Mukanda Utangu wa A-Korindu 13:1-13
-
Zango—jila yilemu (1-13)
13 Chipwe munguhanjika mu malimi ja atu ni ja angelo, alioze nyi chishi zango, mungupwa ngwe ngunga yakuhanjika ngwe-ngwe-ngwe hanji ngwe mikosa yize yakulinga zungo linji.
2 Chipwe mungupwa ni yawana ya kuprofeteza, chipwe mungunyingika yijimbikilo yeswe yisandu, ni yinyingi yeswe, chipwe mungupwa ni ufulielo weswe wa kuhasa kututulula milundu, alioze nyi chishi zango nguli wamokomoko.*
3 Chipwe munguhana yikumba yami yeswe hanga ngulise akwetu, chipwe mungukunjika mujimba wami hanga ngulinangamise, alioze nyi chishi zango nguli wamokomoko.
4 Zango likwete uhomboloji* ni utu. Zango kulishi ukwa. Zango kulishi kulisamba chipwe kulifuza,
5 kulishi kulinga chize kuchalitele, kulishi kufupa yuma yalio liene, kulishi kutenuka ni kawashi. Kulishi kushinginyeka yipi.*
6 Kulishi kuwahilila ni uhenge, alioze liakuwahilila ni umwenemwene.
7 Liakulikolweza mu yuma yeswe, liakufuliela mu yuma yeswe, liakushimbwila yuma yeswe, liakunyongonona mu yuma yeswe.
8 Zango kulishi kuhwa. Alioze utotombo uze Zambi akuhana kuli atu wa kuprofeteza, wa kuhanjika mu malimi, ni kupwa ni yinyingi, muukahwa.
9 Mumu tunanyingika wika chihanda cha chinyingi ni chihanda cha uprofeto,
10 alioze muze chamuwundu muchiza, chize cha chihanda muchikahwa.
11 Muze napwile kanuke te nakuhanjika ngwe kanuke, te nakunyonga ngwe kanuke, te nakumona yuma ngwe kanuke, alioze haliapwila muze hinapwa mukulwana hinambila yuma yeswe ya wanuke.
12 Haliapwila yize tunamono, tunayimwena ha katalilo yoze keshi kusolola kanawa yuma, alioze kulutwe mutukamona yuma yeswe zwalala. Haliapwila ngunanyingika chihanda, alioze kulutwe mungukanyingika yeswe kanawa, ngwe chize ni yami anangunyingika kanawa.
13 Mumu haliapwila kunasala yuma yino yitatu: Ufulielo, kutalatala ni zango; alioze zango linahiana yino yeswe.
Footnotes
^ Hanji “chishi ni ulemu niumwe.”
^ Hanji “uhumikizo.”
^ Hanji “kulishi kwalula yuma yipi.”
