Mbimbiliya kayisonekene ni ukwaso wa spiritu yisandu ya Zambi, mu limi lia Hepreu, Arame, ni Ngregu. Mbimbiliya katamba kuyilumbununa mu malimi anji mba atu a “ku mavungu eswe” ahase kuyuka nayo. (Mateu 24:14) Chize ha Mateu ndo Usolwelo, tukwete mikanda makumi aali ni shimbiali yize avuluka ngwo, “Yisoneko ya Chifuchi Chaha Mateu-Usolwelo” mumu kaliangile kuyisoneka mu limi lia Ngregu kuli akwa-kusoneka Akwa-Kristu ni ukwaso wa spiritu yisandu ku sekulu yitangu M.J.

Mbimbiliya ya Yisoneko ya Chifuchi Chaha Mateu-Usolwelo yitangu, kayituhwishile mu limi lia Inglês ha mwaka 1950. Kayisonejekene kukatuka ha yisoneko ya Ngregu yize avuluka ngwo Westcott ni Hort, yize yinakatuka ha yisoneko yikulu ya Ngregu. Yisoneko ya Chifuchi Chaha yakulumbununa kanawa yisoneko ya Ngregu chakuhona kuchiza hanji kuwezaho maliji. Mbimbiliya yino ya [Chokwe] yinakatuka mu Mbimbiliya ya Inglês ya 2013, yize asele tachi hanga ayilumbunune kanawa chakuhona kuchiza hanji kuwezelaho maliji. Kutwazangile wika kulumbununa Mbimbiliya yize muyilita ni mikanda yize aliangile kulumbununa, alioze yize muyipwa zwalala, yashi kutanga. Apendice jize jili ni mitwe yinambe ngwo: “Shimbi Jinatale ha Kulumbununa Mbimbiliya,” “Yize Yili mu Mbimbiliya Yino Yaha,” ni “Chize Mbimbiliya Yahetele kuli Yetu” yinasolola yiyulo yize akwachile ha kulumbununa Mbimbiliya yino.

Jina lia Zambi, Yehova, liakusoloka ha yisuho 237 mu Mbimbiliya ya Yisoneko ya Chifuchi Chaha Mateu-Usolwelo. Mumu lia ulemu wa kuhalisa jina lia Zambi, ni ulemu wa atu kutambika ha jina liacho mba akaalamwine, Mbimbiliya ya Yisoneko ya Chifuchi Chaha yafunyisa jina lia Yehova ha yihela yize te liakusoloka mu yisoneko yikulu. (Mateu 6:9; A-Roma 10:13) Apendice yili ni mutwe unambe ngwo: “Jina lia Zambi mu Yisoneko ya Ngregu ya Akwa-Kristu” yinalumbununa mumu liaka akwa-kulumbununa asele jina Yehova mu yisoneko muze te liakusoloka.

Jina, Yisoneko ya Chifuchi Chaha, linakatuka ha chilakenyo cha Zambi chakuneha chifuchi chaha cha ululi chize muchikayukisa atu eswe. (2 Petulu 3:13) Akwa-kulumbununa Mbimbiliya ya Yisoneko ya Chifuchi Chaha yino waze azanga chinji Mwenyayo, kakwete chiteli chilemu cha kulumbununa manyonga ni maliji ja Mwenya Mbimbiliya ni ushishiko weswe. Tunalembe hanga Mbimbiliya yino yikwate ku mbunge ya atu waze masa tachi hanga ayitange ni kupwa ni “chinyingi cha umwenemwene.”​—1 Timoteu 2:4.