hanji akuhona atu vumbi.—Tanga 1 A-Korindu 14:8, 9.

14. Chilweza chika chinasolola ngwo Yesu kazachishile majili waze ashi kunyingika?

¹⁴ Mateu kapitulu 5 ndo 7 hali chilweza chipema cha chize Yesu asakwile maliji waze ashi kunyingika. Ha pande jacho, iye kakazangile kukomwesa atu ha kuzachisa maliji akalu hanji waze te atu kanyingikine, ka. Nawa iye kakambile yuma yize te muyaalemeka ku mbunge. Alioze Yesu kalongesele yuma yipema chinji yize te yikwete ulumbunwiso ulemu. Chakutalilaho, Yesu kakwashile tumbaji twenyi hakwaalweza ngwo, ayo te katambile kulipikala ha kulia cha ha tangwa ni tangwa. Iye yaalumbunwina ngwo Yehova mashimbu eswe kakulisa tujila. Chocho, yaahula ngwenyi: “Yenu kunwaahianyine chikolo, nyi?” (Mateu 6:26) Ni maliji wano akehe, Yesu yakwasa tumbaji twenyi kunyingika ulemu wa longeso liacho ni kwaakolweza.

15. Mumu liaka twatamba kuhanjika ni umbovu?

¹⁵ Chize twakuhanjika ni akwetu ni necho chikwete ulemu. Atu te kakuzanga chinji kupanjika Yesu mumu iye te kakuhanjika “maliji a vumbi” hanji kuhanjika ni umbovu. (Luka 4:22) Muze mutuhanjika ni umbovu, atu mazanga chinji kutupanjika ni kutayiza yize tunaalweza.  (Yishima 25:15) Mutupwa ni uhashi wakuhanjika ni umbovu kuli akwetu, nyi mutwaavumbika ni kunyonga ha chize o akwivwa. Chino che Yesu alingile. Chakutalilaho, muze amwene mbunga yinase tachi hanga yimupanjike, iye yawahilila chinji ha kupalikisa shimbu hamwe no ni kwaalongesa. (Marku 6:34) Chipwe muze atu te akumutuka, Yesu kakatukanyine.—1 Petulu 2:23.

16, 17. (a) Muze tunahanjika ni asoko ni masepa jetu, kuchi mutuhasa kwimbulula Yesu? (Tala chizulie ha uputukilo.) (b) Kuchi umwe mama asele tachi hanga ahanjike ni umbovu?

¹⁶ Amu twakuzanga chinji asoko ni masepa jetu, mutuhasa kwaamba yuma yize kuyalitelele mumu ngwetu tunaanyingika kanawa. Mutuhasa kunyonga ngwetu kutwatambile kukeya ha yize mutuhanjika no. Alioze Yesu kakapwile ni kuhanjika yuma yize kuyalitelele kuli masepa jenyi. Muze amwe apwile ni kuzwela hakunyingika yoze te munene hakachi kwo, Yesu yaafumba ni umbovu weswe ha kuzachisa chilweza cha umwe mwana-kemba hanga chaakwase kwalumuna manyonga jo. (Marku 9:33-37) Makulwana amu chikungulwila mahasa kwimbulula chilweza cha Yesu hakuhana yiyulo kuli akwo ni maliji waze alita.—A-Ngalishia 6:1.

¹⁷ Chipwe muze umwe mutu matwamba chuma chize muchitulemeka ku mbunge, nihindu twatamba kusa tachi hanga tuhanjike nenyi ni umbovu. (Yishima 15:1) Chakutalilaho, umwe mwana wa lunga wa umwe mama twamishi, kapwile ni kulinga yuma yipi, ni kulisolola kumeso ja atu ngwe kanawayila Yehova ni mbunge yeswe. Umwe pangi mu chikungulwila yevwila mama wacho chinyengo, ni kumwamba ngwo: “Chili hunya, ha kuhona kufumba mwane.” Mama wacho yalihumikiza ni kunyonga, mba hi yakumbulula ngwenyi: “Chochene, ngunanyingika ngwetu yuma kuyiso kwenda kanawa haliapwila, alioze fumbo lia yono mwana mulichinunga. Muchilita ukahanjike ni yami muze Armagedone hiyahwa; hanga tukatale ni manyonga jacho kali lume amwenemwene.” Amu mama wacho asolwele umbovu hakuhanjika ni pangi wacho, o yanunga ni kupwa masepa. Nawa mwana wacho hakwivwa yize naye ambile, yapwa ni ushindakenyo ngwenyi kumana naye te kakufuliela ngwo, aye meza kalumuna yitanga yenyi limwe tangwa. Ha chino, aye echa kwenda hamwe ni masepa api, yamupapachisa, hi kulutwe lia matangwa yaya ni kukalakala ku Betele. Yuma yeswayo mutuhanjika ni mandumbu jetu, asoko jetu, hanji atu kutwanyingikine, nihindu majili jetu katamba kupwa mashimbu eswe “akulungiwa ni mungwa”—A-Kolosu 4:6.

18. Kuchi mutuhasa kukaula chilweza cha Yesu ha yize twakuhanjika?

¹⁸ Uhashi wakulweza akwetu yize twakunyongo ni yize twakwivwa, uli chawana chinene cha Yehova. Nyi mutukaula kanawa chilweza cha Yesu, mutunyingika shimbu lize lialita ni kuhanjika, mutukanyama ha yize mutuhanjika, nawa mutusa tachi hanga tupwe yimbovu mashimbu eswe. Kashika tuzachisenu kanawa maliji jetu hanga tukolweze akwetu ni kuvwisa Yehova kuwaha.