Mukanda Utangu wa A-Korindu 15:1-58
15 Haliapwila mandumbu, ngunazange kunwiwulula sango jipema jize nanwambulwilile, jize nwatayijile, jize nawa nunanungu ni kukaula.
2 Nyi nwalikwachilila ku sango jipema jize nanwambulwilile, kumakanulamwina kupalikila mu sango jacho, nyi ka, ufulielo wenu muupwa wamokomoko.
3 Mumu sango jize yami natambwile, jenajo nawa nanwambulwilile. Sango jino ngwami, Kristu wafwilile shili yetu kulita ni Yisoneko.
4 Amufunjile mba amuhindwishile ha tangwa liamuchitatu kulita ni Yisoneko.
5 Wasolokele kuli Sefwa,* mba kulutwe kuli e Kumi ni Aali.
6 Kulutwe wasolokele kuli mandumbu kuhiana 500 ha chisuho chimuwika, anji a kuli ayo achili ni mwono ndo haliapwila, alioze amwe hanapombo mu ufwe.
7 Kulutwe wasolokele kuli Tiangu, mba yasoloka kuli apostolo eswe.
8 Kusulaho wasolokele kuli yami, ngwe mwana yoze wasemukine muze shimbu lienyi te kanda liheta.
9 Mumu yami nguli mukehe wahiana hakachi ka apostolo, chatelele kunguvuluka ngwo postolo, mumu nahungumionene chikungulwila cha Zambi.
10 Alioze mumu lia chawana cha keke ya Zambi, nguli chize nguli. Chawana cha keke chize angusolwelele kuchapwile chamokomoko, mumu nahondanganyine chinji kuhiana ayo eswe. Chipwe chocho, hi yami ko nahondanganyine, alioze chawana cha Zambi chize chili muli yami.
11 Chenacho twakwambujola, chipwe yami chipwe ayo, chenacho nawa ni yenu nwafulielele.
12 Nyi twakwambujola ngwetu Kristu kamuhindwishile hakachi ka afu, mba kuchi amwe hakachi kenu akwamba ngwo, kukuchi kapwa uhindukilo wa afu?
13 Nyi chamwenemwene uhindukilo wa afu ushiko, chekwamba ngwo, Kristu kamuhindwishile.
14 Mumu nyi Kristu kamuhindwishile, mulimo wetu wa kwambujola uli wamokomoko, ni ufulielo wenu nawa uli wamokomoko.
15 Nyi chize akwamba ngwo uhindukilo wa afu kuushiko chili chamwenemwene, kuma twapwa yela a mahuza a Zambi, mumu hitunambujola ngwetu Zambi hanahindwisa Kristu ku kufwa, chuma chize chakalingiwile.
16 Mumu nyi afu kechi kaahindwisa, chekwamba ngwo, Kristu neye kamuhindwishile.
17 Nyi Kristu kamuhindwishile, ufulielo wenu uli wamokomoko, nunanungu mu shili yenu.
18 Nyi chenacho, waze hanapombo mu ufwe ha kulinunga ni Kristu, hanatoko.
19 Nyi kachi kutalatala chetu muli Kristu muchipwa wika mu mwono uno, nyi chocho atu katamba kutuvwila chinyengo chinji kuhiana atu akwo.
20 Alioze umwenemwene uli ngwo, Kristu kamuhindwishile hakachi ka afu, iye wapwile muhuko utangu wa waze hanapombo mu ufwe.
21 Mumu ngwe chize kufwa chejile kupalikila muli mutu umuwika, chizechene nawa, ni uhindukilo wa afu wejile kupalikila muli mutu umuwika.
22 Mumu chizechene ngwe eswe akufwa muli Alama, chizechene nawa eswe makatambula mwono muli Kristu.
23 Mutu ni mutu ha shimbu lienyi: Mutangu Kristu, mba kulutwe waze apwa ambala a Kristu, wano kumakaahindwisa ha kwiza cha Kristu.
24 Kusulaho songo mulikeza, mba muze iye makanongesa manguvulu eswe, yiyulo yeswe ni ndundo, makahana Wanangana kuli Zambi yenyi, kanda Tato.
25 Mumu iye chamutamba kuyula ndo muze Zambi makasa akwa-kole jenyi eswe kushi lia yiliato yenyi.
26 Iye makanongesa mukwa-kole wa kasula, kufwa.
27 Mumu Zambi “wazeyesele yuma yeswe kushi lia yiliato ya Kristu.” Alioze muze anambe ngwenyi: ‘Zambi wazeyesele yuma yeswe kushi lia yiliato ya Kristu,’ chino kuchalumbunukine ngwo Zambi neye kakuzeyela Kristu, ka, alioze ngwo Zambi wazeyesele yuma yeswe mushi lia Kristu.
28 Mba muze yuma yeswe makayizeyesa kuli iye, chocho mwe Mwana neye makazeyela Yoze wazeyesele yuma yeswe kuli iye, hanga Zambi akapwe yuma yeswe muli eswe.
29 Nyi afu kechi kaahindwisa, mba yika muyikalingiwa ni waze anapapachisa ni nyonga lia kufwa? Mumu liaka akwapapachisa ni nyonga liacho?
30 Mumu liaka ni yetu nawa twakupwa mu ponde mashimbu* eswe?
31 Mandumbu, ngunawahilila chinji hali yenu muli Yesu Kristu Mwene wetu, kashika ngunanwambulwila ngwami, tangwa ha tangwa nakupwa mu ponde ya kufwa.
32 Yika mungukayuka ha kulitachika chize napwile nacho ni ngongo mu Efwesu ngwe chize akulinga atu* amwe? Nyi afu kechi kaahindwisa, “tulienu, tunwenu, mumu hamene mutukafwa.”
33 Kanda anwonga, masepa api kakupihisa yitanga yipema.
34 Pwenu ni manyonga apema hanga nulinge yuma ya ululi, kanda nulinga-linga shili, mumu amwe kanyingikine Zambi. Ngunahanjika yuma yino hanga ngunukolese sonyi.
35 Alioze umwe mahasa kwamba ngwenyi: “Afu kuchi makaahindwisa? Mujimba uka makapwa nawo?”
36 Chihepuke! Mbuto yize yena mwene wakukuwa kuyishi kupwa ni mwono nyi chitangu kuyafwile.
37 Yena kuchi kutumba chuma chize hichasoka kulu, alioze wakutumba lunona wika, mahasa kupwa wa tiliku hanji wa mbuto yikwo;
38 alioze Zambi kakuhana mujimba ku mbuto kulita ni chize chamupemena, mbuto ni mbuto iye kakuyaha mujimba wayo.
39 Hi musunya weswe ko walifwa, alioze kwatwama musunya wa atu, musunya wa ngombe, musunya wa tujila ni musunya wa yishi.
40 Kuli mijimba ya mwilu ni mijimba ya hashi; alioze uhenya wa mijimba ya mwilu walisa ni uhenya wa mijimba ya hashi.
41 Uhenya wa tangwa uli weka, uhenya wa kakweji uli weka ni uhenya wa tutongonoshi uli weka; kwamba pundu, chipwe uhenya wa tutongonoshi newo walisa.
42 Yino ye muyikalingiwa ha uhindukilo wa afu. Mujimba uze wa kufwa wa kupola; alioze mujimba uze makahindwisa kuushi kupola.
43 Mujimba kakuufunda mu sonyi ni kuuhindwisa mu uhenya. Kakuufunda mu ulelu, ni kuuhindwisa mu tachi.
44 Kakufunda mujimba wa musunya ni kuhindwisa mujimba wa spiritu. Nyi kuli mujimba wa musunya kuli nawa mujimba wa spiritu.
45 Ngwe chize chinasonewa ngwo: “Alama mutangu wapwile mutu* wa mwono.”* Alioze Alama wa kasula wapwile spiritu yize yakuhana mwono.
46 Hi mujimba wa spiritu ko wakwiza chitangu, alioze chitangu kwakwiza mujimba wa musunya, mba kulutwe mukwiza mujimba wa spiritu.
47 Lunga mutangu wakatukile hashi wakuumba ku fufuta ya hashi, alioze lunga wamuchiali wakatukile mu malilu.
48 Atu a hano hashi kapwa ngwe yoze Zambi aumbile ku fufuta ya mavu, alioze a mu malilu kapwa ngwe yoze wakatukile mu malilu.
49 Ngwe chize twalifwa ni yoze aumbile ku fufuta ya mavu, chizechene nawa mutukalifwa ni yoze wakatukile mu malilu.
50 Mandumbu, ngunambe chino kuli yenu ngwami, musunya ni manyinga kuyatambile kuhinga Wanangana wa Zambi, chipwe mujimba uze wakupola kuwatambile kuhinga mwono uze kuushi kuhwa.
51 Talenu! Ngunanwambulwila chijimbikilo chisandu: Yetu eswe kutuchi kaya tulo akufwa, alioze eswe makatwalumuna,
52 susumuku, ha kukamuna cha liso ha kwimba cha chitavwi chakasula. Mumu muze chitavwi muchikemba, e afu makaahindwisa ni kupola chakuhi, ni yetu kumakatwalumuna.
53 Mumu mujimba uze wakupola chatamba kuzala uze kuushi kupola, uze wakufwa chatamba kuzala uze kuushi kufwa.
54 Kashika, muze mujimba uze wakupola muukazala uze kuushi kupola, uze wakufwa muukazala uze kuushi kufwa, hohene maliji anambe ngwo: “Kufwa kachikumba liakulu,” makamanunuka.
55 “Yena kufwa kukumba che chilihi? Yena kufwa lumunyi we ulihi?”
56 Lumunyi yoze wakukoka kufwa, shili, tachi ja shili, Shimbi.*
57 Alioze tusakwilenu kuli Zambi yoze wakutwaha kukumba kupalikila muli Mwene wetu Yesu Kristu!
58 Kashika, mandumbu jami a zango, jikizenu, kanda nukokoloka, lihanenu chinji mu milimo ya Mwene. Mumu nunanyingika ngwenu kukilikita chenu muli Mwene hi chamokomoko ko.
Footnotes
^ Yoze avuluka nawa ngwo Petulu.
^ Hanji “ola yeswe.”
^ Kota nawa, “kulita ni nyonga lia atu.”
^ Hanji “alma.”
^ Chize Alisonekene, “lunga mutangu Alama.”
^ Hanji “Shimbi yakuhana tachi ku shili.”
