Mukanda Utangu wa A-Korindu 16:1-24
16 Haliapwila, hakutwala ku kukunga mbongo ja kuhana kuli asandu, munuhasa kukaula usongwelo uze nahanyine ku yikungulwila ya A-Ngalashia.
2 Ha tangwa litangu lia poso, mweswe wa kuli yenu akase chimwe chuma ku tenga kulita ni uhashi wenyi, hanga kukunga cha mbongo kanda chikalingiwa muze mungukeza.
3 Muze munguheta kuli yenu, mungukatuma amwe ku Yerusaleme hanga akatwale mbongo jize nwakungile ni mbunge yenu yeswe. Mungukatuma waze yenu nwambile ha mikanda yenu ngwenu, nwakwajikijila.
4 Alioze nyi muchilita ni yami kuya, mungukaya hamwe no.
5 Kashika, mungwiza ni kunumeneka muze mungupalikila ku Masendoniya, mumu mungupalikila ku Masendoniya;
6 hanji mungukatwama ni yenu amwe mashimbu, chipwe lume ha mashimbu eswe a chishika, hanga nukahase kungushinjikila yimwe ndambu mu wenyi wami.
7 Mumu chazangile kunumona wika ha kupalika, alioze ngunazange kutwama amwe mashimbu ni yenu nyi Yehova* mapala.
8 Alioze mungutwama mu Efwesu ndo ha Chiwanyino cha Pentekoste,
9 mumu hanangwazulwila pito linene lia mulimo, alioze kuli akwa-kulimika anji.
10 Nyi Timoteu meza koko, mutambulenu kanawa hanga kanda akevwa woma mukachi kenu, mumu iye kakulinga mulimo wa Yehova* chizechene ngwe yami.
11 Kashika niumwe kanda akamulelesa. Alioze nukamushinjikile mu wenyi wenyi ni sambukila hanga akeze kuli yami, mumu ngunamushimbwila hamwe ni mandumbu.
12 Mba hakutwala kuli ndumbwetu Apolu, ngunakamulembejeka chinji hanga aye ni kunumeneka hamwe ni mandumbu. Alioze iye keshi ni nyonga lia kuya haliapwila, makaya muze mapwa ni uhashi.
13 Kanyamenu, manenu nguu mu ufulielo, pwenu akwa-hamu,* pwenu akwa-ndundo.
14 Yuma yeswe yize munulinga yilingenu ni zango.
15 Ngunazange kunutoweza mandumbu: Ngwe chize nunanyingika, akwa-zuwo lia Estefana, kali mihuko yitangu ya Akeya, mba o hanalihana hanga alingile asandu.
16 Ni yenu nawa, nukazeyele kuli atu ngwe wano ni eswe waze akukwasa milimo ni kukilikita chikolo.
17 Ngunakawahilila ha kuheta cha Estefana ni Fortunatu ni Akaiku, mumu o kangukwashile chinji muze yenu te kunushiho.
18 O kangukolwezele ngwe chize alingile ni yenu. Kashika, lemesenu malunga ngwe wano.
19 Yikungulwila ya mu Azia kuyinanumeneka. Akwila ni Prisela kananumeneka chikolo muli Mwene hamwe ni chikungulwila chize chakulikungulwila mu zuwo lio.
20 Mandumbu eswe kananumeneka. Limenekenu umwe ni mukwo ni mbeju yisandu.
21 Yami Paulu ngunasoneka maliji wano ni kwoko liami mwene hanga ngunutumine mwoyo.
22 Nyi mutu umwe keshi kuzanga Mwene, akashingiwe. Mwene wetu eze!
23 Chawana cha keke cha Mwene Yesu chipwe hali yenu.
24 Zango liami likapwe hali yenu eswe muli Kristu Yesu.
