Ha mwaka 1949, tata kakatukile ku Alemanha ni kwalukila ku Austrália hanga afupe mulimo kuze akululikila kahia. Iye kayile ni kutwama ku mbonge ya Victoria, kuze alimbachile ni mama. Yami nasemukine ha mwaka 1953.

Ha kupalika cha mashimbu, mama yaputuka kulilongesa Mbimbiliya ni Yela ja Yehova. Hachino, yami ngunewuluka chize napwile ni kwivwa sango ja mu Mbimbiliya putu ku wanuke wami. Alioze, tata te keshi kutaya yingeleja niyimwe. Tata yapwa mutu mukalu chinji, nawa mama kapwile ni kumwivwila woma. Alioze iye yanunga ni kulilongesa Mbimbiliya mu kusweka, iye kapwile ni kuzanga yize te analilongesa. Kashika, muze tata keshi ku zuwo, mama kapwile ni kutulongesa Mbimbiliya yami ni ndumbwami. Iye kapwile ni kwamba ngwo, hashi muheza kapwa paraisu nawa mutuwahilila nyi mutukaula shimbi ja mu Mbimbiliya.—Samu 37:10, 29; Izaia 48:17.

Muze napwile ni miaka 18, nakatukile ku zuwo mumu tata kapwile ni kutulinga yuma yipi. Yami te nakutaya yuma yize mama angulongesele ya mu Mbimbiliya. Alioze te chishi kuyilemesa. Kashika, te chishi kuhasa kulinga yuma yalita. Yinguputuka kukalakala ngwe mukwa-kululieka kahia kazembwe. Amu nakumbanyishine miaka 20, yingumbata, hakupalika cha miaka yitatu mwanami mutangu yasemuka. Ha shimbu liacho, yingunyonga kanawa yize yahiana ulemu ku mwono wami. Nanyingikine ngwami Mbimbiliya muyihasa kukwasa usoko wami, hachino yinguputuka kulilongesa Mbimbiliya ni Yela ja Yehova. Mukwetu-pwo yapihilila ha chiyulo chami. Muze nayile kukunguluka ha chisuho chitangu, iye yamba ngwo natamba kukwata chiyulo: kulilongesa Mbimbiliya hanji asoko. Namwene ngwo chishi ni yize mungulinga. Yingwecha kuhanjika ni Yela ja Yehova. Alioze, ha kupalika cha mashimbu yinguliseha ha chiyulo chize nakwachile, mumu nanyingikine ngwami, kulilongesa Mbimbiliya che chuma chalita natamba kulinga.

Tangwa limwe, waze nakukalakala no hamuwika, kangusolwele yizulie ya sonyi ku mulimo. Chipwe ngwe nazangile kutala yizulie yacho, alioze ku mbunge yami yapwile ni kungwaha lwaji. Nalivwile chipi. Newulukile yize nalilongesele mu Mbimbiliya, ni kupwa ni shindakenyo ngwami Zambi mangumwesa lamba mumu lia yize te ngunalingi. Muze te nakumona yizulie yacho ya sonyi, usolo wa kuyitala wokele chinji, te chishi kulivwa nawa chipi. Ha kupalika cha mashimbu, yinguzanga kutala chinji yizulie ya sonyi.

Ha kupalika cha miaka 20, hakehe-hakehe yinguvulama yize mama angulongesele. Yuma yize napwile ni kunyonga yiyiputuka kukwata ku yitanga yami. Naputukile kwamba maliji waze kalitele ni maliji a sonyi. Chakapwile nawa ni nyonga lialita hakutwala ku kulisumbakenya. Chipwe ngwe te natwama ni mukwetu-pwo, napwile ni kulisumbakenya ni mapwo akwo. Tangwa limwe, yingulitala ha katalilo ni kuliamba ngwami: “Chishi kulizanga.” Napwile ni kulivwa chipi.

Ulo wami wafwile, mwono wami wapihile chinji. Hachino, yingwazulula mbunge yami ni kulemba kuli Yehova. Hanyima lia miaka 20, yinguputuka cheka kulilongesa Mbimbiliya. Tata te wafwile kulu, mama te hapwa Chela cha Yehova.

Kwapwile kalisa munune ha yize Mbimbiliya yakwamba ni yize te nakulinga. Alioze, yami te ngunazange chinji kupwa ni sambukila ya ku mbunge yize Mbimbiliya yakulakenya. Nasele tachi jinji hanga ngweche kwamba maliji a sonyi ni kwecha kulinga yuma yipi. Nechele kulinga utanji, kuta batota, kuzengewa ni kwiya mwenya-mulimo wami.

Atu waze nakalakalile no, te keshi kutayiza mumu liaka nazangile kwalumuna yuma yinji ku mwono wami. Ha miaka yitatu, ayo yangushinjila chinji hanga ngulinge yize napwile ni kulinga kunyima. Nalimbukile yisuho yinji, chakutalilaho, muze te nakwivwa uli, napwile ni kwamba maliji a sonyi. Muze chino chalingiwile ayo yawahilila ni kwamba ngwo: “Au mwe sepa lietu Joe!” Chino chapwile ni kunguvwisa yinyengo. Nalivwwile ngwe chishi ni ulemu.

Ku mulimo wami, yami te chishi kuhasa kuchina kutala yizulie ya sonyi. yino yapwile sali lieswe, yapwile ya kusa ha mikanda ni ha internet. Waze nakukalakala no, kapwile ni kusa yizulie yino mu ma computador eswe, yuma yize yami napwile ni kulinga mashimbu akunyima. Yami te ngunase tachi hanga ngwehuke yizulie yacho, alioze chapwile kusoloka ngwe ayo kanazange hanga yami nguyambashane. Nechile ukwaso kuli longeshi wami wa Mbimbiliya. Iye kapwile ni kungwivwa ni uhomboloji muze napwile ni kuhanjika nenyi. Iye kapwile ni kuzachisa Mbimbiliya angukwase kunyingika ngwo, munguhasa kukumba usolo wa kutala yizulie ya sonyi. Chikwo nawa, kangukolwezele hanga ngufupe ukwaso wa Yehova ni kulemba mashimbu eswe.—Samu 119:37.

Tangwa limwe nalikungulwile ni waze nakukalakala no. Muze atu eswe apwileho, yingwamba kuli ayo hanga ahane walwa kuli atu waze twakukalakala no waze te anase tachi hanga eche kunwa walwa. Ayo kevwile uli ni kwamba ni liji mwilu ngwo: “Yena wazaluka nyi? Ayo kanase tachi hanga eche kunwa!” Hachino yami yingwakumbulula ngwami: “Ni yami che ngunalingi.” Hanyima lia yino, ayo katayijile tachi jize ngunase hanga ngweche kutala yizulie ya sonyi, kashika te keshi kungupinjisa nawa.

Ha kupalika cha mashimbu, ni ukwaso wa Yehova nakumbile usolo wa kutala yizulie ya sonyi. Kangupapachishile ha mwaka 1999. Nakusakwilila Yehova hakungwaha cheka uhashi wa kupwa nawa ni mwono upema uze walita.

Haliapwila ngunamono mumu liaka Yehova akwivwila kole yizulie ya sonyi yize yami te nakuzanga. Iye kali Tata wa zango yoze te unazange kungufunga ha lamba lize liakwiza mumu lia kutala yizulie ya sonyi. Twatamba kufuliela ha yize mukanda wa Yishima 3:5, 6 wakwamba ngwo: “Fuliela Yehova ni mbunge ye yeswe; kanda ukajikijila ha malinjekela ja yena mwene. Ukamutayize mu yilinga ye yeswe mba iye makalulamisa majila je.” Kusa mu yitanga yize Mbimbiliya yakwamba, yakutufunga ni kutukwasa kupwa ni uwahililo ku mwono.—Samu 1:1-3.

Chitangu te napwile ni kulivwila ngenye. Haliapwila nguli ni sambukila nawa nakulivwa ngwo nguli ni ulemu. Haliapwila mwono wami nakuuzachisa mu jila yalita ni kumona ukwaso wa Yehova ni ukonekeno wenyi. Ha mwaka 2000, yingulimbata ni Karolin umwe pangi chileza, yoze wakuzanga chinji Yehova. Umbachiso wetu walinanga. Kuli yetu chili kuyuka chinene kulinga chihanda cha usoko wa zango wa hashi heswe uze wakumbata mwono walinanga.