Mukanda Utangu wa A-Korindu 12:1-31
12 Haliapwila mandumbu, hakutwala ku yawana ya ku spiritu, chazangile hanga nwalajale.
2 Nunanyingika ngwenu, muze nwapwile akwa-mavungu,* mahamba waze keshi kuhanjika te kakunuyula ni kunupiangula, nwapwile ni kwakaula kweswako kuze manutwala.
3 Kashika nyingikenu ngwenu, niumwe kechi kwamba ngwenyi: “Yesu kashingiwa!” muze anahanjika kupalikila mu spiritu ya Zambi. Hanji niumwe mamba ngwenyi: “Yesu kali Mwene!” shina wika kupalikila mu spiritu yisandu.
4 Kuli yawana yinji, alioze spiritu yimuwika;
5 kuli yuma yinji yakulinga mu mulimo wa Zambi, alioze yeswe twakuyilingila Mwene umuwika.
6 Chikwo nawa, kuli milimo yinji yalisa, alioze Zambi umuwika mwe wakulinga yuma yeswe muli eswe.
7 Alioze ukwaso wa spiritu yisandu wakusoloka zwalala kuli mutu ni mutu, mumu Zambi kakuhana ukwaso wacho hanga ayukise eswe.
8 Kuli umwe, spiritu yisandu yakumukwasa kuhanjika ni mana, kuli mukwo, spiritu yiyene yakumukwasa kuhanjika ni chinyingi,
9 kuli umwe, spiritu yiyene yakumukwasa kupwa ni ufulielo, kuli mukwo, spiritu yacho yakumwaha yawana ya kuuka.
10 Alioze kuli mukwo, yakumukwasa kulinga yikomokeso, kuli mukwo, kuprofeteza, kuli mukwo, kunyingika nyi liji limwe linakatuka kuli Zambi, nyi ka, kuli mukwo, kuhanjika mu malimi alisa, kuli mukwo nawa kulumbununa mu malimi alisa.
11 Chipwe chocho, yuma yeswe yakulingiwa kupalikila mu spiritu* yimuwika, yize yakuhana kuli mutu ni mutu kulita ni upale wa Zambi.
12 Mumu chizechene ngwe mujimba wapwa umuwika, alioze ukwete yihanda yinji, ni yihanda yeswe ya ku mujimba chipwe ngwe yili yinji, nihindu uli mujimba umuwika, ni Kristu neye che apwa.
13 Yetu eswe hanatupapachisa mu spiritu yimuwika hanga tukapwe mujimba umuwika, chipwe ngwe tuli A-Yunda hanji A-Ngresia, tuli ndungo hanji akwa-kutusuka, yetu eswe hanatunwisa spiritu yimuwika.
14 Mumu kwamba pundu, mujimba kuwatwamine ni chihanda chimuwika, alioze ni yihanda yinji.
15 Nyi kulu muliamba ngwenyi: “Hi nguli kwoko ko, kashika hi nguli chihanda cha mujimba ko,” chino kuchalumbunukine ngwo kulishi chihanda cha mujimba.
16 Nyi twitwi muliamba ngwenyi: “Ami hi nguli liso ko, kashika hi nguli chihanda cha mujimba ko,” chino kuchalumbunukine ngwo kulishi chihanda cha mujimba.
17 Nyi ngwe mujimba weswe wapwile liso, kachi kuchi twakupanjika? Nyi ngwe mujimba weswe wapwile twitwi, kachi kuchi twakwiva vumba?
18 Alioze Zambi kasele chihanda ni chihanda cha mujimba kulita ni chize mwene azangile.
19 Nyi ngwe yihanda yeswe yapwile chihanda chimuwika, kachi mujimba halihi muupwa?
20 Umwenemwene uli ngwo kuli yihanda yinji, alioze mujimba umuwika.
21 Liso kuliatambile kwambila kwoko ngwenyi: “Chakufupile,” chipwe mutwe kuwatambile kwambila molu ngwenyi: “Chanufupile.”
22 Alioze yihanda ya mujimba yize yakusoloka ngwe yilelu, neyo yapwa yilemu.
23 Chikwo nawa, chihanda cha mujimba chize twakulelesa, twakuchifuka kanawa, mba yihanda ya mujimba yize twakuvwila sonyi ye twakufunga kanawa.
24 Alioze yihanda yetu yipema, kuyishi kufupiwa ufunge wacho. Mumu Zambi hanatange mujimba wetu, ni kulemesa yihanda yize yahonene ulemu,
25 hanga kukuchi kapwa kulihandununa mu mujimba, alioze hanga yihanda yeswe yikalihulumbe hali yikwo.
26 Nyi chihanda chimuwika cha mujimba chinamono lamba, yihanda yeswe neyo muyimona lamba. Nyi chihanda chimwe machichichimieka, yihanda yikwo yeswe neyo muyiwahilila.
27 Yenu eswe nuli mujimba wa Kristu, mutu mweswe kali chihanda chimuwika cha mujimba wacho.
28 Zambi hanatongola mu chikungulwila yihanda yalisa: Chitangu, apostolo; chamuchiali, aprofeta; chamuchitatu, alongeshi; mba yikwiza waze akulinga yikomokeso, waze akwete utotombo* wa kuuka, waze akukwasa akwo, waze akwete utotombo wa kusongwela ni waze akuhanjika malimi alisa.
29 Shina eswe kali apostolo nyi? Shina eswe kali aprofeta nyi? Shina eswe kali alongeshi nyi? Shina eswe kakulinga yikomokeso nyi?
30 Shina eswe kali ni utotombo* wa kuuka nyi? Shina eswe kakuhanjika mu malimi alisa nyi? Shina eswe kali akwa-kulumbununa nyi?
31 Alioze nungenu ni kufupa yawana yinene yahiana. Nihindu mungukanusolwela jila yahiana chikolo.
Footnotes
^ Hanji ngwetu, te kunushi kufuliela.
^ Hanji “tachi ja Zambi.”
^ Hanji “yawana ya.”
^ Hanji “yawana ya.”
