Mukanda Utangu wa A-Korindu 10:1-33
10 Mandumbu, ngunazange hanga nunyingike ngwenu tulamba twetu eswe kapwile mushi lia lelwa, eswe kapalikile mu kalunga-lwiji,
2 eswe kaapapachishile muli Mose kupalikila mu lelwa ni mu kalunga-lwiji.
3 Eswe alile kulia chimuwika cha ku spiritu,
4 eswe anwine kunwa chimuwika cha ku spiritu. Mumu anwine ku liwe lia ku spiritu lize te liakwakaula. Liwe liacho liapwile ni kumanyinako* Kristu.
5 Alioze, Zambi kakawahililile ni anji a kuli ayo, kashika afwile mu puya.*
6 Yuma yino yapwile ngwe yilweza kuli yetu ha kututoweza, hanga tuchine kuzanga yuma yipi ngwe chize ayo ayizangile.
7 Kanda nupwa akwa-kukombelela mahamba, ngwe chize amwe a kuli ayo apwile; ngwe chize chinasonewa ngwo: “Atu atwamine ni kulia ni kunwa. Mba akatukile hanga ahehe.”
8 Chikwo nawa, kanda tulinga utanji* ngwe chize amwe a kuli ayo alingile utanji, mba afwile ha tangwa limuwika atu 23,000.
9 Kanda tweseka Yehova,* ngwe chize amwe a kuli ayo amwesekele, mba aashihile kuli tupela.
10 Kanda nulinyenyeta, ngwe chize amwe a kuli ayo alinyenyetene, mba aashihile kuli mukwa-kwenyeka.
11 Yuma yino yalingiwile kuli ayo ngwe yilweza, mba ayisonekene ngwe utowezo kuli yetu. Kuli waze songo lia yuma ya mwakono hiliaheta.
12 Kashika, yoze unanyongo ngwenyi kanamana nguu, chamutamba kukanyama, kuchina malimbuka.
13 Nichimwe cheseko kuchanuwanyine, shina wika chize chakulingiwa kuli atu eswe. Zambi kashishika, kashika kechi katayiza anweseke kuhiana chize munuhasa. Alioze, muze cheseko muchiza, iye makanulweza jila ya kutuhukamo hanga nukahase kunyongonona.
14 Kashika, akwetu a zango, chinenu yuma ya mahamba.
15 Ngunahanjika ni yenu ngwe atu akanyama; nyongenu yenwene yuma yize ngunambe.
16 Shina musenge wakuwahisa uze twakunwa muze hitwasakwila Zambi, kuushi kutununga ni manyinga a Kristu nyi? Shina mbolo yize twakupalula, muze twakuyilia kuyishi kutununga ni mujimba wa Kristu nyi?
17 Mbolo yimuwika wika yiliko, kashika yetu eswe chipwe tuli anji, nihindu tuli mujimba umuwika, mumu yetu eswe twakupalula mbolo yimuwika.
18 Talenu A-Izalele: Ha kulia yitapo yize akulambula ha chilumbilo, shina chino kuchishi ngwe o kanali hamwe ni Zambi nyi?
19 Mba yika ngunambe kwamba? Shina yize akulambula kuli hamba yili chuma chimwe, nyi hanji hamba kali chuma chimwe?
20 Ka; alioze ngunambe ngwami yuma yize mavungu akulambula, kakuyilambula kuli andemoniu, hi kuli Zambi ko. Chikwo nawa, chazangile hanga nulinge chuma nichimwe chize chinatale hali andemoniu.
21 Yenu kunuchi kuhasa kunwa ku musenge wa Yehova* ni ku musenge wa andemoniu; chipwe kulia ku “mesa ya Yehova”* ni ku mesa ya andemoniu.
22 Nyi ‘shina tunavwisa Yehova * ukwa’? Kutala, tuli akolo chinji kuhiana iye nyi?
23 Yuma yeswe yinalite, alioze hi yeswe ko yakuyukisa. Yuma yeswe yinalite, alioze hi yeswe ko yakukolesa.
24 Mutu ni mutu kanda anunga ni kufupa kufumbuka chenyi mwene, alioze cha mutu mukwo.
25 Lienu yifwo yeswe yize akulanjisa ha yitanda, kanda nuyambashana mumu lia shimbi yenu ya mbunge,
26 mumu “hashi ni yeswe yize yiliho yambala ya Yehova.”*
27 Nyi umwe yoze keshi kufuliela manusanyika hanga nulie, mba munuzanga kuyako, lienu yeswe yize manwaha, kanda nuyambashana mumu lia shimbi yenu ya mbunge.
28 Mba nyi umwe manulweza ngwenyi: “Chino hanachilambula ngwe chitapo,” kanda nuchilia mumu lia yoze wanulwezacho ni mumu lia shimbi ya mbunge.
29 Nyi ngwe shimbi ya mbunge ya mutu mukwo muyimupinjisa mumu lia yuma yize nguli ni utuswilo wa kulinga, chichi kuyilinga nawa.
30 Nyi mungulia mba mungusakwilila, alioze akwetu mangupatwila mumu lia yize ngunali, shina yitanga yami yinalite?
31 Kashika, chipwe munulia, chipwe mununwa, hanji munulinga chuma cheswacho, lingenu yuma yeswe hanga nuhalise Zambi.
32 Kanda nupwa chitalingiso kuli A-Yunda, kuli A-Ngresia, chipwe ku chikungulwila cha Zambi.
33 Ngwe chize nakulikolweza hanga nguvwise kuwaha atu eswe mu yuma yeswe, ha kuhona kufupa kufumbuka cha yami mwene, alioze kufumbuka cha atu anji hanga akaalamwine.
Footnotes
^ Hanji “liapwile.”
^ Tala Glossario.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
^ Tala Apendice A5.
