Mukanda Utangu wa A-Korindu 11:1-34
11 Pwenu akwa-kungwimbulula chizechene ngwe yami nawa nguli mukwa-kwimbulula Kristu.
2 Ngunanuchichimieka mumu nwakungwiwuluka mu yuma yeswe ni kulikwachilila ha yuma yeswe kulita ni chize nanulongeseleyo.
3 Alioze, ngunazange nunyingike ngwenu, Kristu iye mutwe wa lunga mweswe; lunga iye mutwe wa pwo; mba Zambi iye mutwe wa Kristu.
4 Lunga mweswe yoze wakulemba hanji kuprofeteza ni mutwe wa kufuka, kakulelesa yoze uli ni chiyulo* hali iye.
5 Alioze, pwo mweswe yoze wakulemba hanji kuprofeteza, nyi kafukile ku mutwe wenyi, kakulelesa yoze uli ni chiyulo* hali iye mumu kanapu ngwe pwo yoze wateula kawewe.
6 Nyi pwo keshi kufuka mutwe wenyi, katamba kukamba kambu jenyi; alioze nyi chili sonyi pwo kukamba hanji kuteula kambu jenyi jeswe, chamutamba kufuka mutwe wenyi.
7 Lunga katambile kufuka ku mutwe, se iye kali chizulie ni uhenya wa Zambi, alioze pwo kanapu uhenya wa lunga.
8 Mumu hi lunga ko wakatukile kuli pwo, alioze pwo mwe wakatukile kuli lunga.
9 Chikwo nawa, Zambi kakatangile lunga mumu hali pwo, alioze yatanga pwo mumu hali lunga.
10 Kashika pwo atamba kufuka ku mutwe ngwe chilayi chize muchisolola ngwo, kali mushi lia chiyulo cha lunga ni mumu lia angelo.
11 Nihindu mu chikungulwila cha Mwene, pwo keshi kulimanyina ukawenyi chakuhona lunga, ni lunga neye keshi kulimanyina ukawenyi chakuhona pwo.
12 Mumu, ngwe chize pwo akukatuka kuli lunga, chizechene nawa ni lunga neye kakukatuka kuli pwo; alioze yuma yeswe yakukatuka kuli Zambi.
13 Patulenu yenwene: Shina chinalite pwo kulemba kuli Zambi chakuhona kufuka ku mutwe nyi?
14 Shina chisemewa kuchanulongesele ngwo nyi lunga mapwa ni kambu jisuku, chili kaleleso kuli iye,
15 alioze kuli pwo kambu jisuku japwa uhenya kuli iye nyi? Mumu kamuhele kambu hanga afuke mutwe wenyi.
16 Alioze nyi umwe mamba ngwenyi, ndako yino kuyalitele, yetu kutushi ni ndako yikwo, chipwe mu yikungulwila ya Zambi kuyishimo.
17 Kashika, ha kunwaha shimbi jino, chanuchichimiekene, mumu ha kukunguluka chenu nwakulinga yuma yipi, hi yipema ko.
18 Chikuma chitangu hingunevu ngwami, muze nwakulikungulula ngwe chikungulwila, hakupwa kulihandununa hakachi kenu. Chipwe yami hinaputuka kutayiza ndambu yuma yacho.
19 Kwamba pundu, kumukukapwa kulihandununa hakachi kenu, hanga chikasolole zwalala waze hanaatayiza.
20 Muze nwakulikungulula hamuwika, kunushi kuchilinga hanga nulie Chiwanyino cha Mwene cha Ufuku.
21 Mumu muze mashimbu a kulia chiwanyino akuheta, yenu nwakulianga kulia, kulia chenu cha chingoloshi, kashika umwe kali ni zala, alioze mukwo kanazengewa.
22 Shina yenu kunushi ni mazuwo kuze munuhasa kulila ni kunwina nyi? Nyi hanji nwakulelesa chikungulwila cha Zambi ni kukolesa sonyi waze anahono? Yika natamba kunulweza? Shina natamba kunuchichimieka? Ka, ha chikuma chino chichi kunuchichimieka.
23 Mumu yize nanwambulwilile nayitambwile kuli Mwene ngwo: Mwene Yesu ha ufuku uze te mamukunjika, wanjile mbolo,
24 muze te hasakwila, yayipalula, mba yamba ngwenyi: “Yino yinalumbunuka mujimba wami, uze ngunahana hali yenu. Nungenu ni kulinga chino nukangwiwuluke.”
25 Muze te halia kulu, yalinga chizechene nawa ni musenge, mba yamba ngwenyi: “Musenge uno unalumbunuka usendo waha kupalikila mu manyinga jami. Nungenu ni kulinga chino mashimbu eswe munuunwa, hanga nukangwiwuluke.”
26 Mumu mashimbu eswe munulia mbolo yino ni kunwa ku musenge uno, munwambujola kufwa cha Mwene ndo ha kwiza chenyi.
27 Kashika, mweswawo malia mbolo hanji kunwa ku musenge wa Mwene mu jila yize kuyalitele, kumakamuhisa hakutwala ku mujimba ni manyinga a Mwene.
28 Mutu chitangu katamba kulihengwola ni kulitayiza iye mwene, mba alie mbolo ni kunwa ku musenge.
29 Mumu nyi mutu kanyingikine ulumbunwiso wa mujimba muze akulia mbolo ni muze akunwa ku musenge, kakulia ni kunwa uhiso hali iye mwene.
30 Kashika anji a kuli yenu analele ni kuyiza, chikwo nawa, anji kanapombo mu ufwe.*
31 Alioze, nyi twalihengwola yetu ene chize twapwa, kechi katupatwila.
32 Muze Yehova* akutupatwila, iye kakutufumba hanga kanda akatuhisa hamwe ni akwa-hashi.
33 Kashika mandumbu jami, muze munulikungulula hanga nulie kulia chino, lishimbwilenu umwe ni mukwo.
34 Yoze mevwa zala, chamutamba kulila ku zuwo lienyi, hanga mashimbu a kulikungulula kanda akapwa a upatwilo. Mba hakutwala ku yikuma yikwo, mungukayilulieka muze mungwiza.
Footnotes
^ Chize Alisonekene, “mutwe.”
^ Chize Alisonekene, “mutwe.”
^ Kota chinatale ha kufwa cha ku ufulielo.
^ Tala Apendice A5.
